Koutou Fakaʼaogaʼi Lelei Te Tohi-Tapu
1. Koteā ʼaē ʼe feala ke koutou teuteuʼi ki te fai faka mafola?
1 Tatau aipe peʼe koteā te tohi ʼaē neʼe koutou fakatuʼutuʼu ke koutou tufa ʼi te minisitelio, kae ʼe lelei anai mo kapau ʼe koutou filifili he vaega ʼe ina uga anai he tahi ke fakakaukau, pea mo koutou vaevae mo nātou ʼaē ka fia logo anai. (Hep. 4:12) Kapau ʼe koutou filifili he vaega Tohi-Tapu ʼe tuʼu ʼi te tohi ʼaē ʼe koutou tufa, pea ʼe tokoni atu anai ke faigafua hakotou talanoa ki te tohi. ʼI ʼihi koga meʼa, neʼe fakatokagaʼi e te kau fai faka mafola ʼe lelei tanatou toʼo te Tohi-Tapu ʼi tonatou nima mokā nātou fai palalau mo he tahi peʼe mokā nātou fai faka mafola ʼi te ʼu ʼapi.
2. (a) ʼE tou lava kamata feafeaʼi tatatou ʼuluaki palalau ʼaki he vaega? (b) Koteā te ʼu manatu faka Tohi-Tapu ʼe fia logo kiai te hahaʼi ʼo te telituale?
2 Koutou Kamata ʼAki He Vaega Tohi-Tapu: Ko ʼihi kau fai faka mafola, ʼe nātou kamata tanatou fai palalau ʼaki he fehuʼi, ʼo nātou fakalavelave te manatu ʼo te tagata peʼe ko te fafine ʼo ʼuhiga mo te vaega Tohi-Tapu ʼaē ka nātou lau age ki ai. ʼOsi ʼaia, pea tou fakahā age te manatu totonu ʼo te Folafola ʼa te ʼAtua. ʼE feala koa ke fua lelei te ʼu ʼuluaki palalau ʼaenī ʼi tokotou telituale?
◼ “Kanapaula neʼe ke maʼu hou mālohi moʼo fakahoko te ʼu fetogi ʼaenī, ʼe ke fakahoko anai koa?” Lau age ia Apokalipesi 21:4.
◼ “He koʼe ʼe tou maʼuʼuli ʼi he ʼu temi faigataʼa fēnei?” Lau age ia 2 Timoteo 3:1-5.
◼ “ ʼI tau manatu ʼe lelei age anai koa te maʼuli ʼo totatou fenua mo kapau ʼe mulimuli te hahaʼi ki te tokoni ʼaenī ?” Lau age ia Mateo 7:12.
◼ “ ʼI tau manatu ʼe feala anai koa ke maʼuli tau fānau ʼi te ʼu ʼaluʼaga ʼaē ʼe fakamatala ʼi henī ?” Lau age ia Pesalemo 37:10, 11.
◼ “ ʼI tau manatu ʼe hoko anai koa ʼi he temi te ʼu palalau ʼaenī ?” Lau age ia Isaia 33:24.
◼ “Neʼe kua ke logo koa ki te fetogi puleʼaga ʼaē ʼe talanoa kiai ʼi henī ?” Lau age ia Taniela 2:44.
◼ “Neʼe kua ke fia fai age koa ki te ʼAtua ia te fehuʼi ʼaenī ?” Lau age ia Sopo 21:7.
◼ “ ʼE feala koa ke tou toe felāveʼi mo te kau mate ʼaē neʼe tou ʼoʼofa ai?” Lau age ia Soane 5:28, 29.
◼ “ ʼE ʼiloʼi koa e te kau mate te meʼa ʼaē ʼe fai e te hahaʼi maʼuʼuli?” Lau age ia Tagata Tānaki 9:5.
3. ʼE tou lava tokoni feafeaʼi ki te hahaʼi ke nātou mahino ki te ʼu vaega Tohi-Tapu ʼaē ʼe tou lau age kia nātou?
3 Koutou Fakamahino, Mo Fai He Lea Fakatātā Pea Mo Fakahā Peʼe Feafeaʼi Tona Maʼuliʼi: Ka fia palalau he tahi, ʼaua naʼa koutou foimo palalau ki he ʼu tuʼuga meʼa. Koutou fakamahinohino māmālie, mo fai he lea fakatātā, pea mo fakahā peʼe feafeaʼi te maʼuliʼi ʼo te vaega ʼaē neʼe koutou lau, ke feala hana mahino kiai. (Neh. 8:8) Ka mahino te hahaʼi pea mo nātou tali te meʼa ʼaē ʼe akoʼi mai e te Folafola ʼa te ʼAtua, pea ʼe feala ke hoko ai he ʼu toe fetogi fakaofoofo ʼi tonatou maʼuli.—1 Tes. 2:13.
4. ʼE tou lava fakaʼaogaʼi lelei feafeaʼi te Tohi-Tapu mokā tou fai tatatou ʼu ʼaʼahi?
4 Koutou haga fakaʼaogaʼi fakalelei te Tohi-Tapu mokā koutou fai takotou ʼu ʼaʼahi. Koʼeni te ʼu tokoni ʼe feala ke koutou mulimuli kiai mokā koutou fai takotou ʼu ʼaʼahi: (1) Koutou filifili he vaega Tohi-Tapu ʼe ʼalutahi mo te puani ʼaē ʼe koutou fia palalau kiai. (2) Koutou fehuʼi age pe koteā tana manatu ʼo ʼuhiga mo te vaega ʼaia. Pea koutou lau age. (3) Koutou fakamahino, mo fai he lea fakatātā, pea mo fakahā peʼe feafeaʼi tona maʼuliʼi. ʼI takotou ʼu ʼaʼahi fuli, koutou faiga ke mālama ki he ʼu meʼa foʼou ʼo te Folafola ʼa te ʼAtua. Mole tuai anai, pea ʼe koutou kamata anai he ako Tohi-Tapu.