Ke Lahi Age Tatatou Gāue ʼi Tatatou Minisitelio
1 Neʼe fakatotonu e te ʼapositolo ko Paulo ki te kau Kilisitiano ke natou haʼele ʼi te ala ʼo te ʼAtua pea “ke [natou] haga fai te meʼa ʼaia ʼo laka age.” (1 Tes. 4:1) Koteā tona faka ʼuhiga kiā tātou? Ko tona faka ʼuhiga ke tou kumi ni ʼu ʼaluʼaga ke lahi age tatatou ʼu gāue fakalaumālie, ʼo tou faiga tuʼumaʼu ke tou ‘fakahoko kātoa tatatou minisitelio.’—2 Tim. 4:5.
2 Te ʼu Meʼa ʼAē ʼe Ina Uga Tātou: ʼE tou loto ke lahi age tatatou gāue ʼi tatatou minisitelio heʼe tou loto ke lahi age tatatou tauhi ʼaē ki totatou Tupuʼaga. ʼE tou fia tuputupu ʼi te faʼahi fakalaumālie pea mo tou kumi he ʼu ʼaluʼaga moʼo hikihiki tatatou minisitelio. Ko he ʼu agamāhani lelei ʼe tou fai ʼaki he loto ʼe lelei, ʼe tokoni mai anai ke tou fakahoko he ʼu fakatuʼutuʼu faka teokalatike.—Pes. 1:1, 2; Filp. 4:6; Hep. 10:24, 25.
3 Kapau ʼe tou gāue moʼo fakalahi tatatou minisitelio, pea ʼe fakamaʼua ke tou maʼu ia he loto fia foaki pea mo he maʼuli faka sākilifisio. ʼE feala ke tou maʼu te taʼi manatu ʼaia mo kapau ʼe tou metitāsio ʼi te faikole ki te faʼifaʼitaki lelei ʼa Sesu. (Mat. 20:28) Neʼe maʼu e Sesu te toe fiafia lahi ʼi tana tauhi ʼaē ki te hahaʼi ʼi tana minisitelio. (Gāue 20:35) ʼE feala ke tou faʼifaʼitakiʼi ia Sesu, ʼo tou tōkakaga fakalelei ki te hahaʼi pea mo te ʼu faigamālie fuli ke lahi age te ʼu gāue ʼaē ʼe tou fai ʼi tatatou minisitelio.—Isa. 6:8.
4 Te Gāue ʼa Te ʼu Mātuʼa: Ko tatatou fia tauhi ki te hahaʼi pea mo fakalahi tatatou minisitelio, ʼe feala ke fakahū ki te loto ʼo te fānau ʼi tanatou kei liliki. ʼE fakatokagaʼi ai anai e te kau tūpulaga ia te ʼu gāue ʼaē ʼe fai e te fāmili pea mo tanatou lagolago mālohi ki te fakalahi ʼo tanatou minisitelio. Ko te tehina, ʼi tana kei tūpulaga, neʼe ina loto ke lahi age tana ʼu gāue, he neʼe kaugā gāue mo tana kui ʼi te ʼu gāue ʼo te kōkelekāsio. ʼI tana sio ki te faʼa gāue ʼo tana kui pea mo tona fiafia, neʼe uga ai ia ia ke ina kumi he ʼu faigamālie moʼo tauhi ki tona ʼu tehina. ʼI te temi nei, kua liliu ko te tagata faifekau faka minisitelio.
5 ʼE ʼAoga Ni ʼu Tehina: “Kapau ʼe fakaʼamu he tahi ki he gāue . . . ʼe fakaʼamu ia ki he gāue matalelei.” (1 Tim. 3:1) ʼE fakaloto mālohiʼi ʼi te ʼu palalau ʼaia ia te ʼu tehina ke natou faiga ki he ʼu gāue ʼi te kautahi ʼa Sehova. ʼE mole fakamaʼua kiai he faʼahiga poto makehe. Ko he tehina ʼe loto ke lahi age tana gāue, ʼe ina fakamuʼamuʼa anai ia te ʼu gāue ʼo te Puleʼaga pea mo faʼafai ʼi te minisitelio. (Mat. 6:33; 2 Tim. 4:5) ʼE faiga anai ke ina tuku he faʼifaʼitaki lelei.
6 ʼI Te Mālamanei Kātoa: ʼE fakaviliviliʼi e Sehova te tānaki ʼo te hahaʼi. (Isa. 60:22) ʼE maʼuhiga kiā nātou fuli ʼaē ʼe natou mulimuli ki te faʼifaʼitaki ʼa Sesu ke lahi age tanatou gāue ʼi tanatou minisitelio. Ko te tānaki gāue faka mālamanei ʼo te taʼu gāue 2006, ʼe fakahā ai ko te toko 248 327 hahaʼi neʼe papitema. ʼE fakafuafua ko te toko 680 tupu hahaʼi foʼou ʼi te ʼaho fuli! ʼOfa pē ke tou haga kumi he ʼu ʼaluʼaga ke lahi age tatatou gāue ʼi tatatou minisitelio.