Ko Te Réveillez-vous ! Makehe ʼAē Kā Tufa ʼi Novepeli!
1 ʼE tokolahi te ʼu hahaʼi fakamālotoloto ʼe ʼi ai tanatou ʼu fehuʼi ʼo ʼuhiga mo te ʼaoga ʼo te Tohi-Tapu. Kapau neʼe tohi e te ʼu tagata, he koʼē ʼe ʼui e ko te Folafola ʼa te ʼAtua? He koʼē ʼe feala ke au falala kiai moʼo takitaki ʼo toku ala? Kapau ʼe au lau pea mo ako te Tohi-Tapu, koteā anai tona ʼu lelei kiā au mokā ʼe au fakaʼaogaʼi kiai toku temi pea mo taku ʼu faiga? Ko te Tohi-Tapu fea ʼaē ʼe tonu ke au fakaʼaogaʼi? Ko te ʼu fehuʼi ʼaia ʼe kau ki te ʼu fehuʼi ʼaē kā tali anai kiai ʼi te Réveillez-vous ! makehe ʼo Novepeli, ʼaē ko tona kupu tāfito “ ʼE Feala Koa Hakotou Falala Ki Te Tohi-Tapu?”
2 ʼE tou loto anai ke tou tufa lahi ia te Réveillez-vous ! makehe ʼaia ʼi totatou telituale. Kapau ʼe feala, lolotoga te māhina ʼo Novepeli, tou lagolago ʼi te ʼu Moeaki fuli ki te minisitelio ʼi te ʼu ʼapi mo tatatou kōkelekāsio. Kotou fakahā te Réveillez-vous ! ʼaia ki tokotou ʼu kāiga, tokotou ʼu vāhaʼa fale, tokotou ʼu kaugā gāue, takotou kau faiako, tokotou ʼu kaugā ako, pea mo nātou ʼaē ʼe kotou ʼaʼahi. Kotou ʼave mo koutou he ʼu nusipepa mokā kotou ʼolo ʼo fai fakatau peʼe kotou folau ki he fenua. ʼE fakaʼui anai e te ʼu tagata ʼāfea he tahi ʼu nusipepa ʼe feʼauga maʼa te kōkelekāsio.
3 Kotou Kamata He Ako Tohi-Tapu: Kapau ʼe kotou tuku te nusipepa, pea ʼi muʼa ʼo takotou mavae mai te ʼapi, kotou lagaʼi he manatu ke kotou kamata ai he ako Tohi-Tapu ʼi takotou toe liliu mai. Ohagē lā, ʼe feala ke kotou ʼui fēnei: “Kā au toe liliu mai anai, ʼe au fia fakahā atu anai te tali ʼaē ʼe tou maʼu ʼi te Tohi-Tapu ʼo ʼuhiga mo te fehuʼi ʼaenī: ‘Koteā te fakatuʼutuʼu ʼa te ʼAtua ʼo ʼuhiga mo te kele?’ ” Pea kotou toe liliu leva mo te tohi Te Ako Mai Te Tohi-Tapu pea kotou fakahā age kiā ia te pāsina 4 mo te 5, peʼe kotou vakaʼi te ʼu palakalafe 1 ki te 3 ʼo te kāpite 3. Peʼe feala ke kotou ʼui fēnei: “Kā au toe liliu mai anai, ʼe au fia palalau anai mo koe ki te lea faka polofetā ʼo te Tohi-Tapu ʼe lolotoga hoko nei.” Kā kotou toe liliu ʼo fai te ʼaʼahi, kotou fakahā age te kāpite 9 ʼo te tohi pea kotou vakaʼi mo ia te ʼu palakalafe 1 ki te 3. Peʼe feala ke kotou ʼui fēnei age: “Maʼa te tokolahi, ʼe faigataʼa hanatou mahino mokā natou lau te Tohi-Tapu. Kā au toe liliu mai anai, ʼe au fia fakahā atu anai peʼe feafeaʼi hau mahino lelei age ki tau Tohi-Tapu.” ʼI takotou toe liliu ʼo fai te ʼaʼahi, kotou fakahā age te tohi Te Ako Mai Te Tohi-Tapu, pea mo kotou fakahā age peʼe feafeaʼi te fai ʼo he ako Tohi-Tapu.
4 ʼE gata pē ki te Tohi-Tapu ʼe tou maʼu ai “te ʼu tohi taputapu,” ʼaē ʼe feala ke tou liliu ai ʼo ‘popoto ki te fakamaʼuli.’ (2 Tim. 3:15) Koia, ko tātou fuli ʼe tou fia lagolago mālohi anai ki te tufa ʼo te Réveillez-vous ! makehe ʼaia moʼo tokoni ki te hahaʼi ke natou falala ki te Tohi-Tapu!