ʼE Tou Holoʼi He ʼu Tule
1 Lolotoga he ʼu sēkulō, neʼe fakahalaʼi e Satana ia te loto pea mo te ʼatamai ʼo te hahaʼi tokolahi ʼaki he ʼu akonaki loi pea mo kākā. Neʼe ina fakamafola ia te ʼu faʼahiga akonaki ohagē ko te Tahitolu, te nefesi tuputupua pea mo te ʼifeli. Neʼe ina fakatupu ia te lotolotolua ʼo ʼuhiga mo te maʼuli ʼo he Tupuʼaga pea mo te moʼoni ʼo te Tohi-Tapu. Ko te fakapalatahi pea mo te tauhi ki te puleʼaga ʼe ko he tahi ʼaia ʼu fakahala ke tupu ai he mole tali e te hahaʼi ia te moʼoni. (2 Ko. 4:4) ʼE feafeaʼi hatatou lava holoʼi ia he ʼu akonaki mālohi fēia?—2 Ko. 10:4, 5.
2 Te ʼu Meʼa ʼAē ʼi Te Loto: Ko te ʼu akonaki fakalotu ʼaē kua fualoa te tui kiai ʼa te hahaʼi, ʼi te agamāhani ʼe ko he ʼu meʼa ia kua loloto ʼi te loto ʼo he tahi. Ko ʼihi ʼe natou tui ki te ʼu akonaki hala talu mai tanatou kei liliki. Kapau ʼe tou fia tokoni kiā nātou ʼaia, pea ʼe ʼaoga anai ke hā ʼi tatatou ʼu palalau ʼe tou fakaʼapaʼapa ki tanatou ʼu manatu.—1 Pet. 3:15.
3 ʼE feala ke tou fakaʼapaʼapa kiā nātou ʼaia, ʼo tou tuku ke natou fakamahino mai ia te ʼu akonaki ʼaē ʼe natou tui kiai pea mo te tupuʼaga ʼaē ʼo tanatou tui kiai. (Sake 1:19) ʼE lagi natou tui ko te nefesi ʼe tuputupua koteʼuhi neʼe mate he tahi neʼe natou ʼoʼofa ai pea ʼe natou fakaʼamu ke natou toe sisio ki ai. Peʼe lagi natou fai ia te ʼu ʼaho tupu koteʼuhi ʼe natou leleiʼia ia te ʼu temi ʼaia, ke natou fakatahi ai mo tonatou ʼu fāmili. Kapau ʼe tou fakalogo ki tanatou ʼu palalau, pea ʼe tou mahino ai anai ki tanatou manatu pea ʼe feala ai anai ke tou maʼu ia te tali ʼaē ʼe fakapotopoto ʼo ʼuhiga mo te faʼahi ʼaia.—Taag. 16:23.
4 Tou Faʼifaʼitakiʼi Ia Sesu: Neʼe tuku mai e Sesu ia he faʼifaʼitaki lelei, ʼi te temi ʼaē neʼe tali ai ki te ʼu fehuʼi ʼa te tagata neʼe poto ʼi te Lao. Neʼe mole ʼui fakahagatonu age e Sesu ia te meʼa ʼaē ke ina fai, he neʼe feala pē ke mole tali e te tagata koteʼuhi neʼe tui mālohi ia ki tana lotu. Kae, neʼe fakaʼaogaʼi e Sesu ia te Folafola, ʼo ina fakaafe ia ia ke ina fakahā age ia tana manatu, pea mo tokoni ki ai ʼaki te lea fakatātā ke ina fakakaukauʼi ia te ʼu faʼahi ʼaē neʼe nā palalau kiai.—Luka 10:25-37.
5 Ko te ʼu moʼoni ʼaē ʼi te Folafola ʼa te ʼAtua, ʼe māʼoluga age ia ʼi te ʼu akonaki fakalotu hala. (Hep. 4:12) ʼAki hatatou fakamahino mo he loto faʼa kātaki, ʼe feala ai anai ke tou tokoni ki te hahaʼi ke natou liʼaki ia te ʼu akonaki hala kae natou tali ia te moʼoni ʼaē kā ina fakaʼāteaina anai nātou.—Soa. 8:32.