La Bible : un récit historique exact, des prophéties dignes de foi
Koteā te fakamoʼoni ʼe fakahā ai te moʼoni ʼaē ʼo te ʼu fakamatala ʼa te Tohi-Tapu? Ko te ʼu lea fakapolofetā fea ʼaē kua hoko pea ʼe feala ai kiā tātou ke tou falala ko te ʼu lea fakapolofetā ʼo te temi kā haʼu ʼe hoko moʼoni anai? Ko te ʼu fehuʼi ʼaia ʼe maʼu tona ʼu tali ʼi te foʼi ʼata La Bible : un récit historique exact, des prophéties dignes de foi (Ko te Tohi-Tapu: ko he fakamatala ʼe totonu, ʼe ko he ʼu lea fakapolofetā ʼe tāu ke tou falala kiai), te tolu koga ʼo te foʼi ʼata DVD La Bible : un livre historique et prophétique. ʼI takotou ʼosi vakaʼi te foʼi ʼata viteo ʼaia, ʼe feala anai koa hakotou tali ki te ʼu fehuʼi ʼaenī?
(1) Ko ai koa te Matapuna ʼo te ʼu logo ʼaē ʼe tuha mo te falala ʼe tou maʼu ʼi te Tohi-Tapu? (Tan. 2:28) (2) Koteā te fakamatala ʼe fai ʼi te Tohi-Tapu pea ʼe totonu ʼo ʼuhiga mo te Esipito ʼāfea, pea neʼe hoko moʼoni feafeaʼi te lea fakapolofetā ʼaē ʼe tuʼu iā Isaia 19:3, 4? (3) ʼE fakamoʼoni feafeaʼi e te ʼalekeolosia te fakamatala ʼo te Tohi-Tapu ʼo ʼuhiga mo te kau Asilia, mo tonatou ʼu hau, pea mo te fakaʼosi ʼo te pule ʼo Asilia? (Nau. 3:1, 7, 13) (4) Koteā te ʼu lea fakapolofetā ʼaē neʼe hoko moʼoni ʼo ʼuhiga mo Papiloni? (Sel. 20:4; 50:38; 51:30) (5) Koteā te lea fakapolofetā ʼo ʼuhiga mo te kau Metia pea mo te kau Pelesia neʼe hoko moʼoni? (Isa. 44:28)? (6) Neʼe hoko feafeaʼi ia Taniela 7:6 pea mo Taniela 8:5, 8 kiā Keleka? (7) Neʼe hoko feafeaʼi te manatu ʼaē iā Taniela 7:7 ʼi te temi ʼaē neʼe liliu ai ia Loma ko he puleʼaga fakamālamanei? (8) Ko ai te ʼu Sesale ʼaē ʼe tohi ʼi te Tohi-Tapu? (9) Koteā ʼaē neʼe hoko ki te kau Kilisitiano ʼi te temi pule ʼo Nelone? (10) Neʼe hoko feafeaʼi te ʼu lea fakapolofetā ʼaē ʼe tou maʼu iā Fakahā 13:11 pea mo te 17:10? (11) Ko ai koa te valu hau? (12) Koteā te ʼu meʼa neʼe hā ʼi te foʼi ʼata ʼe fakamoʼoni ai ki te vaega ʼo Tagata Tānaki 8:9? (13) Ko te ʼu lea fakapolofetā fea ʼo ʼuhiga mo te temi kā haʼu ʼe kotou fakatalitali ke kotou sio ki tona fakahoko? (14) ʼE feafeaʼi hakotou fakaʼaogaʼi te foʼi ʼata viteo ʼaia moʼo tokoni ki niʼihi ke natou tui ko te Tohi-Tapu ʼe haʼu mai te ʼAtua?