Tou Faʼifaʼitakiʼi Te Kau Polofeta—Naume
1. Kotea te ʼu ako ʼe feala ke tou maʼu mai te tohi ʼo Naume?
1 Ohage ko tona fakakikite e te polofeta ko Naume, ko te ʼu maumau ʼae neʼe hoko ʼi Ninive ʼi te temi muʼa, ʼe ko te fakamoʼoni ʼaia ko Sehova ʼae neʼe lagavaka ki ʼOna fili, maʼia mo te fili lahi ʼe mole feala ke malo mai ia te Ia. (Nau. 1:2, 6) Kapau ʼe tou ako ia te lea fakapolofeta ʼa Naume, ʼe feala ke tou maʼu he ʼu ako ʼe ʼaoga ki tatatou minisitelio.
2. ʼE feafeaʼi hatatou taupau ia he manatu lelei ʼo ʼuhiga mo te logo ʼae ʼe tou fakamafola?
2 He Fimalie Mo He ʼAmanaki: Ka tou lau ia te tohi ʼo Naume, ʼe lagi tou manatu neʼe ina fakakikite pe te tautea ʼo Ninive, ia te kolo muʼa ʼo Asilia. (Nau. 1:1; 3:7) Kaʼe ko te fakakikite ʼaia neʼe ko he logo lelei ki te hahaʼi ʼa Sehova. Ko te higoa ko Naume ʼe fakaʼuhiga “Fakafimalie.” Koia ʼae neʼe ina fakalotomalohiʼi ai te kau Sutea kua vave pulihi anai ʼonatou fili. Neʼe toe fakamanatuʼi foki e Naume ko Sehova ʼe “ko he nonoaga ia ia i te aho o te mamahi.” (Nau. 1:7) ʼO toe feia pe mo tatou moka tou faifakamafola ʼe tou fakamafola he ʼu logo lelei pea ʼe tou fakalotomalohiʼi ʼihi ke natou kumi nonoʼaga ia Sehova.—Nau. 2:1.
3. ʼE tou lava faʼifaʼitakiʼi feafeaʼi ia Naume ʼi tatatou fakaʼaogaʼi ʼae ia he ʼu faʼifaʼitaki mo he ʼu lea fakata?
3 He ʼu Faʼifaʼitaki Mo He ʼu Lea Fakata: Neʼe tuku e Sehova kia Naume ke ina fakatatau ia te fakaʼosi ʼo Ninive mo te fakaʼosi ʼo te kolo ko Thèbes (No-Amoni) ʼi Esipito, ʼae neʼe maumauʼi e te kau Asilia. (Nau. 3:8-10) Ohage pe ko tatatou palalau ki te fakaʼosi ʼo te tuʼu ʼaeni, ʼe feala ke tou palalau tafitō ki te ʼu lea fakapolofeta Fakatohi-tapu ʼae ʼe natou fakamoʼoni ai ko Sehova ʼe ina fakahoko tuʼumaʼu ia tana folafola. Ohage la ʼi te temi ʼae neʼe tauʼi ai e te kau Papilone mo te kau Meti ia te kolo ko Ninive ʼi te taʼu 632 ʼI Muʼa ʼo te Temi ʼo Sesu. Neʼe hake te Vai Tafe ko Taika ʼuhi ko te ʼu foʼi ʼua lalahi pea neʼe maumau ai he koga ʼo te kaupa ʼo te kolo malohi ʼaia. Pea neʼe vave ia te ʼohofiʼi ʼo Ninive ohage pe ko tona fakakikite e Sehova.—Nau. 1:8; 2:7.
4. Kotea ʼae ʼe tonu ke tou fai ke mahino lelei tatatou faifakamafola?
4 Tou Fakamahino Lelei: Neʼe fakamatalatala leleiʼi e Naume ia te ʼu aluʼaga ʼae neʼe hoko. Neʼe mahino lelei tana fakamatala. (Nau. 1:14; 3:1) ʼO toe feia pe, ʼe tonu ke tou fakaʼaogaʼi ia he ʼu kupu ʼe mahino gafua. (1 Ko. 14:9) Tou ʼuluaki fakaha fakahagatonu age muʼa ia te tupuʼaga ʼo tatatou ʼomai. Ka kotou ako te Tohi-Tapu mo he tahi, kotou tokoni ki ai ke ina fakatuputupu ia tana tui ʼae kia Sehova mo tana Folafola pea ke sio pe ʼe feafeaʼi tana maʼuliʼi ia te ʼu faʼahi ʼaia.—Loma 10:14.
5. Kotea te fakalotofimalie ʼe tou maʼu ʼi te lea fakapolofeta ʼa Naume?
5 Neʼe falala ia Naume ki te fakahoko katoa e Sehova ʼana lea fakapolofeta. Pea neʼe iloga te faʼahi ʼaia ʼi tana tohi. ʼI te kua fakatau ovi mai ʼo te fakaʼosi ʼo te tuʼu ʼaeni ʼa Satana, ʼe feala ke tou maʼu he fakalotofimalie ʼi te ʼu palalau ʼaeni: “E mole ha tua lua anai te mamahi!”—Nau. 1:9.