Te Tufa Makehe ʼi Sepetepeli ʼo ʼUhiga Mo Te Puleʼaga ʼo Te ʼAtua

ʼI te mahina ʼo Sepetepeli ʼe tou faiga anai ke tou fakaha ki te hahaʼi ko te Puleʼaga ʼo te ʼAtua ʼe ko te puleʼaki pe ʼaia ʼe tahi ki te ʼu fihifihia ʼo te malamanei. (Mat 24:14) ʼO feafeaʼi? ʼE tou faiga anai, ʼi te mahina ʼaia, ke tou vaevae ki te tokolahi ia he vaega Tohi-Tapu ʼo ʼuhiga mo te Puleʼaga ʼo te ʼAtua. Pea kapau ʼe fia mahino he tahi, ʼe feala ke tou fakatoʼo age ki ai ia Te Tule Leʼo N° 2 ʼo te taʼu 2020. Kotou faiga ke kotou toe ʼaʼahi ia ia pea mo kamata hana ako Tohi-Tapu ʼaki te kaupepa Ke Ke Fiafia ʼo Heʼe Gata. Ko natou fuli ʼae ʼe natou toʼo tanatou selevisi pionie ʼi te mahina ʼo Sepetepeli ʼe feala anai ke natou filifili ke natou fai ni hola ʼe 15 peʼe 30.

ʼE maumauʼi anai e te Puleʼaga ʼo te ʼAtua ia te ʼu atu ʼu puleʼaga fuli ʼe fakafeagai ki ai. (Tan 2:44; 1Ko 15:24, 25) ʼI te faigamalie ʼaia kia tatou fuli ke tou fakaha ai ʼe tou lagolago kia Sehova pea mo tona Puleʼaga.