Kotea ʼAe ʼe Tonu Ke Tou Fai Ke Tou Maʼuʼuli ʼi Te Malama Foʼou

Kua tou mahino leva, kua vave fakaʼauha e te ʼAtua ia te hahaʼi agakovi pea mo fakatokatoka ia te ʼu fihifihia ʼae ʼe tau mo te malamanei katoa. ʼE tou tui papau ʼe hoko anai ia te aluʼaga ʼaia. Kotea tona tupuʼaga? He ʼe ui fenei ʼi te Tohi-Tapu:

“ ʼE puli anai te malamanei.”—1 SOANE 2:17.

Kae ʼe ʼi ai pe anai ni hahaʼi ʼe hao ai he ʼe ui fenei ʼi te Tohi-Tapu:

“Ko ia ʼae ʼe ina fai te finegalo ʼo te ʼAtua ʼe nofo anai ia ʼo talu ai.”

Ko ia ʼae ʼe fia maʼuli, ʼe tonu ke ina fai ia te finegalo ʼo te ʼAtua. Kapau ʼe tou fia iloʼi ia te finegalo ʼo te ʼAtua, ʼe tonu muʼa ke tou ako ke tou iloʼi ia ia.

KO IA ʼAE ʼE FIA MAʼULI ʼE TONU KE ʼAKO KE INA ILOʼIʼ TE ʼATUA

Pāki: 1. Ko he fafine afilimie ʼi te lopitali, kua fiu mo gaʼegaʼe ʼi te lahi fau ʼo te gaue. 2. ʼE inu kafe ʼi te temi malolo pea mo tokagaʼi tona kauga gaue ʼe fiafia ʼi tana lau ia he nusipepa. 3. ʼE lau age e tona kauga gaue ia he vaega Tohi-Tapu pea mo ina tuku age ia te kiʼi kate jw.org.

Neʼe ui e Sesu: “Koʼeni ia te fakaʼuhiga ʼo te maʼuli heʼe gata, ke natou ako ke natou iloʼi ia koe, te ʼAtua moʼoni pe ʼe tahi.” (Soane 17:3) Koia kapau ʼe tou fia hao mai te fakaʼosi ʼo te malama ʼaeni pea mo maʼuli ʼo heʼe gata, ʼe tonu ke tou ako ke tou iloʼi ia te ʼAtua. ʼE mole tonu pe ke tou mahino ʼe maʼuli moʼoni pea mo iloʼi ʼihi aluʼaga ʼo ʼuhiga mo ia. ʼE tonu ke tou felogoi lelei mo ia. Koia, ʼe maʼuhiga ke tou fakaʼaogaʼi he temi ke tou felogoi mo ia ʼi te ʼaho fuli. Tou vakaʼi ʼihi vaega Tohi-Tapu ʼe tokoni mai anai ke tou maʼu he ʼu felogoi lelei mo tologa pea mo te ʼAtua.

Te ʼu Moʼoni ʼi Te Tohi-Tapu

Neʼe loto e te ʼAtua ke tou maʼuʼuli ʼi he Palatiso.

Neʼe fakatupu e te ʼAtua ia Atama mo Eva, ke nā maʼuʼuli ʼi he palatiso neʼe higoa ko te oloto ʼo Eteni. Neʼe nā haohaoa pea neʼe foaki age e te ʼAtua ia te ʼu meʼa fuli ʼae neʼe ʼaoga kia naua ke nā maʼuli fiafia. Neʼe feala pe ke nā maʼuʼuli ʼo heʼe gata. Kapau ʼe nā felogoi lelei mo te ʼAtua, ʼe mole feala anai ke nā mamate. Kae neʼe nā talagata ki te ʼAtua.

He koʼe ʼe maʼuli mamahi te tagata?

ʼI te temi ʼae neʼe talagataʼa ai ia Atama ki te ʼAtua, neʼe mole kei ina maʼu ia te fealagia ʼae ke maʼuli ʼo heʼe gata, ʼo feia mo tona hologa katoa. ʼE ui fenei ʼi te Tohi-Tapu: “ ʼAki te tagata pe ʼe tahi neʼe hu ai te agahala ki te malamanei, pea ʼaki te agahala ia te mate, ʼo mafola ai te mate ki te tagata fuli pe.” (Loma 5:12) Koia, neʼe maʼu ai e te ʼu fanau fuli ʼo Atama, ia te agahala mo te maʼuli heʼe haohaoa. Koia, ʼe liliu ai te hahaʼi fuli ʼo matutuʼa pea mo mamate.

Kotea ʼae neʼe fai e te ʼAtua moʼo haofaki ia te tagata fuape?

ʼE ui fenei ʼi te Tohi-Tapu: “Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi, pea ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.” (Soane 3:16) Neʼe fekauʼi e te ʼAtua ia Sesu ki te kele ke haʼu ʼo mate maʼa tatou. Neʼe ui fenei e Prabhakar, ko te tagata Initia kua taʼu 86: “Ka au metitasio ki te meʼa ʼofa neʼe foaki e te ʼAtua, ʼe au mahino ai ki te toe ʼofa ʼa Sehovaa kia au. Koia kua au maʼu ai te ʼamanaki ʼae ke au maʼuli ʼo heʼe gata.”

ʼE feafeaʼi hatatou fakaha totatou lotofakafetaʼi ki te ʼAtua?

ʼE ui ʼi te Tohi-Tapu kapau ʼe tou fia fakaha totatou lotofakafetaʼi ki te ʼAtua ʼe tonu ke tou “fakalogo ki ʼana fakatotonu.” (1 Soane 2:3) Ko Sehova ko he ʼAtua manavaʼofa, koia ʼe ina fakaha mai ai pe kotea ʼae ʼe tonu ke tou fai ke tou maʼuli fiafia ʼi te temi nei. (Esaia 48:17, 18) ʼE mole loto e te ʼAtua ke tou maʼuli mamahi. ʼE ina fakapapau mai, kapau ʼe tou mulimuli ki ʼana tokoni, ʼe tou maʼuli fiafia anai ʼi te temi nei, pea mo maʼu te fealagia ʼae ke tou maʼuʼuli ʼo heʼe gata.

KOTOU LAU IA TE TOHI-TAPU ʼI TE ʼAHO FULI

ʼE lau e te fafine ia te Tohi-Tapu ʼi te temi malolo pea mo hiki ake ʼona mata ki te lagi. — Kapau ʼe kotou fia hao ʼi te fakaʼosi, kotou faikole ki te ʼAtua ke tokoni atu ke kotou maʼuliʼi ʼana lao

Ko he tahi ʼe fia maʼuli ʼe tonu ke kai. Kae neʼe ui e Sesu: “ ʼE mole tonu ke maʼuli pe te tagata ki te pane kaʼe ki te ʼu folafola fuli ʼae ʼe haʼu mai ia Sehova.”—Mateo 4:4.

ʼE tou maʼu te ʼu folafola ʼa Sehova ʼi te Tohi-Tapu. Ka kotou ako ia te Tohi-Tapu, ʼe kotou maʼu ai te ʼu fakamatala ʼo ʼuhiga mo te ʼAtua, te ʼu gaue ʼae neʼe ina fai ʼi te temi muʼa, mo te temi nei, pea mo te temi ka haʼu.

KOLE TOKONI KI TE ʼATUA

ʼI ʼihi temi, ʼe tou fia fakalogo ki te ʼu fakatotonu ʼa te ʼAtua, kae ʼe faigataʼa hatatou tuku ia te ʼu agamahani ʼae ʼe fehiʼa ki ai. Kotea ʼe tonu ke tou fai? ʼE ʼaoga anai ke tou ako ke tou iloʼi lelei ia te ʼAtua.

Ko te aluʼaga ʼaia neʼe hoko ki te fafine ʼe tou fakahigoaʼi ko Sakura. Neʼe faifeʼauʼaki. ʼI tana ako leva ia te Tohi-Tapu, neʼe ina iloʼi leva te fakatotonu ʼaeni ʼa Sehova: “Kotou feholaki mai te ʼu felaveʼi fakasino heʼe ʼaoga!” (1 Kolonito 6:18) Pea neʼe faikole leva ki te ʼAtua ʼo kole age ke ina foaki age ia te malohi ke ina lava tuku te fai ʼo te aga ʼaia. Kae neʼe tonu ke faiga malohi ke ina tauʼi te ʼu holi kovi ʼaia. Neʼe ina ui fenei: “Ka au maʼu he ʼu manatu kovi, ʼe au faikole mo palalau fakahagatonu kia Sehova, he ʼe au iloʼi ʼe mole au lavaʼi anai tokotahi. Neʼe ʼaoga ʼosi te faikole ke au nofo ovi kia Sehova.” Ko te toko lauʼi miliona hahaʼi neʼe natou fai ohage ko Sakura, neʼe natou ako ke natou iloʼi ia te ʼAtua. Pea neʼe foaki age e te ʼAtua ia te malohi ke natou fai ni fetogi pea ke natou lava maʼuliʼi ʼana lao.—Filipe 4:13.

Ka kotou ako ke kotou iloʼi lelei te ʼAtua pea ʼe ina iloʼi mo koutou pea mo felogoi lelei mo koutou. (Kalate 4:9; Pesalemo 25:14) ʼE maʼuhiga ke kotou fai ia te faʼahi ʼaia mo kapau ʼe kotou fia hao ʼi te fakaʼosi ʼo te malama ʼaeni pea mo hu ki te malama foʼou. Kae ʼe feafeaʼi anai ia te malama foʼou ʼaia? Kotou lau ia te alatike ʼae ʼe hoa mai.

a Ko Sehova ʼe ko te huafa ʼaia ʼo te ʼAtua ohage ko tona tuʼu ʼi te Tohi-Tapu.