ʼE Faʼifaʼitakiʼi Feafeaʼi e Te Kokelekasio Te Sio ʼa Sehova Ki Te Kau Agahala?

1. Kotea ʼe loto e Sehova ke fai peʼe ke maʼu e te tagata?

ʼI TE fakatupu e Sehova te tagata, neʼe ina foaki age ia te loto faʼifaʼitaliha. ʼE ke fakaʼaogaʼi tuʼumaʼu anai te meʼa ʼofa ʼaia ʼo te ʼAtua moka ke toʼo he ʼu tonu. Ko te tonu maʼuhiga ʼaupito ʼae ʼe feala ke fai e te tagata, ʼe ko tana foaki tona maʼuli kia Sehova pea mo tana tauhi fakatahi mo ʼana tahi ʼu kaugana kia te ia. ʼE loto e Sehova ke toʼo e te tagata fuli pe te tonu ʼaia. Kotea tona tupuʼaga? He ʼe ʼofa ʼi te tagata pea ʼe ina loto ke natou maʼuli fiafia. ʼE fia kaumeʼa mo natou pea ʼe ina loto ke natou maʼuʼuli ʼo heʼe gata.​—Tet. 30:​19, 20; Kal. 6:​7, 8.

2. Ka fai e he tahi he agahala mamafa pea ʼe mole fakahemala, kotea pe ʼae ʼe fakaʼamu lahi ki ai ia Sehova? (1 Soane 2:1)

² ʼE mole fakamalohiʼi e Sehova he tahi ke tauhi age kia te ia. ʼE ina tuku ki te tagata takitokotahi ke ina filifili te meʼa ka ina fai. Kae ʼe feala ke tou fai te fehuʼi ʼaeni: Kotea ʼe hoko ki he tehina peʼe ko he tuagaʼane kua papitema ʼe mole fakalogo ki he lao ʼa te ʼAtua, ʼo ina fai he agalaha mamafa? Kapau ʼe mole fakahemala, ʼe tonu anai ke ‘toʼo’ ʼi te kokelekasio. (1 Ko. 5:​13) Kae logo la te faʼahi ʼaia, ʼe fakaʼamu lahi ia Sehova ke toe liliu mai kia te ia. Kapau neʼe ina foaki te totogi, ʼuhi tafito ʼae ʼe ina loto ke fakamolemole te ʼu agahala ʼo natou ʼae ʼe fakahemala. (Lau ia 1 Soane 2:1.) ʼE loto e totatou ʼAtua fonu ʼi te ʼofa ke fakahemala te kau agahala. Pea ʼe ina fakalotomalohiʼi natou ke natou fai te faʼahi ʼaia.​—Skl 1:3; Loma 2:4; Sakp. 4:8.

3. Kotea anai ka tou palalau ki ai ʼi te alatike ʼaeni?

³ ʼE loto e Sehova ke tou toe maʼu tana faʼahiga sio ʼo ʼuhiga mo te agahala pea mo te kau agahala. ʼE fakaha mai anai ʼi te alatike ʼaeni pe ʼe feafeaʼi hatatou fakahoko te faʼahi ʼaia. Tou vakaʼi te ʼu aluʼaga ʼaeni ʼe tolu: 1) Kotea ʼae neʼe fai ki he tahi neʼe agahala mamafa ʼi te kokelekasio ʼo Kolonito ʼi te ʼuluaki sekulo? 2) Kotea te ʼu tokoni neʼe foaki e te apositolo ko Paulo ki te kokelekasio ʼaia ʼi te agahala ʼa he tagata kae neʼe fakahemala? Pea 3) kotea ʼe ha ʼi te hisitolia ʼaia ʼo ʼuhiga mo te faʼahiga sio ʼa Sehova ki te kau Kilisitiano ʼae ʼe natou fai he agahala mamafa?

KOTEA NEʼE FAI KI HE TAHI NEʼE AGAHALA MAMAFA ʼI TE ʼULUAKI SEKULO?

4. Kotea te aluʼaga neʼe hoko ʼi te kokelekasio ʼo Kolonito? (1 Kolonito 5:​1, 2)

⁴ Lau ia 1 Kolonito 5:​1, 2. ʼI te tolu folau misionea ʼa Paulo, neʼe maʼu logo ki he ʼu aluʼaga neʼe hoko ʼi te kokelekasio ʼo Kolonito. Ko te kokelekasio ʼaia neʼe heʼeki fualoa tona fakatuʼu. Neʼe fai e he tehina he ʼu felaveʼi fakasino heʼe ʼaoga mo te ʼohoana ʼo tana tamai. Neʼe fakaufiufi ʼosi te aga ʼaia. Pea ‘ ʼe kovi age ia ʼi te ʼu meʼa ʼae ʼe fai e te hahaʼi ʼae ʼe mole tui.’ Neʼe tali e te kokelekasio ia te aga ʼaia pea ʼe hage pe neʼe natou toe fiameʼameʼa ai. ʼE lagi neʼe manatu ʼihi ko te aga ʼa te tagata ʼaia ʼe ha ai ia te manavaʼofa ʼo te ʼAtua pea mo tana lotomahino ki te ʼuhiga agahala ʼo te tagata. Kae ʼe mole leleiʼia e Sehova te agahala ʼae ʼe fai ʼi tana hahaʼi. ʼE mahino ia, neʼe ulihi e te tagata ʼaia te kokelekasio ʼuhi ko tana aga fakalialia ʼaia. Pea neʼe feala pe ke ʼi ʼai ʼona fua kovi ki te ʼu tehina ʼae neʼe fakatahi mo ia. Koia, kotea te ʼu fakatotonu neʼe fai e Paulo ki te ʼu tehina mo tuagaʼane ʼo Kolonito?

5. Kotea ʼae neʼe ui e Paulo ki te kokelekasio ʼo Kolonito ke natou fai ? Pea kotea tona fakaʼuhiga ? (1 Kolonito 5:​13) (Vakaʼi mo te pāki.)

⁵ Lau ia 1 Kolonito 5:​13. Neʼe takitaki e te ʼAtua ia Paulo ʼi tana faitohi ki te kau Kolonito. ʼI tana tohi ʼaia, neʼe ina fakatotonu ai ke ‘toʼo’ ʼi te kokelekasio ia te tagata agahala ʼae ʼe mole fakahemala. Kotea te aga neʼe tonu ke fai e te kau Kolonito ʼo ʼuhiga mo te tagata ʼaia ? Neʼe ui age e Paulo ‘ke tuku tanatou fakatahi mo ia.’ Kotea tona fakaʼuhiga ? Neʼe ina fakamahino age ‘ke ʼaua naʼa natou kakai mo te taʼi tagata ʼaia.’ (1 Ko. 5:​11) Ka tou kakai mo he tahi feia, ʼe feala ke hoko atu pe te fakatahi mo ia. Koia, neʼe fia ui e Paulo neʼe tonu ki te kau Kolonito ke ʼaua tanatou fakatahi fakafiafia mo te tagata ʼaia. ʼE ko honatou faʼahiga puipui ʼaia mai tana aga ʼae ʼe kovi. (1 Ko. 5:​5-7) Pea tahi, kapau neʼe mole natou felogoi tuʼumaʼu mo ia, ʼe tokoni anai ki ai ke mahino neʼe kua fakamamaʼo mai te ʼu lekula ʼa Sehova. Koia, ʼe feala anai ke ufiufi pea mo fakahemala.

6. Neʼe malave feafeaʼi ki te kokelekasio ʼo Kolonito pea mo ia ʼae neʼe agahala ia te tohi ʼa Paulo?

⁶ Neʼe feuiʼaki e Paulo pe kotea anai ka fai e te kau Kolonito ʼi tanatou maʼu te tohi ʼae neʼe ina momoli age. Neʼe fakaha age e Tito he ʼu logo fakafiafia. Neʼe tali lelei e te kokelekasio ia tana tohi. (2 Ko. 7:​6, 7) Koia, neʼe mulimuli te kokelekasio ki ʼana fakatotonu. Pea tahi, ʼi te ʼu mahina ʼae neʼe hoa mai, neʼe fakahemala leva te tagata ʼaia. Neʼe fetogi leva tana aga mo tana faʼahiga manatu. Pea neʼe ina fakaalu tahi tona maʼuli mo te ʼu lekula faitotonu ʼa Sehova. (2 Ko. 7:​8-​11) Kotea leva ka ui e Paulo ki te kokelekasio ke natou fai?

NEʼE FEAFEAʼI TE AGA ʼA TE KOKELEKASIO KIA IA ʼAE NEʼE AGAHALA?

7. Hili tona toʼo ʼi te kokelekasio, neʼe kotea tona fua lelei kia ia ʼae neʼe agahala? (2 Kolonito 2:​5-8)

⁷ Lau ia 2 Kolonito 2:​5-8. ʼI tana lua tohi ki te kau Kolonito, neʼe fakatokagaʼi age e Paulo ko ‘te fakatotonu ʼae neʼe fai e te tokolahi ia natou ki te tagata ʼaia neʼe agahala kua feʼauga.’ Ko tona fakaʼuhiga, neʼe ʼi ai te fua lelei ʼo tona fakatonutonuʼi. Kotea ʼae neʼe hoko? Neʼe fakahemala leva te tagata ʼaia.​—Hep. 12:11.

8. Kotea ʼae neʼe kole leva ki te kokelekasio ʼo Kolonito ke natou fai?

⁸ Hili ia, neʼe kole age e Paulo ki te kokelekasio ke natou ‘fakamolemole’ kia ia ʼae neʼe agahala mo ‘fakafimalieʼi ia ia’ pea ‘ke natou fakamoʼoni tonatou ʼofa kia ia.’ Tou tokagaʼi neʼe mole fia ui e Paulo ke gata pe tanatou tali ia ia ke toe liliu mai ki te kautahi ʼa Sehova. Kae neʼe toe loto e Paulo ke fakaha e te kau Kolonito ʼaki ʼanatou palalau mo tanatou aga kua natou fakamolemole moʼoni pea mo ʼofa kia ia. Koia ʼe ko hanatou faʼahiga fakaha lelei ʼaia ki ai tonatou fiafia ʼaki tanatou fakatalitali ia ia ʼi te kokelekasio.

9. He koʼe neʼe feala ke lotolotolua ʼihi ʼo te kokelekasio ʼo Kolonito ki te fakamolemole ki te tagata agahala ʼae neʼe fakahemala?

⁹ Neʼe lotolotolua koa ʼihi ʼo te kokelekasio ʼo Kolonito ʼi tanatou fakatalitali te toe liliu mai ki te kokelekasio ʼa te tagata ʼaia neʼe fakahemala? ʼE mole fakaha mai ʼi te Tohi-Tapu, kae lagi neʼe feala pe ke hoko. ʼE mahino ia neʼe natou ufiufi ʼosi ʼi te aga ʼae neʼe ina fai. Pea lagi, neʼe mole kei iloʼi e ʼihi he meʼa ke natou fai koteʼuhi neʼe ina fakamamahi ia natou fuli. Koia, neʼe manatu ai ʼihi ʼe mole tonu ke natou fakatalitali lelei te tagata ʼaia ohage ko honatou tehina. Kotea tona tupuʼaga? Koteʼuhi ʼi tanatou manatu, ko natou ia ʼae neʼe natou fai he ʼu faiga malohi ke natou nonofo maʼa ʼi te aga ʼae ʼe tonu ke fai. (Vakaʼi mo Luka 15:​28-​30.) Kae he koʼe neʼe maʼuhiga ke fakaha e te kokelekasio ia te ʼofa moʼoni ki te tehina ʼaia neʼe toe liliu mai kia Sehova?

10-11. Kotea neʼe feala ke hoko mo ka na pau la neʼe mole fakagafua e te kau tagata ʼafeā ke toe liliu mai te tagata ʼae neʼe fakahemala ki te kokelekasio?

¹⁰ Fakakaukauʼi age muʼa pe kotea ʼe logoʼi anai e te tagata ʼaia neʼe fakahemala moʼoni mo ka na pau la, neʼe mole fakagafua e te kau tagata ʼafeā ke toe liliu mai ki te kokelekasio? Pe ʼe kotea anai ʼe ina toe logoʼi mo kapau la ʼi tana toe liliu mai ʼaia kia Sehova, ʼe mole fakaha e te kokelekasio tonatou ʼofa ki ai? Neʼe feala pe ke “taʼomia ʼi te lahi fau ʼo tona lotomamahi,” pea mo manatu mole kei he puleʼaki ki tona aluʼaga. Neʼe toe feala pe ke ina tuku ʼana faiga ʼae ke ina toe maʼu he ʼu felogoi lelei mo Sehova.

¹¹ Kotea neʼe feala ke toe hoko mo kapau neʼe mole fia fakamolemole e te ʼu tehina mo tuagaʼane ki te tagata ʼaia neʼe fakahemala? Neʼe feala pe ke natou maumauʼi ʼanatou felogoi mo Sehova. Kotea tona tupuʼaga? Koteʼuhi ʼe mole natou fia faʼifaʼitakiʼi ia Sehova, ʼae ʼe fakamolemole ki te kau agahala ʼae ʼe fakahemala. Kae ʼe natou faʼifaʼitakiʼi ia Satana ʼae ʼe agakovi pea ʼe mole manavaʼofa. Koia, ʼe natou tuku anai ke fakaʼaogaʼi natou e Satana moʼo fakalotovaivaiʼi te tagata ʼaia ʼi tana tauhi kia Sehova.​—2 Ko. 2:​10, 11; Efe. 4:​27.

12. Neʼe faʼifaʼitakiʼi feafeaʼi e te kokelekasio ʼo Kolonito ia Sehova?

¹² Neʼe faʼifaʼitakiʼi feafeaʼi e te kokelekasio ʼo Kolonito ia Sehova kae mole ko Satana? ʼAki tanatou faʼifaʼitakiʼi te aga ʼa Sehova ki te kau agahala ʼae ʼe fakahemala. Ke ke tokagaʼi te meʼa ʼae neʼe fakaha e ʼihi tagata faitohi ʼo te Tohi-Tapu ʼo ʼuhiga mo Sehova. Neʼe ui e Tavite ʼe “agalelei pea mo lotofakamolemole.” (Pes. 86:5) Neʼe tohi fenei e Mikea: “Ko ai koa te ʼAtua ʼae ʼe hage ko koe? Ko ai koa te ʼAtua ʼae ʼe ina fakamolemole te hala pea mo ina galoʼi te agahala.” (Mik. 7:​18) Pea neʼe ui fenei e Esaia: “Ke liʼaki e te agakovi ʼana aga, pea mo te tagata agakovi ʼana manatu. Ke toe liliu mai kia Sehova pea ʼe ʼofa anai ki ai, ʼei ki totatou ʼAtua, he ʼe fakamolemole lahi anai ki ai.”​—Esa. 55:7.

13. He koʼe neʼe mole ʼaoga ke fakatuatuai te toe fakaulu mai ʼo te tagata agahala ʼae neʼe fakahemala? (Vakaʼi te ʼa takai “Ko Te Temi Fea ʼAe Neʼe Toe Fakaulu Mai Ai Te Tagata Agahala ʼAia?”)

¹³ Kapau neʼe fia faʼifaʼitakiʼi e te kokelekasio ʼo Kolonito ia Sehova, neʼe tonu ke natou fakatalitali lelei te tagata agahala neʼe fakahemala pea mo fakaha tonatou ʼofa ki ai. Pea ko te aluʼaga ʼaia neʼe natou fai. Neʼe natou mulimuli ki te ʼu fakatotonu ʼa Paulo, pea neʼe natou “fakalogo kia meʼa fuli.” (2 Ko. 2:9) ʼE moʼoni, logo la neʼe ko kiʼi mahina pe ʼae neʼe nofo ai ʼi tuʼa ia te tagata agahala, kae neʼe fakahemala. Koia, neʼe mole ʼaoga ke fakatuatuai ia tona toe fakaulu mai.

ʼE FEAFEAʼI HATATOU FAʼIFAʼITAKIʼI TE FAITOTONU MO TE MANAVAʼOFA ʼO SEHOVA?

14-15. Kotea neʼe tou ako mai te aluʼaga ʼae neʼe fai ʼo ʼuhiga mo te agahala mamafa neʼe hoko ʼi Kolonito? (2 Petelo 3:9) (Vakaʼi mo te pāki.)

¹⁴ Neʼe tou talanoa ki te aluʼaga neʼe fai ʼo ʼuhiga mo te agahala mamafa neʼe hoko ʼi te kokelekasio ʼo Kolonito. Koia neʼe tohi ʼi te Tohi-Tapu te faʼahi ʼaia “moʼo akoʼi ʼo tatou.” (Loma 15:4) ʼE tou ako mai te hisitolia ʼaia ʼe mole tali e Sehova te ʼu aga kovi fuli ʼi tana hahaʼi. ʼE feala pe ke manatu ʼihi ʼe manavaʼofa ia Sehova, ʼo ina tuku ai he tahi ʼe mole fakahemala ke haga nofo pe ʼi te kokelekasio. Kae ʼe mole ko he fakaha ʼaia e Sehova tona manavaʼofa. Logo la ʼe manavaʼofa, kae ʼe mole ina tali ia faʼahiga aga fuli pe. ʼE mole fetogi ʼana lekula ʼo ʼuhiga mo te meʼa ʼae ʼe lelei mo ʼae ʼe kovi. (Suta 4) Koia, kapau neʼe tuku e Sehova te kau agahala ʼae ʼe mole fakahemala ke haga nonofo ʼi te kokelekasio, ʼe mole ko hona manavaʼofa ʼaia. Kotea tona tupuʼaga? Koteʼuhi ʼe fakatupu kovi anai ki te kokelekasio katoa.​—Taag. 13:20; 1 Ko. 15:33.

¹⁵ ʼE tou toe ako ai ʼe mole loto e Sehova ke fakaʼauha he tahi. ʼE faiga ke ina haofaki te kau agahala moka ko hina meʼa ʼe feala. Kapau ʼe natou fetogi tanatou aga mo faiga ke natou toe maʼu he ʼu felogoi lelei mo ia, ʼe manavaʼofa anai kia natou. (Esk. 33:11; lau ia 2 Petelo 3:9.) Neʼe fakahemala te tagata agahala ʼo te kokelekasio ʼo Kolonito, pea neʼe ina liʼaki tana aga ʼae ʼe kovi. Koia, neʼe fakaʼaogaʼi ai e Sehova ia Paulo moʼo fakamahino ki te kau Kolonito ʼe tonu ke fakamolemole ki te tagata ʼaia pea mo fakatalitali lelei.

16. Kotea ʼe ke logoʼi ʼo ʼuhiga mo te aluʼaga ʼae neʼe fai e Sehova ki te tagata agahala?

¹⁶ ʼE ha mai ʼi te aluʼaga ʼae neʼe hoko ʼi te kokelekasio ʼo Kolonito, ko Sehova ʼe ʼofa pea mo faitotonu. (Pes. 33:5) ʼI tau iloʼi te ʼu kalitate ʼaia ʼo te ʼAtua, ʼe mole uga ai koa koe ke lahi age tau fakavikiviki kia te ia? ʼE tou iloʼi ʼe tou agahala fuli, koia ʼe ʼaoga kia tatou fuli tana lotofakamolemole. Koia ʼae ʼe tou lotofakafetaʼi lahi ai kia Sehova ki te totogi, ʼae neʼe ina fakafealagia ke tou maʼu tana lotofakamolemole. ʼE ko he meʼa fakalotofimalie tatatou iloʼi ʼae ʼe ʼofa moʼoni ia Sehova ki ʼana kaugana, pea ʼe ina loto ke natou maʼuli fiafia.

17. Kotea te ʼu fehuʼi ka tou tali ki ai ʼi te ʼu alatike ʼae ka hoa mai?

¹⁷ Kae ʼe feafeaʼi moka fai e he tahi hana agahala mamafa ia ʼaho nei? ʼE faʼifaʼitakiʼi feafeaʼi e te kau tagata ʼafeā ia Sehova, ʼae ʼe ina loto ke fakahemala te kau agahala? Pea ka natou fakatuʼutuʼu ke toʼo he tahi ʼi te kokelekasio peʼe ke toe fakaulu mai, kotea anai ʼe tonu ke fai e te kokelekasio? ʼE tou tali anai ki te ʼu fehuʼi ʼaia ʼi te ʼu alatike ʼae ka hoa mai.