ʼE Tokoni Feafeaʼi Te Kau Tagata ʼAfeā Kia Natou Neʼe Toʼo ʼi Te Kokelekasio?

1-2. (1) Kotea te manatu ʼa Sehova ʼo ʼuhiga mo natou neʼe agahala mamafa kae mole fakahemala? (2) Ka fai e he tahi hana agahala mamafa, kotea ʼae ʼe fakaʼamu ki ai ia Sehova?

ʼE MOLE tali e Sehova te ʼu aga fuli pea ʼe fehiʼa ki te agahala. (Pes. 5:​4-6) ʼE ina loto ke tou fakaʼapaʼapa ki ʼana lekula faitotonu, ʼae ʼe ina foaki mai ʼi tana Folafola. ʼE mahino ia, ʼe ina iloʼi ʼe tou agahala pea ʼe mole feala ke tou fakalogo katoa age kia te ia. (Pes. 130:​3, 4) Pea tahi, ʼe mole ina tali ‘he tagata ʼe mole fakaʼapaʼapa kia te ia pea ʼe ina fakaʼaogaʼi tona ʼofa makehe moʼo takuʼaki ʼana aga fakalialia.’ (Suta 4) Koia la ʼae ʼe ui ai ʼi te Tohi-Tapu, ‘ ʼe fakaʼauha anai te hahaʼi ʼae ʼe mole fakaʼapaʼapa ki te ʼAtua’ moka hoko te tau ʼo Alamaketone.​—2 Pet. 3:7; Fkha. 16:16.

² Kae, ʼe mole loto e Sehova ke fakaʼauha he tahi. Ohage pe ko tatatou vakaʼi ʼi te ʼu alatike kua ʼosi, pea mo tona fakaha lelei mai ʼi te Tohi-Tapu, ʼe “loto ia ke kaku te hahaʼi fuli ki te fakahemala.” (2 Pet. 3:9) ʼE faʼifaʼitakiʼi e te kau tagata ʼafeā ia Sehova, ʼo natou faiga ke natou tokoni ki te kau agahala ke natou fetogi tanatou aga pea mo toe maʼu tona ʼofa. Kae ʼe mole fakahemala fuli te kau agahala.(Esa. 6:9) ʼE hoko atu pe ʼe ʼihi tanatou fai te meʼa ʼae ʼe kovi logo pe te ʼu tokoni mo te ʼu faiga ʼe fai tuʼumaʼu e te kau tagata ʼafeā ke natou fakahemala. Koia, kotea ʼae ʼe tonu ke fai?

“KOTOU TOʼO MAI IA KOUTOU IA IA ʼAE ʼE AGAKOVI”

3. (1) Kotea ʼae ʼe ui ʼi te Tohi-Tapu ʼo ʼuhiga mo te meʼa ʼae ʼe tonu ke fai e te kau tagata ʼafeā moka mole fakahemala ia ia ʼae neʼe agahala? (2) He koʼe ʼe feala ke tou ui ka toʼo ia ia ʼae neʼe agahala ʼi te kokelekasio, neʼe ko ia pe ia neʼe ina filifili ke mavae?

³ Ka mole fakahemala ia ia ʼae neʼe agahala, ʼe tonu leva ke fakalogo te kau tagata ʼafeā ki te fakatotonu ʼaeni ia 1 Kolonito 5:​13: “Kotou toʼo mai ia koutou ia ia ʼae ʼe agakovi.” Koia, ʼe hage pe ia neʼe filifili e ia ʼae neʼe agahala ke mavae mai te kokelekasio. ʼE ina ʼutu pe te meʼa ʼae neʼe inaa to. (Kal. 6:7) He koʼe ʼe feala ke tou palalau feia? Koteʼuhi neʼe mole ina fia fai he ʼu fetogi ʼo ʼuhiga mo te ʼu faiga tuʼumaʼu ʼa te kau tagata ʼafeā moʼo tokoni ki ai ke fakahemala. (2 Hau 17:​12-​15) ʼE ha ʼi ʼana gaue ʼe mole fia fakalogo ki te ʼu fakatotonu ʼa Sehova.​—Tet. 30:​19, 20.

4. He koʼe ʼe tala ʼi te kokelekasio neʼe toʼo he tahi neʼe agahala kae neʼe mole fakahemala?

⁴ Ka toʼo he tahi neʼe agahala kae mole fakahemala ʼi te kokelekasio, ʼe tala ifo anai he logo ke iloʼi e te kokelekasio ʼe mole kei Fakamoʼoni kia Sehova.b Ko te fakatuʼutuʼu ʼo te logo ʼaia ʼe mole ko hona fakalainoaʼi. Kae ʼe tokoni ki te kokelekasio ke natou fakaʼapaʼapa ki te fakatotonu Fakatohi-tapu ʼaeni ‘ke tuku tanatou fakatahi’ mo he tahi feia, pea mo ‘kakai’ mo ia. (1 Ko. 5:​9-​11) ʼE ʼi ai te ʼu tupuʼaga lelei ʼo te foaki mai e Sehova te fakatotonu ʼaia. Neʼe tohi fenei e te apositolo ko Paulo: “ ʼE mole kotou iloʼi koa la ʼe fakatupu e he kiʼi meʼa fakatupu ia te falena katoa ʼae neʼe natu ʼaki?” (1 Ko. 5:6) Koia, kapau ʼe mole fakahemala pea mole toʼo, ʼe feala pe ke manatu ia te kokelekasio ʼe mole ʼaoga ia ke natou fakalogo ki te ʼu lekula faitotonu ʼa Sehova.​—Taag. 13:20; 1 Ko. 15:33.

5. Kotea te manatu ʼe tonu ke tou maʼu ʼo ʼuhiga mo he tahi neʼe toʼo ʼi te kokelekasio? Pea kotea tona tupuʼaga?

⁵ Koia, kotea te manatu ʼe tonu ke tou maʼu ʼo ʼuhiga mo he tehina neʼe toʼo ʼi te kokelekasio? Logo la ʼe mole tou fakatahi mo ia, kae ʼe tonu ke tou manatuʼi ʼe ko he ovi kua puli, kae mole ui leva mole kei he ʼamanaki ki ai. Kapau neʼe fakamamaʼo he ovi mai te faga ovi, ʼe lagi toe faiga anai ke toe liliu mai ʼi he ʼaho. Tou manatuʼi, neʼe kua ina foaki tona maʼuli kia Sehova. Kae fakaʼofaʼofa foki he ʼe ʼi te temi nei, ʼe mole ina fakahoko tana fakapapau ʼae ke nofo agatonu kia Sehova, pea ʼe feala ke fakatupu tuʼutamaki ki tona maʼuli fakalaumalie. (Esk. 18:31) Kae ʼe tou fakaʼamu ʼe fetogi anai ia ia ʼaia neʼe agahala he ʼe kei maʼu pe te temi, pea ʼe kei fakaha pe e Sehova tona manavaʼofa. Koia, ʼe fakaha feafeaʼi e te kau tagata ʼafeā te aluʼaga ʼaia kia ia ʼae neʼe agahala pea toʼo ʼi te kokelekasio?

KOTEA ʼE FAI E TE KAU TAGATA ʼAFEĀ ʼO ʼUHIGA MO NATOU ʼAE NEʼE TOʼO?

6. Kotea ʼe fai e te kau tagata ʼafeā moʼo tokoni ki he tahi neʼe toʼo ʼi te kokelekasio?

⁶ Kapau neʼe toʼo he tahi ʼi te kokelekasio, ʼe fakagata anai koa e te kau tagata ʼafeā tanatou faiga ʼae ke toe liliu mai kia Sehova? Kailoa ia. Ka fakaha e te kau tagata ʼafeā ki he tahi ʼe toʼo anai ʼi te kokelekasio, ʼe natou toe fakaha age anai ki ai te meʼa ʼae ʼe tonu ke ina fai ke toe fakahu. Kae mole gata ai. ʼE fakaha anai e te kau tagata ʼafeā kia ia ʼae neʼe agahala, ʼe natou toe fia felogoi mo ia ka ʼosi ki ai he ʼu kiʼi mahina ke natou vakaʼi pe ʼe kua fetogi tana manatu. Kapau ʼi tanatou toe felogoi ʼaia ʼe tali e ia ʼae neʼe agahala, pea ʼe natou fakalotomalohiʼi anai ke fakahemala. Tatau aipe pe ʼe heʼeki ina fetogi tana manatu, kae ʼe hoko atu pe anai e te kau tagata ʼafeā tanatou felogoi mo ia.

7. ʼE faʼifaʼitakiʼi feafeaʼi e te kau tagata ʼafeā ia te ʼofa ʼo Sehova? (Selemia 3:​12)

⁷ ʼE faiga te kau tagata ʼafeā ke natou faʼifaʼitakiʼi ia te ʼofa ʼo Sehova ʼi tanatou felogoi mo natou ʼae neʼe toʼo ʼi te kokelekasio. ʼI te temi muʼa, neʼe mole atali ia Sehova ke fakahemala muʼa te puleʼaga ʼo Iselaele, ʼae neʼe agatuʼu. Kae neʼe ina fai he ʼu fakatuʼutuʼu ke tokoni kia natou ia muʼa ʼo hanatou fakaha ʼe natou fakahemala. Ohage pe ko tatatou vakaʼi ʼi te lua alatike ʼo Te Tule Leʼo ʼaeni, neʼe ina fakaha ko te ʼAtua manavaʼofa. ʼO feafeaʼi? ʼAki tana kole age ki te polofeta ko Oseo ke fakamolemole ki tona ʼohoana, ʼae neʼe kei agahala pe. (Oseo 3:1; Mala. 3:7) Ohage ko Sehova, ʼe loto moʼoni te kau tagata ʼafeā ke toe liliu mai ia ia ʼae neʼe agahala ki te kokelekasio. Pea ʼe mole natou fai anai he meʼa ke faigataʼa hana toe liliu mai.​—Lau ia Selemia 3:​12.

8. Ka tou vakaʼi te faʼifaʼitaki ʼo te foha ʼae neʼe puli, ʼe tokoni feafeaʼi mai ke tou mahino ki te ʼofa mo te manavaʼofa ʼo Sehova? (Luka 15:7)

⁸ Manatuʼi te faʼifaʼitaki ʼae neʼe palalau ki ai Sesu ʼo ʼuhiga mo te foha ʼae neʼe puli. Neʼe tou talanoa ki ai ʼi te lua alatike ʼo Te Tule Leʼo ʼaeni. ʼI te sio ʼa te tamai ki tana toe liliu mai ki fale, “neʼe lele ʼo faʼufua mo ʼuma mamahi ki ai.” (Luka 15:20) Ke ke fakatokagaʼi neʼe mole atali te tamai manavaʼofa ʼaia ke kole fakamolemole age tona foha. Neʼe ko ia ʼae neʼe ina ʼuluaki fai te faʼahi ʼaia, pea ʼe ko he aluʼaga ia ʼe fai e he tamai ʼofa ki ʼana fanau. ʼE toe faiga te kau tagata ʼafeā ke natou fakaha te faʼahiga manatu ʼaia kia natou ʼae kua hehe. ʼE natou loto ke “toe liliu mai ki fale” te ʼu ovi ʼaia neʼe puli. (Luka 15:​22-​24, 32) Ka fakahemala he tahi neʼe agahala, ʼe fiafia ia Sehova, mo Sesu, mo te kau ʼaselo pea mo te kokelekasio katoa.​—Lau ia Luka 15:7.

9. Kotea ʼae ʼe loto e Sehova ke fai e te kau agahala?

⁹ Kotea te ʼu ako neʼe tou taʼofi? Neʼe tou ako ʼe mole tuku e Sehova ia natou ʼae ʼe mole fia fakahemala ke haga nonofo ʼi te kokelekasio. Kae ʼe mole lituʼa kia natou ʼaia. ʼE ina loto ke natou toe liliu mai. Pea ka fakahemala te kau agahala, ke ke tokagaʼi te meʼa ʼae ʼe logoʼi e Sehova ʼo ʼuhiga mo natou. ʼE ui fenei ia Oseo 14:4: “ ʼE au fakamalolo anai natou, pea ʼe mole natou toe heʼe agatonu anai. ʼE au ʼofa moʼoni anai kia natou, Koteʼuhi ʼe mole kei au ita kia natou.” ʼI ʼu palalau fakalotomalohi leva! ʼE mole ina uga ai koa la te kau tagata ʼafeā ke natou tokagaʼi ia aluʼaga fuli ʼe ha ai ʼe natou fakahemala? Pea ʼe mole ina toe fakalotomalohiʼi ai koa la ia natou ʼae neʼe mavae mai ia Sehova ke natou toe liliu vave mai?

10-11. ʼE faiga feafeaʼi te kau tagata ʼafeā ke natou tokoni kia natou ʼae kua fualoa tonatou toʼo ʼi te kokelekasio?

¹⁰ ʼE feafeaʼi kia natou ʼae kua fualoa tonatou toʼo ʼi te kokelekasio? ʼE lagi mole kei natou fai te agahala ʼae neʼe tupu ai tonatou toʼo. Pea ʼi ʼihi temi, ʼe mole kei natou manatuʼi pe la te tupuʼaga ʼo tonatou toʼo. Kotea pe te aluʼaga ʼae neʼe hoko, kae ʼe faiga aipe ia te kau tagata ʼafeā ke natou toe maʼu te ʼu hahaʼi ʼaia pea ke natou olo ʼo ʼaʼahi. Ka natou felogoi mo natou ʼaia, ʼe natou kole age anai ke natou faikole fakatahi pea mo fakalotomalohiʼi natou ke natou toe liliu mai kia Sehova. ʼE mahino ia, kapau kua fualoa tana mole kei fakatahi mo te kokelekasio, ʼe kua vaivai ʼosi ia ʼi te faʼahi fakalaumalie. Koia la ʼae, kapau ʼe ina fakaha ki te kau tagata ʼafeā ʼe fia liliu mai kia Sehova, pea ʼe natou fai anai he ʼu fakatuʼutuʼu ke fai hana ako Tohi-Tapu, tatau aipe pe heʼeki fakaulu mai. Pea ko te kau tagata ʼafeā pe ʼae ka natou fai te ʼu fakatuʼutuʼu ʼaia.

¹¹ ʼE faiga ia te kau tagata ʼafeā ke natou faʼifaʼitakiʼi te ʼofa ʼo Sehova. Koia, ʼe natou kumi ke natou toe maʼu ia natou ʼae neʼe toʼo ʼi te kokelekasio pea mo fakaha age kei maʼu pe te faigamalie ke natou toe liliu mai kia Sehova. Ka fakaha e ia ʼae neʼe agahala, ʼe fakahemala moʼoni pea mo ina liʼaki tana aga ʼe kovi, ʼe feala pe ke toe fakahu vave mai.​—2 Ko. 2:​6-8.

12. (1) Kotea ʼihi aluʼaga ʼe tonu ai ke tokakaga tafito ki ai te kau tagata ʼafeā? (2) He koʼe ʼe mole tonu ke tou manatu ʼe mole feala ʼi he ʼaho ke fakamolemole Sehova ki ʼihi kau agahala? (Vakaʼi mo te nota.)

¹² ʼI ʼihi aluʼaga, ʼe tonu anai ke tokakaga tafito te kau tagata ʼafeā ʼi muʼa ʼo tanatou fakaulu mai he tahi. Ohage la, kapau neʼe ko he tahi neʼe ina gaohi koviʼi he fanau, peʼe neʼe kua to ki te apositasia, pe neʼe ina fai he meʼa ke mavete mo tona ʼohoana, ʼe tonu anai ke natou vakaʼi fakalelei pe ʼe fakahemala moʼoni. (Mala. 2:​14; 2 Tim. 3:6) ʼE tonu ke natou puipui te faga ovi. Kae ʼe tonu ke natou toe mahino ʼe tali anai e Sehova te toe liliu mai ʼa he tahi pe neʼe agahala, kae neʼe fakahemala moʼoni pea mo ina liʼaki te fai ʼo tana aga ʼe kovi. Koia, logo la ʼe tonu ke tokakaga te kau tagata ʼafeā ʼi muʼa ʼo tanatou fakaulu he tahi neʼe ina kakaʼi ʼihi, kae ʼe mole tonu leva ke natou manatu ʼe mole feala ʼi he ʼaho ke fakamolemole ki ai ia Sehova.c​—1 Pet. 2:​10.

KOTEA ʼAE ʼE FEALA KE FAI E TE KOKELEKASIO?

13. ʼE tatau anai koa tatatou aga ki he tahi neʼe fakatonutonuʼi e te kau tagata ʼafeā pea mo he tahi neʼe toʼo ʼi te kokelekasio? Fakamahino.

¹³ Ohage ko tatatou vakaʼi ʼi te alatike kua ʼosi, ʼi ʼihi temi ʼe fakaha e te kau tagata ʼafeā ki te kokelekasio neʼe fakatonutonuʼi he tahi. ʼI te aluʼaga ʼaia, ʼe feala koa ke hoko atu tatatou fakatahi mo he tahi neʼe fakatonutonuʼi? ʼEi, koteʼuhi neʼe fakahemala pea kua ina liʼaki tana aga ʼae ʼe kovi. (1 Tim. 5:​20) ʼE kei kau pe ki te kokelekasio. Pea ka ina fia maʼu he ʼu fakalotomalohi, ʼe ʼaoga ke fakatahi tuʼumaʼu mo ʼona tehina mo tuagaʼane. (Hep. 10:​24, 25) Kae ʼe kehe leva ia moka ko he tahi neʼe toʼo ʼi te kokelekasio. ʼE ‘tuku anai tatatou fakatahi mo ia’ pea ‘ ʼaua naʼa tou kakai mo ia.’​—1 Ko. 5:​11.

14. Kotea te tonu ʼe feala ke fai e he ʼu tehina ʼo mulimuli ki tona leʼo ʼo loto ʼae ʼe akoʼi e te Tohi-Tapu moka toʼo he tahi ʼi te kokelekasio? (Vakaʼi mo te pāki.)

¹⁴ Ko tona fakaʼuhiga koa ʼe mole tou tokagaʼi he tahi neʼe toʼo ʼi te kokelekasio? Kailoa ia. ʼE moʼoni, ʼe mole tou fakatahi anai mo ia. ʼEi, ʼe mole tou fakatahi fakafiafia anai mo ia. Kae ʼe feala ke tou fakaafe ia ia ki ʼatatou fono, tafito la moka ʼe tou feiloʼiʼaki lelei mo ia peʼe ko he tahi ʼo totatou famili. ʼE tahi toʼo pe anai e te tehina tana tonu ʼo mulimuli pe ki tona leʼo ʼo loto ʼae ʼe akoʼi e te Tohi-Tapu. Kae ʼe feafeaʼi moka kau ia ia ʼaia ki te fono? ʼI muʼa atu, neʼe mole tou fakamalo ki ai. Kae ʼi heni, ʼe toe tahi fakalogo pe ki te tehina tana toʼo he tonu ʼo mulimuli ki tona leʼo ʼo loto ʼae ʼe akoʼi e te Tohi-Tapu. ʼE ui anai e ʼihi ʼe mole he meʼa ia ʼe kovi moka natou fakamalo ki ai, pea mo ui age ʼe tou fiafia ʼi tana haʼu ʼo fono. Kae ʼe mole fualoa anai tatatou faipalalau mo ia, pea ʼe mole tou faiga anai ke tou fakatahi tuʼumaʼu mo ia.

15. Ko ai ʼae ʼe talanoa ki ai ia 2 Soane 9-​11? (Vakaʼi mo te ʼa takai “Neʼe Talanoa Koa Ia Soane Mo Paulo Ki Te Agahala Pe ʼe Tahi?”)

¹⁵ ʼE feala ke fai e ʼihi te fehuʼi ʼaeni: ‘ ʼE mole koa la ui ʼi te Tohi-Tapu ka fakamalo he tehina ki he tahi feia pea ʼe toe kau mo ia ki ʼana gaue ʼae ʼe kovi?’ (Lau ia 2 Soane 9-​11.) Ka tou lau te ʼu vaega ki muʼa atu peʼe ki muli mai, ʼe ha ai ʼe talanoa ki he ʼu aposita pea mo natou ʼae ʼe natou uga ʼihi ke natou fai he ʼu aga ʼe kovi. (Fkha. 2:​20) Kapau ʼe lagolago malohi he tahi ki te ʼu akonaki fakaaposita peʼe ki he ʼu aga ʼe kovi, ʼe mole olo anai te kau tagata ʼafeā ʼo ʼaʼahi ia ia. ʼE moʼoni, ʼe kei feala pe ki te kilisitiano ʼaia ke fakahemala. Kae kapau ʼe mole fetogi, ʼe mole tou fakamalo anai ki ai pea mo fakaafe ki ʼatatou fono.

FAʼIFAʼITAKIʼI TE ʼOFA MO TE MANAVAʼOFA ʼO SEHOVA

16-17. (1) Kotea ʼae ʼe loto e Sehova ke fai e te kau agahala? (Esekiele 18:32) (2) ʼE kauga gaue feafeaʼi te kau tagata ʼafeā mo Sehova?

¹⁶ Kotea neʼe tou ako ʼi te ʼu alatike ʼaeni ʼe nima? ʼE mole loto e Sehova ke fakaʼauha he tahi. (Lau ia Esekiele 18:32.) ʼE ina loto ke fakatokatoka te kau agahala mo ia. (2 Ko. 5:​20) Koia ʼae, neʼe fakalotomalohiʼi tuʼumaʼu ai e Sehova ʼana kaugana ʼae neʼe mavae mai ia ia, ke natou fakahemala pea mo toe liliu mai kia te ia. Pea ka faiga te kau tagata ʼafeā ke natou taki mai te kau agahala ki te fakahemala, ʼe natou kauga gaue mo Sehova.​—Loma 2:4; 1 Ko. 3:9.

¹⁷ Fakakaukauʼi age muʼa koe te toe fiafia ʼe maʼu ʼi selo moka fakahemala he tahi neʼe agahala. ʼE lahi ʼaupito te fiafia ʼo tatatou Tamai ʼae ʼi selo moka toe liliu mai kia te ia he ovi neʼe puli. Koia, ʼe mole toe ʼasili malohi age koa la totatou ʼofa kia te ia moka tou metitasio ki tona ʼofa, mo manavaʼofa, pea mo tona ʼofa makehe?​—Luka 1:​78.