He Tohi ʼe Tokoni Mai Ke Tou Kataki Agatonu ʼo Kaku Ki Te Fakaʼosi

1-2. (1) Neʼe feafeaʼi te aluʼaga ʼo te kau Kilisitiano ʼae ʼi Sutea ʼi te temi ʼae neʼe faitohi age ai ia te apositolo ko Paulo? (2) He koʼe neʼe to tonu te tohi ʼaia?

ʼI TE ʼosi mate ʼo Sesu ʼi te taʼu 33 ʼo totatou temi, neʼe felaveʼi te kau Kilisitiano ʼo Selusalemi mo Sutea mo te ʼu faigataʼaʼia. Mole fualoa hili te fakatuʼu ʼo te kokelekasio Fakakilisitiano, neʼe fakatagaʼi lahi ai te kau Kilisitiano. (Gaue 8:1) Pea hili ki ai taʼu ʼe 20, neʼe felaveʼi te kau Kilisitiano pea mo te ʼu faigataʼaʼia fakaekonomika, ʼuhi ko te hoge neʼe to ʼi te fenua. (Gaue 11:​27-30) Kae ʼi te taʼu 61 H.T.S. neʼe mole kei lahi tonatou fakatagaʼi. Koia lolotoga te temi ʼaia, ʼaki te laumalie ʼo Sehova neʼe faitohi te apositolo ko Paulo kia natou. Neʼe to tonu te ʼu tokoni ʼaia moʼo teuteuʼi ʼo natou ki he ʼu fakataga ʼe malohi age ka hoko anai kia natou.

² Ko te tohi ʼae ki te kau Hepeleo neʼe fai ʼi tona temi totonu koteʼuhi neʼe mole fualoa te tokalelei ʼae neʼe maʼu e te kau Kilisitiano. Neʼe foaki e Paulo he ʼu tokoni ki te ʼu Kilisitiano ʼaia ke natou katakiʼi te ʼu mamahi ʼae ka ʼamanaki hoko kia natou. Ko te maumauʼi ʼo te tuʼu Fakasutea ʼae neʼe fakakikite e Sesu neʼe kua ovi mai. (Luka 21:20) ʼE mahino ia, neʼe mole iloʼi e Paulo pea mo te kau Kilisitiano ʼae ʼi Sutea ia te temi totonu ʼae ka hoko ai anai te maumau ʼaia. Kae ki te kau Kilisitiano ʼaia neʼe feala ke natou fakaʼaogaʼi te temi ʼae ʼe kei toe moʼo teuteuʼi ʼo natou. Neʼe tonu ke natou fakamalohiʼi tanatou tui pea mo tanatou faʼa kataki.—Hep. 10:25; 12:​1, 2.

3. He koʼe ʼe tonu ke tokagaʼi e te kau Kilisitiano ʼo te temi ʼaeni ia te tohi ʼae ki te kau Hepeleo?

³ Kua vave hoko mai pe he toe mamahi lahi ʼe lahi age ia ʼi te mamahi ʼae neʼe felaveʼi mo te kau ʼuluaki Kilisitiano. (Mat. 24:21; Fkha. 16:​14, 16) Koia, ʼe lelei ke tou vakaʼi ia he ʼu tokoni neʼe foaki e Sehova ki te kau Kilisitiano ʼaia pea ʼe toe ʼaoga kia tatou.

“TOU LILIU ʼO FOTUFOTUʼA ʼI TE FAʼAHI FAKALAUMALIE”

4. Kotea te ʼu fihifihia neʼe tonu ke tauʼi e te kau Sutea ʼae neʼe liliu ko ni Kilisitiano? (Vakaʼi mo te pāki.)

⁴ Neʼe lahi te ʼu fetogi neʼe tonu ke fai e te kau Sutea ʼae neʼe liliu ko he kau Kilisitiano pea neʼe mole faigafua. Neʼe ʼi ai te temi neʼe filifili e Sehova te kau Sutea ko tana hahaʼi. Lolotoga ni taʼu, ko Selusalemi neʼe ko he koga meʼa maʼuhiga. Ko te hau ʼae neʼe ina fakafofoga ia Sehova neʼe ʼafio hau mai Selusalemi. Pea ko te hahaʼi ʼae neʼe fia atolasio kia Sehova neʼe tonu ke natou olo ki te fale lotu ʼae ʼi Selusalemi. Ko te kau Sutea agatonu fuli neʼe natou mulimuli ki te Lao ʼa Moisese pea mo te ʼu lekula ʼae neʼe akoʼi age e te kau takitaki lotu. Neʼe maʼuhiga kia natou te silikosisio, mo te ʼu lekula ʼo ʼuhiga mo te meʼa kai, pea mo tanatou aga ki te hahaʼi ʼae ʼe mole Sutea. Kae hili pe te mate ʼo Sesu, neʼe mole kei tali leva e Sehova te ʼu sakilifisio ʼae neʼe momoli ʼi te fale lotu. Koia, neʼe mole faigafua ki te kau Sutea ʼae neʼe liliu ko he kau Kilisitiano ke natou fetogi tanatou faʼahiga tauhi. (Hep. 10:​1, 4, 10) Maʼia mo te kau Kilisitiano ʼae neʼe natou maʼu he tui ʼe malohi ohage ko te apositolo ko Petelo, neʼe faigataʼa kia natou te fai ʼo te ʼu fetogi ʼaia. (Gaue 10:​9-14; Kal. 2:​11-14) ʼUhi ko te ʼu akonaki foʼou ʼaia kua natou tui ki ai, neʼe fakatagaʼi ia te kau Kilisitiano ʼaia e te kau takitaki lotu Sutea.

5. Ko ai ʼae neʼe tonu ke tokakaga ki ai te kau Kilisitiano ʼae ʼi Sutea?

⁵ Neʼe ʼi ai kutuga ʼe lua neʼe natou fakafeagai ki te kau Kilisitiano ʼae ʼi Sutea. ʼUluaki ko te kau takitaki lotu Sutea, neʼe natou ui ko te kau Kilisitiano ʼaia ko he kau aposita. Lua neʼe ko ʼihi ʼi te kokelekasio, neʼe natou ui neʼe tonu ki te kau Kilisitiano ke hoko atu tanatou muliʼi te Lao ʼa Moisese, lagi he neʼe mole natou loto ke fakatagaʼi natou. (Kal. 6:12) Kotea ka tokoni anai ki te kau Kilisitiano ʼae ʼi Sutea ke natou nonofo agatonu kia Sehova?

6. Kotea ʼae neʼe fakalotomalohiʼi e Paulo ke fai e ʼona tehina mo tuagaʼane? (Hepeleo 5:14–6:1)

⁶ ʼI tana tohi ki te kau Hepeleo, neʼe fakalotomalohiʼi e Paulo ʼona tehina mo tuagaʼane ke natou ako mo metitasioʼi ia te Folafola ʼa te ʼAtua. (Lau ia Hepeleo 5:14–6:1.) Neʼe fakaʼaogaʼi e Paulo te ʼu Koga Tohi Fakahepeleo moʼo fakamahino ki te kau Kilisitiano ʼaia ʼe maʼoluga age te tauhi ʼae kia Sehova ʼi ʼae ʼa te kau Sutea.a Neʼe tokoniʼi e Paulo te kau Kilisitiano ke natou iloʼi pea mo mahino lelei age te ʼu moʼoni ʼae ʼe tuʼu ʼi te ʼu Tohi Taputapu. ʼI tanatou fai te fahaʼi ʼaia, neʼe feala ai ke natou iloʼi te ʼu akonaki hala pea ke mole natou mulimuli ki ai.

7. Kotea te ʼu faigataʼaʼia ʼae ʼe tonu ke tou tauʼi ʼi te temi nei?

⁷ ʼI te temi nei, ʼe tou logo ki te hahaʼi ʼe natou fakamafola ni manatu ʼe mole alu tahi mo te ʼu fahaʼi ʼae ʼe moʼoni mo faitotonu kia mata ʼo Sehova. Ko ʼihi ʼe mole natou leleiʼia te ʼu akonaki Fakatohi-tapu ʼae ʼe tou mulimuli ki ai ʼo ʼuhiga mo te aga ʼae ʼe tonu ke fai. ʼE natou ui ʼe tou agafefeka mo agakovi. Kua ʼaʼasili age te fakafeagai ʼa te manatu ʼa te hahaʼi mo ʼae ʼa Sehova. (Taag. 17:15) Koia, ʼe maʼuhiga ʼaupito ke tou iloʼi lelei te ʼu faʼahiga manatu hala ʼa te malama pea ke tou fakamamaʼo mai ai. ʼAua naʼa tou tuku he tahi ʼe fakafeagai mai ke fakalotovaivaiʼi tatou ʼo tou tuku ai tatatou tauhi ʼae kia Sehova.—Hep. 13:9.

8. Kotea ʼae ka tokoni mai kia tatou ke tou liliu ʼo fotufotuʼa ʼi te faʼahi fakalaumalie?

⁸ Neʼe tokoniʼi e Paulo te kau Hepeleo ke natou liliu ʼo fotufotuʼa ʼi te faʼahi fakalaumalie. ʼO toe feia mo tatou, pea ko tona fakaʼuhiga ke tou ako fakamalotoloto te Tohi-Tapu. ʼE tou iloʼi lelei age ai ia Sehova pea mo tana faʼahiga manatu. ʼE tonu ke hoko atu tatatou faʼahiga fai ʼaia maʼia pe kua tou papitema. Pe ʼe kua fualoa peʼe kailoa tatatou ʼi te moʼoni, ʼe tonu kia tatou fuli ke tou lau pea mo ako te Tohi-Tapu ʼi te ʼaho fuli. (Pes. 1:2) Ko te ako tuʼumaʼu ʼo te Tohi-Tapu ʼe ina fakamalohiʼi tatatou tui, ohage pe ko tona ui e Paulo ki te kau Kilisitiano Hepeleo.—Hep. 11:​1, 6.

‘TOU TUI KE HAOFAKI AI ʼOTATOU MAʼULI’

9. He koʼe neʼe maʼuhiga ke maʼu e te kau Kilisitiano Hepeleo he tui ʼe malohi?

⁹ Neʼe ʼaoga ki te kau Kilisitiano ke natou maʼu he tui malohi ʼe haofaki ai ʼonatou maʼuli moka hoko mai te mamahi lahi ʼi Sutea. (Hep. 10:​37-39) Neʼe fakatokaga e Sesu ʼana tisipulo, ka natou sisio ki te ʼa takatakai ʼo Selusalemi e te ʼu kautau pea ʼe tonu ke natou feholaki ki te ʼu moʼuga. Neʼe ina fai tana tokoni ki te kau Kilisitiano fuli ʼae neʼe maʼuʼuli ʼi Selusalemi mo natou ʼae ʼi te tuʼa kolo. (Luka 21:​20-24) ʼI te temi ʼaia, moka ʼomai he kautau ʼo tauʼi he kolo, ʼi te agamahani neʼe feholaki te hahaʼi ʼae neʼe maʼuʼuli ʼi te tuʼa kolo ki te loto kolo ke puipui ai natou. Neʼe hage ia neʼe mole ko he tokoni lelei ke natou feholaki ki te ʼu moʼuga ʼi hanatou nonofo ʼi te loto kolo ʼi Selusalemi. Koia neʼe ʼaoga ai kia natou he tui ʼe malohi ke natou fakalogo kia Sesu.

10. Kapau ʼe maʼu e te kau Kilisitiano he tui ʼe malohi, kotea ʼae ka natou fai anai? (Hepeleo 13:17)

¹⁰ Neʼe toe tonu foki ki te kau Kilisitiano Hepeleo ke natou falala ki te ʼu tagata ʼae neʼe fakaʼaogaʼi e Sesu ke natou taki te kokelekasio. Neʼe lagi natou foaki ia he ʼu fakatotonu ʼo ʼuhiga mo te temi ʼae ʼe tonu ke natou feholaki ai pea mo tana faʼahiga fakahoko. (Lau ia Hepeleo 13:17.) Neʼe ui e Paulo ki ʼona tehina Hepeleo: “Kotou fakalogo kia natou ʼae ʼe natou takitaki koutou.” Neʼe mole ina fia ui age ke natou fakalogo ʼuhi ko tonatou maʼua. Kae ʼuhi he ʼe natou falala ki te kau tagata ʼafea. Koia ʼae neʼe ʼaoga ki te kau Hepeleo ke lahi age tanatou falala ki te kau tagata ʼafea pea mo fakalogo ki tanatou takitaki ʼi muʼa ʼo te hoko mai ʼo te mamahi. Kapau ʼi te temi tokalelei ʼaia, neʼe fakalogo te kau Kilisitiano ki te kau tagata ʼafea neʼe faigafua age tanatou fakalogo ʼi te ʼu temi faigataʼa.

11. He koʼe ʼe maʼuhiga ke tui malohi te kau Kilisitiano ʼi te temi nei?

¹¹ Ohage ko te kau Kilisitiano Hepeleo ʼe ʼaoga mo tatou ke tou tui. ʼE tou maʼuʼuli nei ʼi he temi ʼe tokolahi ai te hahaʼi ʼe mole natou tui ʼe hoko anai te fakaʼosi ʼo te malama ʼaeni. ʼE natou toe vaʼi pe la mo tatou. (2 Pet. 3:​3, 4) Tahi ʼae, logo la ʼe fakaha mai ʼi te Tohi-Tapu he ʼu aluʼaga ʼe hoko anai lolotoga te mamahi lahi, kae ʼe lahi pe te ʼu fahaʼi ʼe mole tou iloʼi. Koia ʼe tonu ai ke tou tui malohi ʼe hoko moʼoni mai anai te fakaʼosi ʼo te malama ʼaeni ʼi te temi ʼae kua fakatuʼutuʼu ki ai e Sehova. Pea ʼe tonu ke tou toe tui papau ʼe puipui anai tatou e Sehova ʼi te temi ʼaia.—Hap. 2:3.

12. Kotea ʼae ka tokoni mai anai ke tou hao ʼi te mamahi lahi?

¹² ʼE tonu ke tou toe tui ʼe fakaʼaogaʼi e Sehova “te tagata kaugana agatonu mo poto” moʼo takitaki ʼo tatou ʼi te temi nei. (Mat. 24:45) ʼI te kamata ʼo te mamahi lahi, ʼe lagi tou maʼu anai ni tuʼutuʼuni ka puipui ai anai tatou. ʼE lagi hage pe ko te meʼa ʼae neʼe hoko ki te kau Kilisitiano Hepeleo, ʼi te ʼa takatakai ʼo Selusalemi e te kau solia Loma. Koia ʼe maʼuhiga ʼaupito ʼi te temi nei, ke tou falala kia natou ʼae ʼe natou takitaki te kautahi ʼa Sehova. Kapau ʼe mole tou falala mo fakalogo ʼi te temi nei ki tanatou takitaki, pea ʼe faigataʼa pe anai hatatou fakalogo ki te ʼu tuʼutuʼuni ka foaki mai anai lolotoga te mamahi lahi.

13. He koʼe neʼe ʼaoga te tokoni ʼae ʼe tuʼu ia Hepeleo 13:5?

¹³ ʼI tanatou fakaatalitali ʼae ki te fakaha age ke natou feholaki, neʼe tonu ki te kau Kilisitiano Hepeleo ke mole natou “manako ki te paʼaga” kae ke natou maʼumaʼua tafito ʼi tonatou maʼuli ki te ʼu gaue ʼae ʼa Sehova. (Lau ia Hepeleo 13:5.) Ko ʼihi ia natou neʼe natou maʼuʼuli ʼi te temi ʼae neʼe to ai te hoge pea neʼe natou masisiva. (Hep. 10:​32-34) Logo la ʼi te temi muʼa neʼe natou katakiʼi te mamahi ʼuhi ko te logo lelei, kae neʼe lagi kamata manatu leva ʼihi ʼe maʼuhiga ke natou maʼu paʼaga moʼo puipui ʼo natou. Kae neʼe mole haofaki e te paʼaga ʼonatou maʼuli ʼi te temi ʼae neʼe maumauʼi ai ia Selusalemi. (Sakp. 5:3) Neʼe lagi faigataʼa age kia natou ʼae neʼe manako ki te ʼu koloa hanatou feholaki kae tuku ʼonatou ʼapi pea mo ʼonatou koloa fuli.

14. Kapau ʼe malohi tatatou tui, ʼe feafeaʼi anai te ʼu tonu ʼae ʼe tou fai ʼi te temi nei ʼo ʼuhiga mo te ʼu koloa?

¹⁴ Kapau ʼe tou tui malohi kua vave pulihi e Sehova ia te malama agakovi ʼaeni, ʼe mole tou manatu anai ʼe maʼuhiga age ke tou maʼu paʼaga peʼe tou maʼu koloa. Lolotoga te mamahi lahi, ko te paʼaga ʼe mole anai hona ʼaoga. ʼE ui ʼi te Tohi-Tapu ko te hahaʼi ʼe “natou laku anai ʼanatou siliva ʼi te ʼu ala” he ʼe natou mahino ʼe “mole feala anai ke haofaki natou e ʼanatou siliva peʼe ko ʼanatou aulo ʼi te ʼaho ʼo te hauhau ʼo Sehova.” (Esk. 7:19) Koia, ʼe mole tou tokakaga tafito anai ke lahi age tatatou foʼi falā kae ʼe tou fai anai he ʼu tonu ʼe feala ai anai ke tou tokakaga kia tatou totonu feia mo totatou kiʼi famili pea mo tauhi kia Sehova. Koia ʼae ʼe mole tonu ai ke lahi ʼotatou maʼua pea ke mole puli totatou temi ʼi he tokakaga ki ʼotatou koloa. Pea ʼe tonu ke tou tokakaga naʼa pipiki ʼotatou loto ki te ʼu koloa ʼae kua tou maʼu. (Mat. 6:​19, 24) ʼI te kua ovi mai ʼo te fakaʼosi ʼo te malama ʼaeni, ʼe tonu anai ke tou filifili pe ʼe tou falala kia Sehova peʼe ko ʼotatou koloa.

“ʼE ʼAOGA KIA KOUTOU TE FAʼA KATAKI”

15. He koʼe neʼe ʼaoga ki te kau Kilisitiano Hepeleo ke natou faʼa kataki?

¹⁵ Neʼe ʼaoga ke faʼa kataki te kau Kilisitiano Hepeleo ʼi tanatou tauhi ʼae kia Sehova ʼuhi ko te ʼu fihifihia ʼae ka hoko. (Hep. 10:36) Logo la neʼe fakatagaʼi ʼihi ʼi te temi muʼa, kae tokolahi neʼe natou liliu ko ni Kilisitiano ʼi te temi ʼae neʼe tokalelei ai. Koia neʼe fakamanatuʼi age ai e Paulo ke natou nonofo teuteu he ʼe toe fakatagaʼi anai natou pea feala ke natou mamate ohage pe ko Sesu. (Hep. 12:4) Tokolahi te kau Sutea neʼe natou iita mo agamalohi ʼuhi he neʼe hahaʼi te kau Sutea neʼe natou liliu ko ni Kilisitiano. ʼI ni taʼu ʼi muʼa ʼo te fai e Paulo tana tohi ki te kau Hepeleo, neʼe ʼohofi ia ia e te hahaʼi kaugamalie ʼi tana faifakamafola ʼi Selusalemi. Neʼe ko te ʼu tagata Sutea ʼe toko 40 tupu neʼe natou fakapapau “ke mole natou kakai mo iinu mo kapau heʼeki natou matehi ia Paulo.” (Gaue 22:22; 23:​12-14) Logo la neʼe fehiʼaʼinaʼi mo fakatagaʼi te kau Kilisitiano kae neʼe tonu ke hoko atu tanatou fakatahitahi moʼo tauhi kia Sehova, mo fakamafola ia te logo lelei pea mo taupau ke malohi ia tanatou tui.

16. ʼE tokoni feafeaʼi mai te tohi ʼae ki te kau Hepeleo ke tou maʼu he manatu ʼe lelei ʼo ʼuhiga mo te fakataga? (Hepeleo 12:7)

¹⁶ Kotea ʼae neʼe tokoni ki te kau Kilisitiano Hepeleo ke natou katakiʼi te fakafeagai ʼae neʼe tau mo natou? Neʼe fia tokoni ia Paulo kia natou ke natou tokagaʼi te ʼu fua lelei ʼae moka natou katakiʼi te ʼu ʼahiʼahi. Neʼe ina fakamahino ka tau te ʼu Kilisitiano mo ni ʼahiʼahi, ʼe feala ke fakaʼaogaʼi e te ʼAtua te ʼu ʼahiʼahi ʼaia moʼo akoʼi ʼo natou. (Lau ia Hepeleo 12:7.) Ko te faʼahiga ako ʼaia ʼe tokoni anai kia natou ke natou maʼu te ʼu kalitate ʼae ʼe maʼuhiga kia Sehova peʼe ke lelei age tanatou fakaha te ʼu kalitate ʼaia. Kapau neʼe tokagaʼi e te kau Kilisitiano Hepeleo ia te ʼu fua lelei ʼae mai te ʼu ʼahiʼahi ʼaia, ʼe faigafua anai kia natou hanatou fa’a kataki.—Hep. 12:11.

17. Kotea ʼae neʼe iloʼi e Paulo ʼo ʼuhiga mo te katakiʼi ʼo te fakataga?

¹⁷ Neʼe fakalotomalohiʼi e Paulo te ʼu Kilisitiano Hepeleo ke natou katakiʼi ʼonatou ʼahiʼahi ʼaki he lototoʼa pea ke natou nonofo agatonu. Neʼe lelei ke fai e Paulo te tokoni ʼaia he ʼe ki muʼa atu neʼe ina fakatagaʼi te kau Kilisitiano pea neʼe sio tonu ki tonatou gaohi koviʼi. Neʼe ina toe iloʼi foki te katakiʼi ʼo te fakataga. Neʼe lahi te ʼu faigataʼaʼia neʼe tau mo Paulo hili tana liliu ʼae ko he Kilisitiano. (2 Ko. 11:​23-25) Koia ʼae neʼe iloʼi lelei ai e Paulo te ʼu fahaʼi ʼae ʼe ʼaoga moʼo katakiʼi te ʼu ʼahiʼahi. Neʼe ina fakamanatuʼi age ki te kau Kilisitiano, ke feala hanatou katakiʼi te ʼu ʼahiʼahi, neʼe tonu ke natou falala kia Sehova kae mole kia natou totonu. Neʼe maʼu ai e Paulo te lototoʼa ʼo feala ai ke ina ui fenei: “Ko Sehova ʼe ko toku tokoni. ʼE mole au mataku anai.”—Hep. 13:6.

18. Kotea ʼae ʼe tonu ke tou iloʼi ʼo ʼuhiga mo te ka haʼu ke feala ai hatatou katakiʼi te fakataga?

¹⁸ Ko ʼihi tehina ʼe natou lolotoga katakiʼi nei te fakataga. ʼE feala ke tou tokoni kia natou ʼi tatatou faikole ʼae maʼa natou. Pea ʼi ʼihi temi, ʼe feala ke tou foaki age te ʼu meʼa ʼae ʼe ʼaoga kia natou. (Hep. 10:33) Kae ʼe fakaha lelei mai ʼi te Tohi-Tapu “ko natou fuli ʼae ʼe fia pipiki ki te ʼAtua ʼi ʼonatou maʼuli, ʼi tonatou ʼuhiga tisipulo ʼa Kilisito Sesu, ʼe toe fakatagaʼi anai mo natou.” (2 Tim. 3:12) Koia ʼae ʼe tonu ai kia tatou fuli ke tou teuteu ke feala hatatou katakiʼi te ʼu temi faigataʼa ʼae ka hoko mai. Tou hoko atu tatatou falala katoa ʼae kia Sehova pea ke tou tui papau ʼe tokoni mai anai ke tou katakiʼi te ʼu ʼahiʼahi fuli ʼae ʼe tou tau anai mo ia. ʼE ina foaki anai te fimalie ʼi tona temi totonu kia natou fuli ʼae ʼe nonofo agatonu kia te ia.—2 Tes. 1:​7, 8.

19. Kotea ʼae ʼe tonu ke tou fai ke tou teuteu ai ki te mamahi lahi? (Vakaʼi mo te pāki.)

¹⁹ ʼE mahino papau ia ko te tohi ʼa Paulo ʼae ki te kau Hepeleo neʼe tokoni ki te ʼu ʼuluaki Kilisitiano ke natou teuteu ki te mamahi ʼae neʼe ʼamanaki hoko. Neʼe fakalotomalohiʼi e Paulo ʼona tehina ke natou ako fakamalotoloto te Folafola ʼa te ʼAtua pea ke tuputupu tanatou mahino lelei ki ai. ʼI tanatou fai te fahaʼi ʼaia, neʼe natou lava iloʼi ai pea mo tekeʼi te ʼu manatu ʼae neʼe feala ke fakavaivaiʼi ai tanatou tui. Neʼe toe tokoni ia Paulo kia natou ke natou fakamalohiʼi ia tanatou tui ke feala ai hanatou mulimuli ʼaki he lotofalala ki te takitaki ʼa Sesu pea mo ʼae ʼa te ʼu tehina ʼo te kokelekasio. Pea neʼe ui age leva e Paulo ke natou fakaʼuhiga ʼonatou ʼahiʼahi ʼe ko he faigamalie ke akoʼi ai natou e tanatou Tamai ʼofa. ʼOfa pe ke tou toe mulimuli mo tatou ki te ʼu tokoni ʼaia ʼi te Tohi-Tapu. ʼE feala anai ke tou kataki agatonu ʼo kaku ki te fakaʼosi.—Hep. 3:14.