ʼE Lahi Age Tou Fiafia Moka Ke Foaki

1-2. Neʼe fakatupu tatou e Sehova ʼaki te fealagia fea, pea he koʼe ʼe fua lelei kia tatou?

NEʼE fakatupu e Sehova ia te tagata ʼaki te fealagia ʼae ke fiafia lahi age moka ina foaki ʼi tana tali. (Gaue 20:35) Ko tona fakaʼuhiga koa ʼe mole tou fiafia moka foaki mai he meʼa? Kailoa ia. ʼE tou fiafia fuli moka foaki mai he meʼa ʼofa. Kae ʼe lahi age totatou fiafia moka ʼe ko kita ʼae ʼe kita foaki he meʼa ʼofa. Pea ʼe mahino ia kapau neʼe fakatupu tatou e Sehova ʼaki te fealagia ʼaia, he ʼe fua lelei kia tatou. Kotea tona fakaʼuhiga?

² Neʼe fakatupu tatou e Sehova ʼaki te fealagia ʼaia, pea ʼe fakalogo leva ia kia tatou moka ʼe tou loto ke lahi age totatou fiafia. ʼE moʼoni, ʼe feala ke lahi age totatou fiafia moka tou kumi ni aluʼaga ke tou foaki ai. ʼE mole fakaofoofo koa la te fakatupu feia ʼo tatou e Sehova?—Pes. 139:14.

3. He koʼe ʼe ui ʼi te Tohi-Tapu ko Sehova ʼe ko “te ʼAtua fiafia”?

³ ʼE ui mai ʼi te Tohi-Tapu ʼe kita fiafia moka ʼe kita foaki. Koia ʼe mole tou punamaʼuli ai ʼi tana ui ʼae ko Sehova ʼe ko “te ʼAtua fiafia.” (1 Tim. 1:11) Ko ia ʼae neʼe ina ʼuluaki foaki ki ʼihi pea ʼe mole he tahi ʼe ina foaki lahi ohage ko ia. Ohage ko tona tohi e te apositolo ko Paulo: “ʼAki ia ia, ʼe tou maʼuʼuli, mo gaugaue pea mo tou ʼi heni.” (Gaue 17:28) ʼEi, “ko te ʼu meʼa ʼofa lelei fuli mo haohaoa ʼe haʼu mai” ia Sehova.—Sakp. 1:17.

4. Kotea ʼae ka tokoni mai anai ke toe lahi age totatou fiafia?

⁴ ʼE mahino ia ʼe tou loto fuli ke tou fiafia lahi age moka tou foaki. ʼE feala anai moka ʼe tou faʼifaʼitakiʼi te lotofoaki ʼo Sehova. (Efe. 5:1) ʼI te alatike ʼaeni ʼe tou vakaʼi anai te lotofoaki ʼo Sehova pea kotea ʼae ʼe feala ke tou fai moka mole fakaha mai e he tahi tona lotofakafetaʼi. ʼE fakalotomalohiʼi anai tatou e te ʼu manatu ʼaia ke hoko atu tatatou foaki pea ʼe tokoni mai ke lahi age pea mo tou taupau totatou fiafia.

FAʼIFAʼITAKIʼI TE LOTOFOAKI ʼO SEHOVA

5. Kotea ʼae ʼe foaki mai e Sehova kia tatou?

⁵ Kotea la ni faʼahi ʼe foaki mai e Sehova kia tatou? ʼE foaki mai e Sehova te ʼu meʼa ʼae ʼe ʼaoga ki totatou maʼuli. Logo la ko ʼihi ia tatou ʼe mole tou maʼu koloa ke feafeaʼi, kae ʼe tokaga tuʼumaʼu pe ia Sehova ke tou maʼu te ʼu meʼa ʼae ʼe ʼaoga kia tatou. Ohage la, ʼaki te tokoni ʼa Sehova, ʼe ʼi ai tatatou meʼa kai, mo te ʼu meʼa laofi, pea mo hotatou nofoʼaga. (Pes. 4:8; Mat. 6:​31-33; 1 Tim. 6:​6-8) Neʼe foaki mai koa e Sehova te ʼu meʼa fulifuli ʼaia he ko he fakamaʼua? Kailoa ia. Kae he koʼe ʼe ina fai?

6. Kotea te ako ʼe tou maʼu mai ia Mateo 6:​25, 26?

⁶ ʼE foaki mai e Sehova te ʼu meʼa ʼae ʼe ʼaoga kia tatou he ʼe ʼofa ia tatou. Tokagaʼi ia te ʼu palalau ʼa Sesu ia Mateo 6:​25, 26. (Lau.) ʼI te ʼu vaega ʼaia, ʼe ina toʼo te faʼifaʼitaki mai te ʼu meʼa ʼae neʼe fakatupu e te ʼAtua. Neʼe palalau ʼo ʼuhiga mo te ʼu manulele, ʼo ina ui: “ʼE mole natou nunusi pulapula peʼe utu peʼe tanaki ʼi te fale tanakiʼaga taʼukai.” Pea ʼe ina hoko atu fenei: “ʼE fafaga natou e takotou Tamai ʼae ʼe ʼi selo.” Neʼe fai leva e Sesu te fehuʼi ʼaeni: “ʼE mole kotou maʼuhiga age koa la ia natou?” Kotea te ako? Ko te ʼu kaugana ʼa Sehova ʼe natou maʼuhiga age ki ʼona mata ʼi te ʼu manu. Kapau ʼe tokaga Sehova ki te ʼu manu, pea ʼe tou tui papau ʼe tokaga pe anai kia tatou! ʼE hage pe ia Sehova ko he tamai ʼe tokaga lelei ki tona famili he ʼe ʼofa ia natou.—Pes. 145:16; Mat. 6:32.

7. Kotea la he faʼahi ʼe feala ai ke tou faʼifaʼitakiʼi te lotofoaki ʼo Sehova? (Vakaʼi mo te pāki.)

⁷ Ohage ko Sehova, ʼe feala ke tou foaki te ʼu meʼa ʼae ʼe ʼaoga ki ʼihi he ʼe tou ʼoʼofa ia natou. Ohage la, ʼe ke iloʼi koa he tehina peʼe ko he tuagaʼane ʼe mole hana meʼa kai peʼe ko hona meʼa laofi? ʼE feala ke fakaʼaogaʼi koe e Sehova ke ke tokoni ki ai. ʼE iloʼi lelei te hahaʼi ʼa Sehova he ʼe natou fakaha tanatou lotofoaki moka hoko he ʼu tuʼutamaki. Ohage la, lolotoga te mahaki COVID-19, neʼe foaki e te ʼu tehina mo tuagaʼane he meʼa kai, mo he ʼu mutuʼi meʼa pea mo ʼihi atu ʼu meʼa ʼaoga. Pea tokolahi neʼe natou toe fai ni meʼa ʼofa moʼo lagolago ki te gaue fakamalamanei. Neʼe fakaʼaogaʼi te falā ʼaia moʼo tokoni ki te ʼu tehina mo tuagaʼane ʼi te malamanei katoa ʼae neʼe hoko ai he tuʼutamaki fakanatula. Ko te ʼu Fakamoʼoni lotofoaki ʼaia neʼe natou mulimuli ki te ʼu palalau ʼae ia Hepeleo 13:16: “ʼAua naʼa galo kia koutou te fai ʼo te meʼa ʼae ʼe lelei pea mo vaevae mo ʼihi te meʼa ʼae ʼe kotou maʼu, he ʼe leleiʼia e te ʼAtua te taʼi ʼu sakilifisio ʼaia.”

8. Kotea ʼae ʼe feala ke tou fakahoko ʼaki te malohi ʼae ʼe foaki mai e Sehova? (Filipe 2:13)

⁸ ʼE foaki e Sehova tona malohi. Ko te malohi ʼo Sehova ʼe mole hona tuʼakoi. Pea ʼe fiafia moka ina foaki ki tana ʼu kaugana agatonu. (Lau ia Filipe 2:13.) Neʼe kua ke kole koa kia Sehova ke ina foaki atu tona malohi ke mole ke to ki te fakahala peʼe ke ke lava katakiʼi he aluʼaga faigataʼa? Pe neʼe lagi ke kole kia Sehova ʼi he tahi ʼaho ke ina foaki atu pe te malohi ke feala hau fakahoko te ʼu gaue ʼo te ʼaho ʼaia. Pea ka neʼe ina tali atu ʼo ina foaki atu tona malohi, neʼe lagi ke fai mo koe te ʼu palalau ʼaeni neʼe tohi e te apositolo ko Paulo: “ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.”—Flp. 4:13.

9. Kotea ʼae ʼe feala ke tou fai ke tou faʼifaʼitakiʼi ai te foaki lahi e Sehova tona malohi? (Vakaʼi mo te pāki.)

⁹ Logo la ʼe tou agahala, kae ʼe feala pe ke tou faʼifaʼitakiʼi te haga ʼae ʼa Sehova ʼo foaki lahi tona malohi. ʼE moʼoni, ʼe mole feala ke tou foaki totatou malohi ki ʼihi. Kae ʼe feala ke tou fakaʼaogaʼi moʼo tokoni kia natou. Ohage la ʼe feala ke tou tokoni ki te ʼu tehina mo tuagaʼane ʼae kua matutuʼa peʼe mahahaki ʼaki hatatou olo ʼo fai ʼanatou fakatau peʼe fakamaʼa tonatou loto fale. Pea ʼo fakalogo ki ʼotatou fealagia, ʼe feala ke tou tokoni ki te fakamaʼa mo te taupau ʼae ke lelei ia te Fale Fono. Ka tou fakaʼaogaʼi feiaʼi totatou malohi ʼe lahi ʼosi te ʼu gaue lelei ʼe feala ke tou fai maʼa ʼotatou tehina mo tuagaʼane.

10. ʼE feafeaʼi hatatou fakalotomalohiʼi ʼihi ʼaki ʼatatou palalau?

¹⁰ Pea ʼaua naʼa tou galoʼi ʼe toe maʼu te malohi ʼi ʼatatou palalau. ʼE ke iloʼi koa he tahi ʼe ʼaoga ki ai he ʼu palalau fakalotomalohi? Peʼe ʼaoga ki ai he fakalotofimalie? Kapau koia, fakaha age ki ai. ʼE feala hau alu kio ia, peʼe ke pauʼi ki ai, peʼe ke faitohi peʼe ʼave he poapoaki ʼofa ʼi te telefoni. Pea ʼaua naʼa ke tuʼania ʼo ʼuhiga mo te ʼu meʼa ʼae ka ke ui. Ko he ʼu palalau ʼe haʼu mai tou loto ʼe lagi ko te meʼa pe ʼaia ʼe ʼaoga anai ki tou tehina peʼe tuagaʼane ke hoko atu tana nofo agatonu pea ke fimalie ai.—Taag. 12:25; Efe. 4:29.

11. ʼE foaki feafeaʼi mai e Sehova tona poto?

¹¹ ʼE foaki mai e Sehova ia te poto. Neʼe tohi fenei e te tisipulo ko Sakopo: “Kapau ʼe ʼi ai he tahi ia koutou ʼe ʼaoga ki ai te poto, ke ina haga kole ki te ʼAtua, pea ʼe foaki age anai ki ai, koteʼuhi ʼe foaki lahi e te ʼAtua ki te hahaʼi fuli ʼaki tona loto katoa pea ʼe mole ina fai he valoki.” (Sakp. 1:5) Ohage ko tona fakaha ʼi te vaega, ʼe mole taupau pe e Sehova tona poto maʼa ia. ʼE ina foaki lahi ia. Pea ʼe toe ui e Sakopo ka ina foaki tona poto, “ʼe mole ina fai he valoki.” ʼE mole loto e Sehova ke tou ufiufi moka tou kole age tana takitaki. Kae ʼe ina loto ia ke tou kole age tona poto.—Taag. 2:​1-6.

12. Kotea te ʼu aluʼaga ʼe tou maʼu ke tou vaevae ai te ʼu meʼa ʼae ʼe tou iloʼi?

¹² ʼE feala koa ke tou faʼifaʼitakiʼi ia Sehova ʼo tou vaevae totatou poto, ia te ʼu meʼa ʼae ʼe tou iloʼi? (Pes. 32:8) ʼE lahi te ʼu aluʼaga ʼe feala ke tou fai ai te faʼahi ʼaia. Ohage la, ʼe tou akoako ia natou ʼae ʼe foʼofoʼou ʼi te faifakamafola. Ko te ʼu tagata ʼafea ʼe natou lotolelei ʼo akoako te ʼu tehina faifekau fakaminisitelio pea mo te tahi ʼu tehina ke natou fakahoko ʼanatou ʼu gaue ʼi te kokelekasio. Pea ko te ʼu tehina mo tuagaʼane ʼae kua popoto ʼi te gaue laga fale pea mo te taupau ʼo ʼatatou fale tauhi, ʼe natou akoako ʼihi ke natou iloʼi te fakahoko ʼo te ʼu gaue ʼaia.

13. Ka tou akoako ʼihi, ʼe feafeaʼi hatatou faʼifaʼitakiʼi te vaevae ʼae ʼa Sehova tona poto?

¹³ Ka ke akoako ʼihi, faiga ʼo faʼifaʼitakiʼi ia Sehova. Manatuʼi ʼe foaki lahi e Sehova tona poto. ʼO toe feia mo tatou tou vaevae te ʼu meʼa fuli ʼae ʼe tou iloʼi mo natou ʼae ʼe tou akoako. ʼAua naʼa ke taupau he koga ʼi tau tuʼania ʼae naʼa ina fetogi koe ʼi he ʼaho. Pea ʼaua naʼa ke maʼu te manatu ʼae: “Neʼe mole akoʼi au e he tahi! Koia ʼe mole au akoako anai au he tahi!” Mole tonu ke maʼu te manatu ʼaia ʼi te hahaʼi ʼa Sehova. Kae tou fiafia ʼi te vaevae te ʼu faʼahi ʼae kua tou mahino ki ai pea mo tou “toe foaki foki mo ʼotatou maʼuli” maʼa natou ʼae ʼe tou akoako. (1 Tes. 2:8) Ko tona fakaʼuhiga ʼe tou fai anai ia meʼa fuli ʼe tou lavaʼi moʼo akoako ʼo natou. ʼE tou fakaʼamu “ke natou liliu mo natou ʼo popoto ʼi te akoʼi ʼo te ʼu meʼa ʼaia ki ʼihi age.” (2 Tim. 2:​1, 2) Kapau ʼe tou faiga fuli ke tou vaevae lahi totatou poto, ʼe tou liliu anai ia tatou pea mo natou ʼaia ʼo popoto mo fiafia lahi age.

MOKA ʼE MOLE FAKAHA MAI TE LOTOFAKAFETAʼI

14. ʼI te agamahani, kotea ʼae ʼe fai e te hahaʼi moka neʼe tou foaki he meʼa pe neʼe tou tokoni kia natou?

¹⁴ ʼI te agamahani, ka tou foaki he meʼa peʼe ka tou tokoni ki he tahi, pea ʼe fakamalo mai, tafito la moka ko ʼotatou tehina mo tuagaʼane. ʼE lagi natou fakaha tonatou lotofakafetaʼi ʼo natou faitohi mai peʼe natou fai he tahi age meʼa. (Kol. 3:15) Pea ka natou fai te faʼahi ʼaia, ʼe tou fiafia lahi ai.

15. Kotea ʼae ʼe tonu ke tou manatuʼi moka mole fakaha mai e he tahi te lotofakafetaʼi?

¹⁵ Kae ʼi ʼihi temi ʼe mole fakaha mai e ʼihi tonatou lotofakafetaʼi. ʼE hage ʼe natou meʼa noaʼi te temi, peʼe ko te malohi peʼe ko te falā ʼae neʼe tou fakaʼaogaʼi moʼo tokoni kia natou. Kapau ʼe hoko he aluʼaga feia, kotea ʼae ʼe feala ke tou fai ke mole puli ai totatou fiafia peʼe tou iita? ʼE feala ke tou manatuʼi te vaega tafito ʼo te alatike ako ʼaeni, ia Gaue 20:35. Tatau aipe pe ʼe natou fakamalo mai peʼe kailoa, kae ʼe feala pe ke tou filifili ke tou fiafia ʼi tatatou haga foaki. Kotea ʼae ka tokoni mai? Tou vakaʼi he ʼu faʼahi ʼe feala ke tou fai.

16. Kotea ʼae ʼe tonu ke tou faiga ʼo fai?

¹⁶ Faiga ʼo faʼifaʼitakiʼi ia Sehova. ʼE lahi ʼosi te ʼu meʼa ʼae ʼe ina foaki ki te hahaʼi, pe ʼe natou lotofakafetaʼi peʼe kailoa. (Mat. 5:​43-48) ʼE fakapapau mai e Sehova, kapau ʼe tou toe foaki mo tatou ‘ʼo mole tou ʼamanaki ke liufaki mai’ peʼe ke fakaha mai te lotofakafetaʼi, pea ‘ʼe lahi anai totatou fakapale.’ (Luka 6:35) Koia, pe ʼe fakamalo mai peʼe kailoa he tahi neʼe tou foaki he meʼa ki ai pe neʼe tou tokoni ki ai, kae tou manatuʼi ʼe liufaki mai pe anai e Sehova he ʼe tou “foaki ʼaki he loto ʼe fiafia.”—Taag. 19:17; 2 Ko. 9:7.

17. Kotea ʼae ka tokoni mai ke tou taupau he manatu ʼe lelei? (Luka 14:​12-14)

¹⁷ Ia Luka 14:​12-14 (Lau) ʼe tou maʼu ai te tahi tokoni ke tou taupau ai he manatu ʼe lelei moka tou foaki. ʼE mole kovi moka tou fakaha te tali kaiga peʼe tou lotofoaki kia natou ʼae ʼe feala ke natou toe liufaki mai. Kae ʼe feafeaʼi moka tou tokagaʼi ko hatatou agamahani te foaki he ʼe tou ʼamanaki ke toe liufaki mai? Faiga ʼo mulimuli ki te tokoni ʼa Sesu. Tou fakaha te tali kaiga ki he tahi ʼe tou iloʼi ʼe mole feala anai ke ina toe liufaki mai. ʼE tou fiafia ai anai he ʼe tou faʼifaʼitakiʼi ia Sehova. ʼE toe feala ai ke tou taupau totatou fiafia moka mole fakaha mai e ʼihi tonatou lotofakafetaʼi.

18. Kotea ʼae ka ina uga tatou ke ʼaua naʼa tou maʼu he ʼu manatu ʼe kovi ki ʼotatou tehina mo tuagaʼane?

¹⁸ ʼAua naʼa ke maʼu he manatu ʼe kovi ʼo ʼuhiga mo ʼihi. (1 Ko. 13:7) Kapau ʼe tou tokoni ki he tahi kae mole fakamalo mai, tou fai te fehuʼi ʼaeni: ‘ʼE maʼuli galo koa pe neʼe lagi galo ke fakamalo mai?’ Peʼe lagi ʼi ai he tahi ʼu tupuʼaga. Ohage la, ʼe lotofakafetaʼi ʼihi kae ʼe faigataʼa kia natou hanatou fakaha mai. ʼE lagi natou ufiufi moka neʼe tou tokoni age koteʼuhi ʼi muʼa atu neʼe ko natou ʼae ʼi te agamahani neʼe tokoni ki ʼihi. Tatau aipe pe ʼe kotea tona tupuʼaga, kae ko totatou ʼofa ki ʼotatou tehina mo tuagaʼane ʼe tokoni mai ke mole tou maʼu he ʼu manatu ʼe kovi pea ke tou taupau totatou fiafia moka tou foaki.—Efe. 4:2.

19-20. He koʼe ʼe fua lelei anai kia tatou te kataki fualoa moka tou foaki ki ʼihi? (Vakaʼi mo te pāki.)

¹⁹ Ke ke kataki fualoa. Neʼe tohi fenei e te Hau poto ko Salomone ʼo ʼuhiga mo te lotofoaki: “Li tau pane ki te fuga vai, he ʼe ke toe maʼu anai ʼi te hili pe ʼo ni ʼaho.” (Ekl. 11:1) Ohage ko tona fakaha mai ʼi te ʼu palalau ʼaia, ʼe lagi fakaha mai anai e ʼihi tanatou lotofakafetaʼi ‘hili ʼo ni ʼaho,’ ko tona fakaʼuhiga hili ki ai he temi fualoa. ʼE ha lelei te faʼahi ʼaia ʼi te aluʼaga ʼaeni neʼe hoko.

²⁰ Kua hili ki ai ni taʼu, ko te ʼohoana ʼo he taupau fakasiliko neʼe faitohi ki he kiʼi tehina neʼe hoki papitema age pe. Neʼe ina fakalotomalohiʼi ai ke nofo agatonu. Hili teitei taʼu ʼe valu ki muli age, neʼe tali age e te kiʼi tehina ʼaia ki te ʼohoana ʼo te taupau fakasiliko, ʼo ina tohi fenei: “ʼE au loto ke ke iloʼi neʼe lahi ʼosi tau fakalotofimalieʼi au lolotoga te ʼu taʼu ʼaeni kua hili.” Neʼe ina hoko atu fenei: “Ko tau tohi neʼe malave loto kia au, kae tafito te vaega Tohi-Tapu pea ʼe mole au galoʼi anai.”a ʼI tana ʼosi fakamatala age te ʼu fihifihia ʼae neʼe tau mo ia, neʼe tohi fenei e te kiʼi tehina: “ʼI ʼihi temi, neʼe kua au fiu ʼosi, ʼo au fia tuku taku tauhi ʼae kia Sehova. Kae ʼi te ʼu temi ʼaia, neʼe au manatuʼi ai te vaega ʼae neʼe ke tohi mai, pea neʼe au toe maʼu ai te malohi ʼo au haga hoko atu.” ʼE ina toe ui fenei: “Lolotoga te ʼu taʼu ʼaia ʼe valu, ʼe ko tau tohi ʼo feia mo te vaega Tohi-Tapu ʼae neʼe ina fakalotomalohiʼi lahi au.” ʼE mahino ia neʼe lahi ʼaupito te fiafia ʼa te ʼohoana ʼo te taupau fakasiliko ʼi tana maʼu te tohi ʼaia hili ki ai ni taʼu! ʼE toe feia pe anai mo tatou. Kapau neʼe tou tokoni ki he tahi, ʼe feala pe anai ke fakamalo mai hili ki ai he temi fualoa.

21. He koʼe ʼe ke fakatotonu ke ke haga faʼifaʼitakiʼi te lotofoaki ʼo Sehova?

²¹ Ohage ko tatatou ui, neʼe fakatupu tatou e Sehova ʼaki he fealagia makehe. Logo la ʼe tou fiafia moka foaki mai he meʼa ʼofa, kae ʼe toe lahi age totatou fiafia moka tou foaki. ʼE tou fiafia moka feala ke tou tokoni ki ʼotatou tehina mo tuagaʼane. Pea ʼe tou fiafia moka natou fakamalo mai. Pea tatau aipe pe ʼe natou fakamalo mai peʼe kailoa, kae ʼe tou fiafia pe he neʼe tou fai te meʼa ʼae ʼe lelei. ʼAua naʼa galo kia tatou, kotea pe he meʼa ʼe tou foaki ‘ʼe lava foaki mai e Sehova ʼo lahi age ʼi te meʼa ʼaia.’ (2 Klk. 25:9) ʼE lahi tuʼumaʼu pe ia te meʼa ʼae ʼe foaki mai e Sehova. Pea ka fakapale tatou e Sehova, ʼe toe lahi age ai totatou fiafia. Koia, tou fakatotonu ke tou haga faʼifaʼitakiʼi tatatou Tamai ʼi selo, ʼae ʼe lotofoaki.