Tou Lotofakafetaʼi Ki Tē Lotofoaki ʼa Sehova

KO SEHOVA ko te ʼAtua ʼe lotofoaki. (Sakopo 1:17) ʼE feala tatatou sisio ki tana lotofoaki ʼi te ʼu meʼa fuli neʼe ina fakatupu. Neʼe ina fakafonu te ʼatulaulau ʼaki te ʼu fetuʼu pea neʼe ina teuteuʼi te kele ʼaki te vao ʼakau matalelei kehekehe.—Pesalemo 65:13, 14; 147:7, 8; 148:3, 4.

Ko te tagata faitohi ʼo te Pesalemo 104, neʼe lotofakafetaʼi ʼaupito ʼo ʼuhiga mo te ʼu meʼa fuli neʼe fakatupu e Sehova, koia neʼe ina tohi ai te hiva fakavikiviki kia te ia. Ka kotou lau te pesalemo ʼaia, ʼe kotou lotofakafetaʼi koa ohage ko te tagata faipesalemo? Neʼe ina ui fenei: “E au hiva anai [kia Sehova] i toku mauli katoa, e au fakafetai anai ki toku Atua i toku mauli katoa.” (Pesalemo 104:33) ʼE mole kotou fia fakahoko koa la te faʼahi ʼaia?

TE FAʼIFAʼITAKI LAHI ʼO TE LOTOFOAKI

ʼE loto e Sehova ke tou faʼifaʼitakiʼi tana lotofoaki. Pea ʼe ina tuku mai he ʼu tupuʼaga lelei ke tou lotofoaki ai. Neʼe ina takitaki te apositolo ko Paulo ʼaki tona laumalie ke ina tohi fenei: “Fakatotonu ki te kau maukoloa o te sekulo aeni ke aua naa natou fiamealahi, pea ke aua naa natou tuku tanatou falala ki ni koloa fakatemi, kae ke tuku tanatou falala ki te Atua, ae e ina foaki lahi kia tatou te u mea fuli, ke tou fakafiafia ai. Fakatotonu kia natou ke natou fai te lelei, ke natou maukoloa i te u gaue lelei, ke natou faiofa, pea ke natou loto tokoni, pea ke natou tanaki ki te kahau he koloa mauhiga ae kua fakatuu i he fakatafito malohi, koteuhi ke natou too te mauli mooni.”—1 Timoteo 6:17-19.

ʼI tana lua tohi ki te kau Kolinito, neʼe fakamahino e Paulo pe kotea ʼae ʼe tonu ke ina uga tatou ke tou lotofoaki ki ʼihi. Neʼe ina ui fenei: “Ke foaki e te tagata takitahi o mulimuli ki te mea ae kua fakapapau ki ai i tona loto, kae mole i te loto mamahi, pee i te fakamaua, koteuhi e ofa te Atua ki ae e foaki mo te fiafia.” (2 Kolinito 9:7) Ko ai ʼae ʼe tou tokoni ki ai moka tou lotofoaki? Neʼe ui e Paulo, ʼe tou tokoni ki ʼihi ʼaki tatatou foaki te ʼu meʼa ʼae ʼe ʼaoga kia natou. Kaʼe ʼe tou toe tokoni kia tatou totonu koteʼuhi ʼe tapuakiʼi anai tatou e Sehova.—2 Kolinito 9:11-14.

Neʼe talanoa leva ia Paulo ki te fakamoʼoni lahi tokotahi ʼo te lotofoaki ʼa te ʼAtua ʼi tana ui fenei: “Ke fai he fakafetaʼi ki te ʼAtua ki te meʼa ʼofa makehe ʼae neʼe ina foaki noa mai.” (2 Kolinito 9:15, MN) Ko te meʼa ʼofa ʼae neʼe foaki noa mai e Sehova, ʼe kau ai te ʼu meʼa lelei fuli neʼe ina foaki mai ʼaki ia Sesu Kilisito. ʼE mole he kupu ʼe maʼu moʼo fakaha te maʼuhiga ʼo te meʼa ʼofa ʼaia.

ʼE feafeaʼi hatatou fakaha tatatou lotofakafetaʼi kia Sehova mo Sesu ki te ʼu meʼa fuli ʼae kua nā fai mo ʼae ka nā ʼamanaki fakahoko maʼa tatou? ʼE tonu ke ha tatatou lotofoaki ʼi tatatou foaki totatou temi, totatou malohi mo ʼotatou koloa ki te tauhi kia Sehova pea moka tou tokoni ki ʼihi ke natou iloʼi ia ia. Tatau aipe pe veliveli peʼe lahi, kaʼe ʼe tou fealagia pe te faʼahi ʼaia.—1 Koloniko 22:14; 29:3-5; Luka 21:1-4.

He ʼu Meʼa ʼOfa Ki Te Gaue Fakamalamanei

Ohage ko te ʼu ʼuluaki Kilisitiano, tokolahi ia ʼaho nei ʼe natou tuku keheʼi ʼonatou meʼa ʼofa ki te gaue fakamalamanei pea ʼe natou ʼai ki te puha meʼa ʼofa ʼo tanatou kokelekasio. (1 Kolinito 16:2) ʼI te mahina fuli, ʼe momoli e te ʼu kokelekasio te ʼu meʼa ʼofa ʼaia ki te filiale ʼo te kau Fakamoʼoni ʼa Sehova ʼo tonatou fenua. ʼE toe feala mo koutou hakotou momoli fakahagatonu he ʼu meʼa ʼofa ki te filiale ʼo te kau Fakamoʼoni ʼa Sehova ʼo tokotou fenua. ʼE feala takotou maʼu te tuʼasila ʼo te filiale ʼaia ʼi totatou tuʼasila ʼi te Neti www.jw.org pea mo kotou fakafelogoʼi mo te pilo ʼae ʼe tokaga ki ai. Koʼeni te ʼu meʼa ʼofa ʼe feala ke kotou momoli:

TE ʼU VAEGA PAʼAGA

ʼE feala hatatou foaki ki he kautahi he vaega paʼaga kaʼe ʼe mole fakamaʼua ki ai hona tupu moka liufaki mai. Ohage la, ʼi Niu-Kaletonia, ʼe feala ke foaki ki te kautahi Association Les Témoins de Jéhovah ia he paʼaga ʼe mole fakamaʼua ki ai hona tupu.

TE ʼU FAʼAHIGA MEʼA ʼOFA KEHEKEHE

ʼE ʼi ai te tahi ʼu faʼahiga fai meʼa ʼofa ke lagolago ki te haʼele lelei ʼo te gaue fakamalamanei ʼo te Puleʼaga. ʼE kau ki ai te ʼu meʼa ʼaeni:

Te ʼu Kotala assurance vie : ʼE feala ke maʼu e he kautahi ia he falā mai he kotala assurance vie.

Te Falā ʼi Te Fale Paʼaga: ʼE feala ke fakatuʼutuʼu e he tahi ke ina fakagafua ki he kautahi fakalotu, ke natou toʼo ʼi tona fale paʼaga he kiʼi alagā paʼaga.

Te ʼu Kele Mo Te ʼu Nofoʼaga Pea Mo Te Falā: ʼI ʼihi fenua, ohage la ko Falani mo Niu-Kaletonia pea mo Uvea mo Futuna, ʼe feala ke tou foaki te ʼu meʼa ʼofa ʼaia ʼi muʼa ʼo he notea ki he ʼu kautahi ʼe fakamoʼoni ki ai te lao. Kotou fakafelogoʼi mo te Petele ʼi muʼa ʼo hakotou foaki te ʼu faʼahiga meʼa ʼofa ʼaia.

Te ʼu Pepa ʼAe ʼe Tohi Ai Te Tofiʼa ʼe Tuku e He Tahi: ʼE feala ke tou foaki he kele mo he nofoʼaga pea mo he falā ki he kautahi, ʼo tou tohi ʼi he pepa totatou tofiʼa ʼae ʼe tou tuku, ʼo mulimuli pe ki te lao. ʼE toe feala hatatou foaki fakakoga peʼe katoa te ʼu meʼa ʼofa ʼaia.

ʼE feala ke foaki ki te Association Les Témoins de Jéhovah ia he kele mo he nofoʼaga mo he falā pea mo he tofiʼa. ʼI muʼa ʼo te tohi e he tahi te pepa ʼae ʼe tuʼu ai te tofiʼa ʼae ʼe ina tuku, ʼe tonu ke ina vakaʼi fakalelei te ʼu koloa ʼae ʼe faʼifaʼitaliha ki ai. Kapau neʼe ina tohi katoa te pepa ʼaia, pea ʼe lelei ke ina tuku ki te notea.

ʼE feala kia ia ʼae ʼe fia foaki meʼa ʼofa ke fakakaukau ki te ʼu faʼahiga fai kehekehe ʼaia ke lagolago ki te gaue ʼo te Puleʼaga. ʼE kehekehe te ʼu aluʼaga, koia ʼe tonu ai ke fakalavelave te faʼahi ʼaia ki he notea peʼe ki he tahi ʼe fakamoʼoni ki ai te lao. ʼE toe feala ke kotou fakafelogoʼi mo te Petele ʼo kotou faitohi ki ai peʼe telefoni ki te numelo ʼaeni 43 75 00. ʼE feala anai ke foaki e te Petele he tahi ʼu manatu ki te ʼu meʼa ʼae ʼe feala ke tuku e he tahi hili tona mate, pea mo te ʼu meʼa ʼofa ohage ko he kele mo he nofoʼaga mo he falā pea mo he tofiʼa.