ʼE Fakafeagai Koa Ia Te Kau Fakamaʼoni ʼa Sehova Ki Te Foʼi Huki Tauʼi Mahaki?
Kailoa. ʼE mole fakafeaga’i te kau Fakamo’oni ʼa Sehova ki te ʼu foʼi huki tau’i mahaki. Pea ʼo ʼuhiga mo te ʼu fo’i huki ʼaia, ko te tonu ʼe fakalogo pe anai ki te Fakamo’oni ʼa Sehova takitokotahi. Tokolahi ia natou ne’e natou filifili ke natou huki tauʼi mahaki.
ʼE matou kumi he ʼu faito’o ʼe lelei pea ʼe matou lelei’ia te kua lakalaka ki mu’a ia te ʼu gaue fakatoketa ki te tau’i ʼo te ʼu mahaki faigata’a. ʼE matou lotofakafeta’i kia natou ʼae ʼe faiva pea mo gaue kinakina ki te lelei ʼo te ma’uli fakasino ʼi te ʼu fale mahaki, tafito la ʼi te ʼu temi ʼaeni ʼae ʼe tou felaveʼi ai mo te Kolonavilusi.
ʼE matou gaue fakatahi mo natou ʼae ʼe takitaki mo tokaga ki te lelei ʼo te ma’uli fakasino. Ohage la, talu mai te kamata ʼo te mahaki ʼae ko te Kolonavilusi, ne’e matou ta ʼi tomatou tu’asila ʼi te Neti te ʼu alatike pea mo te ʼu ʼata viteo ʼe fakalaka ia lea e 100 tupu ʼe natou fakama’uhiga’i te faka’apa’apa ʼae ki te ʼu lekula fakafenua ʼo ʼuhiga mo te mahaki. Ne’e uga ia te ʼu alatike pea mo te ʼu ʼata viteo ʼaia te haha’i ke natou fakalogo ki te ʼu tu’utu’uni ʼae ki te ʼu fakatahi lalahi, te fakatu’akoi ʼo te ʼu fealuʼaki, te fanufanu ʼo te ʼu nima pea mo te ʼu’ufi ʼo te gutu, ʼo feia pe ki te ʼu tahi atu fakatotonu ʼo te ʼu pule ma’oluga.—Loma 13:1, 2.
Kua lau’i ta’u, te fakamanatu e ʼatatou tohi te ʼu pelesepeto ʼaeni:
Ko te ʼu tonu ʼo ʼuhiga mo te malolo fakasino ʼe fakalogo anai ki te loto ʼo te tagata takitokotahi.—Kalate 6:5.
“[Ko te nusipepa ʼaeni] ʼe mole ina fakaha mai pea mo tokoni mai ke tou faka’aoga’i he fa’ahiga faito’o. Kailoa ia. ʼE talanoa pe ia ki he ʼu me’a kua hoko pea ʼe ina tuku kia ia ʼae ʼe ina lau ke ina fakakaukau’i pea mo taʼofi tokotahi ʼana tonu.”—Réveillez-vous ! (Fakafalani) ʼaho 8 ʼo Fepualio 1987.
“Pea ʼo ʼuhiga leva mo tokotou kiʼi famili pe ’e tali ia te foi huki tau’i mahaki pe’e natou fakafisi ki ai, ko te tonu ʼe fakalogo pe anai kia natou.”—Réveillez-vous ! (Fakafalani) ʼaho 8 ʼo ʼAukusito 1993.
ʼE tou faigaʼi ke faito’o tatou he ʼe ko te ma’uli ʼe ma’uhiga ʼaupito.—Gaue 17:28.
“Ka mahaki te kau Fakamo’ni ʼa Sehova ʼe natou olo ʼo kumi faito’o ʼi te ʼu fale mahaki. ʼE natou faiga tu’uma’u ke natou felave’i mo te ʼu toketa. ʼE natou ʼo’ofa ki te ma’uli. ʼE natou fai ia me’a fuli ʼe fakapotopoto pea mo alu tahi mo te Tohi-Tapu ke loaloaga tonatou ma’uli.”—Ko Te Tule Leʼo (Fakafalani) ʼaho 1 ʼo Oketopeli 1975.
“E tali fakalelei ia te kau Fakamo’oni ʼa Sehova te ʼu faito’o. ʼE natou faiga ke natou haohaoa mai te ʼu mahaki pea ke natou ma’uli fualoa. Koia, ohage ko Luka, te Kilisitiano ʼo te ʼuluaki sekulo, ʼe ’i ai te ʼu Fakamo’oni ʼa Sehova ko te ʼu toketa. . . . ʼE lotomahino te kau Fakamo’oni ʼa Sehova ki te gaue kinakina pea mo te ʼofa ʼo natou ʼae ʼe natou faito’o te ʼu mahaki. Pea ʼe natou lotofakafeta’i kia natou fuli ʼe natou gaue fakamalotoloto mo fakafimalie ia te ʼu mamahi ʼe ta’u mo natou ʼe mahahaki.” Ko Te Tule Leʼo ʼaho 1 ʼo Malesio 2011.