Ko Ai Ne’e Ina Fakatu’u Te Kautahi ’a Te Kau Fakamo’oni ’a Sehova?

Ne’e kamata te hisitolia ’o te kautahi ’a te kau Fakamo’oni ’a Sehova ’o te temi nei ’i te ta’u 1870. ’I te temi ’aia, ne’e fai e te ki’i kutuga ’o te kau Ako ’o te Tohi-Tapu ’ae ne’e ma’u’uli ovi ki te kolo ko Pittsburgh, ’i Pennsylvanie ’i Amelika, ia te ’u fekumi ke natou mahino ki te ’u akonaki ’o te Tohi-Tapu. Ne’e natou fakatatau te ’u akonaki ’ae ’e fai e te ’u lotu pea mo ’ae ’e ako’i mo’oni mai ’i te Tohi-Tapu. Ko te ’u me’a ’ae ne’e natou mahino ki ai, ne’e natou kamata ta ’i te ’u tohi, mo te ’u sulunale, pea mo te nusipepa ’ae ’e higoa ’i te temi nei Ko Te Tule Le’o ’e Ina Kalaga’i Te Pule’aga ’o Sehova.

Ne’e kau te tagata ko Charles Taze Russell ’i te ki’i kutuga ’o te kau Ako ’o te Tohi-Tapu. Logo la ’i te temi ’aia ne’e ko Russell ’ae ne’e ina takitaki te gaue ’ae ko te ako’i ’o te Tohi-Tapu ki te haha’i pea mo te ta ’o Te Tule Le’o, ka’e ne’e mole ina fakatu’u hana lotu fo’ou. Ne’e faiga tafitō ia Russell mo te kau Ako ’o te Tohi-Tapu ke natou fakamafola te ’u akonaki ’a Sesu Kilisito pea mo mulimuli ki te ’u gaue ’ae ne’e fai e te ’uluaki kokelekasio ’o te kau Kilisitiano. ’E matou fakamo’oni ko Sesu ’ae ne’e ina Fakatu’u te Lotu Fakakilisitiano pea ’e matou tui ’e ko ia ne’e ina fakatu’u tamatou kautahi.—Kolose 1:18-20.