Senesi

26 Neʼe to leva he hoge ʼi te fenua ohage pe ko te ʼuluaki hoge ʼae neʼe to ʼi te temi ʼo Apalahamo.+ Koia neʼe alu ai ia Isaake ki Kelali, kia Apimeleke te hau ʼo te kau Filisitini. 2 Pea neʼe ha ia Sehova kia ia, ʼo ina ui age: “ ʼAua naʼa ke hifo ki Esipito. Nofo ʼi te fenua ʼae ka au fakaha atu. 3 Nofo ʼi ai ohage ko he matapule,+ pea ʼe au nofo anai mo koe mo tapuakiʼi koe, he ʼe au foaki atu anai kia koe pea mo tou hakoga te ʼu fenua fuli ʼaeni.+ ʼE au fakahoko anai te fakapapau ʼaeni neʼe au fai ki tau tamai ko Apalahamo:+ 4 ‘ ʼE au fakahahaʼi anai tou hakoga ohage ko te ʼu fetuʼu ʼo te lagi,+ pea ʼe au foaki anai ki tou hakoga te ʼu fenua fuli ʼaia,+ pea ʼe tapuakina* moʼoni anai te ʼu puleʼaga fuli ʼo te kele ʼaki tou hakoga,’+ 5 koteʼuhi neʼe fakalogo ia Apalahamo ki toku leʼo, pea neʼe ina taupau ʼaku fakamaʼua, mo ʼaku fakatotonu, mo ʼaku lekula pea mo ʼaku lao.”+ 6 Neʼe nofo ai ia Isaake ʼi Kelali.+

7 Ka fehuʼi age e te ʼu tagata ʼo te fenua kia Isaake pe ko ai ia Lepeka, neʼe ina tali age: “ ʼE ko toku tokolua.”+ Neʼe mataku ʼi te fakaha age ʼe ko tona ʼohoana, he neʼe ina ui: “ ʼE lagi matehi anai au e te ʼu tagata ʼo te fenua ʼuhi ko Lepeka,” koteʼuhi neʼe ko he fafine finemui.+ 8 Hili ki ai he temi, neʼe sio ia Apimeleke, te hau ʼo te kau Filisitini mai tona matapa fakamalama ki te fakaha e Isaake tona ʼofa* kia Lepeka.+ 9 Neʼe pauʼi atu aipe e Apimeleke ia Isaake ʼo ina ui age: “ ʼE ko tou ia ʼohoana! He koʼe neʼe ke ui mai: ‘ ʼE ko toku tokolua’?” Pea neʼe tali age e Isaake: “Neʼe au palalau feia he neʼe au mataku naʼa matehi au ʼuhi ko ia.”+ 10 Kae neʼe hoko atu e Apimeleke: “He koʼe neʼe ke fai mai kia matou te meʼa ʼaeni?+ Neʼe feala pe ke momoe he tahi ʼo taku hahaʼi mo tou ʼohoana pea ke matou agahala ai ʼuhi ko koe!”+ 11 Neʼe fakatotonu leva e Apimeleke ki tana hahaʼi katoa: “Ko ʼae ʼe fāfā ki te tagata ʼaeni mo tona ʼohoana, ʼe mate moʼoni anai!”

12 Pea neʼe nunusi leva e Isaake tana pulapula ʼi te fenua ʼaia. ʼI te taʼu pe ʼaia, neʼe ina utu tuʼa 100 te meʼa neʼe ina nunusi, he neʼe tapuakiʼi ia ia e Sehova.+ 13 Neʼe liliu leva ʼo maʼu koloa, pea neʼe hoko atu pe tana maʼu koloa, ʼo kaku ki tana koloaʼia ʼaupito. 14 Neʼe ina maʼu he faga ovi mo he faga pipi, pea mo he ʼu hahaʼi faifekau ʼe kaugamalie.+ Pea neʼe maheka leva te kau Filisitini kia ia.

15 Koia neʼe tanu kele ai e te kau Filisitini te ʼu vai keli fuli ʼae neʼe keli e te ʼu tagata faifekau ʼo tana tamai ko Apalahamo.+ 16 Pea neʼe ui e Apimeleke kia Isaake: “Mavae ʼi heni, he ʼe kua ke malohi age koe ia matou.” 17 Neʼe mavae ai ia Isaake ʼo alu ʼo fakatuʼu tona nofoʼaga ʼo ovi ki te vai tafe ʼo Kelali,+ pea neʼe nofo leva ʼi ai. 18 Pea neʼe toe keli e Isaake te ʼu vai keli ʼae neʼe keli ʼi te temi ʼo tana tamai ko Apalahamo kae neʼe tanu e te kau Filisitini ʼi te ʼosi mate ʼo Apalahamo.+ Pea neʼe ina foaki ki te ʼu vai keli ʼaia te ʼu higoa ʼae neʼe foaki e tana tamai.+

19 ʼI te temi ʼae neʼe keli ai e te ʼu tagata faifekau ʼa Isaake he ʼu vai keli ʼi te potu fenua ʼaia, neʼe natou maʼu he vai keli ʼe maʼa ai te vai. 20 Pea neʼe kē te ʼu tagata tauhi ovi ʼo Kelali mo te ʼu tagata tauhi ovi ʼa Isaake, ʼo natou ui: “ ʼE ko tamatou vai!” Koia neʼe ina fakahigoaʼi ai te vai keli ʼaia ko Eseki,* he neʼe natou kē mo ia. 21 Pea neʼe natou kamata keli he tahi age vai keli, pea neʼe toe hoko ai he kē. Koia neʼe ina fakahigoaʼi ai ko Sitina.* 22 Ki muli age, neʼe mavae mai ai ʼo alu ʼo keli he tahi age vai keli pea neʼe mole hoko ai he kē. Koia neʼe ina fakahigoaʼi ai ko Leopoti* pea neʼe ina ui: “Koteʼuhi kua foaki mai e Sehova ʼi te ʼaho nei he fenua ʼe lahi pea kua ina fakahahaʼi matou ʼi te fenua.”+

23 Pea neʼe mavae leva mai ai ʼo alu ki Pele-sepa.+ 24 ʼI te po ʼaia, neʼe ha ia Sehova kia ia ʼo ina ui age ki ai: “Ko au te ʼAtua ʼo tau tamai ko Apalahamo.+ ʼAua naʼa ke mataku,+ he ʼe au nofo mo koe, pea ʼe au tapuakiʼi anai koe mo fakahahaʼi tou hakoga ʼuhi ko taku tagata faifekau ko Apalahamo.”+ 25 Neʼe laga e Isaake ʼi ai he ʼaletale pea neʼe fetapa ki te huafa ʼo Sehova.+ Pea neʼe ina fakatuʼu ai tona fale la,+ pea neʼe keli leva e ʼana tagata faifekau ʼi ai he vai keli.

26 Ki muli age, neʼe haʼu ia Apimeleke mai Kelali mo Ausati, tana tagata faitokoni pea mo Pikoli, te pule ʼo tana foʼi kautau,+ ʼo natou olo kia ia. 27 Pea neʼe ui e Isaake kia natou: “He koʼe ʼe kotou ʼomai kia au, kae neʼe kotou fehihiʼa mo kapu au mai tokotou fenua?” 28 Neʼe natou tali age ki ai: “ ʼE matou sisio ʼe nofo ia Sehova mo koe.+ Koia ʼe matou fia fai ai mo koe he fuakava, pea ke tou fai fakatahi te fakapapau ʼaeni:+ 29 ʼE mole ke fai mai anai he meʼa ʼe kovi ohage pe ko tamatou mole fai atu he meʼa ʼe kovi kia koe, kae neʼe matou agalelei kia koe ʼi tamatou tuku ke ke mavae ʼi te tokalelei. ʼE matou iloʼi ʼe tapuakiʼi koe e Sehova.” 30 Neʼe ina teuteuʼi leva he kaitahi maʼa natou, pea neʼe natou kakai ai mo iinu. 31 ʼI te ʼaho ake, neʼe natou ʼala uhuuhu leva ʼo fai te fuakava.+ Pea neʼe tuku leva e Isaake ke natou olo, neʼe natou mavae ai ʼi te tokalelei.

32 ʼI te ʼaho ʼaia, neʼe olo te ʼu tagata faifekau ʼa Isaake ʼo palalau age ki ai ʼo ʼuhiga mo te vai keli ʼae neʼe natou keli.+ Neʼe natou ui age: “Kua matou maʼu he vai!” 33 Koia neʼe ina fakahigoaʼi ko Sipa. Ko te tupuʼaga la ʼaia ʼo te fakahigoa ʼo te kolo ko Pele-sepa+ ʼo kaku mai ki te ʼaho nei.

34 ʼI te taʼu 40 ʼo Esau, neʼe ʼohoana leva mo Sutita, te ʼofafine ʼo Peeli, te tagata Heti pea mo Pasemati, te ʼofafine ʼo Eloni, te tagata Heti.+ 35 Neʼe lotomamahi ʼaupito ia Isaake mo Lepeka ʼuhi ko te ʼu fafine ʼaia.+