Senesi
28 Koia neʼe pauʼi ai e Isaake ia Sakopo, ʼo ina tapuakiʼi ia ia pea neʼe ina fakatotonu age ki ai: “ ʼE mole tonu ke ke ʼohoana mo he taʼahine ʼo Kanaane.+ 2 Kae ke ke alu ki Patane-alame, ki te famili ʼo Petuele, te tamai ʼo tau faʼe, pea ke ke kumi hou ʼohoana ʼi te ʼu ʼofafine ʼo Lapane,+ te tokolua ʼo tau faʼe. 3 ʼE tapuakiʼi anai koe e te ʼAtua Mafimafi pea ʼe ina foaki atu anai hou hakoga ʼe kaugamalie. ʼE ke liliu moʼoni anai ko he puleʼaga lahi.+ 4 Pea ʼe ina foaki atu anai kia koe mo tou hakoga te ʼu tapuakina ʼae neʼe ina fakapapau kia Apalahamo.+ ʼE feala ai anai hau maʼu te fenua ʼae neʼe ke nofo matapule ai, pea neʼe foaki e te ʼAtua kia Apalahamo.”+
5 Neʼe fekauʼi ai e Isaake ia Sakopo ke alu. Neʼe alu ai ki Patane-alame, kio Lapane, te foha ʼo Petuele te tagata Alamea,+ pea ko te tokolua ʼo Lepeka,+ te faʼe ʼa Sakopo mo Esau.
6 Neʼe sio ia Esau ki te tapuakiʼi e Isaake ia Sakopo, mo tana fekauʼi ke alu ki Patane-alame ʼo kumi ʼi ai hona ʼohoana, pea mo tana fakatotonu age ki ai ʼi te temi ʼae neʼe ina tapuakiʼi ia ia: “ ʼAua naʼa ke ʼohoana mo he taʼahine ʼo Kanaane.”+ 7 Pea neʼe toe sio ia Esau ki te fakalogo ʼa Sakopo ki tana tamai mo tana faʼe, ʼo alu ai ki Patane-alame.+ 8 Neʼe mahino ai ia Esau neʼe mole leleiʼia e tana tamai ko Isaake te ʼu taʼahine ʼo Kanaane.+ 9 Koia, logo la neʼe kua ʼi ai he ʼu ʼohoana ʼo Esau, kae neʼe alu kia Isemaele ʼo ʼohoana mo Maalate. Ko Maalate ko te ʼofafine ʼo Isemaele, te foha ʼo Apalahamo pea ko te tokolua ʼo Nepasote.+
10 Neʼe mavae ia Sakopo mai Pele-sepa ʼo alu ki Halani.+ 11 Neʼe tau leva ki he koga meʼa pea neʼe ina fakatuʼutuʼu ke moe ai ʼi te po ʼaia, he neʼe kua ʼosi to te laʼa. Neʼe ina toʼo ai he foʼi maka ke ʼuluga ki ai pea neʼe takoto leva.+ 12 Neʼe moemisi, pea koʼeni, neʼe ʼi ai he tuʼuga neʼe tuʼu ʼi te kele pea neʼe kaku ki te lagi. Pea neʼe hifo mo hake ʼi ai te ʼu ʼaselo ʼa te ʼAtua.+ 13 Pea koʼeni, neʼe tuʼu ia Sehova ʼi ʼoluga, pea neʼe ina ui age:
“Ko au ia Sehova, te ʼAtua ʼo tau kui ko Apalahamo pea mo te ʼAtua ʼo Isaake.+ Ko te kele ʼae ʼe ke takoto ai, ʼe au foaki atu anai kia koe mo tou hakoga.+ 14 Pea ʼe liliu moʼoni anai tou hakoga ʼo kaugamalie ohage ko te efu ʼo te kele.+ ʼE mavetevete anai ʼi te potu uesite, mo te potu esite, mo te potu noleto pea mo te potu saute. Pea ʼe tapuakina* moʼoni anai te ʼu famili fuli ʼo te kele ʼaki ia koe mo tou hakoga.+ 15 ʼE au nofo mo koe, pea ʼe au haofaki anai ia koe ʼi he potu pe ʼe ke alu ki ai. Pea ʼe au toe fakaliliu mai anai koe ki te fenua ʼaeni.+ ʼE mole au liʼaki anai koe. ʼE au fakahoko moʼoni anai te meʼa ʼae neʼe au fakapapau atu.”+
16 Neʼe ʼala ake leva ia Sakopo mai tana moe, pea neʼe ina ui: “ ʼE nofo moʼoni ia Sehova ʼi te koga meʼa ʼaeni, kae neʼe mole au iloʼi au.” 17 Neʼe mataku ai. Pea neʼe ina toe ui: “Ko te koga meʼa ʼaeni ʼe fakaofoofo!* ʼE mahino ia, ʼe ko te fale ʼaeni ʼo te ʼAtua,+ pea ʼe ko te matapa ʼaeni ʼo te lagi.”+ 18 Koia, neʼe tuʼu ake ai ia Sakopo ʼi te kei hegihegi ʼo toʼo te foʼi maka ʼae neʼe ʼuluga ai. Pea neʼe ina fakatuʼu ohage ko he pou, pea neʼe ina huaʼi he lolo ʼi ʼoluga ʼo te foʼi maka.+ 19 Neʼe ina fakahigoaʼi ai te koga meʼa ʼaia ko Petele,* kae neʼe higoa te kolo ʼi muʼa atu ko Lusi.+
20 Neʼe fai leva e Sakopo te fakapapau ʼaeni: “Kapau ʼe haga nofo ia te ʼAtua mo au, mo ina puipui au ʼi taku faifagona pea mo ina foaki mai he pane ke au kai mo ni mutuʼi meʼa ke au tui, 21 pea kapau ʼe au toe liliu ʼi te tokalelei ki te fale ʼo taku tamai, ʼe fakaha moʼoni ai anai e Sehova ʼe ko ia toku ʼAtua. 22 Pea ko te foʼi maka ʼaeni neʼe au fakatuʼu ohage ko he pou, ʼe liliu anai ko he fale ʼo te ʼAtua.+ Pea ʼe au foaki moʼoni anai ki te ʼAtua te vahe tahi ki te hogofulu ʼo te ʼu meʼa fuli ʼae ka ina foaki mai.”