Numelo

11 Neʼe kamata meo leva te hahaʼi ia muʼa ʼo Sehova. ʼI te logo ʼa Sehova ki ai, neʼe kovi ʼosi tona ita pea neʼe fakato ifo ai e Sehova he afi, ʼo tutu ai ʼihi neʼe nonofo ʼi te ʼu tuʼakoi ʼo te nofoʼaga. 2 ʼI te fetagihi ʼa te hahaʼi kia Moisese, neʼe faikole ai kia Sehova,+ pea neʼe gata leva te afi. 3 Neʼe fakahigoa ai te koga meʼa ko Tapela,* koteʼuhi neʼe fakato ifo e Sehova he afi kia natou.+

4 Neʼe fakaha leva e te faʼahiga hahaʼi kehekehe mo kaugamalie*+ ʼae neʼe fakatahi mo natou tanatou holi ʼae ki he meʼa kai.+ Pea neʼe toe fetagihi foki mo te kau Iselaele, ʼo natou ui: “Ko ai ʼae ka ina foaki mai anai he kanoʼi manu ke matou kai?+ 5 ʼE matou manatuʼi te ʼu ika ʼae neʼe matou kai noa ʼi Esipito, ʼo feia mo te ʼu kokomu, mo te ʼu foʼi ipu, mo te ʼu pualo, mo te ʼu onioni pea mo te lai!+ 6 Kae ʼi te temi nei, ʼe mole kei ʼi ai homatou malohi. ʼE mole he tahi age meʼa ʼe matou sisio ki ai, gata pe ki te mane ʼaeni.”+

7 Neʼe hage te mane+ ko he ʼu kiʼi pulapula hina+ pea mo he puluʼi ʼakau magoni ko te piteliomi. 8 Neʼe mavetevete te hahaʼi ʼi te nofoʼaga ʼo tae te mane, pea neʼe natou momosi peʼe natou tuki. Pea neʼe natou fakamoho leva ʼi he ʼu kulo peʼe natou fai ʼaki ni pane takafuafua.+ Neʼe kano lelei te mane ohage ko he ʼu foʼi keke malie neʼe fai ʼaki te lolo. 9 ʼI te poʼuli, ʼi te temi ʼae neʼe hifo ai te hahau ki te nofoʼaga, neʼe toe hifo ai foki mo te mane.+

10 Neʼe logo ia Moisese ki te fetagihi ʼa te hahaʼi mo ʼonatou famili, neʼe tahi tuʼu te tagata ʼi tona muʼa fale la. Neʼe kovi ʼosi te ita ʼo Sehova,+ pea neʼe mole toe leleiʼia foki e Moisese te faʼahi ʼaia. 11 Pea neʼe ui e Moisese kia Sehova: “He koʼe ʼe ke fakamamahiʼi feiaʼi au? Kotea koa ʼae neʼe au fai ke mole ke ʼofa ai ia au, kae neʼe ke tuku mai te hahaʼi ʼaeni ke liliu ko haku kavega?+ 12 ʼE ko au koa te tamai ʼa te hahaʼi fuli ʼaeni? ʼE natou hifo mai koa mai ia au, ke tupu ai tau ui mai: ‘Ke ke fua natou, ohage ko te fua ʼo he tamasiʼi kei meamea e he tagata gaue,’* ʼo ʼave natou ki te fenua ʼae neʼe ke fakapapauʼi ke foaki ki ʼanatou kui?+ 13 ʼE au maʼu anai ʼifea he kanoʼi manu ke foaki ki te hahaʼi fuli ʼaeni? Koteʼuhi ʼe natou haga fetagihi pe ʼi ʼoku muʼa, ʼo natou ui: ‘Foaki mai he kanoʼi manu ke matou kai!’ 14 ʼE mole feala ke au tokaga tokotahi ki te hahaʼi fuli ʼaeni. ʼE mole au lavaʼi anai.+ 15 Kapau ʼe feia tau gaohi au, fakalelei siʼou loto, ʼe lelei age ke ke matehi au.+ Kapau ʼe ke ʼofa ia au, ʼaua naʼa ke fakaha mai he tahi age malaʼia.”

16 Neʼe tali e Sehova kia Moisese: “Ke ke filifili he ʼu tagata ʼe toko 70 ʼi te kau tagata takitaki ʼo Iselaele, ia natou ʼae ʼe ke iloʼi ko he ʼu tagata takitaki pea mo he ʼu tagata taupau ʼo te hahaʼi.+ Ke ke ʼaumai ia natou ki te fale la ʼo te fono pea ke natou tutuʼu ʼi ai mo koe. 17 ʼE au hifo atu anai+ ʼo palalau mo koe ʼi ai,+ pea ʼe au toʼo anai he potu ʼo toku laumalie maʼoniʼoni+ ʼae ʼe ia koe ʼo tuku kia natou, pea ʼe natou tokoni atu anai ki te taupau ʼo te hahaʼi, ke mole ke ʼamo tokotahi te kavega ʼaia.+ 18 ʼE ke ui anai ki te hahaʼi: ‘Kotou fakamaʼoniʼoniʼi ia koutou totonu ki apogipogi,+ koteʼuhi ʼe kotou kai anai he kanoʼi manu, he neʼe logo ia Sehova ki takotou fetagihi,+ pea mo takotou ui: “Ko ai ʼae ka ina foaki mai anai he kanoʼi manu ke matou kai? Neʼe lelei age tomatou maʼuli ʼi Esipito.”+ ʼE foaki moʼoni atu anai e Sehova he kanoʼi manu, pea ʼe kotou kai anai.+ 19 ʼE mole kotou kai anai ʼi he ʼaho pe ʼe tahi, peʼe 2, peʼe 5, peʼe 10, peʼe 20, 20 kae ʼi he mahina katoa, ʼo kaku ki takotou fiu pea mo fakalialia ki ai,+ he neʼe kotou liʼaki ia Sehova, ʼae ʼe nofo ʼi te lotolotoiga ʼo koutou, pea neʼe kotou fetagihi ʼi ʼona muʼa, ʼo ui: “He koʼe neʼe matou mavae mai Esipito?” ’ ”+

21 Pea neʼe ui e Moisese: “ ʼE au nofo ʼi te lotolotoiga ʼo he hahaʼi ʼe kau ai te ʼu tagata ʼe toko 600 000,*+ kae ʼe ke ui mai koe: ‘ ʼE au foaki anai kia natou he kanoʼi manu, pea ʼe feala anai hanatou kai ki ai ʼi he mahina katoa’! 22 Kapau ʼe tamateʼi te faga manu katoa, ʼe feʼauga ʼape koa? Peʼe kapau ʼe puke te ʼu ika fuli ʼo te tai, ʼe feʼauga ʼape koa?”

23 Neʼe tali e Sehova kia Moisese: “ ʼE nounou koa te nima ʼo Sehova?+ ʼE ke sio pe anai pe ʼe hoko peʼe kailoa te ʼu meʼa ʼae neʼe au ui atu.”

24 Neʼe alu ai ia Moisese ʼo fakaha age ki te hahaʼi te ʼu folafola ʼa Sehova. Neʼe ina fakatahiʼi leva he ʼu tagata ʼe toko 70 ʼi te kau takitaki ʼo te hahaʼi pea neʼe ina fakatotonu age ke natou takatakai te fale la ʼo te fono.+ 25 Neʼe hifo leva ia Sehova ʼi he ʼao+ ʼo palalau age kia ia,+ pea neʼe ina toʼo he potu ʼo te laumalie maʼoniʼoni+ ʼae neʼe ia Moisese ʼo tuku ki te ʼu tagata takitaki ʼe toko 70. Pea ʼi te temi pe ʼae neʼe hifo ai te laumalie kia natou, neʼe natou aga fakapolofeta,*+ kae neʼe mole natou toe fai te aga ʼaia.

26 Neʼe kei nonofo he foʼi toko lua ʼo te ʼu tagata ʼaia ʼi te nofoʼaga, pea neʼe nā higoa ko Eletate mo Metate. Neʼe mole nā olo ki te fale la ʼo te fono, kae neʼe nā kau ia natou ʼae neʼe tohi. Neʼe hifo te laumalie kia naua pea neʼe nā aga fakapolofeta ʼi te nofoʼaga. 27 Pea neʼe lele he tagata tupulaga ʼo tala age kia Moisese: “ ʼE hage ia Eletate mo Metate ko he ʼu polofeta ʼi te nofoʼaga!” 28 Pea neʼe ui e Sosue,+ te foha ʼo Nune pea neʼe ko te tagata tokoni gaue ʼa Moisese talu mai tona temi tupulaga: “Moisese, siʼoku ʼaliki, ke ke taʼofi ia naua!”+ 29 Kae neʼe ui age e Moisese ki ai: “ ʼE ke tuʼania koa naʼa fua kovi kia au te faʼahi ʼaia? ʼE au fakaʼamu ke hage te hahaʼi fuli ʼa Sehova ko he kau polofeta pea ke tuku ifo e Sehova tona laumalie kia natou!” 30 Ki muli age, neʼe toe liliu ia Moisese ki te nofoʼaga mo te kau tagata takitaki ʼo Iselaele.

31 Neʼe fakaagi leva e Sehova he matagi pea neʼe ʼaumai ai he ʼu manulele mai te tai ki te ʼu tafaʼaki ʼo te nofoʼaga+ pea neʼe tonu ke faifagona he tahi ʼi he ʼaho katoa ke feala hana fakalaka ʼi te faʼahi ʼae neʼe natou lele ai. Neʼe tapuke te ʼu manulele ia teitei fasiga nima* ʼe lua ʼi te fuga kele. 32 ʼI te ʼaho katoa ʼaia, mo te po katoa, ʼo feia mo te ʼaho katoa ʼae neʼe hoa mai ki ai, neʼe nofo ʼalaʼala te hahaʼi ke natou puke te ʼu manulele. Neʼe mole he tahi neʼe malalo tana puke manulele ia kato lalahi ʼe hogofulu,* pea neʼe natou fakaleta te ʼu manulele maʼa natou ʼi te ʼu tafaʼaki ʼo te nofoʼaga. 33 Neʼe heʼeki natou kai pe la te kanoʼi manu, neʼe kei natou nofo mo ʼanatou maʼaga pea neʼe kovi ʼosi te ita ʼa Sehova ki te hahaʼi. Neʼe tauteaʼi ai e Sehova te hahaʼi ʼaki he toe mātea lahi.+

34 Neʼe fakahigoa ai te koga meʼa ʼaia ko Kipiloti-ataava,*+ koteʼuhi neʼe tanu ʼi ai te hahaʼi ʼae neʼe natou holi ki he meʼa kai.+ 35 Neʼe mavae leva te hahaʼi mai Kipiloti-ataava pea neʼe natou olo ki Aseloti+ ʼo nonofo ai.