Numelo

12 Neʼe kamata palalau kovi leva ia Miliamu mo Alone ʼo ʼuhiga mo Moisese he neʼe ʼohoana mo te fafine Kusi.+ 2 Neʼe nā ui: “Neʼe palalau pe koa ia Sehova ʼaki ia Moisese? Neʼe mole koa la toe palalau ʼaki ia taua?”+ Kae neʼe fakalogo ia Sehova.+ 3 Ko Moisese neʼe ko te tagata ʼae neʼe agavaivai tokotahi* ʼi te ʼu tagata fuli+ ʼo te kele.

4 Fokifa pe, neʼe ui e Sehova kia Moisese, mo Alone pea mo Miliamu: “Kotou olo toko tolu ki te fale la ʼo te fono.” Neʼe natou olo toko tolu ai. 5 Pea neʼe hifo leva ia Sehova ʼi he ʼao+ ʼo tuʼu ʼi te huʼaga ʼo te fale la ʼo te fono, pea neʼe ina pauʼi ia Alone mo Miliamu. Pea neʼe nā olo ai. 6 Neʼe ina ui: “Fakalelei siʼokolua loto, kae ke kolua fagono mai ki ʼaku folafola. Kapau la neʼe nofo he polofeta ʼa Sehova ʼi te lotolotoiga ʼo koutou, neʼe au fakaha kia ia pe ko ai ia au ʼi he meʼa ʼe ha,+ pea neʼe au palalau ki ai ʼi he moemisi.+ 7 Kae neʼe mole au fai feia mo taku tagata faifekau ko Moisese! Neʼe au tuku age taku hahaʼi fuli ke tokaga ki ai.*+ 8 ʼE au palalau kia ia, ʼo ma fehagaʼaki.+ Ko he meʼa pe ʼe au fia ui age ki ai, ʼe au fakaha lelei age. ʼE toe ha ia Sehova kia ia. Koia, he koʼe neʼe mole kolua tuʼania ʼi te palalau kovi ʼo ʼuhiga mo taku tagata faifekau ko Moisese?”

9 Neʼe kovi ʼosi ai te ita ʼo Sehova kia naua, pea neʼe mavae ai. 10 Neʼe mavae te ʼao ʼi te fuga fale la ʼo te fono, pea koʼeni, neʼe kilia ia Miliamu. Pea neʼe hina tona kilia ohage ko te nive.+ Neʼe maliu leva ia Alone ʼo sio kua kilia ia Miliamu.+ 11 Neʼe ui atu aipe e Alone kia Moisese: “Siʼoku ʼaliki, ʼofa mai. Fakalelei siʼou loto, ʼaua naʼa ke tukugakoviʼi maua ʼo ʼuhiga mo te agahala ʼaia! Neʼe mole ko he meʼa fakapotopoto ʼae neʼe ma fai. 12 Fakalelei siʼou loto, ke ʼaua naʼa ke tuku feia ia Miliamu, ohage ko he tamasiʼi neʼe fanauʼi mai kua mate pea kua kamata pala tona sino!” 13 Pea neʼe pauʼi ai ia Moisese kia Sehova, ʼo ui: “Fakalelei siʼou loto, ʼAtua e, ke ke fakamalolo ia ia!”+

14 Neʼe tali e Sehova kia Moisese: “Kapau ʼe ʼanuhi ia Miliamu e tana tamai, ʼe mole koa la ufiufi lolotoga ʼaho ʼe fitu? Ke ʼave ia ia ki tuʼa atu ʼo te nofoʼaga ke nofo tokotahi ai lolotoga ʼaho ʼe fitu.+ Pea hili ʼaia, ʼe feala anai hana toe liliu mai.” 15 Neʼe ʼave ai ia Miliamu ki tuʼa atu ʼo te nofoʼaga ke nofo tokotahi ai lolotoga ʼaho ʼe fitu,+ pea neʼe mole mavae te hahaʼi ʼo kaku ki te toe liliu mai ʼa Miliamu. 16 Hili ʼaia, neʼe mavae leva te hahaʼi mai Aseloti+ pea neʼe natou fakatuʼu tonatou nofoʼaga ʼi te toafa ʼo Palani.+