Numelo
21 Neʼe logo leva ia te hau ʼo Alate,+ ʼae neʼe ko he tagata Kanaane pea neʼe nofo ʼi te Nekepe, ki te ʼomai ʼa te kau Iselaele ʼi te ala ʼo Atalimi. Neʼe ina tauʼi ai te kau Iselaele pea neʼe ina ʼave popula ʼihi ia natou. 2 Pea neʼe fai leva e te kau Iselaele te fakapapau ʼaeni kia Sehova: “Kapau ʼe ke tuku mai te hahaʼi ʼaeni ki ʼomatou nima, ʼe matou maumauʼi moʼoni anai ʼonatou kolo.” 3 Neʼe logo ia Sehova ki te ʼu leʼo ʼo te kau Iselaele pea neʼe ina tuku te kau Kanaane ki ʼonatou nima. Pea neʼe natou matematehi natou mo maumauʼi ʼonatou kolo. Koia, neʼe fakahigoaʼi ai te koga meʼa ʼaia ko Holema.*+
4 Neʼe hoko atu tanatou faifagona mai te Moʼuga ʼo Hole+ ʼo natou olo ʼi te ala ʼo te Tai Kula, ke mole natou fakalaka ai ʼi te fenua ʼo Etome,+ kae neʼe fiu leva te hahaʼi. 5 Pea neʼe palalau kovi te hahaʼi ki te ʼAtua mo Moisese,+ ʼo natou ui: “He koʼe neʼe kolua fakamavae matou mai Esipito, ke matou mamate ai ʼi te toafa? ʼE mole ʼi ai hamatou meʼa kai mo hamatou moʼi vai,+ pea kua matou* fehihiʼa ki te pane fakalialia ʼaeni.”+ 6 Neʼe ʼaumai leva e Sehova he ʼu gata kafokona ʼo natou ʼusiʼusiʼi ai te hahaʼi. Pea neʼe kaugamalie ai te kau Iselaele neʼe mamate.+
7 Pea neʼe ʼomai leva te hahaʼi kia Moisese, ʼo ui age: “Neʼe matou agahala ʼi tamatou palalau kovi kia Sehova pea mo koe.+ Ke ke hufakiʼi matou pea mo kole kia Sehova ke ina fakamamaʼo te ʼu gata.” Neʼe hufakiʼi ai e Moisese ia te hahaʼi.+ 8 Pea neʼe ui e Sehova kia Moisese: “Ke ke fai he fakatata ʼo he gata kafokona, pea ke fakapipiki ki he pou. Ko he tahi pe neʼe ʼuʼusi, ʼe tonu anai ke sio ki ai, pea ʼe maʼuli anai.” 9 Neʼe fai atu aipe e Moisese he gata kapa+ pea neʼe ina fakapipiki ki he pou.+ Ka ʼuʼusi he tahi pea mo sio ki te gata kapa, neʼe maʼuli ai.+
10 Hili ʼaia, neʼe mavae te kau Iselaele ʼo fakatuʼu tonatou nofoʼaga ʼi Opoti.+ 11 Neʼe natou mavae leva mai Opoti ʼo fakatuʼu tonatou nofoʼaga ʼi Ise-apalimi,+ ʼi te toafa ʼae ʼi te potu esite pea ʼe haga ki Moape. 12 Neʼe natou mavae mai ai ʼo fakatuʼu tonatou nofoʼaga ʼi te Vai Tafe* ʼo Selite.+ 13 Pea neʼe natou mavae leva mai ai ʼo fakatuʼu tonatou nofoʼaga ʼi te potu fenua ʼo te Alenone.+ ʼE tuʼu te Alenone ʼi te toafa, ʼae ʼe kamata mai ʼi te tuʼakoi ʼo te kau Amole. Ko te Alenone ko te tuʼakoi ʼaia ʼo Moape, ʼi te vaha ʼo Moape mo te kau Amole. 14 Koia ʼae ʼe talanoa ai ʼi te tohi ʼo te ʼu Tau ʼa Sehova ʼo ʼuhiga mo “Vahepi ʼi Sufa, mo te ʼu vai tafe* ʼo Alenone, 15 pea mo te Alenone ʼae ʼe alu ki te kolo ko Ali ʼo mulimuli ki te tuʼakoi ʼo Moape.”
16 Hili ʼaia, neʼe natou olo leva ki Peele. Neʼe ui e Sehova kia Moisese ʼi te vai keli ʼaia: “Ke ke fakatahiʼi te hahaʼi ke au foaki ai kia natou he vai.”
17 ʼI te temi ʼaia, neʼe hiva e Iselaele te hiva ʼaeni:
“Vai keli e, ke mapuna ake te vai!—Kotou tali* ki ai!
18 Te vai keli ʼae neʼe keli e te kau pule, ʼae neʼe keli e te kau ʼaliki ʼo te hahaʼi,
ʼAki he toko fakaʼaliki pea mo ʼanatou toko ʼa natou totonu.”
Neʼe natou mavae ai leva mai te toafa ʼo olo ki Matana, 19 mai Matana neʼe natou olo ki Naaliele, pea mai Naaliele ki Pamoti.+ 20 Neʼe natou mavae mai Pamoti ʼo olo ki te potu fenua laulelei ʼae ʼi te fenua ʼo Moape,+ ʼi te koga meʼa maʼoluga ʼo Pisika,+ ʼae ʼe kita sio ai ki Sesimone.*+
21 Pea neʼe fekauʼi e Iselaele he ʼu tagata ʼave logo ke olo kia Sihone, te hau ʼo te kau Amole, ʼo ui age:+ 22 “Tuku ke matou fakalaka ʼi tou fenua. ʼE mole matou fakalaka anai ʼi he moʼi kele neʼe kotou to pulapula ai peʼe ko he gaueʼaga vite. ʼE mole matou inu anai te vai ʼo he vai keli. ʼE matou haʼele pe anai ʼi te Ala ʼo Te Hau ʼo kaku ki tamatou ʼosi fakalaka ʼi tou fenua.”+ 23 Kae neʼe mole tali e Sihone ke fakalaka ia Iselaele ʼi tona fenua. Neʼe ina fakatahiʼi tana foʼi kautau katoa, pea neʼe olo ai ʼo tauʼi ia Iselaele ʼi te toafa. ʼI tanatou tau atu ki Saatesi, neʼe natou fetauʼaki ai mo Iselaele.+ 24 Kae neʼe malo ia Iselaele ia ia, pea neʼe natou matematehi te hahaʼi ʼaki te heleta,+ ʼo natou maʼu leva tona fenua,+ mai te Alenone+ ki te Sapoke,+ ʼae ʼe ovi ki te kau Amone, he ʼe tuʼu ovi ia Saesele+ ki te fenua ʼo te kau Amone.+
25 Neʼe maʼu ai e Iselaele te ʼu kolo fuli ʼaia, pea neʼe natou nonofo leva ʼi te ʼu kolo fuli ʼo te kau Amole,+ ʼae ʼe kau ai ia Heseponi pea mo te ʼu kolo liliki fuli ʼae ʼi ʼona tafaʼaki. 26 Koteʼuhi ko Heseponi neʼe ko te kolo ʼo Sihone, ia te hau ʼo te kau Amole, ʼae neʼe fetauʼaki mo te hau ʼo Moape pea neʼe ina maʼu leva tona fenua katoa ʼo kaku ki te Alenone. 27 Koia ʼae ʼe fai ai te ʼu palalau manukinuki ʼaeni:
“Kotou ʼomai ki Heseponi.
Ke laga te kolo ʼo Sihone pea ke fakatuʼu malohi.
28 He neʼe haʼu he afi mai Heseponi, he uloʼi afi mai te kolo ʼo Sihone.
Neʼe vela ai te kolo ko Ali ʼae ʼi Moape, ʼei te kau ʼaliki ʼo te ʼu faʼahi maʼoluga ʼo te Alenone.
29 Malaʼia kia koe, Moape! ʼE pulihi anai koutou, hahaʼi ʼo Kemosi!+
ʼE feholaki ʼona foha pea ʼe ʼave popula ʼona ʼofafine e Sihone, te hau ʼo te kau Amole ʼuhi ko ia.
30 Tou ʼohofi ia natou,
ʼE maumauʼi anai ia Heseponi ʼo kaku ki Tiponi,+
Tou maumauʼi te kolo ʼaia ʼo kaku ki Nofasi,
ʼE mafola anai te vela ʼo kaku ki Metepa.”+
31 Neʼe nofo ai leva ia Iselaele ʼi te fenua ʼo te kau Amole. 32 Pea neʼe fekauʼi e Moisese he ʼu tagata ke olo ʼo vakaʼi fakafufu te kolo ko Saesele.+ Neʼe ʼohofi leva e te kau Iselaele te ʼu kolo liliki ʼae ʼi ʼona tafaʼaki pea neʼe natou maʼu, kae neʼe natou kapu te kau Amole ʼae neʼe nonofo ai. 33 Hili ʼaia, neʼe natou maliu leva ʼo hake ʼi te Ala ʼo Pasani. Pea neʼe haʼu ia Oke,+ te hau ʼo Pasani mo tana foʼi kautau katoa, ʼo tauʼi natou ʼi Etelei.+ 34 Kae neʼe ui e Sehova kia Moisese: “ ʼAua naʼa ke mataku ia ia,+ he ʼe au tuku atu anai ki ʼou nima, ʼo feia mo tana foʼi kautau katoa pea mo tona fenua.+ Pea ʼe ke fai anai kia ia ohage pe ko te meʼa ʼae neʼe ke fai kia Sihone, te hau ʼo te kau Amole, ʼae neʼe nofo ʼi Heseponi.”+ 35 Neʼe natou malo ai ia ia, mo ʼona foha pea mo tana foʼi kautau katoa, pea neʼe mole hao he tahi.+ Pea neʼe natou maʼu leva tona fenua.+