ʼUluaki Hau
7 Neʼe taʼu 13 te laga e Salomone tona fale hau,+ ʼo kaku ki tana fakaʼosi ia meʼa fuli.+
2 Pea neʼe ina laga te Fale ʼo Te Vao Matuʼa ʼo Lipane,+ neʼe fasiga nima* 100 tona loa, mo fasiga nima 50 tona laulahi pea mo fasiga nima 30 tona maʼoluga. Neʼe hili te fale ʼaia ʼi he ʼu pou neʼe fai ʼaki te ʼakau ko te sete. Neʼe fakatuʼu te ʼu pou ʼo fai ai te ʼu foʼi ʼatu ʼe fa. Pea neʼe toe hili ʼi te ʼu pou te ʼu foʼi lalago neʼe fai ʼaki te ʼakau ko te sete.+ 3 Neʼe fola ni lauʼi papa sete ʼi ʼoluga ʼo te ʼu foʼi lalago ʼae neʼe hili fakalavalava ʼi te ʼu pou. Neʼe ko pou* ʼe 45, pea neʼe taki 15 ʼi te ʼatu. 4 Neʼe ʼi ai te ʼu ʼatu ʼe tolu ʼo te ʼu matapa fakamalama mo ʼonatou kaumatapa, pea neʼe fehagaʼaki te ʼu matapa fakamalama ia nivo ʼe tolu. 5 Neʼe tapa fa te ʼu huʼaga fuli mo te ʼu kaumatapa, ohage pe ko te ʼu muʼa matapa fakamalama ʼae neʼe fehagaʼaki ia nivo ʼe tolu.
6 Pea neʼe ina laga te Fale* ʼo Te ʼu Pou, neʼe fasiga nima 50 tona loa mo fasiga nima 30 tona laulahi, pea neʼe ʼi ai he fakamalumaluʼaga ʼi muʼa, mo ni pou pea mo tona ʼato.
7 Neʼe ina toe laga foki mo te Fale* ʼo Te Hekaʼaga Fakahau,+ ʼae neʼe faifakamau ai, pea neʼe toe higoa ko te Fale ʼo Te Faifakamau.+ Neʼe ʼaofi te loto fale ʼaia ʼaki te sete mai lalo ki te palafo.
8 Ko te fale hau ʼae neʼe tonu ke nofo ai, neʼe tuʼu ʼi te tahi age malaʼe,+ ʼi muli ʼo te Fale ʼo Te Hekaʼaga Fakahau, pea neʼe toe tatau pe tona faʼahiga laga. Neʼe ina toe laga foki mo he fale maʼa te ʼofafine ʼo Falaone, ʼae neʼe ina ʼohoanaʼi. Neʼe tatau te fale ʼaia mo te Fale ʼo Te Hekaʼaga Fakahau.+
9 Ko te ʼu fale fuli ʼaia neʼe fai ʼaki te ʼu foʼi maka totogi kovi+ neʼe taʼataʼaga ʼo fuafua lelei, pea neʼe fakamomole katoa ʼaki ni tutuʼu. Neʼe fakaʼaogaʼi te ʼu foʼi maka ʼaia ki te fakatafito ʼo te ʼu fale ʼaia ʼo kaku ki te gataʼaga ʼo te ʼu kaupa, pea neʼe toe fakaʼaogaʼi ki te ʼu kaupa ʼae neʼe laga ʼi tuʼa ʼo kaku ki te malaʼe lahi.+ 10 Pea neʼe fai te fakatafito ʼaia ʼaki he ʼu foʼi maka lalahi mo totogi kovi. Ko ʼihi foʼi maka neʼe fasiga nima hogofulu, pea ko ʼihi age neʼe fasiga nima valu. 11 Pea neʼe hili ʼi te ʼu fuga maka ʼaia he tahi ʼu foʼi maka totogi kovi, neʼe taʼataʼaga ʼo fuafua lelei, pea mo te ʼakau ʼae ko te sete. 12 Ko te kaupa ʼae neʼe ina ʼa takai te malaʼe lahi neʼe fai ʼaki he ʼu ʼatu ʼe tolu ko he ʼu foʼi maka neʼe taʼataʼaga pea mo he ʼatu ʼe tahi ko te lalago sete. Neʼe toe feia mo te malaʼe+ ʼo te fale ʼo Sehova pea mo te fakamalumaluʼaga ʼo te fale.+
13 Neʼe fekauʼi leva e te Hau ko Salomone ke ʼaumai ia Hilame+ mai Tile. 14 Neʼe ko te tama ʼa te fafine vitua mai te telepi ʼo Nefetali, pea ko tana tamai neʼe ko he tagata mai Tile pea neʼe ko he tagata tufuga kapa.*+ Neʼe faiva ia Hilame, mo poto+ pea neʼe ina iloʼi lelei te ʼu faʼahiga gaue kehekehe ʼae neʼe fakaʼaogaʼi ai te kapa. Neʼe haʼu ai ki te Hau ko Salomone pea neʼe ina fai ʼana gaue fuli.
15 Neʼe ina fai te ʼu pou kapa ʼe lua.+ Neʼe fasiga nima 18 te maʼoluga ʼo te pou ʼe tahi, pea neʼe ʼaoga he maea ʼe fasiga nima 12 tona loa moʼo fuafua te takafuafua ʼo te ʼu pou ʼaia ʼe lua.*+ 16 Neʼe ina fai leva ʼaki te kapa he ʼu ʼuluʼi pou ʼo te ʼu pou takitahi, pea neʼe fasiga nima nima te maʼoluga ʼo te ʼuluʼi pou. 17 Neʼe ʼi ai he meʼa vagavaga mo he ʼu seini neʼe fi ʼi te ʼu ʼuluʼi pou takitahi ʼaia.+ Neʼe koga fitu te meʼa vagavaga ʼaia. 18 Neʼe ina fakapipiki ʼi he koga ʼe tahi he ʼu kelenate ia ʼatu ʼe lua, moʼo fakamataleleiʼi te ʼu ʼuluʼi pou ʼaia ʼe lua. 19 Ko te agaaga ʼo te ʼu ʼuluʼi pou ʼaia ʼo te ʼu pou ʼo te fakamalumaluʼaga neʼe hage ko te lilio, ʼae ko tona maʼoluga neʼe fasiga nima fa. 20 Pea neʼe ha te lilio ʼaia ʼi ʼoluga ʼo te faʼahi ʼae neʼe fua lahi, ʼae neʼe ovi ki te meʼa vagavaga. Pea neʼe ko kelenate ʼe 200 ʼi te ʼu ʼatu ʼae neʼe ʼi te takafoli ʼo te ʼu ʼuluʼi pou takitahi.+
21 Neʼe ina fakatuʼu te ʼu pou ʼo te fakamalumaluʼaga ʼo te fale lotu.*+ Neʼe ina fakatuʼu te pou ʼi te faʼahi mataʼu* ʼo ina fakahigoaʼi ko Sakine,* pea neʼe ina fakatuʼu te pou ʼi te faʼahi hema* ʼo ina fakahigoaʼi ko Poase.*+ 22 Pea ko te agaaga ʼo te ʼu ʼuluʼi pou neʼe hage ko te lilio. Neʼe fakaʼosi ai te fai ʼo te ʼu pou.
23 Neʼe ina faʼu leva te foʼi tane vai lahi, neʼe higoa ko te Tai.+ Neʼe takafuafua, neʼe fasiga nima 10 mai te tahi faʼahi ki te tahi age faʼahi, pea neʼe fasiga nima 5 tona maʼoluga. Neʼe ʼaoga he maea ʼe fasiga nima 30 moʼo fuafua te takafoli ʼo te foʼi tane vai ʼaia.*+ 24 Pea ʼi lalo ifo ʼo te tapaʼi tane vai, neʼe ina fakamataleleiʼi ia tona takafoli ʼaki ni fuaʼi ʼakau takafuafua.+ Neʼe ko fuaʼi ʼakau ʼe hogofulu ʼi he fasiga nima ʼe tahi, pea neʼe ina fai ia ʼatu ʼe lua. Neʼe haka te kapa moʼo faʼu fakatahi te foʼi tane mo te ʼu fuaʼi ʼakau ʼaia ʼi he moʼi temi pe ʼe tahi. 25 Neʼe hili te foʼi tane vai ʼi te ʼu vitulo ʼe 12.+ Neʼe haga te ʼu vitulo ʼe 3 ki te potu noleto, neʼe haga te tahi ʼu vitulo ʼe 3 ki te potu uesite, neʼe haga te tahi ʼu vitulo ʼe 3 ki te potu saute pea neʼe haga te tahi ʼu vitulo ʼe 3 ki te potu esite. Neʼe hili te foʼi tane ʼaia ia natou pea neʼe natou felituʼaʼaki. 26 Ko te matolu ʼo te foʼi tane ʼaia neʼe ko te laulahi ʼo te ʼalofi nima ʼe tahi.* Neʼe hage te fai ʼo te tapaʼi tane ʼaia ko he tapaʼi ipu pea mo he lilio. Neʼe ko fua pate* vai ʼe 2 000 ʼi loto.
27 Neʼe ina fai leva te ʼu saliote* kapa ʼe hogofulu.+ Ko he saliote ʼe tahi neʼe fasiga nima fa tona loa, mo fasiga nima fa tona laulahi pea mo fasiga nima tolu tona maʼoluga. 28 Pea neʼe fenei te faʼu ʼo te ʼu saliote ʼaia: Neʼe ʼi ai te ʼu pano ʼi te ʼu tafaʼaki, pea neʼe ʼa takai te ʼu pano ʼaia ʼaki he ʼu ukamea. 29 Pea neʼe togi ʼi te ʼu pano ʼae neʼe ʼa takai ʼaki he ʼu ukamea ni laione,+ mo ni vitulo pea mo ni kelupimi,+ pea neʼe toe togi te ʼu meʼa ʼaia ʼi te ʼu ukamea. ʼI ʼoluga pea mo lalo ʼo te ʼu laione pea mo te ʼu vitulo, neʼe togi ai te ʼu fihu. 30 Pea ko he saliote ʼe tahi neʼe ʼi ai ʼona foʼi teka kapa ʼe fa pea mo te ʼu foʼi lalago kapa ʼo te ʼu foʼi teka. Neʼe taʼofi te ʼu foʼi lalago kapa e ni foʼi vaʼe ia tuliki ʼe fa. Neʼe ʼi ai te ʼu tekeni ʼo te foʼi topu kapa. Neʼe teuteuʼi te ʼu tafaʼaki ʼo te ʼu tekeni ʼaia ʼaki ni fihu. Neʼe haka te kapa moʼo faʼu fakatahi te ʼu tekeni mo te ʼu fihu ʼi he moʼi temi pe ʼe tahi. 31 ʼI lalo ifo ʼo te laugutuʼi topu, neʼe ina fai ai he meʼa ʼi te takafoli, pea mai te takele ʼo te topu ki te lalo meʼa ʼaia ʼi te takafoli neʼe fasiga nima tahi. Mai te ʼu tekeni ki ʼoluga ʼo te meʼa ʼaia ʼi te takafoli, neʼe fasiga nima tahi vaelua tona maʼoluga. Neʼe ʼi ai te ʼu meʼa neʼe togi ʼi te meʼa ʼaia ʼi te takafoli. Pea ko te ʼu pano ʼae ʼi te ʼu tafaʼaki ʼo te ʼu saliote, neʼe mole takafuafua kae neʼe tapa fa. 32 Neʼe tuʼu te ʼu foʼi teka ʼe fa ʼi lalo ifo ʼo te ʼu pano ʼae neʼe ʼi te ʼu tafaʼaki, pea neʼe pipiki ʼihi koga ʼo te ʼu foʼi teka ki te saliote, pea ko te maʼoluga ʼo he foʼi teka ʼe tahi neʼe fasiga nima tahi vaelua. 33 Pea neʼe fai te ʼu foʼi teka ohage pe ko te ʼu foʼi teka ʼo te ʼu saliote mahani. Neʼe fai te ʼu koga kehekehe fuli ʼo te ʼu foʼi teka ʼaki te ukamea neʼe haka, ʼo feia mo te ʼu foʼi ukamea ʼo te ʼu teka, mo ʼonatou kaho pea mo te ʼu meʼa ʼi te lotomalie ʼo te ʼu foʼi teka, ʼae neʼe fakapipiki ki ai te ʼu kaho. 34 Neʼe takitahi te saliote mo ʼona foʼi vaʼe ʼe fa ia tuliki ʼe fa. Neʼe haka te kapa moʼo faʼu fakatahi te ʼu meʼa ʼaia mo te saliote ʼi he moʼi temi pe ʼe tahi. 35 ʼI ʼoluga ʼo te saliote, neʼe ʼi ai he meʼa ʼi te takafoli ʼo te topu, pea ko tona maʼoluga neʼe ko te vaelua ʼo he fasiga nima. ʼI te meʼa ʼaia, neʼe ʼi ai te ʼu pano neʼe ʼa takai ʼaki he ʼu ukamea, pea neʼe haka te kapa moʼo faʼu fakatahi te ʼu meʼa ʼaia mo te saliote ʼi he moʼi temi pe ʼe tahi. 36 Pea neʼe ina togi ni kelupimi, mo ni laione pea mo ni fuʼu palema ʼi te ʼu faʼahi lauʼatea ʼo te ʼu pano ʼaia mo te ʼu ukamea, pea mo ina togi ni fihu ʼi te takafoli.+ 37 Neʼe fena tana fai te ʼu saliote ʼe hogofulu.+ Neʼe tatau tana fai te ʼu saliote fuli ʼaia ʼaki te kapa neʼe haka,+ pea neʼe tatau tonatou lahi mo tonatou agaaga faʼu.
38 Neʼe ina fai he ʼu foʼi topu kapa ʼe hogofulu.+ Neʼe feala ke ʼai ki he foʼi topu ʼe tahi he fua pate vai ʼe 40. Ko he foʼi topu ʼe tahi neʼe fasiga nima fa.* Neʼe ʼi ai te foʼi topu ʼe tahi ʼi te ʼu saliote takitahi ʼaia ʼe hogofulu. 39 Neʼe ina fakatuʼu leva he ʼu saliote ʼe nima ʼi te faʼahi mataʼu ʼo te fale, pea mo he ʼu saliote ʼe nima ʼi te faʼahi hema ʼo te fale. Pea neʼe ina fakatuʼu te foʼi tane vai ʼae ʼe higoa ko te Tai ʼi te faʼahi mataʼu ʼo te fale, ʼo haga ki te potu saute esite.+
40 Neʼe toe fai foki e Hilame+ te tahi ʼu foʼi topu, mo te ʼu huo takele+ pea mo te ʼu ipu lalahi.+
Neʼe fakaʼosi ai e Hilame te ʼu gaue fuli ʼae neʼe ina fai maʼa te Hau ko Salomone ʼi te fale ʼo Sehova:+ 41 neʼe ina fai te ʼu pou ʼe lua+ pea mo te ʼu ʼuluʼi pou ʼe lua ʼae neʼe hage ko he ʼu ipu, mo te ʼu meʼa vagavaga ʼe lua+ moʼo fakamataleleiʼi te ʼu ʼuluʼi pou ʼe lua ʼae neʼe hage ko he ʼu ipu. 42 Neʼe ina toe fai mo te ʼu kelenate ʼe 400+ ki te ʼu meʼa vagavaga ʼe lua, ko ʼatu ʼe lua ʼo te ʼu kelenate ki he meʼa vagavaga ʼe tahi, moʼo fakamataleleiʼi te ʼu ʼuluʼi pou ʼe lua ʼae neʼe hage ko he ʼu ipu. 43 Neʼe ina toe fai mo te ʼu saliote ʼe hogofulu+ pea mo te ʼu foʼi topu ʼe hogofulu+ ʼae neʼe hili ʼi te ʼu saliote. 44 Neʼe ina toe fai mo te foʼi tane vai ʼae ʼe higoa ko te Tai+ pea mo te ʼu vitulo ʼe 12 ʼae neʼe hili ki ai te tane vai. 45 Neʼe ina toe fai mo te ʼu tanakiʼaga lefulefu, mo te ʼu huo takele, mo te ʼu ipu lalahi pea mo te ʼu meʼa kehekehe fuli, ʼae neʼe fai e Hilame ʼaki te kapa gigila maʼa te Hau ko Salomone ʼi te fale ʼo Sehova. 46 Neʼe haka e te hau te kapa ʼo huaʼi ki he ʼu pa kele moʼo faʼu ʼaki te ʼu meʼa ʼaia, ʼi te koga fenua ʼo te Solotane, ʼi te vaha ʼo Sukoti mo Salatani.
47 Neʼe mole fua e Salomone te ʼu meʼa kehekehe fuli he neʼe lahi ʼaupito. Pea neʼe mole iloʼi ai te mamafa ʼo te kapa.+ 48 Neʼe fai e Salomone te ʼu meʼa fuli ʼaeni ʼo te fale ʼo Sehova: te ʼaletale+ aulo, mo te laupapa+ aulo ʼae neʼe hili ki ai te ʼu pane ʼae neʼe molagaʼi, 49 mo te ʼu tuʼulaga malama+ ʼi te muʼa Potu Taputapu ʼAupito* neʼe fai ʼaki te aulo maʼa, neʼe tuʼu he ʼu tuʼulaga malama ʼe nima ʼi te faʼahi mataʼu pea mo he ʼu tuʼulaga malama ʼe nima ʼi te faʼahi hema, pea mo te ʼu fisiʼi teu kua mātala,+ mo te ʼu malama, pea mo te ʼu pipi,* neʼe fai ʼaki te aulo,+ 50 mo te ʼu foʼi topu, mo te tahi age ʼu faʼahiga pipi,*+ mo te ʼu ipu lalahi, mo te tahi age ʼu faʼahiga ipu+ pea mo te ʼu ʼaiʼaga afi,+ neʼe fai ʼaki te aulo maʼa, pea mo te ʼu tuʼuʼaga neʼe fai ʼaki te aulo ʼae neʼe hili ki ai te ʼu faʼahiga saniele ke gaugaue ai te ʼu matapa+ ʼo te Potu Taputapu ʼAupito, mo te ʼu matapa ʼo te fale* ʼo te fale lotu.+
51 Koia, neʼe fakaʼosi ai e te Hau ko Salomone te ʼu gaue fuli ʼae neʼe tonu ke ina fai maʼa te fale ʼo Sehova. Neʼe ʼaumai leva e Salomone te ʼu meʼa ʼae neʼe fakamaʼoniʼoniʼi e Tavite, tana tamai,+ pea neʼe ina tuku te siliva, mo te aulo pea mo te ʼu faʼahiga meʼa kehekehe ki te ʼu tanakiʼaga koloa ʼo te fale ʼo Sehova.+