ʼUluaki Hau
9 ʼI te ʼosi laga pe e Salomone te fale ʼo Sehova, mo te fale hau+ pea mo te ʼu meʼa fuli ʼae neʼe ina loto ke ina fai,+ 2 neʼe ha leva ia Sehova kia Salomone, ko tona tuʼa lua ʼaia, ohage pe ko tana ha age kia ia ʼi Kipeone.+ 3 Pea neʼe ui e Sehova ki ai: “Neʼe au logo ki tau faikole ʼi ʼoku muʼa pea mo tau kole mai toku manavaʼofa. Neʼe au fakamaʼoniʼoniʼi te fale ʼaeni neʼe ke laga, he neʼe au filifili ke fakamaʼuhigaʼi ʼi ai toku huafa ʼo talu ai.+ Pea ʼe tuku tuʼumaʼu anai ki ai ʼoku mata mo toku loto.+ 4 Pea kapau ʼe ke haʼele ʼi ʼoku muʼa mo tou loto katoa pea mo aga fakahagatonu, ohage ko Tavite, tau tamai,+ ʼo ke fai ia meʼa fuli ʼae neʼe au fakatotonu atu,+ pea mo ke fakalogo ki ʼaku lao mo ʼaku lekula,+ 5 ʼe au fakatuʼu anai ke malohi ʼo talu ai te hekaʼaga fakahau ʼo tou puleʼaga ʼi Iselaele, ohage pe ko taku fakapapau age kia Tavite, tau tamai: ‘ ʼE ʼi ai tuʼumaʼu pe anai he tagata ʼi tou hologa ʼe heka anai ʼi te hekaʼaga fakahau ʼo Iselaele.’+ 6 Kae kapau ʼe kotou lituʼa mai kia te au, ia koutou mo ʼokotou foha, ʼo mole kotou taupau ʼaku fakatotonu mo ʼaku lao ʼae neʼe au tuku atu kia koutou, pea mo kotou tauhi ki he tahi age ʼu ʼatua pea mo tulolo ʼi ʼonatou muʼa,+ 7 ʼe au kapu anai ia Iselaele ʼi te kele ʼae neʼe au foaki age kia natou,+ pea ko te fale ʼae neʼe au fakamaʼoniʼoniʼi ke fakamaʼuhigaʼi ai toku huafa, ʼe au siʼaki anai ke mamaʼo mai ia au,+ pea ʼe fehiʼaʼinaʼi anai mo manukiʼi ia Iselaele e te hahaʼi fuli.+ 8 Pea ʼe liliu anai te fale ʼaeni ko he fale kua maumau.+ Ko te hahaʼi fuli ʼae ka fakalaka anai ʼi ai, ʼe natou sisio mo punamaʼuli anai. ʼE kalokalo anai ʼonatou ʼulu* pea mo ui: ‘He koʼe koa neʼe fai e Sehova te meʼa ʼaia ki te fenua ʼaeni pea mo te fale ʼaeni?’+ 9 Pea ʼe natou tali anai: ‘ ʼUhi he neʼe natou liʼaki ia Sehova tonatou ʼAtua, ʼae neʼe ina fakamavae ʼanatou kui mai te fenua ʼo Esipito, pea neʼe natou tali he tahi age ʼu ʼatua, mo natou tulolo ʼi ʼonatou muʼa pea mo tauhi kia natou. Ko te tupuʼaga la ʼaia ʼo te fakahoko e Sehova te ʼu malaʼia fuli ʼaeni kia natou.’ ”+
10 Neʼe laga e Salomone te ʼu fale ʼe lua, ia te fale ʼo Sehova pea mo te fale hau lolotoga taʼu ʼe 20.+ 11 Neʼe foaki e Hilame,+ te hau ʼo Tile kia Salomone te ʼu ʼakau ʼae ko te sete mo te senelie pea mo te aulo fuli ʼae neʼe loto ki ai ia Salomone.+ Pea neʼe foaki leva e te Hau ko Salomone kia Hilame te ʼu kolo ʼe 20 ʼo te fenua ʼo Kalilea. 12 Koia neʼe mavae ai ia Hilame mai Tile ʼo alu ʼo sio ki te ʼu kolo ʼaia neʼe foaki age e Salomone, kae neʼe mole ina leleiʼia. 13 Neʼe ina ui: “Siʼoku tehina, kotea koa te ʼu kolo ʼaeni neʼe ke foaki mai?” Koia neʼe fakahigoaʼi ai te ʼu kolo ʼaia ko te Fenua ʼo Kapuli* ʼo kaku mai ki te ʼaho nei. 14 Lolotoga te temi ʼaia, neʼe momoli e Hilame ki te hau te ʼu taleta* aulo ʼe 120.+
15 Koʼeni te fakamatala ʼo ʼuhiga mo natou ʼae neʼe fakamaʼua e te Hau ko Salomone ke natou gaue maʼa ia.+ Neʼe natou laga te fale ʼo Sehova,+ mo tona fale hau, mo Milo,*+ mo te kaupa ʼo Selusalemi, mo Atesoli,+ mo Mekito+ pea mo Kesele.+ 16 (Neʼe haʼu ia Falaone, te hau ʼo Esipito ʼo ʼohofi ia Kesele pea mo ina tutu. Neʼe ina toe matehi foki mo te kau Kanaane+ ʼae neʼe nonofo ʼi te kolo ʼaia. Neʼe ina foaki leva te kolo ʼaia ki tona ʼofafine, te ʼohoana ʼo Salomone, ko hana meʼa ʼofa ʼi te temi ʼae neʼe mavae ai.*)+ 17 Neʼe laga e Salomone ia Kesele, mo Pete-oloni ʼi Lalo,+ 18 mo Paalati+ pea mo Tamale ʼi te toafa, ʼi te loto fenua, 19 ʼo feia mo te ʼu kolo fuli ʼo Salomone ʼae neʼe ʼave ki ai ʼona koloa, mo te ʼu kolo ʼae neʼe tau ai ʼana saliote,+ mo te ʼu kolo ʼae maʼa te ʼu tagata heka hosi, pea mo te ʼu meʼa fuli ʼae neʼe fia laga e Salomone ʼi Selusalemi, mo Lipane pea mo te fenua katoa ʼo tona puleʼaga. 20 Pea neʼe ʼi ai he hahaʼi kaugamalie neʼe toe mai te kau Amole, mo te kau Heti, mo te kau Pelesite, mo te kau Hevi pea mo te kau Sepusi,+ pea neʼe mole kau ki te hahaʼi ʼo Iselaele.+ 21 Neʼe kei maʼuʼuli pe tonatou hologa ʼi te fenua, he neʼe mole feala ke pulihi katoa natou e te kau Iselaele. Pea neʼe fakamaʼua e Salomone ke natou gaue maʼa ia ohage ko he ʼu kaugana ʼo kaku mai ki te ʼaho nei.+ 22 Kae neʼe mole fakakauganaʼi e Salomone he tagata Iselaele,+ he neʼe ko ʼana tagata tau, mo ʼana tagata faifekau, mo tana kau ʼaliki, mo tana kau pule solia, pea mo te ʼu pule ʼo tana kau tagata taki saliote pea mo tagata heka hosi. 23 Pea ko te ʼu pule ʼe toko 550 ʼo te kau takitaki gaue, neʼe natou tokakaga ki te ʼu gaue ʼae neʼe fai maʼa Salomone pea mo takitaki te kau gaue.+
24 Kae neʼe haʼu te ʼofafine ʼo Falaone+ mai te Kolo ʼo Tavite ʼo alu ki tona fale+ ʼae neʼe laga e Salomone maʼa ia. Pea neʼe laga leva e Salomone ia Milo.*+
25 Neʼe momoli e Salomone tuʼa tolu ʼi te taʼu+ he ʼu holokoseta pea mo he ʼu sakilifisio ʼo te tokalelei ʼi te ʼaletale ʼae neʼe ina laga maʼa Sehova,+ pea mo he ʼu sakilifisio neʼe ina tutu ke kohu ʼi te ʼaletale, ʼae neʼe tuʼu ia muʼa ʼo Sehova. Neʼe ina fakaʼosi ai te laga ʼo te fale.+
26 Neʼe toe lahi ʼaupito mo te ʼu vaka neʼe faʼu e te Hau ko Salomone ʼi Esioni-kepele,+ ʼae ʼe tuʼu ovi ki Elati,* ʼi te matatai ʼo te Tai Kula ʼi te fenua ʼo Etome.+ 27 Neʼe fekauʼi e Hilame ʼana hahaʼi faifekau ke natou olo mo te ʼu vaka ʼaia,+ he neʼe natou iloʼi lelei te tai, ke natou gaue fakatahi ai mo te hahaʼi faifekau ʼa Salomone. 28 Neʼe natou olo ki Ofile+ ʼo toʼo mai ai te ʼu taleta aulo ʼe 420 pea neʼe natou ʼave ki te Hau ko Salomone.