Te ʼu Akonaki Fakatohi-tapu​—Ko He ʼu Tokoni Ki Te ʼu Temi Fuli

FAKAKAUKAUʼI AGE MUʼA: ʼE ke lolotoga mamata nei he fale tanakiʼaga mataga. Ko ʼihi foʼi monimo maka kua maumau. Pea ko ʼihi ʼe mole kei katoa. Kae ko te tahi ia natou ʼe kei katoa lelei. Pea ʼe ke fehuʼi atu ki te tagata taki mamata: “ ʼE kei lagi foʼou age te foʼi monimo ʼaeni ia natou ʼae?” ʼE ina tali atu: “Kailoa, ʼe ko ia ʼae ʼe ʼafeā age pea neʼe mole heʼeki fakafoʼou pe la.” ʼE ke toe fehuʼi age: “Neʼe lagi puipui?” Pea ʼe ina tali mai: “Kailoa ia, logo la te agi ʼa te ʼu tuʼani matagi mo te ʼua pea mo te faigaʼi ke maumauʼi e te hahaʼi kae neʼe tologa pe ia.” ʼE ke punamaʼuli fenei ai: “Neʼe feafeaʼi tona faʼu?”

ʼE toe hage pe te foʼi monimo malohi ʼaia ko te Tohi-Tapu. ʼE ko he tohi kua ʼafeā ʼaupito age ʼi te ʼu tohi fuli. ʼE moʼoni ʼe ʼi ai ʼihi tohi kua fualoa. Kae ohage pe ko te ʼu foʼi monimo ʼafeā ʼae kua makafaʼafaʼa, ʼe kua lahi te ʼu tohi ʼafeā ʼaki te temi kua maumau ʼosi. Pea ko te ʼu manatu fakasienesia ʼae neʼe tuʼu ai, ʼe mole kei alu tahi mo te iloilo foʼou pea mo te ʼu fakamoʼoni ʼae kua tou maʼu nei. Ko te ʼu tokoni fakatoketa ʼae neʼe maʼu ai, ʼe feala ke fakatupu tuʼutamaki age. Pea ʼe lahi te ʼu tohi ʼafeā ʼe mole kei katoa peʼe kua maumau.

ʼE makehe age pe te Tohi-Tapu ia. Neʼe kamata tohi kua hili ki ai sekulo ʼe 35 tupu. Logo la neʼe tapuʼi mo meʼa noaʼi, pea tutu, kae ʼe kei haohaoa lelei pe te logo ʼae ʼe tuʼu ai. Ki te iloilo foʼou ʼo te temi ʼaeni, ko te Tohi-Tapu ʼe mole kei ʼaoga ki totatou temi. Kae ʼi te Tohi-Tapu neʼe tala fakatomuʼa ai ia he ʼu aluʼaga ʼe fakatalakitupua pea mo fakaofoofo.—Vakaʼi te ʼa takai “Kua ʼAfeā Koa Peʼe Fakatomuʼa ʼi Tona Temi?”

TE ʼU PELESEPETO ʼE KEI ʼAOGA

ʼE feala pe ke ke feʼekeʼaki fenei: “ ʼE kei ʼaoga moʼoni koa te ʼu akonaki Fakatohi-tapu ki totatou temi?” Ke feala hau maʼu tona tali, fai te fehuʼi ʼaeni kia koe totonu: “Kotea te ʼu fihifihia kovi ʼae ʼe tau mo te malamanei ia ʼaho nei? Kotea te ʼu malaʼia ʼae ʼe fakamataku age?” ʼE ke manatu lagi ki te tau, te ʼulihi ʼo te ulufenua, te agakovi mo te aga fakakaka. Tou vakaʼi age ʼihi pelesepeto ʼo te Tohi-Tapu. Pea ke fai te fehuʼi ʼaeni: “Ka na pau la neʼe mulimuli te tagata ki te ʼu pelesepeto ʼaia, ʼe mole koa la tokalelei mo matalelei te kele?”

TE ʼOFA KI TE TOKALELEI

“Manuʼia ia natou ʼae ʼe natou kumi ke natou tokalelei mo te hahaʼi, koteʼuhi ʼe fakahigoaʼi anai natou ko te ʼu foha ʼo te ʼAtua.” (Mateo 5:9) “Kapau ʼe feala, pea mo fakalogo kia koutou, kotou maʼuʼuli ʼi te tokalelei mo te hahaʼi fuli pe.”—Loma 12:18.

TE MANAVAʼOFA MO TE LOTOFAKAMOLEMOLE

“Manuʼia ia natou ʼae ʼe manavaʼofa, koteʼuhi ʼe fakaha age anai kia natou te manavaʼofa.” (Mateo 5:7) “Kotou haga fekatakiʼaki, pea mo fefakamolemoleʼaki ʼaki he lotolelei, tatau aipe pe ʼe ʼi ai hokotou fihifihia mo he tahi. Ohage pe ko te lotolelei ʼa Sehovaa ke fakamolemole kia koutou, ʼe tonu ke kotou toe fai feia mo koutou.”—Kolose 3:13.

TE FELOGOI TAHI ʼO TE ʼU LANU

“Mai te tagata ʼe tahi neʼe ina [te ʼAtua] fakatupu te hahaʼi ʼo te ʼu lanu fuli ke natou nonofo ʼi te fuga kele katoa.” (Gaue 17:26) “ ʼE mole fakapalatahi te ʼAtua, kaʼe ʼi te ʼu puleʼaga fuli pe, ko te tagata ʼae ʼe manavasiʼi kia te ia pea mo ina maʼuliʼi te faitotonu, ʼe ina tali leleiʼi ia ia.”—Gaue 10:34, 35.

TE FAKAʼAPAʼAPA KI TE KELE

“Nee too leva e [Sehova] Atua te tagata o tuku ki te oloto o Eteni, ke tauhi mo leoleo ki ai.” (Senesi 2:15) Ko Sehova ka ina “maumauʼi ia natou ʼae ʼe natou maumauʼi te kele.”—Fakaha 11:18.

TE FEHIʼA KI TE MANUMANU MO TE ʼU AGA HEʼE ʼAOGA

“Kotou tokakaga ki te faʼahiga manumanū kehekehe, koteʼuhi maʼia mo ia ʼae ʼe maʼu koloa, ʼe mole fakalogo tona maʼuli ki te ʼu koloa ʼae ʼe ina maʼu.” (Luka 12:15) “Ke ʼaua naʼa kotou palalau ʼo ʼuhiga mo te ʼu felaveʼi fakasino heʼe ʼaoga, mo te ʼu aga heʼe maʼa fuli pe, pea mo te ʼu holi fakavale koteʼuhi ʼe mole tuha mo te kau maʼoniʼoni.”—Efeso 5:3.

TE AGA FAKAHAGATONU MO TE GAUE KINAKINA

“ ʼE matou loto ke matou aga fakahagatonu ia meʼa fuli.” (Hepeleo 13:18) “Ko ʼae neʼe kaihaʼa ke ʼaua naʼa toe kaihaʼa, kaʼe ke gaue kinakina”—Efeso 4:28.

TE MAʼUHIGA ʼO TE TOKONI KI ʼIHI

“Kotou fai he ʼu palalau fakalotofimalie kia natou ʼae ʼe lotomamahi, mo kotou tokoni ki te kau vaivai, pea mo kataki fualoa ki te hahaʼi fuli.” (1 Tesalonika 5:14) “Ke tokaga kia natou ʼae ʼe hala mo tamai pea mo faʼe pea mo te kau vitua ʼae ʼe mamahi.”—Sakopo 1:27.

ʼE mole fakatuʼu pe ʼi te Tohi-Tapu he lisi ʼo te ʼu pelesepeto ʼaia. Kae ʼe akoʼi mai ʼi ai ke tou fakamaʼuhigaʼi mo haga maʼuliʼi ʼi te ʼaho fuli. Kapau ʼe tokolahi ia natou ʼae ʼe mulimuli ki ai pea ʼe mole lahi anai he ʼu fihifihia. Koia, ʼe ʼaoga moʼoni te ʼu pelesepeto ʼo te Tohi-Tapu ki totatou temi. ʼE tokoni feafeaʼi atu anai kia koe ʼi te temi nei?

ʼE FUA LELEI FEAFEAʼI TE ʼU AKONAKI ʼO TE TOHI-TAPU KIA KOE

Neʼe ui fenei e te tagata poto tokotahi: “ ʼE ha te poto ʼi ʼana gaue.” (Mateo 11:19, nota) ʼE kotou ʼio koa ki ai? ʼE hoki ha te ʼu fua ʼo te poto moka ʼe ke maʼuliʼi. Koia, ʼe feala ke ke fakakaukau fenei: “Kapau ʼe ʼaoga moʼoni te Tohi-Tapu pea ʼe ʼi ai anai hona fua lelei ki toku maʼuli? ʼE tokoni feafeaʼi mai anai ki te ʼu fihifihia ʼae ʼe au lolotoga tauʼi?” Tou vakaʼi he faʼifaʼitaki.

Ko Delphine,b neʼe lelei tona maʼuli mo tona kiʼi famili pea mo tana gaue. Kae, fokifa pe kua felaveʼi mo te ʼu toe fihifihia. Neʼe mate tana taʼahine. Neʼe mavete mo tona ʼohoana. Pea neʼe tau mo te ʼu fihifihia fakapaʼaga. ʼE ina ui fenei: “Neʼe mole kei au iloʼi pe la pe ko ai ia au, he neʼe kua mate taku kiʼi taʼahine pea puli mo toku ʼohoana, pea neʼe mole kei ʼi ai hoku ʼapi. Neʼe mole kei hoku ʼuhiga heʼe kua pulinoa toku malohi pea mole kei ʼi ai hoku ka haʼu.”

Neʼe hoki mahino ai ia Delphine ki te ʼu palalau ʼaeni: “E kaku te u aho o omatou tau ki te tau e fitugofulu, pea e kaku natou ae e malolohi age kia tau e valugofulu; pea ko te fiamealahi ae e matou mau i ai ko te kinakina mo te masiva; koteuhi e puli vave te mauli, pea e tou felelei ki te mate.”—Pesalemo 90:10.

ʼI te ʼu temi faigataʼa ʼaia, neʼe maʼu e Delphine he fakalotofimalie ʼi te Tohi-Tapu. Pea ko te ʼu tokoni ʼae neʼe ina maʼu ai, neʼe fua lelei ʼaupito kia ia. ʼI te ʼu alatike ʼae ka hoa mai anai, tokolahi neʼe natou maʼu ai te ʼu fua lelei ʼi tanatou muliʼi te ʼu tokoni ʼo te Tohi-Tapu. Neʼe natou manatu ai ʼe hage pe te Tohi-Tapu ko te foʼi monimo ʼae neʼe tou talanoa ki ai ʼi te kamata. ʼE mole hage ia ko ʼihi tohi kua ʼafeā fau pea ʼe mole kei feala hatatou fakaʼaogaʼi. ʼE feia koa la te Tohi-Tapu, he neʼe makehe tona faʼu? ʼE maʼu moʼoni ai koa te ʼu manatu ʼa te ʼAtua kae mole ʼa te tagata?—1 Tesalonika 2:13.

ʼE lagi ʼe ke toe manatu ʼe mole loaloaga te maʼuli pea ʼe lahi fau te ʼu fihifihia. Moka ke tau mo he ʼu faigataʼaʼia, kofea ʼae ʼe ke maʼu ai he tokoni fakalotofimalie?

Tou vakaʼi aluʼaga ʼe tolu ʼe fakamoʼoni ai te ʼaoga ʼo te Tohi-Tapu ki tou maʼuli. ʼE tokoni atu anai ke ke

1. tekeʼi ʼou fihifihia moka ʼe feala.

2. fakatokatoka ʼou fihifihia.

3. katakiʼi te ʼu aluʼaga faigataʼa ʼae ʼe mole feala ke fetogi.

ʼE talanoa anai te ʼu alatike ʼae ka hoa mai ki te ʼu faʼahi ʼaia ʼe tolu.