ʼE Fakaliliu Anai e Sehova Te Kele Ko He Palatiso

1. Kotea ʼae neʼe fakaha lelei e te polofeta ko Esaia ki te kau Iselaele?

NEʼE ui e te polofeta ko Esaia ko Sehova ʼe ko “te ʼAtua ʼo te moʼoni.” ʼI te Fakahepeleo ko te kupu “moʼoni” ko tona fakaʼuhiga “ameni.” (Esa. 65:​16, kiʼi nota) Pea te kupu “ameni” ʼe fakaʼuhiga “fai pe ki ai” peʼe “ ʼe mahino papau ia.” ʼE tautau fakaʼaogaʼi ʼi te Tohi-Tapu te kupu “ameni” moʼo tataʼo ʼaki te moʼoni ʼa he palalau peʼe ko he gaue ʼe fai e Sehova peʼe ko Sesu. Koia, neʼe fakaha lelei ai e Esaia ki te kau Iselaele, ko he meʼa pe ʼe tala fakatomuʼa e Sehova, ʼe ina fakahoko tuʼumaʼu pe. ʼE ina fakahoko moʼoni tana ʼu fakapapau.

2. He koʼe ʼe feala ke tou falala ki te ʼu fakapapau ʼa Sehova ʼo ʼuhiga mo totatou ka haʼu, pea ko te ʼu fehuʼi fea ka tou tali anai ki ai?

² ʼE feala koa mo tatou ke tou falala katoa ki te ʼu fakapapau ʼa Sehova ʼo ʼuhiga mo totatou ka haʼu? Hili teitei taʼu ʼe 800 ki te temi ʼo Esaia, neʼe fakamahino e te apositolo ko Paulo pe koʼe ʼe feala ke tou tui papau ʼe hoko tuʼumaʼu pe te ʼu fakapapau ʼa te ʼAtua. Neʼe ina ui: “ ʼE mole feala . . . ke loi te ʼAtua.” (Hep. 6:18) Ohage la, ʼe mole feala ke haʼu mai he matapuna vai ia he vai ʼe lelei pea mo kona. ʼO toe feia aipe, ko Sehova te Matapuna ʼo te moʼoni, ʼe mole feala ia ke loi. Koia, ʼe feala ke tou falala katoa kia meʼa fuli ʼe tala e Sehova, ʼo kau ai ʼana fakapapau fuli ʼo ʼuhiga mo totatou ka haʼu. ʼI te alatike ʼaeni, ʼe tou tali anai ki te ʼu fehuʼi ʼaeni: Kotea ʼae ʼe fakapapauʼi e Sehova ʼe ina foaki mai ʼi te ka haʼu? Pea kotea he ʼu fakamoʼoni ʼe ina fakahoko anai tana fakapapau?

KOTEA ʼAE NEʼE FAKAPAPAUʼI E SEHOVA?

3. (1) Kotea te fakapapau ʼe leleiʼia e te ʼu kaugana ʼa te ʼAtua? (Fakaha 21:​3, 4) (2) Kotea ʼae ʼe ui mai e ʼihi moka tou lau age te fakapapau ʼaia?

³ Tou vakaʼi te fakapapau ʼae ʼe leleiʼia e te ʼu kaugana ʼa te ʼAtua. (Lau ia Fakaha 21:​3, 4.) ʼE fakapapau mai e Sehova “ ʼe mole toe ʼi ai anai te mate, mo te putu, mo te lauga pea mo te mamahi.” Tokolahi ia tatou ʼe tou lau ki te hahaʼi te koga tohi fakalotofimalie ʼaia ʼo ʼuhiga mo te maʼuli ʼi te Palatiso. Pea kotea ʼae ʼe ui mai e ʼihi? ʼE lagi natou ui: “ ʼE ko he logo lelei foki, kae ʼe faigataʼa kia au haku tui ki ai.”

4. (1) Kotea ʼae neʼe kua iloʼi e Sehova ʼe hoko anai ʼi totatou temi? (2) ʼO mole gata pe ki te fai e Sehova tana fakapapau, kotea te tahi faʼahi neʼe ina fai?

⁴ ʼE mahino ia, ʼi te takitaki e Sehova ia te apositolo ko Soane ke ina tohi te fakapapau ʼaia ʼo ʼuhiga mo te maʼuli ʼi te Palatiso, neʼe kua ina iloʼi ʼe tou fakaha anai ia ʼaho nei te ʼamanaki ʼaia ki te hahaʼi moka tou fakamafola te logo ʼo te Puleʼaga. Neʼe toe iloʼi foki e Sehova ʼe faigataʼa anai ki te tokolahi hanatou tui ʼe hoko anai te ʼu fetogi ʼaia ʼi te ka haʼu. (Esa. 42:9; 60:2; 2 Ko. 4:​3, 4) Koia, ʼe tou lava tokoni feafeaʼi ki te hahaʼi ke natou tui ʼe hoko moʼoni anai te ʼu lelei ʼae ʼe tou lau ia Fakaha 21:​3, 4? Pea kotea ʼae ʼe feala ke tou fai ke toe malohi age mo tatatou falala ki ai? Neʼe ko Sehova totonu ʼae neʼe ina fai te fakapapau fakalotofimalie ʼaia. Pea neʼe ina foaki mai he ʼu tupuʼaga ke tou tui ʼe ina fakahoko moʼoni anai. Kotea te ʼu tupuʼaga ʼaia?

ʼE FAKAMOʼONI E SEHOVA ʼE HOKO ANAI TANA FAKAPAPAU

5. Ko te ʼu vaega fea ʼae ʼe tou maʼu ai he ʼu tupuʼaga ke tou falala ki te fakapapau ʼa te ʼAtua, pea kotea ʼae ʼe ui ai?

⁵ ʼE tou maʼu he ʼu tupuʼaga ke tou falala ai ʼe hoko moʼoni anai te fakapapau ʼa Sehova, ʼi te ʼu vaega ʼae ʼe hoa mai. ʼE tou lau fenei ai: “Neʼe ui fenei e Ia ʼae ʼe heka ʼi te hekaʼaga fakahau: ‘Koʼeni, ʼe au fakafoʼou ia meʼa fuli.’ Pea ʼe ina toe ui fenei: ‘Tohi, koteʼuhi ko te ʼu folafola ʼaia ʼe agatonu pea mo moʼoni.’ Pea neʼe ina ui fenei mai: ‘Kua hoko te ʼu folafola ʼaia! Ko au te Kamataʼaga pea mo te Fakaʼosiʼaga.’ ”—Fkha. 21:​5, 6, ʼuluaki koga.

6. He koʼe ko te ʼu fakamoʼoni ʼae ʼe tou lau ia Fakaha 21:​5, 6 ʼe toe malohi age ai tatatou falala ʼae ki te fakapapau ʼa te ʼAtua?

⁶ He koʼe ʼe toe malohi age tatatou falala ʼae ki te fakapapau ʼa te ʼAtua ʼaki te ʼu vaega ʼaia? ʼE ui fenei ʼi te tohi Te Fakahā—Te Ikuʼaga Fakafiafia! ʼo ʼuhiga mo te ʼu vaega ʼaia: “Neʼe hage neʼe sinie e Sehova he pepa fakamoʼoni ʼe ina foaki anai ki te hahaʼi agatonu te ʼu tapuakina ʼaia ʼi te ka haʼu.”b ʼE tuʼu te fakapapau ʼa te ʼAtua ia Fakaha 21:​3, 4. Pea ʼi te ʼu vaega 5 mo te 6, ʼe hage neʼe sinie peʼe fakamoʼoni e Sehova totonu ʼe ina fakahoko anai tana fakapapau ʼaia. Tou vakavakaʼi te ʼu fakamoʼoni ʼaia mai ia Sehova.

7. Ko ai ʼae ʼe palalau ʼi te vaega 5, pea he koʼe ʼe makehe te ʼu palalau ʼaia?

⁷ ʼE tou lau ʼi te vaega 5: “Neʼe ui fenei e Ia ʼae ʼe heka ʼi te hekaʼaga fakahau.” (Fkha. 21:​5, ʼuluaki koga) ʼE makehe te ʼu palalau ʼaia he ʼe tuʼa tolu pe te fai e Sehova totonu ia te ʼu palalau ʼaia ʼi te tohi ʼo Fakaha. Koia ko te fakamoʼoni ʼaia ʼe mole haʼu ia mai he ʼaselo malohi, peʼe mai ia Sesu ʼae kua fakatuʼuake. Kailoa ia, kae ʼe haʼu totonu ia mai ia Sehova! Pea ʼe feala ai ke tou falala ki te hoko atu e Sehova tana palalau. Kotea tona tupuʼaga? Koteʼuhi ko Sehova “ ʼe mole feala ke loi.” (Tito 1:2) Koia ʼe feala ke tou falala ʼe hoko moʼoni anai te ʼu palalau ʼae ia Fakaha 21:​5, 6.

“KOʼENI, ʼE AU FAKAFOʼOU IA MEʼA FULI”

8. ʼE fakaha lelei feafeaʼi e Sehova ʼe hoko moʼoni anai tana fakapapau? (Esaia 46:10)

⁸ Tou tokagaʼi ʼi te temi nei ia te kupu “Koʼeni.” (Fkha. 21:5) Ko te kupu Fakakeleka ʼae neʼe fakaliliu ʼaki te kupu “koʼeni” ʼe fakaʼaogaʼi liuliuga ʼi te tohi ʼo Fakaha. ʼE ui ʼi he tohi, ʼe fakaʼaogaʼi te kupu ʼaia “ke tokagaʼi leleiʼi e ia ʼae ʼe lautohi te manatu ʼae ʼe hoa mai ki te kupu ʼaia.” Pea kotea ʼae ʼe hoa mai ki ai? Ko te ʼu folafola ʼaeni ʼa te ʼAtua: “ ʼE au fakafoʼou ia meʼa fuli.” ʼE moʼoni ʼe palalau ia Sehova ki he ʼu fetogi ka ina fakahoko anai ʼi te ka haʼu. Kae ʼi tana iloʼi papau ʼae ʼe hoko moʼoni anai, ʼe ha ʼi ʼana palalau ʼaia ʼe hage ia kua lolotoga hoko nei.—Lau ia Esaia 46:10.

9. (1) ʼI te ui ʼae e Sehova “ ʼe au fakafoʼou ia meʼa fuli,” kotea te ʼu gaue ka ina fai anai? (2) Kotea ʼae ka hoko ki “te lagi” mo “te kele” ʼo te temi nei?

⁹ Neʼe ui e Sehova ia Fakaha 21:5: “ ʼE au fakafoʼou ia meʼa fuli.” Kotea tona fakaʼuhiga? ʼI te kapite ʼaia ʼo Fakaha, ʼe fakaʼuhiga te ʼu palalau ʼaia ʼa Sehova kia faʼahi ʼe lua ka ina fai anai. ʼE ina fetogi pea mo fakafoʼou. ʼUluaki, kotea ʼae ʼe fetogi e Sehova? ʼE tou lau fenei ia Fakaha 21:1: “Kua puli te lagi ʼafeā pea mo te kele ʼafeā.” Ko “te lagi ʼafeā” ʼe ko te ʼu puleʼaga fakapolitike ʼae ʼe fakaneke e Satana mo ʼana temonio. (Mat. 4:​8, 9; 1 Soa. 5:19) ʼI te Tohi-Tapu, ko te kupu “kele” ʼe feala ke fakaʼuhiga ki te hahaʼi ʼo te kele. (Pes. 97:1; Tet. 32:1) Koia, ko “te kele ʼafeā” ʼe fakaʼuhiga ki te hahaʼi agakovi ia ʼaho nei. ʼE mole faigaʼi anai e Sehova ke toe lelei age “te lagi” pea mo “te kele” ʼo te temi ʼaeni. Kailoa, kae ʼe ina maumauʼi anai pea mo ina fetogi. ʼE ina fetogi anai ʼaki “he lagi foʼou mo he kele foʼou” ko tona fakaʼuhiga ʼaki he puleʼaga foʼou ka pule anai ki ni hahaʼi faitotonu.

10. Kotea ʼae ka fakafoʼou anai e Sehova?

¹⁰ ʼE fakafoʼou feafeaʼi anai e Sehova ia meʼa fuli? (Fkha. 21:5) ʼE tokaga anai ia Sehova ke liliu te kele mo te hahaʼi ʼo haohaoa. Ohage ko tona fakakikite e Esaia, ʼe fakaliliu anai e Sehova te kele katoa ko he ʼoloto matalelei, ohage ko te ʼoloto ʼo Eteni. Pea ʼe ina fakafoʼou anai mo tatou, ko tona fakaʼuhiga ʼe ina fakamalolo katoa anai ia tatou takitokotahi. ʼE mole kei ʼi ai anai he tahi ʼe ketu, peʼe kivi, peʼe tuli, pea maʼia mo natou ʼae kua mamate, ʼe toe fakatuʼuake anai mo natou.—Esa. 25:8; 35:​1-7.

“KO TE ʼU FOLAFOLA ʼAENI ʼE AGATONU PEA MO MOʼONI . . . KUA HOKO [IA]!”

11. Kotea te fakatotonu neʼe fai age e Sehova kia Soane, pea kotea tona tupuʼaga?

¹¹ Kotea te tahi fakamoʼoni ʼe foaki mai e te ʼAtua ke tou falala ai ki tana fakapapau? Neʼe ui e Sehova kia Soane: “Tohi, koteʼuhi ko te ʼu folafola ʼaia ʼe agatonu pea mo moʼoni.” (Fkha. 21:5) Neʼe mole fakatotonu pe e Sehova kia Soane ke ina tohi. Kae neʼe ina toe fakaha age tona tupuʼaga. Neʼe ina ui fenei: “Koteʼuhi ko te ʼu folafola ʼaia ʼe agatonu pea mo moʼoni.” ʼEi, ko te ʼu folafola ʼa te ʼAtua ʼe tuha ia mo te falala. ʼE tou fakamalo kia Soane ʼi tana fakalogo ʼae ki te fakatotonu age ʼae ke ina “tohi.” ʼE feala ai ke tou lau te fakapapau ʼaia mai te ʼAtua ʼo ʼuhiga mo te Palatiso pea ke tou metitasio ki te ʼu lelei taulekaleka ʼae ka tou maʼu anai.

12. He koʼe neʼe moʼoni te ui fenei ʼa Sehova: “Kua hoko te ʼu folafola ʼaia!”

¹² Kotea ʼae ʼe ui e te ʼAtua ʼi te hoko atu? “Kua hoko te ʼu folafola ʼaia!” (Fkha. 21:6) ʼI heni, ʼe hage ʼe ui e Sehova ko te ʼu meʼa ʼae neʼe talanoa ki ai ʼo ʼuhiga mo te Palatiso kua hoko fuli. Pea ʼe moʼoni pe ia, koteʼuhi ʼe mole he meʼa ʼe feala ke ina taʼofi tana fakahoko tana fakatuʼutuʼu. ʼE foaki mai e Sehova he tahi fakamoʼoni ke tou tui ai ʼe hoko moʼoni anai tana fakapapau. Kotea ʼae neʼe ina ui?

“KO AU TE KAMATAʼAGA PEA MO TE FAKAʼOSIʼAGA”

13. He koʼe neʼe ui e Sehova: “Ko au te Kamataʼaga [“Alefa”] pea mo te Fakaʼosiʼaga [“Omeka”]”?

¹³ Ohage ko tatatou ui ʼi te kamata, neʼe tuʼa tolu te palalau ʼa Sehova totonu ʼi te ʼu meʼa ʼae neʼe ha kia Soane. (Fkha. 1:8; 21:​5, 6; 22:13) ʼI te ʼu lakaga takitahi ʼaia, neʼe ui fenei e Sehova: “Ko au te Kamataʼaga [“Alefa,” kiʼi nota] pea mo te Fakaʼosiʼaga [“Omeka,” kiʼi nota].” Ko te ʼu kupu ʼaia ʼe lua Alefa mo Omeka, ʼe ko te ʼu mataʼi tohi ʼuluaki pea mo fakaʼosi ʼo te ʼalafapeti Fakakeleka. Koia, ko te ui ʼae e Sehova “ko au te Kamataʼaga pea mo te Fakaʼosiʼaga” ʼe ina fakaha ai, ka ina kamata he gaue pea ʼe tokaga anai ke hoko katoa ʼi tona fakaʼosi.

14. (1) Kotea la he fakamatala ʼi te Tohi-Tapu neʼe hage ai neʼe ui e Sehova ko ia “te Kamataʼaga” [Alefa] pea mo “te Fakaʼosiʼaga” [Omeka]? (2) ʼO mulimuli kia Senesi 2:​1-3, kotea ʼae ʼe feala ke tou tui papau ki ai?

¹⁴ Hili te fakatupu e Sehova ia Atama mo Eva, neʼe ina fakaha age kia naua tana fakatuʼutuʼu ʼo ʼuhiga mo te hahaʼi pea mo te kele. ʼE ui fenei ʼi te Tohi-Tapu: “Neʼe tapuakiʼi naua e te ʼAtua, pea neʼe ina ui age kia naua: ‘Kolua fanaunau pea mo liliu ʼo hahaʼi, kolua fakahahaʼi pea mo puleʼi te kele.’ ” (Sen. 1:28) ʼI tana fakaha ʼaia tana fakatuʼutuʼu ʼi te kamataʼaga, neʼe hage pe neʼe ui e Sehova “Alefa.” ʼE hoko mai anai te temi ʼae ka fonu ai te kele ko te ʼu fanau ʼa Atama mo Eva, ʼe natou haohaoa pea mo fakalogo ki te ʼAtua. ʼE natou fakaliliu anai te kele ko he Palatiso. ʼI te temi ʼaia, ʼe kua kaku anai tana fakatuʼutuʼu ki tona fakaʼosiʼaga, pea ʼe hage anai ʼe ui e Sehova “Omeka.” ʼI te ʼosi fakatupu e Sehova “te lagi, mo te kele pea mo te ʼu meʼa fuli ʼae ʼi ai” neʼe ina fai leva ni palalau ʼe ha ai ʼe hoko moʼoni anai tana fakapapau. ʼE tou lau ʼana palalau ʼaia ia Senesi 2:​1-3. (Lau.) Neʼe ui e Sehova ʼe taputapu ia te fitu ʼaho. Kotea tona fakaʼuhiga? Neʼe ina tuku te fitu ʼaho ke hoko ai tana fakatuʼutuʼu ʼo ʼuhiga mo te hahaʼi pea mo te kele. Pea ʼi te fakaʼosi ʼo te fitu ʼaho, kua fakahoko katoa ai leva tana fakatuʼutuʼu.

15. He koʼe neʼe hage neʼe lava taʼofi e Satana te fakahoko e Sehova tana fakatuʼutuʼu maʼa te hahaʼi?

¹⁵ Hili te agatuʼu ʼa Atama mo Eva, neʼe nā liliu ʼo agahala pea mafola ai te agahala mo te mate ki ʼana fanau. (Loma 5:12) Neʼe hage neʼe lava taʼofi e Satana te fakahoko e Sehova tana fakatuʼutuʼu ʼae ke nofoʼi te kele e ni hahaʼi haohaoa, ʼe natou fakalogo kia te ia. Neʼe lagi manatu ia Satana ʼe fai anai e Sehova te puleʼaki ʼae ke ina matehi ia Atama mo Eva, pea ina toe fakatupu he tahi taumatuʼa haohaoa. ʼE ina fakahoko ai anai tana fakatuʼutuʼu maʼa te hahaʼi. Kae kapau neʼe fai e te ʼAtua te faʼahi ʼaia, neʼe feala ke lau e te Tevolo ʼe gutuloi ia Sehova. Kotea tona tupuʼaga? Koteʼuhi ia Senesi 1:​28, neʼe ui e Sehova kia Atama mo Eva ʼe ko tonā hologa ʼae ka ina fakahahaʼi anai te kele.

16. He koʼe neʼe lagi manatu ia Satana ʼe feala ke ina ui kia Sehova neʼe to noa ʼosi tana fakatuʼutuʼu?

¹⁶ Pe neʼe lagi manatu ia Satana ki he tahi puleʼaki ka fai e te ʼAtua. Neʼe lagi manatu ʼe tuku anai e Sehova ke maʼu e Atama mo Eva hanā ʼu fanau, kae ʼe natou agahala fuli anai ʼo talu ai. (Ekl. 7:20; Loma 3:23) Kapau neʼe fai e te ʼAtua te puleʼaki ʼaia, neʼe feala pe ke ui e te Tevolo neʼe to noa ʼosi te fakatuʼutuʼu ʼa Sehova. Kotea tona tupuʼaga? Koteʼuhi ʼe mole nofoʼi anai te kele ʼae kua liliu ko he palatiso e te ʼu fanau haohaoa ʼa Atama mo Eva.

17. Kotea te puleʼaki neʼe fai e Sehova ʼi te agatuʼu ʼa Satana mo te ʼuluaki taumatuʼa, pea ʼe feafeaʼi anai tona fakaʼosiʼaga? (Vakaʼi mo te pāki.)

¹⁷ Kae neʼe lagi punamaʼuli ia Satana ki te puleʼaki ʼae neʼe fai e Sehova moʼo fakahoko tana fakatuʼutuʼu logo la te agatuʼu ʼa Satana mo te ʼuluaki taumatuʼa. (Pes. 92:5) Neʼe tuku e Sehova ke maʼu e Atama mo Eva honā hologa, ʼo moʼoni ai ʼana palalau. Neʼe mole loi. Pea neʼe fakaha lelei leva e Sehova ʼe ina fakahoko moʼoni anai tana fakatuʼutuʼu ʼi te kamataʼaga, ʼe mole he meʼa ʼe feala ke ina taʼofi. Neʼe ina tala ʼe ʼi ai anai he hakoga ka ina haofaki te ʼu fanau ʼa Atama mo Eva. (Sen. 3:15; 22:18) ʼE foaki anai e te hakoga ʼaia tona maʼuli ko he totogi moʼo haofaki te malamanei. ʼE mahino ia, ko he puleʼaki neʼe mole pe la manatu ki ai ia Satana. Kotea tona tupuʼaga? He ʼe fakatafito te fakatuʼutuʼu ʼaia ki te ʼofa ki te hahaʼi. (Mat. 20:28; Soa. 3:16) ʼE mole maʼu e Satana te ʼofa ʼaia, kae ʼe manatu pe ia kia ia totonu. Koia, ʼaki te totogi ʼaia, ʼe feafeaʼi anai te fakaʼosiʼaga? Hili te ʼu Taʼu ʼe Afe, ʼe nofoʼi anai te kele ʼae kua liliu ko he palatiso e te hologa ʼo Atama mo Eva, ʼe natou haohaoa pea mo fakalogo kia Sehova, ohage pe ko tona fakatuʼutuʼu e Sehova ʼi te kamataʼaga. Ka hoko anai te faʼahi ʼaia, ʼe hage pe ʼe ui anai e Sehova “Omeka.”

KE MALOHI AGE TATATOU TUI KI TE FAKAPAPAU ʼA SEHOVA ʼO ʼUHIGA MO TE PALATISO

18. Kotea te ʼu fakamoʼoni ʼe tolu ʼe foaki mai e te ʼAtua? (Vakaʼi mo te fakamatala ʼae ʼe ʼa takai “Tupuʼaga ʼe Tolu Ke Tou Falala Ki Te Fakapapau ʼa Sehova.”)

¹⁸ Neʼe tou vakaʼi ʼi te alatike ʼaeni he ʼu fakamoʼoni ke tou tui papau ai ʼe liliu anai te kele ko he Palatiso. Kotea ʼae ʼe feala ke tou ui ki te hahaʼi ke toe tui mo natou ki ai? ʼUluaki, ʼe ko Sehova totonu ʼae ʼe ina fai te fakapapau ʼaia. ʼE tou lau fenei ʼi te tohi ʼo Fakaha: “Neʼe ui fenei e Ia ʼae ʼe heka ʼi te hekaʼaga fakahau: ‘Koʼeni, ʼe au fakafoʼou ia meʼa fuli.’ ” ʼE ina maʼu te poto pea mo te malohi moʼo fakahoko tana fakapapau, pea ʼe toe loto moʼoni ki ai. Lua, kia Sehova ko te meʼa ʼae ʼe ina ui ʼe hage ia kua hoko moʼoni. Ko te tupuʼaga la ʼae ʼo tana ui fenei: “Ko te ʼu folafola ʼaia ʼe agatonu pea mo moʼoni. . . . Kua hoko te ʼu folafola ʼaia!” Tolu, ʼe mole he meʼa ʼe feala ke ina taʼofi ia Sehova ke ina fakaʼosi he gaue neʼe ina kamata. Koia, ʼe ina ui fenei ai: “Ko au te Kamataʼaga pea mo te Fakaʼosiʼaga.” ʼE fakaha lelei ai anai e Sehova ko Satana ʼe gutu loi pea ʼe mole ina lava taʼofi ia Sehova ke ina fakahoko tana fakatuʼutuʼu.

19. Kotea ʼae ʼe feala ke ke fai moka mole tui he tahi ki te fakapapau ʼa te ʼAtua ʼo ʼuhiga mo te Palatiso?

¹⁹ Manatuʼi ka ke fakaha ki te hahaʼi te ʼu fakamoʼoni ʼe fakahoko anai e te ʼAtua tana ʼu fakapapau, ʼe toe malohi age tau falala ʼae kia te ia. Koia, ka ke lau age ki he tahi te fakapapau ʼae ia Fakaha 21:​4, pea ina ui atu “ ʼE ko he logo lelei foki, kae ʼe faigataʼa kia au haku tui ki ai” kotea ʼae ʼe feala ke ke fai? ʼE feala ke ke lau pea mo fakamahino age te ʼu vaega 5 mo te 6. Fakaha age pe ʼe fakamoʼoni feafeaʼi e Sehova ʼi te ʼu vaega ʼaia ʼe ina fakahoko katoa anai tana fakapapau.—Esa. 65:16.