Ke Malohi Tuʼumaʼu Tatatou Feʼofaʼaki

1-2. (1) He koʼe neʼe ui e te apositolo ko Paulo ko te ʼofa ʼe ko te kalitate ʼaia “ ʼe lahi” age? (2) Kotea te ʼu fehuʼi ka tou vakaʼi anai?

NEʼE talanoa ia te apositolo ko Paulo ki te tui, mo te ʼamanaki pea mo te ʼofa. Pea neʼe ina fakaʼosi leva tana palalau ʼo ina ui fenei: “Ko ia ʼae ʼe lahi ʼi te ʼu [kalitate] ʼaia ʼe ko te ʼofa.” (1 Ko. 13:13) He koʼe neʼe ui e Paulo ia te faʼahi ʼaia? ʼI te ka haʼu, ʼe mole kei ʼaoga anai ke tou tui ki te ʼu fakapapau ʼa te ʼAtua ʼo ʼuhiga mo he malama foʼou peʼe ke tou ʼamanaki ʼe ina fakahoko anai te ʼu fakapapau ʼaia, he ʼe ʼi te temi ʼaia, ʼe kua hoko fuli anai. Kae ʼe hoko atu pe anai tatatou ʼoʼofa kia Sehova pea mo te hahaʼi. Pea ʼe haga tuputupu anai totatou ʼofa ʼaia ʼo talu ai.

² ʼE tonu anai ke tou fakaha tuʼumaʼu ia te ʼofa. Koia ʼe tou vakaʼi anai ʼi te alatike ʼaeni te ʼu fehuʼi ʼe tolu: ʼUluaki, he koʼe ʼe tonu ke tou feʼofaʼaki? Lua, ʼe feafeaʼi hatatou fakaha tatatou feʼofaʼaki? Tolu, ʼe feafeaʼi hatatou taupau ke malohi tatatou feʼofaʼaki?

HE KOʼE ʼE TONU KE TOU FEʼOFAʼAKI?

3. He koʼe ʼe tonu ke tou feʼofaʼaki?

³ He koʼe ʼe maʼuhiga ke tou feʼofaʼaki? ʼE maʼuhiga, he ʼe tou fakaha ai ko tatou ko te ʼu Kilisitiano moʼoni. Neʼe ui fenei e Sesu ki ʼana apositolo: “ ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.” (Soa. 13:35) Pea ka tou feʼofaʼaki, ʼe tou taupau ai totatou logo tahi. Neʼe ui e Paulo ko te ʼofa “ ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.” (Kol. 3:14) Kae ʼe ʼi ai te tahi tupuʼaga maʼuhiga ke tou feʼofaʼaki ai. Neʼe tohi fenei e te apositolo ko Soane ki ʼona tehina mo tuagaʼane: “Ko ia ʼae ʼe ʼofa ki te ʼAtua ʼe tonu foki ke ʼofa ki tona tehina.” (1 Soa. 4:21) Koia, ka tou feʼofaʼaki ʼe tou fakaha ai ʼe tou ʼoʼofa ki te ʼAtua.

4-5. Tuku mai he faʼifaʼitaki ʼe ha ai te pikipikiga ʼo totatou ʼofa ʼae ki te ʼAtua pea mo tatatou feʼofaʼaki.

⁴ Kotea te pikipikiga ʼo totatou ʼoʼofa ʼae ki te ʼAtua pea mo totatou ʼoʼofa ki ʼotatou tehina mo tuagaʼane? Moʼo tali ki ai, ʼe feala ke tou vakaʼi te pikipikiga ʼo totatou mafu pea mo te tahi ʼu koga ʼo totatou sino. Ke iloʼi e he toketa pe kua vaivai peʼe kei malohi te ta ʼo totatou mafu, ʼe feala ke ina fakafuafua ʼi totatou nima. Pea ʼe feala ai ke ina toe iloʼi pe ʼe haohaoa totatou mafu. Kotea ʼae ʼe tou ako mai te faʼifaʼitaki ʼaia?

⁵ Ka fua e he toketa ʼi totatou nima te ta ʼo totatou mafu, ʼe ina toe iloʼi ai pe ʼe haohaoa totatou mafu. ʼO toe feia aipe, ʼe feala ke tou iloʼi pe ʼe malohi totatou ʼofa ki te ʼAtua moka tou tokagaʼi pe ʼe feafeaʼi totatou ʼofa ki ʼotatou tehina mo tuagaʼane. Kapau ʼe tou tokagaʼi ʼe mole kei lahi totatou ʼoʼofa kia natou, ʼe lagi kua toe siʼisiʼi ai mo totatou ʼoʼofa ki te ʼAtua. Kae kapau ʼe kei tou ʼoʼofa tuʼumaʼu ki ʼotatou tehina mo tuagaʼane, ʼe tou iloʼi ai ʼe kei malohi pe totatou ʼoʼofa ki te ʼAtua.

6. He koʼe ʼe tonu ke tou foimo fai he puleʼaki moka ʼe tou tokagaʼi mole kei malohi totatou ʼofa ʼae ki ʼotatou tehina mo tuagaʼane? (1 Soane 4:​7-9, 11)

⁶ ʼE tonu ke tou foimo fai he puleʼaki moka ʼe tou tokagaʼi ʼe mole kei malohi totatou ʼoʼofa ki ʼotatou tehina mo tuagaʼane. Kotea tona tupuʼaga? He ʼe feala ke fua kovi ki ʼatatou felogoi mo Sehova. ʼE ha lelei te faʼahi ʼaia ʼi te ʼu palalau ʼaeni ʼa te apositolo ko Soane: “Ko ia ʼae ʼe mole ʼofa ki tona tehina ʼae ʼe sio ki ai, ʼe mole feala ke ʼofa ki te ʼAtua ʼae ʼe mole sio ki ai.” (1 Soa. 4:20) Kotea te ako maʼa tatou? Ke leleiʼia tatou e Sehova ʼe tonu ke tou “feʼofaʼaki.”—Lau ia 1 Soane 4:​7-9, 11.

ʼE FEAFEAʼI HATATOU FAKAHA TATATOU FEʼOFAʼAKI?

7-8. Kotea la he ʼu faʼahi ʼe feala ke tou fakaha ai tatatou feʼofaʼaki?

⁷ ʼE ha tuʼa lahi ʼi te Folafola ʼa te ʼAtua te fakatotonu ʼae ke tou “feʼofaʼaki.” (Soa. 15:​12, 17; Loma 13:8; 1 Tes. 4:9; 1 Pet. 1:22; 1 Soa. 4:11) Kae ko te ʼofa ʼe ko he faʼahi ʼe tou logoʼi ʼi totatou loto, ʼe mole feala ke sio he tahi ki ai. Koia ʼe feafeaʼi hatatou fakaha totatou ʼoʼofa ki te ʼu tehina mo tuagaʼane? ʼAki tatatou ʼu palalau mo ʼatatou gaue.

⁸ ʼE lahi te ʼu faʼahi ʼe feala ke tou fakaha ai ʼe tou ʼoʼofa ki ʼotatou tehina mo tuagaʼane. Ohage la, ʼe tou “fefakahaʼaki te moʼoni.” (Sakl. 8:16) ʼE tou “fetokaleleiʼaki.” (Mko. 9:50) ʼE tou “lotolelei ʼo fakamaʼuhigaʼi ʼihi.” (Loma 12:10) ʼE tou “fefakatalitaliʼaki.” (Loma 15:7) ʼE tou “haga . . . fefakamolemoleʼaki.” (Kol. 3:13) ʼE tou “haga feʼamoʼaki [ʼatatou] kavega.” (Kal. 6:2) ʼE tou “haga fefakafimalieʼaki.” (1 Tes. 4:18) ʼE tou “haga . . . fefakalotomalohiʼaki.” (1 Tes. 5:11) Pea ʼe tou “fefaikoleʼaki.”—Sakp. 5:16.

9. He koʼe ko te fakafimalieʼi ʼo ʼihi ʼe ko he faʼahi maʼuhiga ke tou fakaha ai totatou ʼofa? (Vakaʼi mo te pāki.)

⁹ Tou vakaʼi he faʼahi ʼe tou lava fakaha ai totatou ʼofa, ʼe tuʼu ʼi te palakalafe ki muʼa atu. Neʼe ui e Paulo ke tou “haga fefakafimalieʼaki.” He koʼe ʼe ko he faʼahi maʼuhiga ʼaia? ʼE ui ʼi he tohi Fakatohi-tapu ko te kupu “fakafimalie” ʼae neʼe fakaʼaogaʼi e Paulo ʼe fakaʼuhiga ki “takita nofo mo he tahi ʼo fakalotomalohiʼi ia ia moka felaveʼi mo ni faigataʼaʼia ʼaupito.” Koia, ka tou fakafimalieʼi he tehina peʼe ko he tuagaʼane ʼe lotomamahi, ʼe tou tokoni kia ia ke hoko atu tana tauhi agatonu kia Sehova. Pea ʼi te temi fuli pe ʼae ʼe tou fakafimalieʼi ai hotatou tehina peʼe tuagaʼane, ʼe tou fakaha ai ʼe tou ʼoʼofa ia ia.—2 Ko. 7:​6, 7, 13.

10. He koʼe ʼe tau hoa te manavaʼofa pea mo te fakafimalie?

¹⁰ ʼE tau hoa ia te manavaʼofa pea mo te fakafimalieʼi ʼo he tahi. ʼO feafeaʼi? Ka manavaʼofa he tahi, ʼe ina fia fakafimalieʼi ʼihi pea mo tokoni kia natou. Koia, ka tou manavaʼofa pea ʼe uga ai tatou ke tou fakafimalieʼi ʼotatou tehina mo tuagaʼane. Tokagaʼi pe ʼe fakapipiki feafeaʼi e Paulo te manavaʼofa ʼo Sehova pea mo tana fakafimalieʼi ia te hahaʼi. ʼE ina ui ʼo ʼuhiga mo Sehova ʼe ko “te Tamai ʼo te ʼu manavaʼofa pea mo te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe.” (2 Ko. 1:3) Ko te ʼAtua ʼe ko te Tamai, peʼe ko te Matapuna ʼo te manavaʼofa he ʼe lahi ʼaupito tona manavaʼofa ki te hahaʼi. Pea ko te manavaʼofa ʼo Sehova ʼe ina uga ai ia ia ke ina fakafimalieʼi “tatou ʼi ʼotatou ʼahiʼahi fuli.” (2 Ko. 1:4) Ohage pe ko natou ʼae ʼe fia iinu ʼe natou fimalie moka natou inu he moʼi vai, ʼo toe feia pe ʼe foaki e Sehova he fiafia mo he fakafimalie kia natou ʼae ʼe lotomamahi. ʼE feafeaʼi hatatou faʼifaʼitakiʼi ia Sehova, ʼo tou manavaʼofa pea mo fakafimalieʼi ai ʼihi? ʼE feala anai mo kapau ʼe tou faiga ke tou maʼu he ʼu kalitate. Kotea la ʼihi kalitate?

11. ʼO mulimuli kia Kolose 3:12 mo 1 Petelo 3:​8, ko te tahi ʼu kalitate fea ka tokoni mai ke tou ʼofa pea mo fakafimalieʼi ai ʼotatou tehina mo tuagaʼane?

¹¹ Kotea ʼae ka tokoni mai ke tou ʼoʼofa pea mo tou “haga fefakafimalieʼaki” ʼi te ʼaho fuli? ʼE tonu anai ke tou maʼu te ʼu kalitate ohage ko te kauga mamahi, mo te ʼofa fakatautehina, pea mo te agaʼofa. (Lau ia Kolose 3:12; 1 Petelo 3:8.) He koʼe ʼe ʼaoga te ʼu kalitate ʼaia? Ka tou manavaʼofa ki ʼotatou tehina pea mo maʼu mo te ʼu kalitate ʼaia, ʼe malohi anai tatatou fia fakafimalieʼi natou moka natou tau mo ni faigataʼaʼia. Ohage ko tona ui e Sesu: “ ʼE haʼu mai te gutu te meʼa ʼae ʼe fonu ʼi te loto. Ko te tagata ʼae ʼe agalelei, ʼe ina toʼo mai tona koloa ʼae ʼe lelei te ʼu meʼa ʼae ʼe lelei.” (Mat. 12:​34, 35) ʼEi ko tatatou fakafimalieʼi ʼotatou tehina mo tuagaʼane ʼae ʼe felaveʼi mo ni faigataʼaʼia, ʼe ko he faʼahi maʼuhiga ʼaia ke tou fakaha ai totatou ʼofa kia natou.

ʼE FEAFEAʼI HATATOU TAUPAU KE MALOHI TATATOU FEʼOFAʼAKI?

12. (1) He koʼe ʼe tonu ke tou tokakaga? (2) Ko te fehuʼi fea ʼae ka tou vakaʼi anai?

¹² ʼE tou loto fuli ke “tou haga feʼofaʼaki.” (1 Soa. 4:7) Kae ʼe maʼuhiga ke tou manatuʼi te fakatokaga ʼaeni neʼe fai e Sesu: “ ʼE momoko anai ia te ʼofa ʼo te tokolahi.” (Mat. 24:12) Neʼe mole fia ui e Sesu ʼe tokolahi anai ʼana tisipulo ka mole kei feʼofaʼaki. Kae ʼe tonu ke tou tokakaga naʼa tou hage ko te hahaʼi ʼi te malama ʼaeni ʼae mole kei feʼofaʼaki. Koia, tou vakaʼi te fehuʼi maʼuhiga ʼaeni: ʼE feala koa ke tou iloʼi pe ʼe kei malohi tatatou ʼoʼofa ki ʼotatou tehina mo tuagaʼane?

13. ʼE feafeaʼi hatatou iloʼi pe ʼe kei malohi totatou ʼofa ki ʼotatou tehina?

¹³ Ke tou iloʼi pe ʼe kei malohi totatou ʼofa, ʼe feala ke tou sivisivi tatatou aga moka hoko ni aluʼaga ʼi totatou maʼuli. (2 Ko. 8:8) Ohage ko te aluʼaga ʼaeni neʼe palalau ki ai ia te apositolo ko Petelo: “Kaʼe tafito, ke kotou feʼofamamahiʼaki, koteʼuhi ʼe ʼuʼufi e te ʼofa he ʼu tuʼuga agahala.” (1 Pet. 4:8) Koia, ko tatatou aga moka fai e ʼotatou tehina he hala peʼe ko he meʼa ʼe tou mamahi ai, ʼe ha ai anai pe ʼe kei malohi tatatou ʼoʼofa kia natou.

14. ʼO mulimuli kia 1 Petelo 4:​8, ko te faʼahiga ʼofa fea ʼae ʼe tonu ke tou maʼu? Tuku mai he faʼifaʼitaki.

¹⁴ Tou vakavakaʼi te ʼu palalau ʼae neʼe fai e Petelo. ʼI te ʼuluaki koga ʼo te vaega 8, ʼe ha ai te faʼahiga ʼofa ʼae ʼe tonu ke tou maʼu, ke tou “feʼofamamahiʼaki.” ʼI te Fakakeleka, ko te kupu “mamahi” ʼae neʼe fakaʼaogaʼi e Petelo ko tona fakaʼuhiga “folahi.” Pea ʼi te lua koga ʼo te vaega ʼe ha ai te meʼa ʼae ʼe hoko moka tou feʼofamamahiʼaki. ʼE tou ʼuʼufi ai te ʼu agahala ʼo ʼotatou tehina. ʼE hage ko he laupapa ʼe pūpū. ʼE tou folahi anai he kie ki te laupapa. Pea ʼe mole tou ʼuʼufi pe anai he pu ʼe tahi peʼe lua, kae ko te laupapa katoa. ʼO toe feia aipe, kapau ʼe tou ʼofa mamahi ki ʼotatou tehina mo tuagaʼane, ʼe mole tou “ ʼuʼufi” pe anai, peʼe fakamolemole, he hala ʼe tahi peʼe lua, kae ko “he ʼu tuʼuga agahala.”

15. Kapau ʼe malohi totatou ʼofa ki ʼotatou tehina mo tuagaʼane, kotea anai ʼe feala ke tou fai? (Kolose 3:13)

¹⁵ Ka ʼe malohi totatou ʼofa ki ʼotatou tehina mo tuagaʼane, ʼe feala anai ke tou fakamolemole ʼanatou hala, tatau aipe moka ʼi ʼihi temi ʼe faigataʼa tona fai. (Lau ia Kolose 3:13.) Pea ka tou fakamolemole ki ʼotatou tehina, ʼe ha ai ʼe kei malohi totatou ʼofa pea ʼe tou fia fakafiafiaʼi ia Sehova. Kotea he tahi faʼahi ka tokoni mai ke tou katakiʼi he aga ʼa he tehina peʼe tuagaʼane pea ke tou fakamolemole?

16-17. Kotea he tahi faʼahi ka tokoni mai ke tou fakamolemole he ʼu hala ʼo ʼotatou tehina mo tuagaʼane? Tuku mai he faʼifaʼitaki. (Vakaʼi mo te pāki.)

¹⁶ Tou tokagaʼi tafito te ʼu kalitate ʼo ʼotatou tehina mo tuagaʼane kae mole ko ʼonatou vaivaiʼaga. Tou toʼo te faʼifaʼitaki ʼaeni. Ohage la ʼe ke fakatahi mo he ʼu tehina mo tuagaʼane. ʼE kotou fiafia pea ʼi te fakaʼosi ʼe ke toho he ʼu pāki ʼo kotou fuli. ʼE mole ke toho pe he ʼu pāki ʼe lua. Kae lagi ko pāki ʼe tolu, naʼa ʼi ai he pāki ʼe mole lelei. Pea ʼe ke tokagaʼi ʼi he pāki ʼe mata mamalu he tehina. Kotea ka ke fai mo te pāki ʼaia? ʼE ke molehi anai he ʼe ʼi te ʼu pāki ʼae ʼe lua ko natou fuli ʼae ʼe tuʼu ai, ʼo feia mo te tehina, ʼe natou malimali.

¹⁷ ʼE tatau te ʼu pāki ʼae ʼe lelei mo te ʼu suvenia ʼae ʼe tou fia taupau. ʼI te agamahani, ʼe tou maʼu he ʼu suvenia lelei mai tatatou fakatahi mo ʼotatou tehina mo tuagaʼane. Kae kapau neʼe ui peʼe fai e he tahi he faʼahi neʼe mole tou leleiʼia. Kotea ʼae ka tou fai? ʼE tou faiga anai ke tou galoʼi te faʼahi ʼaia, ohage pe ko tatatou molehi te pāki ʼae ʼe mole lelei. (Taag. 19:11; Efe. 4:32) ʼE feala noa pe hatatou fakamolemole te hala ʼaia neʼe fai e totatou tehina peʼe tuagaʼane, koteʼuhi ʼe lahi age te ʼu temi neʼe tou fakafiafia ai mo ia pea ʼe kei tou manatuʼi. ʼE ko te ʼu suvenia lelei ʼaia ʼe tou fia taupau pea ʼe maʼuhiga age kia tatou.

ʼE MAʼUHIGA TE ʼOFA TAFITO IA ʼAHO NEI

18. Kotea te ʼu manatu tafito ʼo ʼuhiga mo te ʼofa neʼe tou vakaʼi ʼi te alatike ʼaeni?

¹⁸ He koʼe ʼe tou loto ke malohi tuʼumaʼu tatatou feʼofaʼaki? Ohage ko tatatou vakaʼi ʼi te alatike ʼaeni, ka tou ʼoʼofa ki ʼotatou tehina mo tuagaʼane ʼe tou ʼoʼofa ia Sehova. ʼE feafeaʼi hatatou fakaha totatou ʼofa ʼaia kia natou? Ohage la, moka tou fakafimalieʼi ia natou. Pea ʼe feala anai ke tou “haga fefakafimalieʼaki” mo kapau ʼe tou manavaʼofa. Kotea ʼae ʼe feala ke tou fai ke malohi tuʼumaʼu pe tatatou feʼofaʼaki? Tou faiga malohi ʼo fakamolemole te ʼu hala ʼo ʼotatou tehina mo tuagaʼane.

19. He koʼe ʼe maʼuhiga ke tou feʼofaʼaki tafito ia ʼaho nei?

¹⁹ He koʼe ʼe maʼuhiga ke tou feʼofaʼaki tafito ia ʼaho nei? Tokagaʼi te manatu ʼaeni neʼe ui e Petelo: “Kua ovi mai te fakaʼosi ʼo te ʼu meʼa fuli. Koia, . . . ke kotou feʼofamamahiʼaki.” (1 Pet. 4:​7, 8) Pea ʼi te kua ovi mai ʼo te fakaʼosi ʼo te malama agakovi ʼaeni, kotea ʼae ka hoko kia tatou? Neʼe ui fenei e Sesu ʼo ʼuhiga mo ʼana tisipulo: “ ʼE fehiʼaʼinaʼi anai koutou e te ʼu puleʼaga fuli ʼuhi ko toku huafa.” (Mat. 24:9) Ke tou lava katakiʼi totatou fehiʼaʼinaʼi ʼaia ʼe tonu ke tou taupau tatatou logo tahi. Ka tou logo tahi, ʼe mole iku anai te ʼu faiga ʼa Satana ke ina fakamavetevete tatou, koteʼuhi ʼe tou feʼofaʼaki. Pea ko te ʼofa “ ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.”—Kol. 3:14; Flp. 2:​1, 2.