Tou Haga Fakaha Te ʼOfa ʼAe ʼe ʼAʼasili Ai Totatou Malohi

1. Kotea te faʼahi maʼuhiga ʼae neʼe talanoa ki ai Sesu ʼi tona po fakaʼosi mo ʼana tisipulo?

ʼI TE po fakaʼosi ʼa Sesu mo ʼana tisipulo ʼi muʼa ʼo tana mate, neʼe teitei tuʼa 30 ia tana talanoa ki te ʼofa. Neʼe ina ui ki ʼana tisipulo ʼe tonu ke natou “feʼofaʼaki.” (Soane 15:12, 17) Ko te ʼofa ʼae ka natou femaʼuʼaki ʼe fakaofoofo anai pea ʼe natou fakaha ʼaki ai anai, ko natou ko te ʼu tisipulo moʼoni ʼa Kilisito. (Soane 13:34, 35) Ko te ʼofa ʼae neʼe talanoa ki ai Sesu ʼe mole ko he meʼa pe ʼe kita logoʼi ʼi tokita loto. Kae ko te ʼofa Fakakilisitiano moʼoni. Neʼe ui fenei e Sesu: “ ʼE mole he tahi ʼe lahi age tona ʼofa ʼi te ʼofa ʼa he tahi ʼe ina foaki tona maʼuli ʼo ʼuhiga mo ʼona kaumeʼa. Ko koutou ko ʼoku kaumeʼa mo kapau ʼe kotou fai ia te meʼa ʼae ʼe au fakatotonu atu.”—Soane 15:13, 14.

2. (1) Kotea ʼae kua iloʼi e te hahaʼi ʼo ʼuhiga mo te ʼu kaugana ʼa te ʼAtua ia ʼaho nei? (2) Kotea te ʼu fehuʼi ʼae ka tou tali anai ki ai ʼi te alatike ʼaeni?

² Ia ʼaho nei, kua iloʼi e te hahaʼi ko te ʼu kaugana ʼa Sehova ʼe natou maʼu te logo tahi pea mo te ʼofa moʼoni. (1 Soane 3:10, 11) Tatau aipe pe kotea tonatou lanu, tonatou telepi, tanatou lea, tonatou haʼuʼaga, peʼe ko tonatou faʼahiga akoʼi, kae ʼe natou feʼofaʼaki moʼoni ʼi te malamanei katoa. He koʼe ʼe maʼuhiga tafito te ʼofa ʼi te temi nei? ʼE fakamalohiʼi feafeaʼi tatou e Sehova mo Sesu ʼaki te ʼofa? Pea ʼe feafeaʼi hatatou fakaha totatou ʼofa moʼo fakalotofimalieʼi mo fakamalohiʼi niʼihi?—1 Kolonito 8:1.

ʼE MAʼUHIGA TAFITO TE ʼOFA ʼI TE TEMI NEI

3. ʼE malave feafeaʼi te ʼu “temi makehe” ʼaeni ki te tokolahi?

³ ʼE tou maʼuʼuli nei ʼi “he ʼu temi makehe,” pea kua tou sisio pe ki “te malaʼia mo te ʼu mamahi.” (2 Timoteo 3:1-5; Pesalemo 90:10, MN) Tokolahi te hahaʼi ʼe natou lotomamahi ʼaupito pea kua natou fia mamate. ʼI te taʼu fuli ko te toko 800 000 tupu ʼe natou fakamate, pea ʼe lau, ʼe ʼi ai tuʼumaʼu pe te fakamate hili sekonita ʼe 40. Kae meʼa fakaʼofaʼofa, he neʼe toe hoko te aluʼaga ʼaia ki ʼihi ʼi ʼotatou tehina mo tuagaʼane.

4. Ko ai te ʼu tagata ʼi te Tohi-Tapu ʼae neʼe fia mamate?

⁴ ʼI te temi muʼa, ko ʼihi kaugana ʼa te ʼAtua neʼe natou fia mamate ʼuhi ko te lahi fau ʼo tonatou lotomamahi ʼi ʼonatou fihifihia. Ohage la, ʼi te lahi fau ʼo te lotomamahi ʼa Sopo neʼe ina ui fenei: “ ʼE au fakalialia ki toku maʼuli; ʼE mole kei au fia hoko atu toku maʼuli.” (Sopo 7:16; 14:13, MN) ʼI te lotovaivai ʼaupito ʼa Sonasi, neʼe ina ui fenei: “I te aho nei, [Sehova], ke ke too la toku mauli ia au, koteuhi e lelei age te mate kia au i te mauli.” (Sonasi 4:3) Pea neʼe toe lotomamahi mo te polofeta ko Elia, he neʼe ina ui fenei: “Kua feauga! [Sehova], too atu nei toku mauli.” (1 Hau 19:4) Kae neʼe ʼofa Sehova ʼi ʼana kaugana agatonu ʼaia pea neʼe loto ia ke natou maʼuʼuli. Neʼe mole ina fakatonutonuʼi natou ʼi tanatou maʼu te ʼu manatu ʼaia. Neʼe tokoni kia natou ke natou fia maʼuʼuli mo hoko atu ia tanatou tauhi agatonu kia te ia.

5. He koʼe ʼe ʼaoga tafito ʼi te temi nei totatou ʼofa ki ʼotatou tehina mo tuagaʼane?

⁵ Ia ʼaho nei, tokolahi ʼotatou tehina mo tuagaʼane ʼe natou tau mo he ʼu aluʼaga fakatupu hoha pea ʼe ʼaoga totatou ʼofa kia natou. Ko ʼihi ʼe vaʼi peʼe fakatagaʼi natou. Pea ko ʼihi ʼe tonu ke natou katakiʼi tonatou fatufatuʼi peʼe laukoviʼi e ʼonatou kaugā gaue. Peʼe natou ogosia ʼuhi ko te lahi fau ʼo ʼonatou hola gaue peʼe ko te ʼu aluʼaga ʼae ʼe hoko ʼi ʼanatou gaue. Pea ko ʼihi ʼe natou tau mo te ʼu fihifihia ʼi ʼonatou maʼuli fakafamili. Lagi neʼe natou ʼohoana mo he tahi ʼe mole tauhi kia Sehova pea ʼe fakafeagai tuʼumaʼu kia natou. Koia ʼuhi ko te ʼu aluʼaga ʼaia, ko te tokolahi ʼe mole kei natou lavaʼi he meʼa pea natou manatu ʼe mole kei ʼi ai honatou ʼuhiga. Kae ko ai ʼae ʼe feala ke tokoni kia natou?

KO TE ʼOFA ʼO SEHOVA ʼE INA FAKAMALOHIʼI TATOU

6. ʼE fakamalohiʼi feafeaʼi e Sehova ʼana kaugana ʼaki tona ʼofa?

⁶ ʼE fakalotofimalieʼi e Sehova ʼana kaugana he ʼe ina loto ke natou iloʼi ʼe ʼofa ia natou ʼi te temi nei, pea ʼe ʼofa anai kia natou ʼo talu ai. Fakakaukauʼi age muʼa pe kotea ʼae neʼe logoʼi e te kau Iselaele ʼi te ui fenei age e Sehova kia natou: “E ke mauhiga i oku mata, koteuhi e ke lahi kia au pea e au ofa kia koe, . . . Aua naa ke mataku ki he mea, koteuhi e au nofo mo koe.” (Esaia 43:4, 5) ʼE tou iloʼi ʼe tou maʼuhiga fuli kia Sehova.a (Vakaʼi te kiʼi nota.) ʼE fakapapauʼi fenei mai ʼi te Tohi-Tapu ʼo ʼuhiga mo Sehova: “O hage ko he tagata toa ae e ina fakamauli ia koe; e mau anai tona fiafia lahi ia koe.”—Sofoni 3:16, 17.

7. Kotea ʼae ʼe tatau ai te ʼofa ʼo Sehova pea mo te ʼofa ʼo he faʼe? (Vakaʼi te ʼuluaki pāki.)

⁷ ʼE fakapapau mai ia Sehova, ʼe ina fakamalohiʼi mo fakalotofimalieʼi tana hahaʼi ʼi ʼonatou faigataʼaʼia fuli. Neʼe ina ui fenei: “E [fafaga] anai koutou, e luluku anai koutou i te u nima, pea e alaala anai koutou i te u fuga tuli. O hage ko he tagata ae e fakapelepelei e tana fae, e au fakapelepelei feia anai koutou.” (Esaia 66:12, 13) Fakakaukauʼi age muʼa te fimalie ʼae ʼe logoʼi e he kiʼi toe meamea moka fua pea mo gaoʼi mo tana faʼe. ʼO toe feia pe, ʼe ʼofa mamahi Sehova kia koe pea ʼe ina loto ke ke maʼuli fimalie. Manatuʼi tuʼumaʼu ʼe ke maʼuhiga kia Sehova.—Selemia 31:3.

8, 9. ʼE fakamalohiʼi feafeaʼi tatou e Sesu ʼaki tona ʼofa?

⁸ Koʼeni te tahi tupuʼaga ʼe tou iloʼi ai ʼe ʼofa Sehova kia tatou: “Neʼe ʼofa mamahi te ʼAtua ki te malamanei ʼo ina foaki ai tona ʼAlo ʼulu tokotahi, pea ko ʼae ʼe tui kia te ia ʼe mole mate anai kaʼe ʼe ina maʼu anai te maʼuli heʼe gata.” (Soane 3:16) ʼE toe ʼofa foki ia Sesu kia tatou, he neʼe ina sakilifisioʼi tona maʼuli maʼa tatou. Pea ko tona ʼofa ʼaia ʼe ina fakamalohiʼi tatou. ʼE ui ʼi te Tohi-Tapu, ʼe mole feala anai ki ‘te mamahi, peʼe ko te tuʼania’ ke ina “fakamavae . . . tatou mai te ʼofa ʼo Kilisito.”—Loma 8:35, 38, 39.

⁹ ʼI ʼihi temi, ʼe tou felaveʼi mo he ʼu mamahi ʼe ina fakavaivaiʼi te kakano pea mo te fakakaukau, peʼe puli ai totatou fiafia ʼi tatatou tauhi ʼae kia Sehova. Kae tou manatuʼi ia te ʼofa ʼae ʼo Kilisito kia tatou, he ʼe tou maʼu ai anai te malohi moʼo katakiʼi te ʼu aluʼaga ʼaia. (Lau ia 2 Kolonito 5:14, 15.) Ko te ʼofa ʼo Sesu ʼe ina uga tatou ke tou toe fia hoko atu ʼatatou faiga pea mo tatatou tauhi kia Sehova. Pea tahi, ʼe lava tokoni mai ke tou faʼa kataki, tatau aipe pe ʼe tou tau mo te ʼu tuʼutamaki fakanatula, te fakataga, te lotovaivai, peʼe ko te tuʼania.

ʼE ʼAOGA TOTATOU ʼOFA KI ʼOTATOU TEHINA MO TUAGAʼANE

10, 11. Ko ai ʼae ʼe tonu ke ina fakamalohiʼi te ʼu tehina mo tuagaʼane ʼae ʼe lotovaivai? Fakamahino.

¹⁰ ʼE toe fakaʼaogaʼi foki e Sehova ia te kokelekasio moʼo fakamalohiʼi tatou ʼaki tona ʼofa. Ka tou ʼoʼofa ki ʼotatou tehina mo tuagaʼane, ʼe tou fakaha ai ʼe tou ʼoʼofa ia Sehova. ʼE tou fai ia meʼa fuli ʼe tou lavaʼi moʼo tokoni ki ʼotatou tehina mo tuagaʼane, ke natou mahino ʼe natou maʼuhiga pea ʼe ʼofa Sehova kia natou. (1 Soane 4:19-21) Neʼe tohi fenei e te apositolo ko Paulo: “Kotou haga fefakalotomalohiʼaki pea mo fetokoniʼaki, ohage pe ko takotou fai.” (1 Tesalonika 5:11) ʼE mole ko he maʼua pe ʼo te kau tagata ʼafeā. Kae ʼe feala kia tatou takitokotahi ke tou faʼifaʼitakiʼi ia Sehova mo Sesu, ʼo tou fakalotofimalieʼi ʼotatou tehina mo tuagaʼane.—Lau ia Loma 15:1, 2.

¹¹ Ko ʼihi ʼi te kokelekasio ʼe natou tau mo he ʼu toe mamahi ʼi ʼonatou loto peʼe ko te loto hoha, pea ʼe ʼaoga kia natou ia he toketa pea mo he ʼu faitoʼo. (Luka 5:31) ʼE mahino ki te kau tagata ʼafeā pea mo ʼihi ʼi te kokelekasio logo la ko natou ʼe mole ko he ʼu toketa, kae ʼe maʼuhiga ʼaupito te tokoni pea mo te fakafimalie ʼae ʼe feala ke natou foaki. ʼE feala ki te kokelekasio katoa ke natou “fai he ʼu palalau fakalotofimalie kia natou ʼae ʼe lotomamahi, mo . . . tokoni ki te kau vaivai, pea mo kataki fualoa ki te hahaʼi fuli.” (1 Tesalonika 5:14) Tou faiga ke tou mahino pe kotea ʼae ʼe logoʼi e ʼotatou tehina mo tuagaʼane. Koia ʼe ʼaoga ke tou kataki fualoa kia natou, pea ke fakalotofimalie ʼatatou palalau ʼi te temi ʼae ʼe natou lotovaivai ai. ʼE ke faigaʼi koa ke ke fakalotomalohiʼi niʼihi? Kotea ʼae ʼe feala ke ke fai ke lahi age tau fakalotofimalie mo fakalotomalohiʼi niʼihi?

12. Neʼe feafeaʼi te fakalotomalohiʼi ʼo te tuagaʼane e tona kokelekasio ʼaki te ʼofa?

¹² Ko he tuagaʼane ʼe maʼuli ʼi Eulopa ʼe ina ui fenei: “ ʼE ʼi ai ʼihi temi ʼe au fia fakamate, kae ʼe tokolahi ia natou ʼae ʼe tokoni mai. Ko te kokelekasio ʼae ʼe au kau ai neʼe ina haofaki au. Pea ʼe fakalotomalohiʼi tuʼumaʼu pe au e te ʼu tehina mo tuagaʼane ʼaki te lahi ʼo tonatou ʼofa. Logo la ko te tokosiʼi ʼe natou iloʼi te toe mamahi ʼae ʼi toku loto, kae ʼe lagolago tuʼumaʼu mai pe ia te kokelekasio. ʼE ʼi ai te taumatuʼa ʼe hage pe ko haku ʼu matuʼā fakalaumalie. Pea ʼe nā tokakaga lelei kia au ʼi te ʼaho fuli.” ʼE moʼoni, ʼe mole tatau te ʼu tokoni ʼae ʼe feala ke foaki e te ʼu tehina mo tuagaʼane. Kae ʼe lahi te ʼu faʼahi ʼe feala kia tatou fuli ke tou fai moʼo lagolago ki ʼotatou tehina mo tuagaʼane.b (Vakaʼi te kiʼi nota.)

TE FAKAMALOHI ʼO ʼIHI ʼAKI TE ʼOFA

13. Kotea ʼae ʼe tonu ke tou fai moʼo fakalotofimalieʼi niʼihi?

¹³ Ke ke fakalogo lelei. (Sakopo 1:19) ʼE tou fakaha totatou ʼofa moka tou fakalogo ʼaki he lotomahino. Pea ʼaki he aga fakaʼeteʼete, fai he ʼu fehuʼi ʼe lava tokoni atu ke ke mahino ki te ʼu meʼa ʼae ʼe logoʼi e tou tehina. Fakaha age ʼaki te agaaga ʼo tou fofoga ʼe ke fia tokaga pea mo ʼofa moʼoni kia ia. Pea ke fakalogo ki ai ʼaki he kataki fualoa ʼo mole ke tuʼusi ʼana palalau. Kapau ʼe ke fakalogo lelei, ʼe feala anai ke ke mahino lelei age ki ai pea ʼe toe feala ai foki ke falala atu kia koe. Pea ʼi tau faiga ʼae ke ke tokoni ki ai, ʼe faigafua anai hana fakalogo ki te ʼu faʼahi ʼae ʼe ke ui age. Ka ke tokaga moʼoni ki ʼihi, pea ʼe ke liliu anai ko he fakafimalie moʼoni kia natou.

14. He koʼe ʼe mole tonu ke tou fai he ʼu valoki?

¹⁴ ʼAua naʼa ke fai he ʼu valoki. Kapau ʼe logoʼi e ia ʼae ʼe lotomamahi ʼe tou valoki ia ia, pea ʼe toe ʼaʼasili anai tona lotomamahi. Pea ʼe faigataʼa anai hatatou tokoni ki ai. “Ko he tahi, ae e palalau fakafuanoa, e ina fakalaveai te loto o hage ko he heleta, kae ko te alelo o te kau poto e ina ave te faitoo.” (Taaga Lea 12:18) ʼE moʼoni, ʼe mole tou hoʼi fai pe anai he ʼu palalau ʼe fakatupu mamahi ki he tahi ʼe lotomamahi. Kae kapau ʼe mole tou fakakaukauʼi ʼatatou palalau, ʼe feala ai ke lavea kovi tona loto. Ke feala hatatou fakalotofimalieʼi ia ia, ʼe tonu ke tou faigaʼi ke ina iloʼi papau ʼe tou fia mahino moʼoni ki tona aluʼaga.—Mateo 7:12.

15. Kotea he meʼa gaue ʼe feala ke tou fakaʼaogaʼi moʼo fakafimalieʼi niʼihi?

¹⁵ Fakaʼaogaʼi te Folafola ʼa te ʼAtua moʼo fakafimalieʼi niʼihi. (Lau ia Loma 15:4, 5.) Ko te Tohi-Tapu ʼe haʼu mai “te ʼAtua, ʼae ʼe ina foaki te faʼa kataki mo te fimalie.” Koia ʼae ʼe mole tou punamaʼuli ai ʼi tatatou maʼu ia he ʼu palalau fakafimalie ʼi te Tohi-Tapu. ʼE tou toe maʼu foki te tohi Index des publications des Témoins de Jéhovah pea mo te tohi Kumiʼaga Tohi maʼa te kau Fakamoʼoni ʼa Sehova. ʼAki te ʼu meʼa gaue ʼaia, ʼe feala ke tou maʼu he ʼu vaega Tohi-Tapu pea mo te ʼu tohi ʼae ʼe feala ke tou fakaʼaogaʼi moʼo fakafimalieʼi mo fakalotomalohiʼi ʼotatou tehina mo tuagaʼane.

16. Kotea te ʼu kalitate ʼae ka tokoni mai anai ke tou fakalotomalohiʼi he tahi ʼe lotomamahi ʼaupito?

¹⁶ Ke ke agaʼofa mo agamalū. Ko Sehova ʼe ko “te Tamai ʼo te ʼu manavaʼofa pea mo te ʼAtua ʼae ʼe ina fakafimalieʼi te hahaʼi,” pea ʼe “manavaʼofa” ki ʼana kaugana. (Lau ia 2 Kolonito 1:3-6; Luka 1:78; Loma 15:13) Neʼe tuku mai e te apositolo ko Paulo ia he faʼifaʼitaki lelei ʼi te aluʼaga ʼaia, he neʼe ina faʼifaʼitakiʼi ia Sehova. Neʼe ina tohi fenei: “Neʼe matou tokakaga lelei kia koutou, ohage ko te tokaga ʼofa ʼa he faʼe ki ʼana fanau ʼae ʼe ina fafaga. Koia, ʼi tamatou ʼoʼofa lahi ia koutou, neʼe matou fakatotonu ai ke mole gata pe tamatou fakaha atu kia koutou te logo lelei ʼo ʼuhiga mo te ʼAtua, kaʼe ke matou toe foaki foki mo ʼomatou maʼuli moʼo tokoni atu, koteʼuhi neʼe matou ʼoʼofa mamahi ia koutou.” (1 Tesalonika 2:7, 8) Ka tou agaʼofa ohage ko Sehova, ʼe lagi tou fakafimalieʼi anai he tehina peʼe ko he tuagaʼane neʼe faikole ʼo ʼuhiga mo te faʼahi ʼaia.

17. Kotea te manatu fakapotopoto ʼae ka tokoni mai anai ke tou fakalotomalohiʼi ʼotatou tehina mo tuagaʼane?

¹⁷ ʼAua naʼa ke fakamaʼua ki ʼou tehina mo tuagaʼane ke natou haohaoa. ʼE tonu ke ke maʼu he manatu fakapotopoto. Kapau ʼe ke fakamaʼua ke natou haohaoa, ʼe ke lotovaivai anai. (Ekelesiasi 7:21, 22) Tou manatuʼi ko Sehova ʼe mole ina fakamaʼua mai he meʼa ʼe mole tou lavaʼi. Koia, ʼe ʼaoga ke tou fekatakiʼaki. (Efeso 4:2, 32) ʼE mole tou fai anai he meʼa ke manatu ai ʼotatou tehina mo tuagaʼane ʼe mole lahi ʼanatou gaue kia Sehova. Pea ʼe mole tou fakatatau anai ia natou ki ʼihi. Kae tou fakalotomalohiʼi mo tou fakamalo kia natou ki ʼanatou gaue. He ʼe tokoni anai kia natou ke natou fiafia ʼi tanatou tauhi ʼae kia Sehova.—Kalate 6:4.

18. He koʼe ʼe tou fia fakamalohiʼi ʼotatou tehina mo tuagaʼane ʼaki te ʼofa?

¹⁸ Ko te ʼu kaugana fuli ʼa Sehova ʼe natou maʼuhiga kia te ia pea mo Sesu. (Kalate 2:20) ʼE tou ʼoʼofa mamahi ki ʼotatou tehina mo tuagaʼane, koia ʼae ʼe tou fia agaʼofa ai kia natou. ʼE tou “haga kumi te ʼu meʼa ʼae ʼe ʼaoga ki te tokalelei pea mo ʼae ʼe tou fefakalotomalohiʼaki ai.” (Loma 14:19) Kua tou fakaʼamu la ke tou maʼuʼuli ʼi te Palatiso, he ʼe mole toe felaveʼi anai he tahi mo te lotovaivai. ʼE mole toe ʼi ai anai te mahaki pea mo te tau. ʼE mole toe mate anai he tahi ʼuhi ko tona ʼuhiga agahala, pea ʼe mole toe ʼi ai anai he fakataga, he ʼu fihifihia fakafamili peʼe ko te ʼu aluʼaga fakalotomamahi ʼo te maʼuli. Pea ʼi te fakaʼosi ʼo te ʼu taʼu ʼae ʼe afe, ʼe haohaoa anai te hahaʼi fuli. Ko natou ʼae ka nonofo agatonu ʼi te ʼahiʼahi fakaʼosi, ʼe vaheʼi anai natou e Sehova ko ʼona foha fakakelekele pea ʼe natou maʼu anai “te ʼateaina fakakololia ʼo te ʼu fanau ʼa te ʼAtua.” (Loma 8:21) Koia, tou fakaha fuli te ʼofa ʼae ʼe tou lelesili malohi ai, pea mo tou fetokoniʼaki ke feala hatatou maʼuʼuli ʼi te malama foʼou fakatalakitupua ʼa te ʼAtua.