ʼE Tonu Ke Tou Loto Lolomi Ke Feala Hatatou Maʼu Te Fakapale!
“Ko nātou fuli pe ʼe kau ki he faigaoʼi, ʼe nātou lolomi ia nātou ʼo ʼuhiga mo meʼa fuli.”—1 Kolonito 9:25, MN.
1. Ohage ko tona ʼui ia Efeso 4:22-24, koteā ʼaē neʼe tonu ke fai e te ʼu lauʼi miliona hahaʼi moʼo foaki tonatou maʼuli kia Sehova?
KAPAU ko koutou ko he ʼu Fakamoʼoni ʼa Sehova kua papitema, neʼe koutou fakahā ia muʼa ʼo te hahaʼi ʼe koutou fia kau ki te lele ʼaē ʼe fakapale ʼaki te maʼuli heʼegata. Neʼe koutou tali ke koutou fai te finegalo ʼo Sehova. ʼI muʼa ʼo tatatou foaki totatou maʼuli kia Sehova, tokolahi ia tatou neʼe tonu ke tou fai he ʼu fetogi lahi ke tali e te ʼAtua te foaki ʼo totatou maʼuli kia te ia. Neʼe tou mulimuli ki te tokoni ʼa te ʼapositolo ko Paulo ki te kau Kilisitiano: “Koutou līaki tokotou ʼulugaaga ʼāfea ʼaē ʼe ʼalutahi mo takotou aga ʼāfea pea ʼe fakahehema ʼo fai pe ki tona ʼu holi kākā . . . Koutou kofuʼi te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efeso 4:22-24, MN ) Ko tona faka ʼuhiga ʼaē, ʼi muʼa ʼo tatatou tali ke tou foaki totatou maʼuli ki te ʼAtua, neʼe tonu ke tou fakafisi ki te maʼuli ʼāfea ʼaē neʼe mole lelei.
2, 3. ʼE fakahā feafeaʼi ia 1 Kolonito 6:9-12 te ʼu faʼahiga fetogi e lua ʼaē ʼe tonu ke tou fai ke tou maʼu ai te ʼofa ʼo te ʼAtua?
2 Ko ʼihi ʼu agaaga ʼo te ʼulugaaga ʼāfea ʼaē ʼe tonu ke līaki e te kau Fakamoʼoni ʼa Sehova, ʼe ko te ʼu aga ʼaē ʼe tauteaʼi e te Folafola ʼa te ʼAtua. Neʼe fakahā e Paulo ʼihi ʼu aga ʼi tana faitohi ki te kau Kolonito, ʼo ina ʼui fēnei: “ ʼE mole he tagata fai folonikasio, he tagata tauhi tamapua, he tagata fai feʼauʼaki, he ʼu tagata ʼe taupau ke fai kia nātou he ʼu holi ʼe mole tonu ke fai, he ʼu tagata ʼe momoe mo he ʼu tagata, he kau kaihaʼa, he hahaʼi mānumānu, he kau konahia, he kau leakovi, he ʼu hahaʼi ʼe nātou faʼao he ʼu meʼa ʼe mole ʼa nātou, ʼe nātou maʼu anai te puleʼaga ʼo te ʼAtua.” Pea neʼe ina fakahā neʼe tonu ki te ʼu Kilisitiano ʼo te ʼuluaki sēkulō ke nātou fetogi tonatou ʼulugaaga, ʼi tana ʼui fēnei: “Neʼe ko te ʼuhiga ʼaia ʼo niʼihi ia koutou.” Koutou tokagaʼi, neʼe nātou feiā ʼi muʼa atu, kae ʼi te temi nei kua nātou fetogi.—1 Kolonito 6:9-11, MN.
3 Neʼe toe ʼui e Paulo ʼe lagi ʼaoga ke fai he tahi ʼu fetogi, he neʼe ina ʼui fēnei: “ ʼE gafua ia meʼa fuli pe kia te ʼau, kae ʼe mole ʼaoga ia meʼa fuli pe.” (1 Kolonito 6:12, MN ) Koia, tokolahi ia ʼaho nei ʼaē ʼe nātou fia liliu ko he kau Fakamoʼoni ʼa Sehova, ʼe mahino kia nātou te ʼaoga ʼaē ke nātou fakafisi ki he ʼu meʼa, tatau aipe peʼe gafua, kae ko he ʼu meʼa ʼe mole ʼaoga peʼe mole faʼa maʼuhiga. Ko te ʼu meʼa ʼaia ʼe feala ke nātou kaihaʼa tonatou temi, pea feala ke ina fakaleluʼi ia nātou mai te kumi ʼo te ʼu meʼa ʼaē ʼe maʼuhiga tāfito.
4. Koteā ʼaē ʼe manatu tahi ai ia Paulo pea mo te kau Kilisitiano?
4 Ko te foaki ʼo totatou maʼuli ki te ʼAtua ʼe ko he meʼa ʼe tou fai ʼaki he lotolelei, kae neʼe mole fakakinauʼi tatou pea mo hage ʼe ko he toe sakilifisio lahi ʼaē neʼe tonu ke tou fai. ʼE manatu tahi mo Paulo te kau Kilisitiano ʼaē kua foaki tonatou maʼuli ki te ʼAtua, ʼaē neʼe ina ʼui fēnei ʼi te hili ʼo tana liliu ko he tisipulo ʼa Kilisito: “ ʼUhi ko [Sesu], neʼe ʼau tali ke ʼau fakafisi kia meʼa fuli pea kua hage kia ʼau ko he tuʼuga ʼotaʼota, ke feala haku maʼu ia Kilisito.” (Filipe 3:8, MN ) Neʼe tali fakafiafia e Paulo ke ina fakafisi ki te ʼu meʼa ʼaē neʼe mole faʼa maʼuhiga, ke feala hana fakahoko te finegalo ʼo te ʼAtua.
5. Neʼe ko te faʼahiga lele feafeaʼi ʼaē neʼe kau kiai ia Paulo pea mo mālo ai, pea ʼe lava feafeaʼi ke tou fai feiā mo tatou?
5 Neʼe loto lolomi ia Paulo ʼi tana lele fakalaumālie, pea ki muli age neʼe feala ai ke ina ʼui fēnei: “Neʼe ʼau tauʼi te tau matalelei, kua ʼau fakaʼosi te lele, neʼe ʼau tauhi te tui. ʼI te temi nei kua tāʼofi maʼa ʼaku ia te pale ʼo te faitotonu, ʼaia ka fakapale ʼaki ʼau ʼo foaki mai kia te ʼau e te ʼAliki, te tuʼi fakamāu faitotonu, ʼo mole kia ʼau tokotahi pe, kae ʼe toe kau foki kiai mo nātou fuli ʼaē neʼe nātou leleiʼia tana hā mai.” (2 Timoteo 4:7, 8, MN ) ʼE feala anai koa ʼi he ʼaho ke tou fai te ʼu palalau ʼaia? ʼE feala anai mo kapau ʼaki te tui ʼe tou loto lolomi ʼi tatatou lele faka Kilisitiano, ʼo mole tou līaki kae tou lele ki tona gataʼaga.
Ko Te Loto Lolomi Moʼo Fai Te Meʼa ʼAē ʼe Lelei
6. Koteā te loto lolomi, pea koteā te ʼu faʼahi e lua ʼaē ʼe tonu ai ke tou loto lolomi?
6 Ko te ʼu kupu faka Hepeleo pea mo faka Keleka ʼaē neʼe fakaliliu ʼaki te kupu “loto lolomi” ʼi te Tohi-Tapu, ʼi tona fakaliliu fakahagatonu ʼe faka ʼuhiga ki he tahi ʼe ina lava puleʼi ia ia totonu. ʼE fakaʼaogaʼi te ʼu kupu ʼo ʼuhiga mo he tahi ʼe ina tāʼofi ia ia ke mole ina fai he meʼa ʼe kovi. Kae ʼe mahino ia ʼe toe ʼaoga he loto lolomi mo kapau ʼe tou fakaʼaogaʼi totatou sino moʼo fai te ʼu gāue lelei. Ko te hahaʼi agahala ʼe nātou holi ke nātou fai te meʼa ʼaē ʼe kovi, koia ʼe ko he ʼu faʼahi e lua ʼe tonu ke tou tauʼi. (Tagata Tānaki 7:29; 8:11) ʼE tonu ke tou tāʼofi ia tatou ke mole tou fai te meʼa ʼaē ʼe kovi, pea ʼe toe tonu foki ke tou uga ia tatou ke tou fai te meʼa ʼaē ʼe lelei. ʼI tona fakahagatonu, ko tatatou puleʼi totatou sino ke tou fai te meʼa ʼaē ʼe lelei, ʼe ko te puleʼaki lelei ʼaia ke ʼaua naʼa tou fai te meʼa ʼaē ʼe kovi.
7. (a) Ohage ko Tavite, ʼe tonu ke tou faikole ʼo ʼuhiga mo teā? (b) Koteā ʼaē ʼe tonu ke tou metitasio kiai, pea ʼe tokoni mai anai ke lahi age tatatou loto lolomi?
7 ʼE mahino lelei mai ʼe maʼuhiga ʼaupito te loto lolomi ke feala hatatou foaki totatou maʼuli ki te ʼAtua. ʼE ʼaoga ke tou faikole ohage ko tona fai e Tavite: “Fakatupu ia te ʼau he loto maʼa, Ê ʼAtua, pea ʼai kia te ʼau he laumālie foʼou, ʼe mālohi.” (Pesalemo 51:10) ʼE feala ke tou metitasio ki te ʼu lelei ʼaē ʼe tou maʼu ʼi tatatou mole fai te ʼu aga heʼeʼaoga, pea mo te ʼu aga ʼaē ʼe fua kovi ki te faʼahi fakasino. Koutou fakakaukauʼi ki te ʼu fua kovi mo kapau ʼe koutou fai te ʼu aga ʼaia: he ʼu mahaki, he ʼu felogoi kovi, peʼe ko takotou mate tautonu. ʼI te tahi age faʼahi, koutou fakakaukauʼi te ʼu lelei ʼaē ʼe kita maʼu mokā kita mulimuli ki te faʼahiga maʼuli ʼaē ʼe fakatotonu mai e Sehova ke tou fai. Kae ʼe moʼoni ʼe tonu ke tou manatuʼi ko totatou loto ʼe kākā. (Selemia 17:9) ʼE tonu ke tou fakatotonu ke tou tauʼi te ʼu faiga ʼo totatou loto ke tou fakasiʼisiʼi te maʼuhiga ʼaē ke tou taupau te ʼu lekula ʼa Sehova.
8. Koteā ʼaē kua tou ʼiloʼi ʼo ʼuhiga mo te kakano? Koutou tuku mai he faʼifaʼitaki.
8 Tokolahi ia tatou ʼe tou ʼiloʼi, ʼe faiga tuʼumaʼu e te kakano ke ina fakavaivaiʼi te mālohi ʼo te laumālie. Ohage la ko te gāue fai faka mafola ʼo te Puleʼaga. ʼE fiafia ia Sehova ki te lotolelei ʼa te hahaʼi ke nātou kau ki te gāue ʼaia ʼaē ʼe ina hāofaki te maʼuli ʼo te hahaʼi. (Pesalemo 110:3; Mateo 24:14) Tokolahi ia tatou neʼe mole faigafua tatatou ako ke tou fai faka mafola ki te hahaʼi. Neʼe tonu, pea lagi kei ʼaoga ke tou lolomi totatou sino, ke tou “tukipalaʼi” pea mo “taki ia ia ohage ko he tahi ʼe popūla,” kae mole tou mulimuli ki tona loto ʼaē ke tou maʼuli fakafīfīmālie.—1 Kolonito 9:16, 27, MN; 1 Tesalonika 2:2.
“ ʼO ʼUhiga Mo Meʼa Fuli”?
9, 10. Koteā ʼaē ʼe toe faka ʼuhiga kiai te “loto lolomi ʼo ʼuhiga mo meʼa fuli”?
9 Ko te tokoni ʼa te Tohi-Tapu ke tou “loto lolomi ʼo ʼuhiga mo meʼa fuli,” ʼe hā ʼaki mai ko te loto lolomi ʼe mole gata pe ki te lolomi ʼo totatou ʼita pea mo tatatou mole fai he ʼu aga heʼeʼaoga. ʼE lagi tou manatu kua tou maʼu te loto lolomi ʼi te ʼu faʼahi ʼaia, pea kapau ko ia, ʼe feala ke tou loto fakafetaʼi. Kae e feafeaʼi ki te tahi ʼu faʼahi ʼo te maʼuli ʼaē ʼe mole hā lelei ai te ʼaoga ʼaē ke tou loto lolomi? Ohage la ʼe tou maʼuʼuli ʼi he fenua ʼe maʼu koloā pea mo lahi te ʼu koloā ʼa te hahaʼi. ʼE mole fakapotopoto anai koa te fakafisi ki te totogi ʼo he ʼu meʼa ʼe mole honatou ʼaoga? ʼE lelei mo kapau ʼe akoʼi e te ʼu mātuʼa ki tanatou fānau ke ʼaua naʼa nātou totogi te ʼu meʼa ʼaē ʼe nātou sio kiai, ʼuhi pe heʼe feala ke nātou maʼu, peʼe matalelei, peʼe ko he meʼa ʼe feala ke nātou totogi. ʼE mahino ia, ke fua lelei te ako ʼaia, ʼe tonu ke tuku e te ʼu mātuʼa he faʼifaʼitaki lelei.—Luka 10:38-42.
10 ʼE feala ke tou maʼu te loto papau ʼaia mo kapau ʼe tou ako ke tou fakafeauga ki te ʼu meʼa ʼaē ʼe tou maʼu. ʼE tou leleiʼia ai te ʼu koloā ʼaē ʼe tou maʼu, pea mo tou mahino lelei age kia nātou ʼaē ʼe mole nātou totogi he ʼu koloā maʼa nātou, mole ʼuhi heʼe mole nātou loto kiai, kae koteʼuhi heʼe mole feala. ʼE moʼoni, ko te faka faigafua ʼo tokita maʼuli ʼe mole ʼalutahi mo te ʼu manatu ohage “ke ke agalelei kia koe” peʼe “ ʼe tau mo koe te meʼa ʼaē ʼe lelei tokotahi.” Ko te ʼu paki ʼaē ʼe nātou fakahāhā ai te ʼu koloā, ʼe nātou uga te holi ʼa te hahaʼi ke nātou foimo toʼo fakavilivili, kae ʼe nātou fai te faʼahi ʼaia ʼuhi pe ko te fia maʼu paʼaga. ʼE feala ki te ʼu faʼahi ʼaia ke nātou fakahalaʼi tatatou ʼu faiga ʼaē ke tou loto lolomi. Mole heʼeki fualoa, neʼe tohi fēnei e te nusipepa mai te fenua koloaʼia ʼo Eulopa: “Kapau ko te lolomi ʼo te ʼu holi kovi ʼe fakamaʼua ke tauʼi ʼe nātou ʼaē ʼe māsisiva, e feafeaʼi age la te moʼoni ʼo te faʼahi ʼaia kia nātou ʼaē ʼe maʼuʼuli ʼi he fenua koloaʼia, ʼi he sosiete ʼe maʼu koloā ia ʼaho nei!”
11. He koʼe ʼe ʼaoga tatatou ako ʼaē ke mole tou hoko totogi ia meʼa fuli pe, kae koteā ʼaē ʼe feala ke faigataʼa ai te faʼahi ʼaia?
11 Kapau ʼe faigataʼa te fakakeheʼi ʼo te meʼa ʼaē ʼe tou loto kiai pea mo te meʼa ʼaē ʼe ʼaoga moʼoni kia tatou, pea ʼe tokoni mai anai kia tatou te loto lolomi mo kapau ʼe tou fai he ʼu fakatuʼutuʼu ke ʼaua naʼa tou fai he ʼu meʼa kae mole tou fakakaukauʼi ki tona ʼu fua. Ohage la, kapau ʼe tou fia tāʼofi tatatou agamāhani ʼaē ko te totogi ʼo meʼa fuli pe, pea ʼe feala ke tou fakatotonu ke mole tou tohi maʼua peʼe, ka tou faifakatau, ʼe feala ke tou toʼo pe te falā ʼaē ʼe ʼaoga. Koutou manatuʼi neʼe ʼui e Paulo ko “te aga faka lotu ʼaia pea mo te vilitute ʼaē ko te fakafeauga pe kia kita totonu” ʼe “fakatupu maʼu meʼa.” Neʼe ina ʼui fēnei: “Neʼe mole tou ʼaumai he meʼa ki te malamanei, pea ʼe mole feala foki ke tou ʼave he meʼa. Koia, kapau ʼe tou maʼu te meʼa kai pea mo te meʼa kofu, ʼe tou feʼauga pe anai ʼi te ʼu meʼa ʼaia.” (1 Timoteo 6:6-8, MN ) ʼE tou feiā koa? Ko te ako ʼaē ke tou maʼuli faigafua, ʼo ʼāteaina mai te fakahoko ʼo totatou ʼu holi kehekehe, ʼe fakamaʼua kiai ke tou loto moʼoni kiai pea mo tou loto lolomi. Kae ʼe ko he ako ʼe tonu ke tou maʼu.
12, 13. (a) He koʼe ʼe tonu ke tou loto lolomi ʼo ʼuhiga mo te ʼu fono faka Kilisitiano? (b) Koteā te tahi ʼu faʼahi ʼe tonu ai ke tou loto lolomi?
12 Ko te kau ki te ʼu fono, mo te ʼu fakatahi lalahi ʼe toe maʼua kiai he loto lolomi. Ohage la, ʼe ʼaoga ke tou maʼu te kalitate ʼaia mo kapau ʼe tou tokaga ki he tahi meʼa lolotoga te polokalama. (Tāʼaga Lea 1:5) ʼE lagi tonu ke tou lolomi ia kita ke tou fakalogo lelei kia ia ʼaē ʼe faiakonaki, kae mole tou fakaleluʼi ʼihi ʼaki tatatou fai fanafana. Ko te fetogi ʼo tatatou polokalama ke tou ʼōmai tautonu ai ʼe fakamaʼua kiai he loto lolomi. Tahi ʼaē meʼa, ʼe ʼaoga ke tou loto lolomi moʼo tuku he temi ke tou teuteu ai tatatou ʼu fono pea mo tou fai he ʼu tali.
13 Ko tatatou loto lolomi ʼi he ʼu kiʼi meʼa liliki, ʼe ina fakamālohiʼi ai tatatou loto lolomi ʼi te ʼu meʼa lalahi. (Luka 16:10) Koia ʼe ko he aga fakapotopoto tatatou akonakiʼi tatou ke tou lau tuʼumaʼu te Folafola ʼa te ʼAtua pea mo te ʼu tohi faka Tohi-Tapu, mo ako pea mo metitasio ki te ʼu meʼa ʼaē ʼe tou lau! ʼE ko he aga fakapotopoto tatatou lolomi ʼo tatou ʼo ʼuhiga mo te ʼu gāue ʼaē ʼe mole lelei, mo te ʼu fakakaumeʼa kovi, mo te ʼu aga heʼeʼaoga, pea mo tatatou ʼu agamāhani kovi, peʼe ke tou akonakiʼi tatou ke tou fakafisi ki te ʼu gāue ʼaē ʼe feala ke nātou kaihaʼa totatou temi maʼuhiga ʼaē ʼe tou fakaʼaogaʼi ki te tauhi ki te ʼAtua! Ko tatatou nofo maʼumaʼua ʼi te tauhi kia Sehova ʼe ko he puipui lelei moʼoni ʼaia ki te ʼu meʼa ʼaē ʼe feala ke nātou fakamamaʼo tatou mai te palatiso fakalaumālie ʼo te kokelekasio ʼa Sehova ʼi te malamanei katoa.
Tou Liliu Ko He ʼu Hahaʼi Lalahi ʼAki Te Loto Lolomi
14. (a) ʼE tonu ke ako feafeaʼi e te fānau te loto lolomi? (b) Koteā te ʼu lelei ʼaē ʼe feala ke maʼu e te fānau mo kapau ʼe nātou maʼu tautonu te faʼahiga ako ʼaia ʼi tonatou maʼuli?
14 Ko he tamasiʼi kei meamea ʼe mole tupu ake mo te loto lolomi. Ko te tohi neʼe fai e te hahaʼi ʼaē ʼe nātou sivi te aga ʼa te ʼu tamaliki, ʼe fakamahino fēnei ai: “ ʼE mole maʼu feiā pe te loto lolomi peʼe maʼu fakafokifā. ʼE ʼaoga ki te fānau te takitaki ʼa te ʼu mātuʼa pea mo tanatou tokoni ke nātou kamata ako te loto lolomi. . . . ʼAki te takitaki ʼa te ʼu mātuʼa ia te ako ʼaia, ʼe tuputupu te loto lolomi ʼi te ʼu temi ako ʼa te fānau.” Ko te sivi neʼe fai ki te ʼu tamaliki taʼu fā neʼe fakahā ai ko nātou ʼaē neʼe akoʼi age kia nātou te loto lolomi “ ʼi te agamāhani neʼe nātou lahilahi ake ʼo liliu ko he kau tūpulaga ʼe mole faigataʼa, ʼe leleiʼia e te hahaʼi, mo lototoʼa, ʼe nātou ʼiloʼi papau te meʼa ʼe nātou loto kiai pea ʼe feala ke tou falala kia nātou.” Ko nātou ʼaē neʼe mole nātou kamata ako te loto lolomi, “neʼe mole honatou kaumeʼa, mo ʼiʼita vave pea mo ʼuigataʼa. Neʼe nātou lotohoha pea mole nātou tauʼi te ʼu faigataʼaʼia.” Koia, ke liliu ko he tagata peʼe ko he fafine lelei, ʼe tonu ke ako e te tamasiʼi ke ina maʼu te loto lolomi.
15. Kapau ʼe mole tou maʼu te loto lolomi pea koteā ʼaē ʼe fakahā ai, ʼaē ʼe mole tatau mo te fakatuʼutuʼu ʼaē ʼe tuʼu ʼi te Tohi-Tapu?
15 ʼO toe feiā pe, kapau ʼe tou fia liliu ko he kau tagata Kilisitiano kua lalahi, ʼe tonu ke tou ako ke tou maʼu te loto lolomi. Kapau ʼe mole tou maʼu te loto lolomi, pea ʼe tou hage pe ko he ʼu tamaliki kei meamea ʼi te faʼahi fakalaumālie. ʼE tokoni mai te Tohi-Tapu ke tou “fakakaukau o hage ko he u tagata lalahi.” (1 Kolonito 14:20) ʼE tou fakatuʼutuʼu ke tou “aʼu ki te logo tahi ʼi te tui pea mo te ʼatamai mālama totonu ʼo ʼuhiga mo te ʼAlo ʼo te ʼAtua, ki te katoa ʼo te ʼuhigaʼi tagata, ki te fakafuafua ʼo te ʼaluʼaga ʼo te katoa ʼa Kilisito.” Koteā tona tupuʼaga? “Ke ʼaua naʼa tou hage ko he ʼu kiʼi tamaliki ʼe fetafeaʼaki ʼi te ʼu fuga vai pea mo feʼāveʼaki ʼi hē mo hē e te matagi ʼo te ʼu akonaki fuli pe, ʼaki te kākā ʼa te tagata, ʼi tanatou faiva ʼaē ʼi te faʼufaʼu ʼo te kākā.” (Efeso 4:13, 14, MN ) ʼE hā lelei mai ko te ako ʼaē ke tou loto lolomi ʼe maʼuhiga kia tatou ʼi te faʼahi fakalaumālie.
Tou Maʼu Te Loto Lolomi
16. ʼE tokoni feafeaʼi ia Sehova kia tatou?
16 Ke tou maʼu te loto lolomi, ʼe ʼaoga ke tokoni mai te ʼAtua pea ʼe feala ke tou maʼu tana tokoni. Ko te Folafola ʼa te ʼAtua, ohage ko he sioʼata haohaoa, ʼe ina fakahā mai te ʼu faʼahi ʼaē ʼe tonu ke tou fetogi, pea ʼe ina foaki mai he ʼu tokoni moʼo fakahoko te ʼu fetogi ʼaia. (Sakopo 1:22-25) Ko te ʼu tēhina ʼe nātou fia tokoni mo nātou. ʼE loto mahino te kau tagata ʼāfea mokā nātou foaki tokoni. Ko Sehova totonu ʼe ina foaki lahi tona laumālie maʼoniʼoni mo kapau ʼe tou kole kia te ia ʼi tatatou ʼu faikole. (Luka 11:13; Loma 8:26) Koia tou fiafia ʼi te fakaʼaogaʼi ʼo te ʼu meʼa ʼaia. ʼE feala ke tokoni mai te ʼu manatu ʼaē ʼe tuʼu ʼi te pasina 21.
17. Koteā te fakaloto mālohi ʼaē ʼe foaki mai kia tatou ia Tāʼaga Lea 24:16?
17 ʼE fakaloto fīmālie lahi tatatou ʼiloʼi ʼaē ʼe maʼuhiga kia Sehova tatatou ʼu faiga ʼaē ke ina leleiʼia tatou! ʼE tonu ke uga tatou e te faʼahi ʼaia ke tou haga faiga ke lahi age tatatou loto lolomi. Tatau aipe peʼe tuʼa fia tatatou tō, kae ʼe mole tonu ke tou līaki tatatou ʼu faiga. “ ʼE feala ke tō tuʼa fitu te faitotonu, kae ʼe mahino papau ia ʼe toe tuʼu ake anai.” (Tāʼaga Lea 24:16) ʼI te temi fuli pe ʼaē ʼe tou lava fakahā ai te loto lolomi, ʼe tonu ke tou fiafia ia tatou. ʼE feala ke tou tui papau ʼe toe fiafia mo Sehova ia tatou. ʼE ʼui e te Fakamoʼoni ʼi muʼa ʼo tana foaki tona maʼuli kia Sehova, ʼi te temi fuli pe ʼaē neʼe ina lava tauʼi ai tana fia suluka lolotoga te vāhaʼa katoa, neʼe ina fakapale ia ia ʼo ʼalu ʼo toʼo he meʼa ʼaoga maʼa ia ʼaki te paʼaga ʼaē neʼe ina lava tāʼofi ʼaki te loto lolomi.
18. (a) Koteā ʼaē ʼe tonu ke tou toe lolomi? (b) Koteā te fakapapau ʼe foaki mai e Sehova?
18 Ko te meʼa maʼuhiga ke tou manatuʼi ke tou lolomi tatatou fakakaukau pea mo te ʼu meʼa ʼaē ʼe tou logoʼi ʼi totatou loto. ʼE tou maʼu te manatu ʼaia ʼi te ʼu palalau ʼaenī ʼa Sesu: “Ko he tahi pe e sio ki he fafine mo he sio holi, kua tono mo ia i tona loto.” (Mateo 5:28; Sakopo 1:14, 15) Ko ia ʼaē neʼe ina ako ke ina puleʼi tana fakakaukau pea mo te ʼu meʼa ʼe ina logoʼi ʼi tona loto, ʼe faigafua anai kia ia ke ina puleʼi tona sino katoa. Koia ke mālohi tatatou fakatotonu ʼaē ke mole tou fai te meʼa ʼaē ʼe kovi pea ke mole tou manatu kiai. Ka malaga ia tatou he ʼu fakakaukau kovi, tou foimo tekeʼi te ʼu fakakaukau ʼaia. ʼE feala ke tou feholaki mai te fakahala ʼaki te faikole pea mo tou haga sio maʼu kia Sesu. (1 Timoteo 6:11; 2 Timoteo 2:22; Hepeleo 4:15, 16) ʼI tatatou faiga fakamalotoloto, ʼe tou mulimuli anai ki te tokoni ʼaē ʼe tuʼu ia Pesalemo 55:22: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.”
Kei Koutou Manatuʼi Koa?
• Koteā te ʼu faʼahi e lua ʼaē ʼe tonu ai ke tou loto lolomi?
• Koteā te faka ʼuhiga ke tou maʼu te “loto lolomi ʼo ʼuhiga mo meʼa fuli”?
• ʼI te ako ʼaenī, koteā te ʼu tokoni ʼaoga moʼo maʼu te loto lolomi neʼe koutou tāʼofi?
• ʼE kamata ʼifea te loto lolomi?
[Talanoa ʼo te pasina 21]
Te ʼu Meʼa ʼe Tonu Ke Tou Fai Ke Mālohi Ai Totatou Loto Lolomi
• Tou fakahā te loto lolomi ʼi te ʼu kiʼi meʼa liliki
• Tou metitasio ki te ʼu lelei ʼo te temi ʼaenī pea mo te ka haʼu
• Tou fetogi te ʼu meʼa ʼaē ʼe tapuʼi e te ʼAtua ʼaki te ʼu meʼa ʼaē ʼe ina fakaloto mālohi ke tou fai
• Tou foimo tekeʼi fakavilivili te ʼu manatu kovi
• Tou fakafonu totatou ʼatamai ʼaki he ʼu manatu fakalaumālie fakaloto mālohi
• Tou tali te tokoni ʼaē ʼe feala ke foaki mai e te kau Kilisitiano kua fakapotopoto
• ʼAua naʼa tou tō ʼi he ʼu ʼaluʼaga ʼe feala ke fakahalaʼi ai tatou
• Tou kole ki te ʼAtua ke tokoni mai ʼi te ʼu temi ʼaē ʼe fakahalaʼi ai tatou
[Paki ʼo te pasina 19]
Ko te loto lolomi ʼe ina uga tatou ke tou fai te meʼa ʼaē ʼe lelei