“Tou Aga Fakapotopoto” ʼi Te Kua Ōvi Mai ʼo Te Temi Fakaʼosi

“Ko te fakaʼosi ʼo te ʼu meʼa fuli kua ōvi mai. Koia koutou aga fakapotopoto.”​—1 Petelo 4:7.

1. Koteā te faka ʼuhiga ʼo te ʼui ʼaē ke tou “aga fakapotopoto”?

KO TE ʼu palalau ʼa te ʼapositolo ko Petelo ʼaē ʼe tuʼu ʼi ʼoluga ʼe tonu ke malave ʼaupito ki te faʼahiga fakaʼaogaʼi e te kau Kilisitiano tonatou maʼuli. Kae neʼe mole ʼui e Petelo kia nātou ʼaē ʼe lautohi ke nātou līaki te ʼu maʼua pea mo te ʼu meʼa ʼaē ʼe ʼaoga ki tonatou maʼuli ʼi te ʼaho fuli; pea ʼe mole ina fakaloto mālohiʼi nātou ke nātou mataku ʼaupito ʼuhi ko te fakaʼauha ʼaē ka ʼamanaki hoko. Kae neʼe ina uga fēnei ia nātou: “Koutou aga fakapotopoto.” Ko te manatu ʼaē ke tou “aga fakapotopoto” ko tona faka ʼuhiga ke tou fakafuafua lelei te ʼu meʼa ʼaē ʼe tou fai, ke tou popoto, pea mo tou tokaga ki ʼatatou ʼu palalau pea mo ʼatatou ʼu aga. Ko tona faka ʼuhiga ʼe tou tuku te Folafola ʼa te ʼAtua ke ina puleʼi tatatou ʼu fakakaukau pea mo tatatou ʼu aga. (Loma 12:⁠2) Mai tona ʼaluʼaga ʼaē ʼe tou maʼuʼuli ʼi te “lotolotoiga ʼo he taʼiake aga fakalialia pea mo fakapikopiko,” koia ʼe ʼaoga ai kia tatou ke tou aga fakapotopoto, ke tou tekeʼi ai te ʼu fihifihia pea mo te ʼu faigataʼaʼia.​—Filipe 2:​15.

2. ʼE ʼaoga feafeaʼi ki te kau Kilisitiano te faʼa kātaki ʼa Sehova ia ʼaho nei?

² Ko te kupu “aga fakapotopoto” ʼe toe tokoni foki kia tatou ke tou maʼu he manatu fakapotopoto ʼo ʼuhiga mo tatou. (Tito 2:​12; Loma 12:3) ʼE maʼuhiga te faʼahi ʼaia ʼuhi ko te ʼu palalau ʼaē ʼe tuʼu ia 2 Petelo 3:​9: “Ko Sehova ʼe mole tuai ʼo ʼuhiga mo tana fakapapau, ohage ko te faka ʼuhiga e ʼihi tana tuai, kae ʼe faʼa kātaki kia koutou heʼe mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.” Koutou tokagaʼi ko Sehova ʼe faʼa kātaki, ʼo mole gata pe kia nātou ʼaē ʼe mole tui kia te ia, kae ʼe toe faʼa kātaki foki “kia koutou”​—ʼaē ʼe kau ki te kokelekasio faka Kilisitiano. Koteā tona tupuʼaga? Koteʼuhi ʼe “mole ina loto ke fakaʼauha he tahi.” Lagi ko ʼihi ʼe kei ʼaoga ke nātou fai he ʼu fetogi pea mo he ʼu fakatonutonu, ke feala hanatou maʼu te meʼa ʼofa ʼo te maʼuli heʼegata. Koia ʼe tou vakaʼi anai te ʼu faʼahi ʼaē ʼe lagi ʼaoga ai ke tou fai he ʼu fetogi.

“Koutou Aga Fakapotopoto” ʼi Takotou ʼu Felogoi Faka Famili

3. Ko te ʼu fehuʼi fea ʼaē ʼe fai e te ʼu mātuʼa ʼo ʼuhiga mo tanatou ʼu tamaliki?

³ ʼE tonu ke maʼu te tokalelei ʼi te loto fale. Kae ko ʼihi ʼe ko “he loto fale ʼe lahi ai . . . te kē.” (Tāʼaga Lea 17:1) E feafeaʼi koa tokotou famili? ʼE hāo koa tokotou loto fale ʼi te “ ʼita, te pākalaga, pea mo te ʼu leakovi”? (Efesi 4:​31) E feafeaʼi koa takotou tamaliki? ʼE nātou logoʼi koa ʼe koutou ʼoʼofa pea mo koutou leleiʼia ia nātou? (Vakaʼi ia Luka 3:​22.) ʼE koutou toʼo koa he temi moʼo akoʼi ʼo nātou? ʼE koutou ‘akonakiʼi koa nātou ʼi te faitotonu’ kae mole koutou fai ʼaki te ʼita? (2 Timoteo 3:​16) Mai tona ʼaluʼaga ʼaē ko te ʼu fānau ʼe ko he “tofiʼa mai ia Sehova,” ʼe ina fia ʼiloʼi papau peʼe tou gaohi feafeaʼi ia nātou.​—Pesalemo 127:⁠3.

4. (a) Koteā te meʼa ʼaē ʼe feala ke hoko mo kapau ʼe aga fefeka he tagata ki tona ʼohoana? (b) ʼE lava feafeaʼi ki te ʼu fafine ʼohoana ke nātou tokalelei mo te ʼAtua pea mo nātou fakatuputupu te maʼuli fiafia ʼo tonatou famili katoa?

⁴ E feafeaʼi koa te ʼu tagata ʼohoana? “ ʼU tagata ʼohoana, koutou haga ʼofa ki ʼokotou ʼu ʼohoana, ohage ko te ʼofa ʼaē ʼa Kilisito ki te kokelekasio pea mo ina foaki ia ia totonu maʼa te kokelekasio.” (Efesi 5:​28, 29) Ko he tagata ʼe agakovi, mo fefeka tana takitaki, peʼe mole fakapotopoto, ʼe ina fakatupu anai he tuʼutāmaki ki te lelei ʼo tona loto fale, kae ʼe ina toe maumauʼi foki mo tana ʼu felogoi ʼaē mo te ʼAtua. (1 Petelo 3:7) E feafeaʼi te ʼu fafine ʼohoana? ʼO toe feiā aipe ʼe tonu ke nātou “fakalogo ki ʼonatou ʼohoana ohage ko hanatou fakalogo ki te ʼAliki.” (Efesi 5:​22) Ko he fafine ʼe loto ke lelei ia mata ʼo te ʼAtua, ʼe mole ina tokagaʼi te ʼu vaivaiʼaga ʼo tona ʼohoana pea ʼe fakalogo lelei ki ai. ʼI ʼihi temi, ʼe fia fakahā anai e te fafine tana manatu. ʼE ʼui fēnei ia Tāʼaga Lea 31:26 ʼo ʼuhiga mo te fafine ʼohoana faʼa gāue: “Neʼe ina avahi tona gutu ʼaki te poto, pea ko te lao ʼo te manavaʼofa ʼe ʼi tona ʼalelo.” ʼI tana tokaga fakalelei pea mo fakaʼapaʼapa ki tona ʼohoana, ʼe ina taupau maʼu tana tokalelei mo te ʼAtua, pea ʼe ina fakatuputupu te fiafia ʼo te famili katoa.​—Tāʼaga Lea 14:⁠1.

5. He koʼe ʼe tonu ke mulimuli te kau tūpulaga ki te ʼu tokoni faka Tohi-Tapu ʼo ʼuhiga mo tanatou aga ki tanatou ʼu mātuʼa?

⁵ Kau tūpulaga, e feafeaʼi takotou aga ki takotou ʼu mātuʼa? ʼE koutou fakakinakinaʼi koa nātou pea mo fai he ʼu palalau heʼe fakaʼapaʼapa ohage ko tona fai māhani e te hahaʼi ʼo te mālama? Peʼe koutou fakalogo koa ki te fakatotonu ʼaenī ʼa te Tohi-Tapu: “Koutou fakalogo ki takotou ʼu mātuʼa ʼo fakatahi mo te ʼAliki, heʼe tonu te faʼahi ʼaia: ‘Faka maʼuhiga tau tāmai pea mo tau faʼe,’ ko te ʼuluaki folafola ʼaia ʼaē ʼe kau kiai mo te fakapapau: ‘Koteʼuhi ke fua lelei kia te koe pea mo ke maʼuli fualoa ʼi te kele’ ”?​—Efesi 6:​1-3.

6. ʼE lava feafeaʼi hatatou kumi te tokalelei mo totatou ʼu tēhina ʼi te tui?

⁶ Tahi ʼaē meʼa, ʼe tou fakahā ʼe tou “aga fakapotopoto” mokā tou “kumi te tokalelei pea mo haga muliʼi” mo totatou ʼu kaugā fagona ʼi te tui. (1 Petelo 3:​11) ʼI ʼihi temi ʼe mole tou felogoiʼaki pea ʼe mole tou femahinoʼaki. (Sake 3:2) Kapau ʼe tou tuku ke fakaʼāsili tatatou lotokovi, pea ʼe feala ke fakatupu tuʼutāmaki ki te tokalelei ʼo te kokelekasio katoa. (Kalate 5:​15) Koia tou foimo fakatokatoka tatatou ʼu tokakovi; tou kumi he ʼu puleʼaki ke tou tokalelei.​—Mateo 5:​23-​25; Efesi 4:​26; Kolose 3:​13, 14.

“Te Aga Fakapotopoto” Pea Mo Te ʼu Maʼua Faka Famili

7. (a) Neʼe fakaloto mālohiʼi feafeaʼi e Paulo te manatu ʼaē ke tou “aga fakapotopoto” ʼi te ʼu gāue māhani ʼo te maʼuli? (b) Ko te aga fea ʼaē ʼe tonu ke taupau e te ʼu taumatuʼa Kilisitiano ʼo ʼuhiga mo tonatou ʼu maʼua ʼi tonatou loto fale?

⁷ Neʼe tokoniʼi e te ʼapositolo ko Paulo te kau Kilisitiano ke nātou “aga fakapotopoto.” (Tito 2:​12) ʼI te kapite ʼaia, ʼe fakaloto mālohiʼi e Paulo te hahaʼi fafine ke “nātou ʼoʼofa ki tonatou ʼu ʼohoana, ke nātou ʼoʼofa ki tanatou ʼu fānau, ke nātou aga fakapotopoto, mo aga fakapoipoi, mo faʼa gāue ʼi te loto fale.” (Tito 2:​4, 5) Neʼe faitohi ia Paulo ʼi te ʼu taʼu 61 ki te 64 ʼo totatou temi, ʼi he ʼu taʼu ʼi muʼa ʼo te fakaʼauha ʼo te tuʼu ʼo te ʼu faʼahiga meʼa faka Sutea. Kae ko te ʼu gāue māhani, ohage ko te fakamaʼa ʼo te loto fale, neʼe kei maʼuhiga ke fai. Koia ʼe tonu ai ki te taumatuʼa ke nā fai tana ʼu gāue ʼo te loto fale ke “ ʼaua naʼa leakoviʼi te folafola ʼa te ʼAtua.” Neʼe faifakalelei te pule famili ki te Kilisitiano neʼe ʼalu age ki tona ʼapi, ʼuhi ko te mole tokalelei ʼo tona loto fale. Neʼe ina fakamahino age ʼe mole tokalelei tona loto fale “he neʼe pionie.” ʼE ko he meʼa lelei mokā tou fai he ʼu sakilifisio ki te Puleʼaga, kae ʼe tonu ke tou tokakaga ke mole tou meʼa noaʼi te haʼele lelei ʼo te ʼu meʼa ʼaē ʼe ʼaoga ki totatou famili.

8. ʼE lava feafeaʼi ki te ʼu pule famili ke nātou fakafuafua lelei tanatou tokakaga ki te ʼu meʼa ʼaē ʼe ʼaoga ki tonatou famili?

⁸ ʼE uga e te Tohi-Tapu te ʼu tāmai ke nātou tokakaga muʼa ki tonatou famili, ʼo ina ʼui ko ʼaē ʼe mole tokaga ki tona famili, ʼe “fakafisi ia ki te tui pea ʼe kovi age ia ʼi he tagata ʼe mole tui.” (1 Timoteo 5:8) Ko te ʼu lekula ʼo ʼuhiga mo te maʼuli ʼe kehekehe ia ʼi te malamanei, pea ʼe lelei hatatou taupau he ʼu manatu fakapotopoto ʼo ʼuhiga mo te ʼu koloā. Neʼe faitohi fēnei te tagata ʼaē neʼe ina tohi te Tāʼaga Lea 30:⁠8: “ ʼAua naʼa ke tuku mai kia te ʼau te masiva peʼe ko te maʼu koloā.” Kae ʼe mole tonu ke galoʼi e te ʼu mātuʼa te ʼu meʼa ʼaē ʼe ʼaoga ʼi te faʼahi fakasino ki tanatou tamaliki. Ohage la, ʼe ko he aga poto anai koa ki te ʼu mātuʼa ke nā līaki tona ʼu maʼua faka famili ʼuhi ko hana ʼu pilivilesio faka teokalatike? ʼE feala koa ke tupu ʼaki ai he loto ʼita ʼa te fānau? Kae ʼe ʼui fēnei ia Tāʼaga Lea 24:27: “Teuteuʼi tau gāue ʼi tuʼa, pea mo ke teuteuʼi maʼa koe ʼi te gāueʼaga. Hili ʼaia pea ʼe tonu anai ke ke laga mo tou loto fale.” Ei, ʼe ʼaoga ke koutou tuʼania ʼo ʼuhiga mo te ʼu meʼa fakasino, kae ʼe maʼuhiga ʼaupito ke koutou ‘laga tokotou loto fale’​—ʼi te faʼahi fakalaumālie pea mo te ʼu meʼa ʼaē ʼe ʼi te loto.

9. He koʼe ʼe ko he aga fakapotopoto te fakakaukauʼi e te ʼu pule famili te fealagia ʼaē ʼe feala ke nātou mamate peʼe nātou mahahaki?

⁹ Kua koutou fai koa he ʼu fakatuʼutuʼu ʼe ʼaoga ki tokotou famili mo kapau ʼe koutou mate fakapunamaʼuli anai? ʼE ʼui fēnei ia Tāʼaga Lea 13:22: “Ko he tahi ʼe lelei ʼe ina tuku anai he tofiʼa ki te ʼu foha ʼo tona ʼu foha.” ʼO mole gata ʼaki pe tanatou faiga ʼaē ke nātou ʼiloʼi ia Sehova pea mo felogoi lelei mo ia, ʼe toe tokaga anai te ʼu mātuʼa ke maʼu e tanatou tamaliki he tofiʼa ʼi te faʼahi fakasino. ʼE lahi te ʼu fenua ʼe faiga te ʼu pule famili ke nātou tānaki he paʼaga ʼi te fale paʼaga, pe ko he pepa ʼe fakamoʼoni ai ʼe maʼu anai e tanatou fānau te ʼu koloā ʼo te ʼapi pea ke ʼi ai honatou assurance-vie. Koia, ko te hahaʼi ʼa te ʼAtua ʼe mole nātou hāo ʼi te ʼu “temi pea mo te ʼu meʼa ʼaē ʼe hoko fakafokifā.” (Tagata Tānaki 9:​11) Ko te falā ʼe ʼaoga “moʼo taupau,” pea kapau ʼe lelei te ʼu fakatuʼutuʼu ʼaē ʼe fai, pea ʼe feala ke kita hāo mai te faigataʼaʼia ʼo te falā. (Tagata Tānaki 7:​12) ʼI te ʼu fenua ʼaē ʼe mole totogi ai e te puleʼaga te ʼu faitoʼo, ʼe feala ke fakatuʼutuʼu e ʼihi ke nātou tuku kehe he falā moʼo totogi ʼaki te ʼu faitoʼo ʼaē ʼe ʼaoga kia nātou.a

10. ʼE lava feafeaʼi ke “tānaki” e te ʼu mātuʼa Kilisitiano he meʼa maʼa tanatou fānau?

¹⁰ Tahi ʼaē meʼa, ʼe ʼui fēnei e te Tohi-Tapu: “ ʼE mole ko te fānau ʼaē ʼe tonu ke nātou tānaki he meʼa maʼa te ʼu mātuʼa, kae ko te ʼu mātuʼa ʼaē ʼe tonu ke nātou tānaki maʼa te fānau.” (2 Kolonito 12:14) ʼI te mālama, ʼe ko he meʼa māhani ki te ʼu mātuʼa ke nātou tānaki he falā ʼo ʼuhiga mo te ako ʼo tanatou fānau pea mo te temi ʼaē ka nātou ʼohoana ai, ke kamata lelei tonatou maʼuli mokā nātou lalahi ake. ʼE kua koutou fakakaukauʼi koa te ka haʼu fakalaumālie ʼo takotou fānau? Ohage la, ko hakotou tamasiʼi ʼe kau ki te minisitelio ʼo te temi katoa. Mai tona ʼuhiga ʼaē ko nātou ʼaē ʼe gāue ʼi te temi katoa ʼi te minisitelio, ʼe mole nātou fakamaʼua peʼe nātou fakatalitali ke fai age kia nātou he tokoni ʼo ʼuhiga mo te falā, koia ʼe fakatuʼutuʼu anai e te ʼu mātuʼa ke nātou ‘vaevae mo ia ʼo mulimuli ki te ʼu meʼa ʼaē ʼe ʼaoga ki ai,’ ke feala ai hanatou tokoni kia ia ke ina haga fai tana selevisi ʼi te temi katoa.​—Loma 12:13; 1 Samuele 2:​18, 19; Filipe 4:​14-​18.

11. Ko tatatou ʼu manatu fakapotopoto ʼo ʼuhiga mo te falā, ʼe faka ʼuhiga koa ia ʼe mole tou tui? Koutou fakamahino.

¹¹ Ko tatatou manatu fakapotopoto ʼaia ʼo ʼuhiga mo te falā ʼe mole feala ke ʼui ʼe mole tou tui ki te kua ōvi mai ʼo te fakaʼauha ʼo te mālama agakovi ʼa Satana. ʼE tou fia ʼui ʼi henī ʼe tonu ke tou maʼu “te poto ʼaē ʼe ʼaoga” pea mo fakafuafua lelei te ʼu meʼa ʼaē ʼo ʼuhiga mo te falā. (Tāʼaga Lea 2:7; 3:​21) ʼI te tahi ʼaho, neʼe ʼui e Sesu ko “te ʼu foha ʼo te tuʼu ʼo te ʼu faʼahiga meʼa ʼaenī ʼe popoto age nātou ʼi te fai puleʼaki . . . ʼi te ʼu foha ʼo te mālama” ʼi tanatou fakaʼaogaʼi ʼo tanatou falā. (Luka 16:8) Koia ko ʼihi neʼe nātou fakatokagaʼi ʼe tonu ke nātou fai he ʼu fetogi ʼi te faʼahiga fakaʼaogaʼi ʼo tanatou falā ke feala ai hanatou tokakaga lelei ki te ʼu meʼa ʼaē ʼe ʼaoga ki tonatou ʼu famili.

“Te Aga Fakapotopoto” ʼi Tatatou Fakatuʼutuʼu ʼo ʼUhiga Mo Te Ako

12. Neʼe feafeaʼi te akoʼi e Sesu tana ʼu tisipulo ke nātou mulimuli ki te fetogi ʼo te ʼu ʼaluʼaga ʼo te temi?

¹² “Ko te ʼaluʼaga ʼo te mālama ʼaenī ʼe fetogi,” pea ʼe hoko vave te ʼu fetogi ʼi te faʼahi faka ekonomike pea mo te haʼele ki muʼa ʼo te tekenolosia. (1 Kolonito 7:​31) Kae neʼe ako e Sesu ki tana ʼu tisipulo ke nātou mulimuli ki te ʼu ʼaluʼaga ʼo te maʼuli. Neʼe ina ʼui age kia nātou ʼi tana fekauʼi nātou ʼi tanatou ʼuluaki fai faka mafola: “ ʼAua naʼa koutou toʼo he aulo, pe ko he siliva, pe ko he paʼaga kapa ke ʼai ki te taga ʼaiʼaga paʼaga ʼo tokotou ʼu noʼo, pe ko he kato fafaʼo meʼa kai ki te ala, pe ko he ʼu kofu ʼo loto e lua, pe ko he ʼu tapugā vaʼe, pe ko he tokotoko, heʼe tau mo te tagata gāue ke ina maʼu tana meʼa kai.” (Mateo 10:​9, 10) Kae ʼi te tahi ʼaluʼaga neʼe ʼui e Sesu: “Ko ʼaē ʼe ʼi ai hana taga paʼaga ke ina toʼo, ʼo feiā foki mo he kato meʼa kai.” (Luka 22:36) Neʼe koteā te meʼa ʼaē neʼe fetogi? Ko te ʼu ʼaluʼaga ʼo te maʼuli. Neʼe kua lahi ʼaupito te ʼu fetogi ʼa te lotu, pea ʼi te temi leva ʼaia neʼe tonu ke nātou fai he ʼu fakatuʼutuʼu ʼo ʼuhiga mo nātou totonu.

13. Koteā te fakatuʼutuʼu tāfito ʼo ʼuhiga mo te ako, pea ʼe lava feafeaʼi ke lagolago te ʼu mātuʼa ki tanatou fānau ʼi te faʼahi ʼaia?

¹³ ʼO feiā aipe ia ʼaho nei, ʼe tonu ke tokakaga te ʼu mātuʼa ki te ʼu meʼa ʼaē ʼe hoko ʼi te faʼahi faka ekonomike ia ʼaho nei. Ohage la, ʼe koutou fai koa he ʼu fakatuʼutuʼu ke akoʼi lelei nātou ʼi te ʼu faleako? Ko te fakatuʼutuʼu tāfito ʼo te ako, ko te teuteuʼi ʼo he tūpulaga ke liliu ko he minisi faiva ʼa Sehova. Pea ko te ako ʼaē ʼe maʼuhiga tāfito ʼe ko te ako fakalaumālie. (Isaia 54:13) ʼE toe tokakaga foki te ʼu mātuʼa ki te fealagia ʼaē ke nātou popoto ʼi te fakaʼaluʼalu ʼo tonatou maʼuli ʼi te faʼahi ʼo te falā. Koutou foaki he ʼu tokoni ki takotou fānau, ʼo koutou tokoni kia nātou ke nātou fili lelei te ʼu meʼa ʼaē ʼe nātou fia ako, pea mo koutou vakaʼi mo nātou peʼe fakapotopoto te hoko atu ʼo tanatou ako peʼe kailoa. Ko te taʼi puleʼaki ʼaia ʼe ko te maʼua ʼo te famili, pea ʼe mole tonu ke tou valoki te ʼu fakatuʼutuʼu ʼaē kua nātou fai. (Tāʼaga Lea 22:6) E feafeaʼi ia nātou ʼaē ʼe nātou fili ke nātou ako tanatou tamaliki ʼi tonatou ʼapi?b Logope la neʼe lelei te fai e te tokolahi te faʼahi ʼaia, neʼe ʼui e ʼihi neʼe mole nātou ʼiloʼi ʼe faigataʼa feiā anai, pea neʼe lahi te ʼu meʼa lelei ʼe mole ako ʼe tanatou ʼu fānau ʼuhi ko te faʼahi ʼaia. Koia kapau ʼe koutou fakakaukauʼi peʼe tonu ke fai tana ako ʼi tokotou ʼapi, koutou fakafuafua peʼe lelei anai kia nātou te faʼahi ʼaia, ʼo koutou vakaʼi lelei peʼe feala hakotou akoʼi nātou pea mo mulimuli ki tanatou ako.​—Luka 14:28.

‘ ʼAua Naʼa Koutou Kumi He ʼu Meʼa Lahi’

14, 15. (a) Neʼe pulihi feafeaʼi e Paluke tona poto fakalaumālie? (b) He koʼe neʼe ko he aga fakavale tana ‘kumi te ʼu meʼa lahi’?

¹⁴ Mai tona ʼaluʼaga ʼaē ʼe mole heʼeki hoko mai te fakaʼauha ʼo te tuʼu ʼo te ʼu faʼahiga meʼa ʼaenī, ko ʼihi ʼe lagi nātou fia kumi te ʼu meʼa ʼaē ʼe foaki e te mālama​—he gāue ʼe tupu ʼaki ai hakita ʼiloa, he ʼu gāue ʼe kita maʼu koloā ai, pea mo nātou kumi te ʼu koloā. Tou fakatokagaʼi te sikalaipe ʼa Selemia ko Paluke. Neʼe lāuga fēnei: “Malaʼia kia ʼau, he neʼe hilifaki e Sehova te mamahi ki toku faigataʼaʼia! Kua ʼau fiu ʼi te toʼetoʼe, pea neʼe mole ʼau maʼu he potu ke ʼau mālōlō ai.” (Selemia 45:3) Neʼe kua gaʼegaʼe ia Paluke. Neʼe ko he gāue faigataʼa pea mo fakaloto hoha ia te gāue sikalaipe kia Selemia. (Selemia 36:​14-​26) Pea neʼe hage ʼe mole ʼosi anai te ʼu mamahi ʼaia. Neʼe hoko te faʼahi ʼaia ia taʼu e 18 ʼi muʼa ʼo te fakaʼauha ʼo Selusalemi.

¹⁵ Neʼe ʼui e Sehova kia Paluke: “Koʼeni! Ko te meʼa ʼaē neʼe ʼau laga, ʼe ʼau maumauʼi, pea ko te meʼa ʼaē neʼe ʼau to, ʼe ʼau taʼaki, māʼia mo te fenua katoa. Kae ko koe, ʼe hoko atu pe tau kumi te ʼu meʼa lahi. ʼAua naʼa hoko atu tau kumi.” Neʼe kua puli te fakapotopoto ʼa Paluke. Neʼe ina kamata ‘kumi maʼa ia he ʼu meʼa lahi age,’ lagi ko te ʼu koloā, te ʼiloa, pea mo te maʼuli fīmālie. Mai tona ʼaluʼaga ʼaē neʼe “taʼaki, [e Sehova] māʼia mo te fenua katoa,” neʼe koteā koa te ʼuhiga ʼo te kumi ʼo te ʼu faʼahiga meʼa ʼaia? Koia neʼe foaki ai e Sehova kia Paluke te fakamanatu mālohi ʼaenī: “Heʼe koʼeni ʼe ʼau fakahoko anai he tuʼutāmaki ki te ʼu kakano fuli . . . , pea ʼe ʼau foaki atu anai tou nefesi ko he totogi ʼi te ʼu potu fuli ʼaē ʼe ke ʼalu anai kiai.” Ko te ʼu koloā fakamālama neʼe mole hāo ʼi te fakaʼauha ʼo Selusalemi! Neʼe fakamoʼoni e Sehova ʼe hāo tokotahi anai “tona nefesi ohage ko he totogi.”​—Selemia 45:​4, 5.

16. Koteā te ako ʼaē ʼe feala ke maʼu e te hahaʼi ʼa Sehova ia ʼaho nei ʼaki te meʼa ʼaē neʼe hoko kia Paluke?

¹⁶ Neʼe fakalogo ia Paluke ki tona fakatotonuʼi e Sehova, pea ohage ko te meʼa ʼaē neʼe fakapapau e Sehova, neʼe hāofaki te maʼuli ʼo Paluke. (Selemia 43:​6, 7) ʼE ko he ako mālohi ki te hahaʼi ʼa Sehova ia ʼaho nei! ʼE mole ko he temi ʼaenī ke tou ‘kumi he ʼu meʼa lahi age maʼa tatou.’ Koteā tona tupuʼaga? Koteʼuhi “ ʼe mole te malamanei pea mo tana ʼu holi.”​—1 Soane 2:​17.

Tou Fakaʼaogaʼi Lelei Te Temi ʼAē ʼe Kei Toe

17, 18. (a) Neʼe tali feafeaʼi e Sonasi te fakahemala ʼa te kau Ninive? (b) Neʼe akonakiʼi feafeaʼi e Sehova ia Sonasi?

¹⁷ Kae, ʼe lava feafeaʼi hatatou fakaʼaogaʼi lelei te temi ʼaē ʼe kei toe? Tou vakaʼi te meʼa ʼaē neʼe hoko ki te polofeta ko Sonasi. Neʼe “ ʼalu ki Ninive . . . , pea neʼe fai faka mafola ʼo ʼui maʼana: ‘Kei toe pe ʼaho e fāgofulu, pea ʼe maumauʼi anai ia Ninive.’ ” Neʼe punamaʼuli ia Sonasi, he neʼe tali lelei e te hahaʼi ʼo Ninive tana logo pea mo nātou fakahemala! Koia neʼe mole fakaʼauha ai e Sehova te kolo ʼaia. Neʼe koteā te tali ʼa Sonasi? “Ê Sehova, fakalelei kae ke toʼo toku nefesi, heʼe lelei age taku mate ʼi taku maʼuli.”​—Sonasi 3:​3, 4; 4:⁠3.

¹⁸ Neʼe akoʼi e Sehova kia Sonasi te meʼa maʼuhiga. Neʼe ina “fakahomo he kiʼi fuʼu ʼakau, ke homo ake ʼo fakamalumaluʼi ia Sonasi, ke liliu ʼo fakamalumalu tona ʼulu . . . Pea neʼe fiafia ʼaupito ia Sonasi ki te kiʼi fuʼu ʼakau ʼaia.” Kae ko te fiafia ʼa Sonasi neʼe nounou, ohage ko te mate vave ʼo te kiʼi fuʼu ʼakau ʼaia. Neʼe “ ʼita” ai ia Sonasi ʼi tana kua velahia. Neʼe fakahā ai e Sehova te meʼa ʼaē neʼe hala ai te manatu ʼa Sonasi, ʼo ina ʼui fēnei: “Ko koe neʼe ke ʼofa mamahi ki te kiʼi fuʼu ʼakau . . . Kae kia te ʼau, ʼe mole tonu koa la ke ʼau ʼofa mamahi ki Ninive, te kolo lahi ʼaē ʼe nonofo ai te toko teau ʼuafulu afe tupu, ʼaē ʼe mole nātou ʼiloʼi te kehekehe ʼo tonatou nima mataʼu pea mo tonatou nima hema, ʼo mole lau ia te ʼu manu lalata?”​—Sonasi 4:​6, 7, 9-​11.

19. Koteā te faʼahiga manatu ʼaē ʼe tou fia līaki?

¹⁹ Ko Sonasi neʼe manatu pe kia ia totonu! Neʼe ʼofa mamahi ia ki te kiʼi fuʼu ʼakau, kae neʼe mole manavaʼofa ia ki te hahaʼi ʼo Ninive​—te hahaʼi ʼaē neʼe mole ‘nātou ʼiloʼi te kehekehe ʼo tonatou nima mataʼu pea mo tonatou nima hema.’ ʼO toe feiā aipe mo tatou, ʼe lagi tou fakaʼamu ke foimo fakaʼauha te mālama agakovi ʼaenī! (2 Tesalonika 1:8) Kae ʼi tatatou fakatalitali ki te ʼaho ʼaia, ʼe ʼi ai totatou maʼua, ko te tokoni ki te hahaʼi fakamalotoloto, ʼaē ʼe mole nātou ‘ ʼiloʼi te kehekehe ʼo tonatou nima mataʼu pea mo tonatou nima hema.’ (Mateo 9:​36; Loma 10:​13-​15) ʼE koutou fakaʼaogaʼi anai koa te temi nounou ʼaē ʼe kei toe moʼo tokoni ki te tokolahi ke nātou maʼu te ʼatamai mālama taulekaleka ʼo ʼuhiga mo Sehova? Koteā he tahi age fakafiafia ʼe feala ke fakatatau ki te gāue ʼaē ko te tokoni ki he tahi ke ina maʼu te maʼuli?

Ke Hoko Atu Takotou “Aga Fakapotopoto”

20, 21. (a) Koteā te ʼu faʼahiga meʼa ʼaē ʼe feala ke tou fakahā ai tatatou “aga fakapotopoto” lolotoga te ʼu ʼaho ʼaenī? (b) Koteā te ʼu tapuakina ʼaē ka tou maʼu mo kapau ʼe tou “aga fakapotopoto”?

²⁰ ʼI te fakaōvi mai ʼo te temi ʼaē ka fakaʼauha ai te tuʼu ʼa Satana, ʼe mahino ia ʼe tou tau anai mo ni ʼu fihifihia foʼou. ʼE fakakikite ia 2 Timoteo 3:​13: “Ko te kau tagata agakovi pea mo te hahaʼi kākā ʼe nātou ʼāsili kovi anai.” Kae ʼaua naʼa koutou “fiu pea mo lotovaivai ʼi tokotou ʼu nefesi.” (Hepeleo 12:3) Tou kole kia Sehova ke ina foaki mai te mālohi. (Filipe 4:​13) Tou kātakiʼi te ʼu ʼaluʼaga kovi ʼo te temi ʼaenī, kae ʼaua naʼa tou manatuʼi te ʼu meʼa ʼaē kua hoko ki muʼa atu. (Tagata Tānaki 7:​10) Tou fakaʼaogaʼi te poto ʼaē ʼe ʼaoga, ʼo tou mulimuli ki te takitaki ʼaē ʼe foaki mai e “te tagata kaugana agatonu mo poto.”​—Mateo 24:45-​47.

²¹ ʼE mole tou ʼiloʼi peʼe kei loaloaga te temi ʼaē ʼe kei toe. Kae ʼaki he loto falala ʼe feala ke tou ʼui “kua fakaōvi mai te fakaʼosi ʼo te ʼu meʼa fuli pe.” ʼO aʼu ki te hoko mai ʼo te fakaʼosi, tou maʼuʼuli “ ʼaki he aga fakapotopoto” ʼi ʼatatou ʼu felogoi mo te hahaʼi, ʼi tatatou faʼahiga gaohi ʼo totatou ʼu famili, pea mo totatou ʼu maʼua fakamālama. Kapau ʼe tou fai te faʼahi ʼaia, pea ʼe feala ai kia tatou fuli ke tou falala ʼe maʼu mai anai tatou “ ʼe tou heʼe mele mo maʼa pea mo tou nonofo ʼi te tokalelei”!​—2 Petelo 3:​14.

[Nota ʼi te lalo pasina]

Te ʼu Puani Ke Tou Fakamanatu

◻ ʼE lava feafeaʼi hatatou fakahā ʼe tou “aga fakapotopoto” ʼi tatatou ʼu felogoi?

◻ ʼE tou fakahā feafeaʼi ʼe tou fakahoko lelei totatou ʼu maʼua faka famili?

◻ He koʼe ʼe tonu ke tokakaga te ʼu mātuʼa ki te ako ʼo tanatou ʼu fānau ʼi te ʼu faleako?

◻ Koteā te ʼu ako ʼaē ʼe tou maʼu ʼaki te ʼu meʼa ʼaē neʼe hoko kia Paluke pea mo Sonasi?

[Paki ʼo te pasina 18]

Kapau ʼe mole feagaleleiʼaki he taumatuʼa, pea ʼe nā maumauʼi tana ʼu felogoi mo Sehova

[Paki ʼo te pasina 20]

ʼE tonu ke tokakaga te ʼu mātuʼa ki te akoʼi ʼo tanatou fānau