“Ko He Faitoʼo Ki Tou Pito”
ʼE LAU ʼe lahi te ʼu mahaki ʼe tupu mai te ʼu hoha ʼo te loto, ohage ko te mataku, te lotomamahi, te loto mānumānu, te lotokovi, te fehiʼa, pea mo tokita tukugakoviʼi. ʼO ʼuhiga mo te faʼahi ʼaia, ʼe ko he meʼa fakaloto mālohi te ʼui ʼa te Tohi-Tapu ko te ‘manavasiʼi kia Sehova’ ʼe “ko he faitoʼo ki tou pito pea ko he fakamokomoko ki tou ʼu hui”!—Tāʼaga Lea 3:7, 8.
Ko te ʼu hui ʼe ko te koga fefeka ʼo te sino. Koia, ʼe fakaʼaogaʼi e te Tohi-Tapu te kupuʼi palalau “hui” moʼo fakatā ki te tagata totonu—kae tāfito ki te ʼu meʼa ʼe ina logoʼi ʼi tona loto. Kae e feafeaʼi he liliu ʼa te manavasiʼi kia Sehova “ko he faitoʼo ki tou pito”?
ʼE kehekehe te ʼu manatu ʼa te kau sivi Tohi-Tapu ʼo ʼuhiga mo te kupuʼi palalau “pito” ʼi te vaega ʼaenī. ʼE ʼui fēnei e te tagata, mai te ʼaluʼaga ʼaē “ko te koga ʼaia ʼe tuʼu ʼi te lotomalie ʼo te sino,” ʼe lagi fakatātā e te “pito” te ʼu koga maʼuhiga fuli ʼo te sino. Maʼa te tahi tagata, ʼe lagi faka ʼuhiga te kupuʼi palalau “pito” ki te uho, ohage ko tona fakaʼaogaʼi ia Esekiele 16:4. Kapau koia ʼaia, pea ʼe lagi faka maʼuhigaʼi e te Tāʼaga Lea 3:8 te ʼaoga ʼaē ke tou fakalogo katoa ki te ʼAtua—ohage ko te kiʼi tamasiʼi ʼaē ʼe kei fuafatuʼi e tana faʼe pea mo fakalogo tona fafaga ki tana faʼe. Ko te tahi manatu ʼe ina faka ʼuhiga te “pito” ki te ʼu ʼua pea mo te ʼu ivi ʼo te sino. Ka tou lau te ʼu vaega ʼaē ʼi muʼa atu ʼo feiā mo te ʼu vaega ʼaē ʼe hoa mai kiai, ʼe lagi fakaʼaogaʼi te kupuʼi palalau ʼaia moʼo fakakeheʼi mo te ʼu “hui”—ia te ʼu koga ʼo te sino ʼaē ʼe fefeka age.
Logope te faka ʼuhiga totonu ʼo te kupu ʼaia, kae ʼe ʼi ai te meʼa ʼe tou ʼiloʼi papau: Ko te manavasiʼi kia Sehova koʼena la te fakapotopoto. ʼE feala pe ke maʼu he fīmālie ʼo totatou sino ʼi te temi ʼaenī, mokā tou fakalogo ki te ʼu fakatuʼutuʼu ʼa te ʼAtua. Tahi ʼaē meʼa, ʼe feala ai ke tali tatou e Sehova, pea ko te faʼahi ʼaia ʼe ina taki anai tatou ki te maʼuli haohaoa—ʼi te faʼahi fakasino pea mo te faʼahi ʼo te loto—ʼi tona mālama foʼou ʼi te temi ka haʼu.—Isaia 33:24; Apokalipesi 21:4; 22:2.
[Haʼuʼaga ʼo te paki pasina 32]
Dr. G. Moscoso/SPL/Photo Researchers