E Feafeaʼi He Feala Ki Te Tagata Ko He Paki ʼo Te ʼAtua?

“NEʼE fakatupu e te ʼAtua ia te tagata ko tona paki, ʼaki te paki ʼo te ʼAtua neʼe ina fakatupu; neʼe ina fakatupu nāua ko te tagata pea mo te fafine.” ʼE feiā te talanoa ʼa te Folafola ʼaē haʼu mai te ʼAtua, kae koteā koa tona faka ʼuhiga? Neʼe feafeaʼi koa te faʼu ʼaē ʼo te ʼuluaki tagata pea mo te ʼuluaki fafine ki te paki ʼo te ʼAtua?—Senesi 1:27.

Ko ʼonā sino neʼe hage koa ko te sino ʼo te ʼAtua? Kailoa, ʼe mole feala ia. Ko te tagata ʼe tagata pe ia, ʼe kakano, neʼe fakatupu ia ke maʼuli ʼi te fuga kele. Ko te ʼAtua ʼe laumālie, ʼe maʼuli ia ʼi he kolōlia ʼi selo ʼe molemo feala ke tou fakafuafua, ʼo mole feala pe la ki he tagata ke fakaōviōvi ki ai. (Ekesote 33:18-20; 1 Kolonito 15:50) Kae, e feafeaʼi koa ki te ʼui ʼaē, ko te tagata neʼe faʼu ki te paki ʼo te ʼAtua? Ko tona ʼuhiga ʼaē, neʼe foaki ki te tagata te fealagia ʼaē ke ina fakaʼaogaʼi te ʼu kalitate fakaofoofo ʼa te ʼAtua—te ʼofa, te faitotonu, te poto, pea mo te mālohi—ʼo feiā ki te ʼu kalitate ʼaē.

Te ʼu Kalitate ʼo Sehova

Ko te ʼu kalitate ʼa Sehova ʼe ʼasi mai ʼi te ʼu meʼa fuli ʼaē neʼe ina faʼu, kae neʼe fakaʼofaʼofa foki leva tona fakaʼaogaʼi ʼi te ʼu felogoi ʼa Sehova pea mo te ʼuluaki taumatuʼa ia Atama pea mo Eva. (Loma 1:20) Ko tona ʼofa neʼe ʼasi mai ʼi tana haga ʼaē ʼo faʼu te kele ʼo fakafeauga lelei ki te maʼuli ʼo te tagata. Ko Sehova neʼe ina faʼu maʼa te tagata hona ʼohoana haohaoa ke liliu ko hona kaumeʼa pea mo te faʼe ʼo tana ʼu tamaliki. Neʼe ina tuku ia nāua tokolua ki he ʼōloto matalelei pea mo foaki age kia nāua ʼo mahu ʼaupito, ia meʼa fuli neʼe ʼaoga ki tonā maʼuli pea mo tonā fiafia. Pea ko te faʼahi leva ʼe fakatalakitupua ia meʼa fuli pe, neʼe foaki age e te ʼAtua kia nāua te fealagia ʼaē ke nā maʼuʼuli ʼo heʼegata.—Senesi 2:7-9, 15-24.

Ko te poto ʼo te ʼAtua neʼe ʼasi mai ʼi tana ʼahiʼahiʼi ʼaē ia te ʼuluaki taumatuʼa. Kapau neʼe nā fia kau tuʼumaʼu ki te famili faka ʼatulaulau ʼa te ʼAtua, pea mo maʼuli ʼo heʼegata ʼi tonā ʼuhiga tāmai mo faʼe ʼo te tagata fuli pe, neʼe tonu ke nā liliu ko ni ʼu faʼifaʼitaki ʼi te agatonu pea mo te tauhi moʼoni. Koia, neʼe tuku age ai e Sehova te fealagia ʼaē ke nā fakahā te ʼaluʼaga ʼo tonā loto ʼaki he ʼahiʼahi neʼe tāu—neʼe mole tonu kia nāua ke nā kai ki te ʼakau ʼo te mālama ki te lelei mo te kovi. ʼI poto foki ʼa te ʼAtua ʼi tana tuku age ʼaē ki te tagata fuape he fealagia ke nātou fakahā tanatou fakalogo pea mo tonatou ʼofa ʼaē kia te ia ʼi muʼa ʼo hana foaki age kia nātou te ʼu pilivilesio fakaofoofo ʼaē neʼe ʼi tona loto!

Neʼe hā te faitotonu ʼa te ʼAtua ʼi tana haga ʼaē ʼo ʼekenaki tana hahaʼi ki tana ʼu pelesepeto māʼoluga pea mo tana mole fakamālaloʼi te ʼu pelesepeto ʼaia. Neʼe hā te faʼahi ʼaia ʼi tana tuku age ʼaē kia Atama pea mo Eva te ʼu fealagia fuli ke nā fai te meʼa ʼaē ʼe lelei. Pea ʼi tanā hala leva ʼi te faʼahi ʼaia, neʼe toe hā tana faitotonu ʼi tana tauteaʼi nāua ke nā maʼuli mamahi, ʼaki pe te tūʼa ʼaē neʼe ina fakatuʼutuʼu ki te talagataʼa.

Koia, ko te mālohi ʼaē ʼa Sehova neʼe hā ʼi tana haga ʼaē ʼo taupau tana tautea. Ko Satana, te fakafeagai lahi, neʼe ina fia fakahā age kia nāua, ko Sehova neʼe gutuloi, pea neʼe fakapapau age e Satana he ʼu meʼa lahi kia Eva mo kapau ʼe talagataʼa ki te ʼAtua. (Senesi 3:1-7) Kae neʼe mole feala kia Satana ke ina fakahoko tana fakapapau. Neʼe mole feala kia ia ke ina tāʼofi ia Sehova ʼi tana kapu ia Atama mo Eva mai te ʼōloto ʼo Eteni, pea neʼe mole feala kia ia ke ina tāʼofi te fakahoko ʼaē ʼo te ʼu palalau ʼa te ʼAtua kia Atama: “Ko koe ko te efu pea ʼe ke toe liliu anai ki te efu.” (Senesi 3:19) Kae, neʼe mole haga atu aipe ia Sehova ʼo fakahoko ʼi te moʼi temi pe ʼaia te tautea ʼo ʼuhiga pea mo te mate, koia ʼi te faʼahi ʼaia neʼe ina fakahā ai tona ʼofa. Neʼe ina tuku te fealagia kia Atama pea mo Eva ke nā fakatupu ni ʼu tamaliki ke feala ʼaki ia nātou ʼaia ke ina fakahoko tana ʼuluaki fakatuʼutuʼu ʼo ʼuhiga mo te tagata.—Senesi 1:28.

Koia, ko te faitotonu ʼa Sehova, mo tona ʼofa, mo tona māfimāfi, pea mo tana fakapotopoto neʼe ʼiloga lelei ia ʼi tana fakapapau ʼaē ʼo ʼuhiga mo he hāko ʼaē ka ina fakaʼauha anai te ʼu gāue ʼa Satana pea mo molehi te ʼu fua kovi ʼaē ʼo te ʼuluaki talagataʼa ki te pule fakaʼatua. (Senesi 3:15) ʼI fakaofoofo foki ʼo totatou Tupuʼaga!

He ʼu Faiga Moʼo Faʼifaʼitaki Ki Te ʼAtua

ʼE logo aipe la tana mole kei haohaoa ko te tagata ʼe feala pe tana maʼuliʼi te ʼu kalitate ʼo te ʼAtua. Koia la ʼaē, neʼe fakaloto mālohiʼi ai e Paulo te kau Kilisitiano ʼo tona temi: “Koutou liliu ko he kau faʼifaʼitaki ʼo te ʼAtua, ohage ko he fānau ʼofaina.” (Efesi 5:1) Kae ʼi te hoholo mai ʼo te hisitolia, ko te tokolahi neʼe nātou fakahā tanatou mole fakaʼapaʼapa ki te ʼu kalitate ʼa te ʼAtua. ʼI te temi ʼo Noe, ʼi te kua kovi ʼaupito ʼa te tagata neʼe lotomālohi leva ia Sehova ke ina fakaʼauha te hahaʼi fuli gata pe kia Noe pea mo tona famili. Ko Noe neʼe “ko te tagata agatonu ia. Neʼe nofo agatonu ia ʼi te lotolotoiga ʼo te ʼu hahaʼi ʼo tona temi” pea neʼe ina fakahā tona ʼofa ki te ʼAtua ʼi tana fakatokagaʼi te ʼu fakatotonu ʼa te ʼAtua.a “Neʼe fakamaʼua kia Noe ke ina fai meʼa fuli neʼe fakatotonuʼi age e te ʼAtua. Pea neʼe ina fai.” (Senesi 6:9, 22) Neʼe fakahā e Noe tona ʼofa kāiga pea mo tana pipiki ʼaē ki te faitotonu ʼi tana liliu ʼaē ko he “tagata fai faka mafola ʼo te faitotonu.” (2 Petelo 2:5) Neʼe aga fakapotopoto pea neʼe ina fakaʼaogaʼi lelei tona mālohi fakatagata ʼo mulimuli ki te fakatotonu ʼa te ʼAtua ke faʼu he aleka lahi, pea mo tānaki kiai he ʼu meʼa kai, mo fakatahiʼi ki loto te ʼu manu, pea mo nātou hū ki te aleka ʼi te fakatotonu ʼa te ʼAtua. Neʼe ina toe fakahā foki tona ʼofa ʼaē ki te faitotonu ʼi tana mole faka fealagia ʼaē ki te ʼu hahaʼi agakovi ke nātou fakahalaʼi ia ia.

Ko te Tohi-Tapu ʼe ina fakahā mai te tahi ʼu faʼifaʼitaki neʼe nātou toe fakahā te ʼu kalitate fakaʼatua. Ko te faʼifaʼitaki ʼaē neʼe takimuʼa pe ʼi te faʼahi ʼaia ko Sesu Kilisito, ʼaē neʼe ko he fakatā lelei ʼo te ʼAtua ʼo feala ai la tana ʼui ʼaē: “Ko ʼaē neʼe sio kia te ʼau neʼe kua sio ia ki te Tāmai.” (Soane 14:9) ʼI te ʼu kalitate ʼaē neʼe fakahā e Sesu, neʼe makehe ia tona ʼofa. Ko tona ʼofa ʼaē ki tana Tāmai pea mo te malamanei, ʼaē neʼe ina uga ia ia ke mavae mai tona nofoʼaga ʼi selo ʼo haʼu ʼo maʼuli ohage ko he tagata ʼi te fuga kele. Neʼe uga ia ia e tona ʼofa ke ina faka kolōlia tana Tāmai ʼaki tana agatonu pea mo tana faka mafola ʼaē te ʼu logo lelei ki te hāofaki ki te malamanei. (Mateo 4:23; Soane 13:31) Ki muli age, ko te ʼofa neʼe ina uga ia Sesu ke ina foaki tona maʼuli haohaoa moʼo hāofaki te malamanei kae tāfito moʼo tāpuhā ia te huafa ʼo te ʼAtua. (Soane 13:1) ʼI tatatou faiga ʼaē ke tou faʼifaʼitaki ki te ʼAtua, ʼe ʼi ai koa la he tahi age faʼifaʼitaki ʼe lelei age ia Sesu Kilisito?—1 Petelo 2:21.

ʼE Lava Feafeaʼi Kia Tatou ʼi Te Temi Nei Ke ʼĀʼāsili Age Tatatou Hage Ko Te ʼAtua?

ʼE lava feafeaʼi, ia ʼaho nei hatatou fakaʼasi te ʼu kalitate ʼa te ʼAtua pea mo maʼuʼuli ʼo mulimuli pe ki te paki ʼa te ʼAtua? Tou ʼuluaki vakaʼi muʼa te kalitate ʼaē ko te ʼofa. Neʼe ʼui e Sesu: “ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.” E feafeaʼi hatatou fakahā ʼe tou ʼofa ki te ʼAtua? ʼE tali e te ʼapositolo ko Soane ʼo fēnei: “Ko te faka ʼuhiga ʼo te ʼofa ʼaē ki te ʼAtua, ko te tauhi ki tana ʼu fakatotonu; pea ko tana ʼu fakatotonu ʼe mole mamafa.”—Mateo 22:37; 1 Soane 5:3.

ʼE mahino papau ia, ke feala hatatou fakalogo ki te ʼu fakatotonu ʼaē ʼa Sehova ʼe tonu muʼa ke tou ʼiloʼi pe koteā te ʼu fakatotonu ʼaia. Koia la ʼaē, ʼe tonu ai, ke tou lau, ke tou akoʼi, pea mo metitasioʼi te Folafola ʼa te ʼAtua ʼaē ko te Tohi-Tapu ʼo toe feiā aipe ki te ʼu tohi ʼe fakatafito ki te Tohi-Tapu. Ohage ko te tagata fai pesalemo, ʼe tonu anai ke feala hatatou ʼui: “ ʼE ʼau manako ki tau lao! ʼI te ʼaho fuli pe ʼe ina fakamaʼua ia ʼau.” (Pesalemo 119:97) ʼI te tuputupu ʼaē ʼo tatatou mahino ki te Folafola ʼa te ʼAtua, ʼe tou liliu ʼo manatu tahi pea mo te ʼAtua. ʼE tou ʼofa leva ki te agatonu kae tou fehiʼa ki te vaʼiganoaʼi ʼo te lao. (Pesalemo 45:7) Ko te faʼahi ʼaia ʼaē neʼe hala ai ia Atama. Neʼe mahino ia ki te lao ʼa Sehova, kae neʼe mole feʼauga tona ʼofa ki ai ke tapiki maʼu ki te lao ʼaia. Mokā ʼe tou lau te Folafola ʼa te ʼAtua, ʼe tonu ke tou fai tuʼumaʼu te fehuʼi ʼaenī kia tatou takitokotahi, ‘E feafeaʼi te faka ʼuhiga ʼo te meʼa ʼaia kia ʼau totonu? Koteā koa te meʼa ʼaē ʼe tonu ke ʼau fai moʼo fakaʼāsili age taku fakaʼalu tahi toku maʼuli pea mo te ʼu kalitate ʼa te ʼAtua?’

Neʼe toe ʼui foki maʼa Sesu: “ ʼE tonu ke ke ʼofa ki tou kāiga ohage pe ko koe totonu.” (Mateo 22:39) Ko te tagata ʼaē ʼe lelei tona maʼuli ʼe ʼofa pe foki kia ia totonu pea ʼe loto pe foki ia ki te meʼa ʼaē ʼe lelei ki tona maʼuli. Ko te meʼa ʼaia ʼe mole kovi ia. Kae ʼe tou fakahā koa te taʼi ʼofa ʼaia ki totatou kāiga? ʼE tou muliʼi koa te tokoni faka Tohi-Tapu ʼaenī: “ ʼAua naʼa ke fakafisi te lelei kia nātou ʼaē ʼe tonu ke foaki kiai, mo kapau e fealagia e tou nima ke ina fai”?—Tāʼaga Lea 3:27; Kalate 6:10.

E feafeaʼi ʼo ʼuhiga mo te kalitate ʼaē ko te poto? Ko tatatou faiga ʼaē ke tou maʼuliʼi te kalitate ʼaia ʼe ina uga tatou ke tou ako te Tohi-Tapu heʼe ko te matapuna ʼaia ʼo te poto fakaʼatua. ʼE tou lau ia Pesalemo 119:98-100: “Ko tau fakatotonu ʼe ina fakaliliu ia ʼau ke ʼau poto age ʼi toku ʼu fili, heʼe nofo mo ʼau ʼo aʼu ki he ʼu temi ʼe mole hona gataʼaga. Kua ʼau liliu ʼo sio loloto age ʼi toku kau fai ako, heʼe ʼau fakatokagaʼi tau ʼu fakamanatu. ʼE ʼau aga fakapotopoto age ia nātou ʼaē kua matutuʼa, heʼe ʼau mulimuli ki tau ʼu fakatotonu.” Ia Tāʼaga Lea 3:18, ʼe fakatā ia te poto ki “he fuʼu ʼakau ʼo te maʼuli.” Kapau ʼe tou maʼu ia te poto pea mo tou maʼuliʼi, ʼe leleiʼia anai tatou e te ʼAtua pea ʼe ina foaki mai anai ia te fakapale ʼaē ko te maʼuli heʼegata.—Tagata Tānaki 7:12.

E feafeaʼi ʼo ʼuhiga mo te faitotonu? ʼI te mālama agakovi ʼaenī, ko te faitotonu ʼe ko he kalitate maʼuhiga kia nātou ʼaē ʼe holi ke leleiʼia nātou e te ʼAtua. Ko Sesu neʼe ʼofa ki te faitotonu kae neʼe fehiʼa ki te meʼa noaʼi ʼo te lao. (Hepeleo 1:9) ʼE toe feiā mo te kau Kilisitiano ʼi te temi nei. Ko te faitotonu ʼe ina uga nātou ke nātou leleiʼia te ʼu kalitate ʼe ʼaoga. ʼE nātou tekeʼi te ʼu ala heʼe faitotonu ʼo te malamanei kae nātou fakaliliu te fai ʼo te finegalo ʼo te ʼAtua ko te meʼa maʼuhiga pe ʼaia ʼi tonatou maʼuli.—1 Soane 2:15-17.

ʼO ʼuhiga pea mo te mālohi, ko tatou fuli pe ʼe ʼi ai tatatou fakafuafua ki te faʼahi ʼaia. ʼE ʼi ai foki totatou mālohi ʼi te faʼahi fakasino pea mo totatou mālohi ʼi te faʼahi fakaʼatamai, pea ʼi tatatou tuputupu ʼi totatou ʼuhiga Kilisitiano, ʼe tou fakatuputupu mo he mālohi ʼi te faʼahi fakalaumālie. Ko Sehova ʼe ina hikihiki totatou mālohi ʼaki tona laumālie maʼoniʼoni ʼo kaku ki te feala ʼaē ke tou fakahoko te finegalo ʼo te ʼAtua, logope la totatou vaivavavai. Neʼe ʼui e Paulo: “ ʼE ʼau mālohi ki te meʼa fuli ʼaki ia ia ʼaē ʼe ina foaki mai te mālohi.” (Filipe 4:13) Ko he mālohi tatau ʼe feala ke tuku mai kia tatou mo kapau ʼe tou kole te laumālie ʼa Sehova.

Tou Faka Mafola Te Logo Lelei

Ko tatatou maʼuliʼi ia te ʼu kalitate maʼuhiga e fā ʼa te ʼAtua ʼe hā lelei ʼi tatatou fakalogo ʼaē ki te fakatotonu ʼaenī: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou. Pea koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:19, 20) Ko te faʼahiga gāue ʼaē ko te fai ʼo ni ʼu ako ʼe ina foaki te maʼuli kia nātou ʼaē ʼe nātou tali fakaleleiʼi. ʼE ko he fakahāhā lelei foki ʼo te ʼofa kia nātou ʼaē, ko te tokolahi, neʼe ʼi te kamata neʼe ko he ʼu matāpule kia tatou!

Ki muli mai, ko te faʼahiga akonaki ʼaia ʼe ko te ala ia ki te poto. ʼE ina ʼaumai te fua ʼaē ko te faʼa kātaki. Koteā la he tahi age gāue ʼe feala ke ʼui: “ ʼAki te meʼa ʼaia, ʼe ke hāofaki anai ia koe, pea mo nātou ʼaē ʼe fakalogo kia te koe”? (1 Timoteo 4:16) ʼI te gāue ʼaē ko te fai ʼo ni ʼu tisipulo, ʼe mole fua lelei pe ki he tokotahi, kae ko ʼaē ʼe fakalogo pea mo ʼaē ʼe fai ako ʼe nā maʼu lualua te ʼu tapuakina heʼegata.

Ohage la ki te faitotonu, ko te kau Kilisitiano ʼe nātou akoʼi te ʼu lao faitotonu ki tanatou ʼu kaugā ako Tohi-Tapu. ʼE tou tokoni kia nātou ke nātou tauhi kia Sehova, “te ʼAtua ʼo te faitotonu.” (Malakia 2:17) Ko nātou ia ʼaho nei, ʼaē ʼe nātou foaki tonatou maʼuli moʼo kaugana kia Sehova pea mo nātou mulimuli ki ai ʼi te faitotonu kua tala ko te kau faitotonu, kua faka lākatonuʼi nātou, ʼe lolotoga taki nātou ki tonatou hāofaki ʼi Halamaketone.—Loma 3:24; Sake 2:24-26.

Koia, ʼe ko he fakahāhā ʼo te mālohi ia te faka mafola pea mo te akoʼi ʼaē ʼo te ʼu logo lelei ki te malamanei katoa! (Mateo 24:14) ʼE ʼaoga foki anai ia te faʼa kātaki moʼo haga faka mafola ʼi te ʼu fenua ʼaē ko te tokolahi ʼi ai ʼe mole nātou fia logo. Kae ko Sehova, ʼaki tona laumālie, ʼe ina foaki te mālohi ʼaē ʼaoga moʼo faʼa kātakiʼi ʼo aʼu ki te fakaʼosi.—Isaia 40:30, 31; Mateo 24:13; Luka 11:13.

ʼE moʼoni ia, ʼi totatou ʼuhiga hākoga heʼe haohaoa ʼo Atama, ʼe mole feala ke tou maʼuliʼi ke lelei ʼosi ia te ʼu kalitate matalelei ʼaia. Kae, ke tou manatuʼi, ko te tagata neʼe fai ʼo mulimuli ki te paki ʼo te ʼAtua, pea mo kapau ʼe tou faiga ke ʼāʼāsili age tatatou hage ko te ʼAtua, ʼe tou fakahoko he tahi tupuʼaga ʼo totatou ʼi malamanei. (Tagata Tānaki 12:13) Kapau ʼe tou faiga fakamalotoloto pea mo tou kole ke fakamolemoleʼi tatou mokā ʼe tou tō, ʼe feala ke tou fakaʼamu ʼe tou kau anai ʼi te mālama agatonu foʼou ʼa te ʼAtua, ʼaē feala ai leva ke tou maʼu ia te haohaoa. Koia, ʼe tou maʼuʼuli anai ʼi he palatiso fakakelekele ʼe nofoʼi e te hahaʼi haohaoa ʼaē ʼe nātou maʼuliʼi katoa te ʼu kalitate ʼa te ʼAtua. ʼI meʼa fakafiafia leva! Koia la ʼaē, ʼi te ʼuhiga katoa leva ʼo te kupuʼi palalau, ko te hahaʼi ʼe liliu anai ia ko te paki ʼo te ʼAtua.

[Nota ʼi te lalo pasina]

[Paki ʼo te pasina 25]

Neʼe fakahā mai e Sesu peʼe feafeaʼi te maʼuliʼi ʼo te ʼu kalitate fakaʼatua ʼo Sehova

[Paki ʼo te pasina 26]

Koia, ko te hahaʼi ʼe nātou liliu anai ʼi tona ʼaluʼaga katoa ko te paki ʼo te ʼAtua