ʼE ‘Teuteuʼi Koa Takotou ʼu Faikole Ohage Ko He Iseso’?
“Ke teuteuʼi taku faikole ohage ko he iseso ʼi ʼou muʼa.”—Pesalemo 141:2.
1, 2. Koteā ʼaē neʼe fakatātā e te iseso ʼaē neʼe tutu?
NEʼE fakatotonu e Sehova ʼAtua ki tana polofeta ko Moisese, ke ina teuteuʼi he iseso taputapu ke fakaʼaogaʼi ʼi te tapenakulo ʼaē neʼe tauhi ai te kau Iselaelite. Neʼe fakahā e te ʼAtua te ʼu meʼa magoni kehekehe e fā ʼaē neʼe tonu ke fakafio moʼo fai ʼaki te iseso. (Ekesote 30:34-38) Pea neʼe ko he meʼa neʼe magoni.
2 ʼI te fuakava ʼo te Lao ʼaē neʼe kau kiai te puleʼaga ʼo Iselaele, neʼe fakatotonu ai ke tutu te iseso ʼaia ʼi te ʼaho fuli pe. (Ekesote 30:7, 8) Neʼe ʼi ai koa he faka ʼuhiga makehe ʼo te fakaʼaogaʼi ʼo te iseso? Ei, he neʼe hiva fēnei te tagata fai pesalemo: “ ʼOfa pe ke ʼau teuteuʼi taku faikole ohage ko he iseso ʼi ʼou muʼa [Sehova ʼAtua], ke ʼau hiki atu ʼoku ʼu nima ohage ko he momoli atu ʼo te pulapula ʼo te afiafi.” (Pesalemo 141:2) ʼE ʼui e te ʼapositolo ko Soane ʼi te tohi ʼo Fakahā, ko nātou ʼaē ʼe nātou ʼatakai te hekaʼaga faka hau ʼa te ʼAtua, ʼe nātou puke te ʼu ipu aulo ʼe fonu ai te iseso. ʼE ʼui fēnei e te vaega ʼaia: “Pea ko te iseso ʼe ina fakatātā te ʼu faikole ʼa te kau maʼoniʼoni.” (Fakahā 5:8) Koia, ko te iseso magoni ʼaē neʼe tutu neʼe ina fakatātā te ʼu faikole ʼaē neʼe momoli e te ʼu kaugana ʼa Sehova ʼi te ʼaho mo te po.—1 Tesalonika 3:10; Hepeleo 5:7.
3. Koteā ʼaē ʼe tonu ke tokoni mai kia tatou ke tou ‘teuteu tatatou ʼu faikole ohage ko he iseso ia muʼa ʼo te ʼAtua’?
3 Kapau ʼe tou loto ke tali e te ʼAtua tatatou ʼu faikole, pea ʼe tonu ke tou faikole kia te ia ʼi te huafa ʼo Sesu Kilisito. (Soane 16:23, 24) Kae koteā ʼaē ʼe feala ke tou fai moʼo hikihiki te lelei ʼo tatatou ʼu faikole? ʼE ʼaoga anai ke tou vakaʼi he ʼu faʼifaʼitaki faka Tohi-Tapu, ke tou teuteuʼi ai tatatou ʼu faikole ohage ko he iseso ia muʼa ʼo Sehova.—Tāʼaga Lea 15:8.
Koutou Faikole ʼAki Te Tui
4. Koteā te pikipikiga ʼo te tui pea mo te ʼu faikole ʼaē ʼe tali e te ʼAtua?
4 Kapau ʼe tou loto ke hake tatatou ʼu faikole ki te ʼAtua ohage ko he iseso magoni, pea ʼe tonu ke tou faikole ʼaki te tui. (Hepeleo 11:6) Kapau ʼe tokoni te kau tagata ʼāfea ki he tahi ʼe mahaki ʼi te faʼahi fakalaumālie pea ʼe ina tali lelei tanatou ʼu tokoni faka Tohi-Tapu, pea ko tanatou “faikole ʼo te tui ʼe ina faitoʼo anai ia ia ʼaē ʼe mamahi.” (Sake 5:15) ʼE leleiʼia e totatou Tāmai ʼaē ʼi selo te ʼu faikole ʼaē ʼe tou fai ʼaki te tui, ʼo feiā mo te ʼu faikole ʼaē ʼe tou fai mokā tou ako te Folafola ʼa te ʼAtua. Neʼe fakahā e te tagata fai pesalemo he manatu lelei ʼi tana hiva fēnei: “ ʼE ʼau hiki anai ʼoku ʼu nima ki tau ʼu fakatonutonu ʼaē neʼe ʼau ʼofa ai, pea ʼe ʼau fia tokagaʼi tau ʼu lekula. Akoʼi mai tou lotoʼofa, te aga fakapotopoto pea mo te ʼatamai mālama, he neʼe ʼau tui ki tau ʼu fakatonutonu.” (Pesalemo 119:48, 66) Tou ‘folahi ʼotatou ʼu nima’ ʼo tou faikole ʼaki he loto agavaivai, pea mo tou fakahā tatatou tui ʼo tou mulimuli ki te ʼu fakatotonu ʼa te ʼAtua.
5. Koteā ʼaē ʼe tonu ke tou fai mo kapau ʼe mole tou maʼu te poto?
5 Kapau la ʼe mole tou maʼu te poto ʼaē ʼe ʼaoga moʼo tauʼi ʼo he ʼahiʼahi. ʼE lagi tou lotolotolua ki te ʼui ʼaē ʼe lolotoga hoko ʼi te temi ʼaenī he lea faka polofeta ʼo te Tohi-Tapu. ʼE mole tonu ke tou tuku te faʼahi ʼaia ke ina fakavaivai tatou ʼi te faʼahi fakalaumālie, kae tou faikole ke tou maʼu te poto. (Kalate 5:7, 8; Sake 1:5-8) ʼE mahino papau ia ʼe mole feala ke tou ʼamanaki ke tali mai e te ʼAtua ʼi hona ʼaluʼaga fakatalakitupua. ʼE tonu ke tou fakahā neʼe tou faikole fakamalotoloto, ʼo tou fai te meʼa ʼaē ʼe ina loto ke fai e tana hahaʼi fuli. ʼE tonu ke tou ako te Tohi-Tapu ke mālohi ai tatatou tui, ʼo tou fakaʼaogaʼi te ʼu tohi ʼaē ʼe foaki mai e “te tagata kaugana agatonu mo poto.” (Mateo 24:45-47; Sosue 1:7, 8) ʼE toe ʼaoga foki ke tuputupu tatatou ʼatamai mālama ʼo tou kau tuʼumaʼu ki te ʼu fono ʼaē ʼe fai e te hahaʼi ʼa te ʼAtua.—Hepeleo 10:24, 25.
6. (a) Koteā ʼaē ʼe tonu ke tou ʼiloʼi fuli ʼo ʼuhiga mo totatou temi pea mo te hoko ʼo te ʼu lea faka polofeta ʼo te Tohi-Tapu? (b) ʼO hilifaki ki tatatou faikole ʼaē ke tāpuhā te huafa ʼo Sehova, koteā te meʼa ʼaē ʼe tonu ke tou fai?
6 Ia ʼaho nei, ko ʼihi kau Kilisitiano ʼaē ʼe nātou fia maʼu koloā pea mo nātou loto ke nātou ʼiloa, ʼe mole kei nātou fakatokagaʼi “te temi fakaʼosi” ʼaē ʼe tou maʼuli ai. (Taniela 12:4) ʼE lava hūfaki e te ʼu tēhina mo tuagaʼane ia nātou ʼaia, ke nātou toe maʼu pea ke toe mālohi tanatou tui ʼaē ki te ʼu fakamoʼoni faka Tohi-Tapu ʼo ʼuhiga mo te ʼi henī ʼa Kilisito ʼaē neʼe kamata ʼi te taʼu 1914, ʼi te temi ʼaē neʼe fakanofo ia ia e Sehova ko te Hau ʼi selo pea kua pule ʼi te lotolotoiga ʼo tana ʼu fili. (Pesalemo 110:1, 2; Mateo 24:3) ʼE tonu ke mahino kia tatou fuli ko te ʼu meʼa ʼaē neʼe fakakikite, ohage ko te fakaʼauha ʼo te lotu hala—ia “Papiloni Lahi”—mo te ʼohofiʼi ʼo te hahaʼi ʼa Sehova e Satana ʼaē ko Koke ʼo Makoke, pea mo tonatou hāofaki e te ʼAtua Māfimāfi ʼi te tau ʼo Halamaketone, ko te ʼu meʼa fuli ʼaia ʼe feala ke hoko fakapunamaʼuli mai pea ʼi he kiʼi temi nounou. (Fakahā 16:14, 16; 18:1-5; Esekiele 38:18-23) Koia, tou kole ke tokoni mai te ʼAtua ke tou nonofo alaala ʼi te faʼahi fakalaumālie. Tou faikole fakamalotoloto fuli ke tāpuhā te huafa ʼo Sehova, ke hoko mai tona Puleʼaga, pea ke fakahoko tona finegalo ʼi te kele ohage ko selo. Ei, tou haga tui pea mo maʼuliʼi te ʼu faikole ʼaē ʼe tou fai fakamalotoloto. (Mateo 6:9, 10) Ei, tou fakaʼamu kia nātou fuli ʼaē ʼe nātou ʼoʼofa kia Sehova, ke nātou ʼuluaki kumi muʼa te Puleʼaga pea mo tona faitotonu, pea mo nātou lagolago mālohi ki te fai faka mafola ʼo te logo lelei ʼi muʼa ʼo te hoko mai ʼo te fakaʼosi.—Mateo 6:33; 24:14.
Tou Fakavikiviki Pea Mo Fakafetaʼi Kia Sehova
7. Koteā ʼaē ʼe koutou leleiʼia ʼi te faikole ʼa Tavite ʼaē ʼe tuʼu ia 1 Fakamatala 29:10-13?
7 Moʼo ‘teuteuʼi tatatou ʼu faikole ohage ko he iseso,’ ʼe maʼuhiga ke tou fakavikiviki ʼaki totatou loto katoa pea mo tou fakafetaʼi ki te ʼAtua. Neʼe feiā te faikole ʼa te Hau ko Tavite, ʼi te temi ʼaē neʼe ina foaki mo te hahaʼi ʼo Iselaele te ʼu koloā ki te laga ʼo te fale lotu ʼa Sehova. Neʼe faikole fēnei Tavite: “Fakafetaʼi kia te koe, Ê Sehova te ʼAtua ʼo Iselaele, tamatou tāmai, talu mai he ʼu temi ʼe mole ʼiloʼi hona gataʼaga ki he ʼu temi ʼe heʼegata. ʼE ke maʼu, Ê Sehova, te māʼoluga, mo te mālohi, mo te matalelei, mo te takimuʼa, pea mo te ʼalikisia; heʼe ko meʼa fuli ʼi te lagi pea mo te kele ʼe ʼa koe. ʼE ʼa koe te puleʼaga, Ê Sehova, ia koe ʼaē ʼe ke toe hikihiki koe ʼi tou ʼuhiga pule kia meʼa fuli. Ko te koloā pea mo te kolōlia ʼe hifo mai ia te koe, pea ʼe ke pule ki te ʼu meʼa fuli pe; pea ʼe maʼu ʼi tou nima te mālohi pea mo te māfimāfi, pea ʼe maʼu ʼi tou nima te fealagia ʼo te fai ʼo he meʼa lahi pea mo foaki te mālohi kia meʼa fuli. Pea ʼi te temi nei, Ê ʼAtua, ʼe mātou fakafetaʼi kia te koe pea mo mātou fakavikiviki ki tou huafa taulekaleka.”—1 Fakamatala 29:10-13.
8. (a) ʼI te Pesalemo 148 ʼo aʼu ki te Pesalemo 150, koteā te ʼu palalau fakavikiviki ʼaē ʼe malave tāfito ki tokotou loto? (b) Kapau ʼe tatau te ʼu meʼa ʼaē ʼe tou logoʼi ʼi totatou loto pea mo te meʼa ʼaē ʼe tuʼu ʼi te vaega ʼo Pesalemo 27:4, koteā anai te meʼa ʼaē ka tou fai?
8 ʼE ko he ʼu palalau matalelei ʼaia moʼo fai ʼaki he fakavikiviki pea mo fakahā tokita loto fakafetaʼi! ʼE lagi mole matalelei feiā tatatou ʼu faikole, kae ʼe feala ke tou fai ʼaki totatou loto katoa. ʼE lahi te ʼu faikole fakafetaʼi pea mo te ʼu fakavikiviki ʼe tou maʼu ʼi te tohi ʼo Pesalemo. Koutou filifili te ʼu kupu ʼaē ʼe tou maʼu ʼi te Pesalemo 148 ki te 150 moʼo fai he fakavikiviki. ʼE lahi te ʼu pesalemo ʼe fakahā ai te loto fakafetaʼi ki te ʼAtua. Neʼe hiva fēnei Tavite: “Ko te meʼa e tahi neʼe ʼau kole kia Sehova. Ko te meʼa ʼaē ʼe ʼau loto kiai, ke ʼau nofo ʼi te ʼapi ʼa Sehova ʼi te ʼaho fuli ʼo toku maʼuli, ke ʼau mamata ki te matalelei ʼo Sehova pea mo ʼau leleiʼia tona fale lotu.” (Pesalemo 27:4) Tou maʼuliʼi te ʼu faikole ʼaia, ʼo tou kau mālohi ki te ʼu gāue fuli ʼa te hahaʼi kaugamālie ʼa Sehova. (Pesalemo 26:12) Kapau ʼe tou fai te faʼahi ʼaia pea mo tou metitasio ki te Folafola ʼa te ʼAtua ʼi te ʼaho fuli, ʼe tou maʼu aianai he ʼu tupuʼaga ke tou fakaōvi kia Sehova ʼaki he loto fakavikiviki pea mo he loto fakafetaʼi.
Tou Kumi Te Tokoni ʼa Sehova ʼAki He Loto Agavaivai
9. Neʼe feafeaʼi te faikole ʼa te Hau ko Asa, pea koteā ʼaē neʼe hoko?
9 Kapau ʼe tou tauhi kia Sehova ʼaki totatou loto katoa ʼuhi ko tatou ko tana ʼu Fakamoʼoni, pea ʼe feala ke tou tui papau ʼe fakalogo mai ki tatatou kole ʼaē ke tokoni mai. (Isaia 43:10-12) Tou vakaʼi te faʼifaʼitaki ʼo Asa, te Hau ʼo Suta. Neʼe tokalelei te ʼu ʼuluaki taʼu e 10 ʼo tona nofo hau, ʼaē neʼe hoko ia taʼu e 41 (mai te taʼu 977 ki te taʼu 937 ʼi muʼa ʼo totatou temi). Pea neʼe ʼohofiʼi ia Suta e te kau solia ʼe lauʼi miliona ʼaē neʼe takitaki e Sela, te tagata Etiopea. Logope la tanatou kaugamālie ʼaupito, kae ko Asa pea mo tana kau solia neʼe nātou fakafeagai kia nātou. Kae ʼi muʼa ʼo te fakahoko ʼo te tau, neʼe faikole fakamalotoloto ia Asa. Neʼe ina ʼiloʼi ʼe feala kia Sehova ke ina hāofaki nātou. ʼI tana kole tokoni ʼaia, neʼe ʼui fēnei e te hau: “ ʼE mātou falala atu kia te koe, pea ʼe mātou ʼōmai ʼaki tou huafa ki te hahaʼi kaugamālie ʼaenī. Ê Sehova, ko koe tomatou ʼAtua. Ke ʼaua naʼa maʼu he mālohi ʼa te tagata ʼi tana fakafeagai kia te koe.” Neʼe hoko ai te mālo lahi ʼi te hāofaki e Sehova ia Suta ʼo hikihiki ai tona huafa lahi. (2 Fakamatala 14:1-15) Tatau aipe peʼe hāofaki tatou e te ʼAtua mai te ʼu ʼahiʼahi peʼe ina foaki mai te mālohi ʼaē ke tou kātakiʼi te ʼu ʼahiʼahi ʼaia, kae ʼe tou tui papau ʼe fakalogo mai ki tatatou ʼu kole ʼaē ke tokoni mai.
10. Kapau ʼe mole tou poto ʼi te fakatokatoka ʼo he fihifihia, ʼe lava tokoni feafeaʼi mai kia tatou te faikole ʼaē neʼe fai e te Hau ko Sosafate?
10 Kapau ʼe mole tou ʼiloʼi te meʼa ʼaē ʼe tonu ke tou fai mokā hoko mai he fihifihia, ʼe feala ke tou falala ʼe fakalogo mai anai Sehova ki tatatou kole mamahi ʼaē ke tokoni mai. Neʼe hā te faʼahi ʼaia ʼi te temi ʼo Sosafate, te Hau ʼo Suta, ʼaē neʼe kamata tana nofo hau ʼi te taʼu 936 ʼi muʼa ʼo totatou temi pea hoko lolotoga taʼu e 25. ʼI te temi ʼaē neʼe tauʼi ia Suta e te ʼu kautau fakatahi ʼo Moape, mo Amone, pea mo te ʼu potu moʼugaʼia ʼo Seile, neʼe faikole fēnei Sosafate: “Ê tomatou ʼAtua, ʼe mole ke fakahoko anai koa te fakamāu kia nātou? Heʼe mole kei ʼi ai he mālohi ia mātou ia muʼa ʼo te toe hahaʼi kaugamālie ʼaenī ʼaē ʼe fakafeagai mai kia mātou; pea ʼe mole mātou ʼiloʼi te meʼa ʼaē ʼe tonu ke mātou fai, kae ko tomatou ʼu mata ʼe fakahaga atu kia te koe.” Neʼe tali e Sehova ki te faikole agavaivai ʼaia, ʼo tau maʼa Suta pea neʼe ina fakahoko te maveuveu ʼi tonatou ʼu fili, ʼo nātou fetāmateʼiʼaki. Neʼe matataku ai te ʼu puleʼaga ʼo te ʼu tafaʼaki, pea neʼe nofo ai Suta ʼi te tokalelei. (2 Fakamatala 20:1-30) Kapau ʼe mole tou maʼu te poto ʼaē ʼe ʼaoga moʼo tauʼi ʼo he fihifihia, pea ʼe feala ke tou faikole ohage ko Sosafate: ‘ ʼE mole mātou ʼiloʼi te meʼa ʼaē ʼe tonu ke mātou fai, kae ʼe fakahaga atu tomatou ʼu mata kia te koe.’ ʼE feala ke fakamanatuʼi mai e te laumālie maʼoniʼoni te ʼu manatu faka Tohi-Tapu ʼaē ʼe ʼaoga moʼo fakatokatoka te fihifihia, pea feala ke tokoni mai te ʼAtua ʼi hona ʼaluʼaga makehe.—Loma 8:26, 27.
11. ʼO ʼuhiga mo te faikole, koteā ʼaē ʼe feala ke tou ako ʼaki te ʼu meʼa ʼaē neʼe fai e Nehemia ʼo ʼuhiga mo te ʼu kaupā ʼo Selusalemi?
11 ʼE lagi tonu ke tou kātaki ʼo haga kole ki te ʼAtua ke tokoni mai. Neʼe putu ia Nehemia, mo tagi, mo ʼaukai, pea mo faikole lolotoga ni ʼu ʼaho ʼo ʼuhiga mo te ʼu kaupā ʼo Selusalemi ʼaē neʼe kua maumau pea mo te kua heʼe ʼamanaki ʼa te hahaʼi ʼo Suta. (Nehemia 1:1-11) ʼE mahino ia neʼe hakehake tana ʼu faikole ki te ʼAtua ohage ko he iseso magoni. ʼI te tahi ʼaho, neʼe sio te Hau Pelesia ko Artaxerxès ʼe lotomamahi ia Nehemia, pea ina fehuʼi age ki ai: “Koteā ʼaē ʼe ke loto kiai?” Neʼe tohi fēnei e Nehemia: “ ʼI te temi ʼaia, neʼe ʼau faikole ai ki te ʼAtua ʼo selo.” Neʼe tali te ʼAtua ki tana faikole nounou ʼaia ʼaē neʼe ina fai fakalogologo, he neʼe fakagafua kia Nehemia ke ina fakahoko te meʼa ʼaē neʼe loto kiai, ke ʼalu ki Selusalemi ʼo toe laga tona ʼu kaupā ʼaē kua maumau.—Nehemia 2:1-8.
ʼE Akoʼi Mai e Sesu Peʼe Tonu Ke Feafeaʼi Tatatou Faikole
12. ʼE koutou fakanounou feafeaʼi anai te ʼu puani tāfito ʼo te faikole faʼifaʼitaki ʼaē neʼe tuku mai e Sesu?
12 ʼI te ʼu faikole fuli ʼaē ʼe tuʼu ʼi te Tohi-Tapu, ko te faikole ʼaē ʼe feala ke tou faʼifaʼitakiʼi, ʼe ko te faikole ʼaē neʼe akoʼi mai e Sesu Kilisito, ʼaē ʼe hage ko he iseso magoni. ʼE ʼui fēnei ʼi te Evaselio ʼo Luka: “Neʼe ʼui maʼa te tokotahi ʼo [te] ʼu tisipulo [ʼa Sesu] kia te ia: ‘ ʼAliki, ako mai kia mātou te faikole, ohage ko tona ako e Soane ki tana ʼu tisipulo.’ Pea neʼe ʼui maʼana kia nātou: ‘Kapau ʼe koutou faikole, koutou ʼui fēnei, “Tāmai ke tāpuhā tou huafa. Ke hoko mai tou puleʼaga. Foaki mai tamatou pane ki te ʼaho ʼaenī, ʼaē ʼe ʼaoga ki te ʼaho nei. Pea ke fakamolemole ʼamatou ʼu agahala, heʼe mātou toe fakamolemole foki mo mātou kia nātou ʼaē ʼe nātou maʼua mai kia mātou, pea ʼaua naʼa ke tuku mātou ki te fakahala.” ’ ” (Luka 11:1-4; Mateo 6:9-13) Tou vakaʼi te faikole ʼaia, ʼaē neʼe mole fakatuʼutuʼu ke lau fakaʼatamai kae ke fakaʼaogaʼi ohage ko he faʼifaʼitaki.
13. ʼE koutou fakamahino feafeaʼi anai te ʼu palalau ʼaenī, “Tāmai, ke tāpuhā tou huafa”?
13 “Tāmai, ke tāpuhā tou huafa.” Ko te palalau kia Sehova ohage ki he Tāmai ʼe ko he pilivilesio makehe ʼaē ʼe maʼu e tana ʼu kaugana ʼaē kua nātou foaki tonatou maʼuli kia te ia. Ohage ko te fakaōvi ʼa he ʼu fānau ki he tāmai manavaʼofa pea mole nātou tuʼania, ʼe tonu ke tou fakaʼaogaʼi he temi ke tou faikole tuʼumaʼu ai ki te ʼAtua ʼaki he aga fakaʼapaʼapa. (Pesalemo 103:13, 14) ʼE tonu ke hā ʼi tatatou ʼu faikole tatatou tuʼania ʼaē ʼo ʼuhiga mo te tāpuhā ʼo te huafa ʼo Sehova, heʼe tou holi ke tou sio ki tona fakamaʼa mai te ʼu leakovi fuli ʼaē neʼe fai ʼo ʼuhiga mo ia. ʼE moʼoni, ʼe tou loto ke fakakeheʼi te huafa ʼo Sehova pea ke maʼoniʼoni, peʼe taputapu.—Pesalemo 5:11; 63:3, 4; 148:12, 13; Esekiele 38:23.
14. Koteā te faka ʼuhiga ʼo tatatou faikole fēnei, “Ke hoko mai tou puleʼaga”?
14 “Ke hoko mai tou puleʼaga.” Ko te Puleʼaga ʼe ko te ʼuhiga pule ʼa Sehova ʼaē ʼe ina fai ʼaki te puleʼaga faka Mesianike ʼi selo, ʼaē neʼe ina tuku ki tona ʼAlo pea mo “te kau maʼoniʼoni” ʼaē ka gāue fakatahi mo Sesu. (Taniela 7:13, 14, 18, 27; Fakahā 20:6) Kua fakaōvi mai pe te temi ʼaē ka “hoko mai” ai te Puleʼaga ʼo molehi ia nātou fuli ʼi te kele ʼaē ʼe nātou fakafeagai ki te pule faʼifaʼitaliha ʼo te ʼAtua. (Taniela 2:44) ʼOsi ʼaia, pea ʼe fakahoko anai te finegalo ʼo Sehova ʼi te kele, ohage ko selo. (Mateo 6:10) ʼE maʼu ai anai e te hahaʼi fuli he fiafia lahi ʼi tanatou tauhi agatonu ki te Pule ʼo te ʼAtulaulau!
15. Koteā ʼaē ʼe hā ʼaki tatatou kole ʼaē kia Sehova ke ina ‘foaki mai tatatou pane ki te ʼaho ʼaenī’?
15 “Foaki mai tamatou pane ki te ʼaho ʼaenī, ʼaē ʼe ʼaoga ki te ʼaho nei.” Ko te kole ʼaē kia Sehova ke ina foaki mai te meʼa kai “ki te ʼaho ʼaenī” ʼe hā ʼaki ai ʼe mole tou kole ke ina foaki mai he ʼu tuʼuga meʼa, kae ko te ʼu meʼa pe ʼaē ʼe feʼauga kia tatou ʼi te ʼaho fuli. Logope la ʼe tou falala ki te ʼAtua ke ina foaki mai te ʼu meʼa ʼaia, kae ʼe toe maʼua mo tatou ke tou gāue pea mo tou fai ia meʼa fuli ke tou maʼu ai he meʼa kai pea mo te tahi ʼu meʼa ʼaē ʼe ʼaoga kia tatou. (2 Tesalonika 3:7-10) ʼE mahino ia ʼe tonu ke tou fakamālo kia Ia ʼaē, mai selo, ʼe ina foaki mai te ʼu meʼa fuli ʼaia, heʼe hā ʼaki ai tona ʼofa, mo tona poto, pea mo tona mālohi.—Gāue 14:15-17.
16. ʼE lava fakamolemole feafeaʼi mai te ʼAtua kia tatou?
16 “Fakamolemole ʼamatou ʼu agahala, heʼe mātou toe fakamolemole foki mo mātou kia nātou ʼaē ʼe nātou maʼua mai kia mātou.” Mai tona ʼaluʼaga ʼaē ʼe tou heʼe haohaoa pea mo agahala, ʼe mole feala ke tou mulimuli katoa ki te ʼu lekula haohaoa ʼa Sehova. Koia, ʼe tonu ke tou kole ke ina fakamolemole mai ʼaki te sakilifisio faitotogi ʼo Sesu. Kae kapau ʼe tou loto kia “Ia ʼaē ʼe Fakalogo ki te ʼu faikole” ke ina fakaʼaogaʼi te maʼuhiga ʼo te sakilifisio ʼaia ki totatou ʼu agahala, pea ʼe tonu ke tou fakahemala pea mo tou tali lelei tana akonakiʼi tatou. (Pesalemo 65:2; Loma 5:8; 6:23; Hepeleo 12:4-11) Pea tahi ʼaē meʼa, ʼe fakamolemole mai te ʼAtua kia tatou mo kapau ʼe tou ‘fakamolemole foki mo tatou kia nātou ʼaē ʼe nātou maʼua mai kia tatou,’ ei kia nātou ʼaē neʼe agahala mai kia tatou.—Mateo 6:12, 14, 15.
17. Koteā te faka ʼuhiga ʼo te ʼui ʼaē, “ ʼAua naʼa ke tuku mātou ki te fakahala”?
17 “ ʼAua naʼa ke tuku mātou ki te fakahala.” ʼI ʼihi temi, ʼe ʼui e te Tohi-Tapu ko Sehova ʼe ina fakahoko te ʼu meʼa, kae ʼi tona fakahagatonu ʼe ina tuku ke hoko te ʼu meʼa ʼaia. (Lute 1:20, 21) Ko te ʼAtua ʼe mole ina fakahalaʼi tatou ke tou agahala ai. (Sake 1:13) ʼE fakatupu te ʼu fakahala e te Tevolo, mo tatatou kakano agahala, pea mo te mālama ʼaenī. ʼE ko Satana ʼaē ʼe ina fakahalaʼi tatou pea mo ina faigaʼi ke tou agahala ki te ʼAtua. (Mateo 4:3; 1 Tesalonika 3:5) Ka tou kole ke ‘ ʼaua naʼa ina tuku tatou ki te fakahala,’ ʼe tou kole ai ki te ʼAtua ke mole ina tuku tatou ke tou agahala mokā fakahalaʼi tatou ke tou talagataʼa kia te ia. ʼE feala ke ina takitaki tatou ke mole tou tō pea ke mole kākāʼi tatou e Satana, “te agakovi.”—Mateo 6:13; 1 Kolonito 10:13.
Koutou Mulimuli Ki Te ʼu Meʼa ʼAē ʼe Koutou Kole
18. E feafeaʼi hatatou gāue ʼo mulimuli ki tatatou kole ʼaē ke manuʼia tatatou teuteu ʼohoana pea mo totatou maʼuli faka famili?
18 Ko te faikole faʼifaʼitaki ʼa Sesu neʼe talanoa ki te ʼu meʼa maʼuhiga, kae ʼe feala ke tou faikole ʼo ʼuhiga mo he tahi meʼa. Ohage la, ʼe lagi feala ke tou faikole ke manuʼia takita teuteu ʼohoana. Ke feala hatatou nonofo maʼa ʼo aʼu ki te ʼaho ʼo te fakatapu, ʼe tonu ke tou faikole ke tou maʼu te loto lolomi. Kae ʼe tonu ke tou mulimuli ki te ʼu meʼa ʼaē ʼe tou kole, ʼo mole tou lau he ʼu tohi peʼe tou sioʼi he ʼu ʼata ʼe hā ai te ʼu aga heʼeʼaoga. Tou toe fakatotonu foki ke tou ‘ ʼohoana ʼi te ʼAliki pe.’ (1 Kolonito 7:39; Teutalonome 7:3, 4) ʼI te ʼosi ʼohoana, ʼe ʼaoga anai ke tou mulimuli ki tatatou faikole ʼaē ke tou fiafia, ʼo tou maʼuliʼi te ʼu tokoni ʼa te ʼAtua. Pea kapau ʼe tou maʼu fānau, ʼe mole feʼauga pe tatatou faikole ʼaē ke nātou liliu ko he ʼu kaugana agatonu ʼa Sehova. ʼE tonu ke tou fai ia meʼa fuli ke tou fakahū ki tonatou ʼatamai te moʼoni ʼo ʼuhiga mo te ʼAtua, ʼo tou fai hanatou ako Tohi-Tapu pea mo tou ʼolo tuʼumaʼu mo nātou ki te ʼu fono faka Kilisitiano.—Teutalonome 6:5-9; 31:12; Tāʼaga Lea 22:6.
19. Koteā ʼaē ʼe tonu ke tou fai mo kapau ʼe tou faikole ʼo ʼuhiga mo tatatou minisitelio?
19 ʼE tou faikole koa ke tou maʼu he ʼu tapuakina ʼi tatatou minisitelio? Kapau koia ʼaia, pea ʼe tonu ke tou mulimuli ki te ʼu meʼa ʼaē ʼe tou kole, ʼo tou fakaʼaogaʼi he temi lahi ki te gāue fai faka mafola ʼo te Puleʼaga. Kapau ʼe tou kole ke tou maʼu he ʼu faigamālie ke tou tokoni ki te hahaʼi ke nātou haʼele ʼi te ala ʼaē ʼe ina taki ki te maʼuli heʼegata, ʼe tonu ke tou taupau he ʼu nota lelei ʼo ʼuhiga mo te hahaʼi ʼaē neʼe fia logo pea ke tou fai he ʼu ako Tohi-Tapu. E feafeaʼi mo kapau ʼe tou loto ke tou pionie, ko tona faka ʼuhiga ke tou faka mafola temi katoa? Tou maʼuliʼi te ʼu meʼa ʼaē ʼe tou kole, ʼo tou fakatuputupu tatatou gāue fai faka mafola pea mo tou faka mafola mo te tahi ʼu pionie ʼi te minisitelio. Kapau ʼe koutou fai te ʼu meʼa ʼaia, pea ʼe ko he fakahā ʼaia ʼe koutou mulimuli ki te ʼu meʼa ʼaē ʼe koutou kole.
20. Koteā ʼaē ka tou vakaʼi anai ʼi te alatike ʼaē ka hoa mai?
20 Kapau ʼe tou tauhi agatonu kia Sehova, pea ʼe feala ke tou falala ʼe ina tali anai ki tatatou ʼu faikole ʼaē ʼe ʼalutahi mo tona finegalo. (1 Soane 5:14, 15) Neʼe tou maʼu he ʼu manatu ʼe ʼaoga anai kia tatou, ʼi tatatou vakaʼi ʼihi ʼu faikole ʼaē ʼe tuʼu ʼi te Tohi-Tapu. ʼI te alatike ʼaē ka hoa mai, ʼe tou vakaʼi anai te tahi ʼu tokoni faka Tohi-Tapu ʼe fai kia nātou ʼaē ʼe nātou fia ‘teuteuʼi tanatou faikole ohage ko he iseso ia muʼa ʼo Sehova.’
ʼE Koutou Tali Feafeaʼi Anai Koa?
◻ He koʼe ʼe tonu ke tou faikole ʼaki te tui?
◻ He koʼe ʼe tonu ke tou fakavikiviki pea mo fakafetaʼi ki te ʼAtua mokā tou faikole?
◻ He koʼe ʼe feala ke tou falala mokā tou kumi tokoni kia Sehova ʼi te faikole?
◻ Koteā te ʼu puani tāfito ʼo te faikole ʼa Sesu ʼaē ʼe tonu ke tou faʼifaʼitakiʼi?
◻ ʼE lava feafeaʼi hatatou mulimuli ki te ʼu meʼa ʼaē ʼe tou kole?
[Paki ʼo te pasina 12]
Ohage ko te Hau ko Sosafate, ʼi ʼihi temi ʼe lagi ʼaoga ke tou faikole fēnei: ‘ ʼE mole mātou ʼiloʼi te meʼa ʼaē ʼe tonu ke mātou fai, kae ʼe mātou fakahaga atu tamatou ʼu mata kia te koe, Sehova’
[Paki ʼo te pasina 13]
ʼE koutou faikole koa ʼo mulimuli ki te faʼifaʼitaki ʼaē neʼe tuku mai e Sesu?