Neʼe Ha Ia Kilisito ʼi Tona Kololia

Neʼe faiakonaki ia Sesu ki te hahaʼi ʼi te koga fenua ʼae neʼe tuʼu ai te kolo ko Sesalea Filipo, ʼae neʼe vahaʼa mamaʼo mo te Moʼuga ʼo Helemone ia teitei kilometa ʼe 25. Lolotoga tana faiakonaki ʼaia, neʼe ina fakaha ki ʼana apositolo te logo fakapunamaʼuli ʼaeni: “ ʼE au tala moʼoni atu kia koutou, ko ʼihi ia koutou ʼae ʼi heni, ʼe mole mamate anai kaʼe heʼeki sisio ki te haʼu ʼo te Foha ʼo te tagata ʼi tona Puleʼaga.”—Mateo 16:28.

Neʼe lagi feʼekeʼaki e te ʼu tisipulo ʼa Sesu pe kotea te fakaʼuhiga ʼo ʼana palalau. Hili ki ai ni ʼaho, neʼe toʼo e Sesu te ʼu apositolo ʼe toko tolu, ko Petelo, mo Sakopo pea mo Soane, ʼo natou hake ki he moʼuga maʼoluga. Neʼe lagi ko te poʼuli he neʼe tulemomoe te foʼi toko tolu ʼaia. ʼI te lolotoga faikole ʼa Sesu, neʼe fetogi tona agaaga ʼi ʼonatou muʼa. Neʼe sisio te ʼu apositolo ki te gigila ʼo tona fofoga ohage ko te laʼa pea mo te hihina ʼo ʼona kofu.

Pea neʼe ha te ʼu tagata ʼe lua, neʼe “ko Moisese mo te polofeta ko Elia.” Neʼe nā kamata palalau mo Sesu ʼo ʼuhiga mo ‘tana mavae ʼae ka hoko ʼi Selusalemi.’ (Luka 9:30, 31) Ko tana mavae ʼaia neʼe fakaʼuhiga ki te mate ʼo Sesu pea mo tona fakatuʼuake, ʼae neʼe talanoa ki ai Sesu ʼi muʼa atu. (Mateo 16:21) Neʼe mole loto ia Petelo ke hoko te ʼu faʼahi ʼaia. Kaʼe neʼe ha ʼi tanatou faipalalau, neʼe mole tonu ke hao ia Sesu mai te mate fakalainoa.

ʼI tanatou kua ʼaʼala lelei ake, neʼe punamaʼuli te ʼu apositolo ʼaia ʼe toko tolu ʼi te meʼa ʼae neʼe natou sisio mo logo ki ai. Neʼe ko he meʼa pe ia neʼe ha kia natou, kaʼe kia Petelo neʼe ko he meʼa moʼoni ia, ʼo ina kamata fai ai he ʼu fakatuʼutuʼu, ʼo ina ui fenei: “ ʼAliki, ʼe lelei ke matou ʼi heni. Tou fakatuʼu he ʼu fale la ʼe tolu, he tahi maʼa koe, mo he tahi maʼa Moisese pea mo he tahi age maʼa Elia.” (Maleko 9:5) Neʼe lagi fia fakatuʼu e Petelo he ʼu fale la he neʼe ina loto ke hoko atu te meʼa ʼaia neʼe ha kia natou.

ʼI te lolotoga palalau ʼa Petelo, neʼe ʼaofi natou e he ʼao gigila, pea neʼe natou logo ki he leʼo mai te ʼao, ʼe ina ui fenei: “Ko toku ʼAlo ʼaeni, toku ʼofaina, ʼae ʼe au fiafia ai. Kotou fakalogo kia te ia.” ʼI te logo ʼa te ʼu apositolo ki te leʼo ʼo te ʼAtua, neʼe natou matataku ʼo natou tulolo ki lalo, kaʼe neʼe ui fenei e Sesu kia natou: “Kotou tutuʼu ake. ʼAua naʼa kotou matataku.” (Mateo 17:5-7) Neʼe tutuʼu ake te ʼu apositolo ʼaia ʼe toko tolu, pea neʼe natou tokagaʼi neʼe ko Sesu tokotahi pe. Neʼe kua puli te meʼa ʼae neʼe ha kia natou. ʼI tanatou hihifo mai te moʼuga ʼi te kua ʼaho, neʼe fakatotonu fenei age e Sesu kia natou: “ ʼAua naʼa kotou fakamatala ki he tahi te meʼa ʼae neʼe ha atu, ʼo kaku ki te fakatuʼuake ʼo te Foha ʼo te tagata mai te kau mate.”—Mateo 17:9.

ʼI te sio ʼa te kau apositolo kia Elia ʼi te meʼa ʼae neʼe ha age kia natou, neʼe natou fai ai te fehuʼi ʼaeni: “He koʼe koa ʼe ui e te kau sekelipa ʼe tonu muʼa ke haʼu ia Elia?” Neʼe tali fenei age e Sesu: “Kua ʼosi haʼu ia Elia pea neʼe mole natou iloʼi ia ia.” (Mateo 17:10-12) Neʼe talanoa ia Sesu ʼo ʼuhiga mo Soane Patita, ʼae neʼe ina fai he gaue neʼe tatau mo ʼae ʼa Elia. Neʼe teuteuʼi e Elia te ala kia Eliseo, pea neʼe toe fai feia e Soane kia Kilisito.

ʼE mahino ia, neʼe fakalotomalohiʼi ia Sesu pea mo te ʼu apositolo ʼaki te meʼa ʼaia neʼe ha. Neʼe ko te ha fakatomuʼa ʼaia ʼo te kololia ʼo Kilisito ʼi tona Puleʼaga. Koia neʼe sio te ʼu tisipulo “ki te haʼu ʼo te Foha ʼo te tagata ʼi tona Puleʼaga,” ohage pe ko tona fakapapau e Sesu. (Mateo 16:28) ʼI tanatou nonofo ʼi te moʼuga, neʼe natou “sisio mata ki tona kololia.” Logo la neʼe loto e te kau Faliseo ke fai e Sesu he fakailoga moʼo fakamoʼoni neʼe ko ia te Hau ʼae neʼe filifili e te ʼAtua, kaʼe neʼe mole ina fai. Kaʼe neʼe fakagafua ki te ʼu tisipulo ʼae neʼe faifaitahi mo Sesu ke natou sisio ki te fetogi ʼo tona agaaga, ʼae neʼe fakamoʼoni ai ki te ʼu lea fakapolofeta ʼo ʼuhiga mo te Puleʼaga. Koia, neʼe tohi fenei e Petelo ki muli age: “ ʼE kua malohi age tatatou falala ki te ʼu lea fakapolofeta.”—2 Petelo 1:16-19.