Te ʼu Fehuʼi ʼa Te Kau Lautohi

ʼE ʼau mahino ko te kupu faka Keleka toté (pea) ʼe fakaʼaogaʼi moʼo fakahū he meʼa ʼe hoko. Koia he koʼe ʼe ʼui ia Mateo 24⁠:9: “Pea [toté] ʼe ʼave anai koutou ki te mamahi,” kae ʼe ʼui mai ia ʼi te fakamatala ʼo Luka 21:​12: “Kaʼe ia muʼa ʼo te ʼu meʼa fuli ʼaia, ʼe nātou puke anai koutou pea mo nātou fakatagaʼi anai koutou”?

ʼE moʼoni ʼe feala ke fakaʼaogaʼi te kupu toté moʼo fakahū he meʼa ʼe hoko, he meʼa ʼe fefakahoahoaʼaki ʼi te temi. Kae ko te kupu ʼaia ʼe mole faka ʼuhiga pe ki he meʼa e tahi ʼi te Tohi-Tapu.

Ko te tikisionalio A Greek-English Lexicon of the New Testament and Other Early Christian Literature, ʼaē neʼe tohi e Bauer, Arndt pea mo Gingrich, ʼe hā ai ko te kupu toté ʼe ʼi ai tona ʼu faka ʼuhiga tāfito e lua ʼi te Tohi-Tapu.

Ko tona faka ʼuhiga “ ʼi te temi ʼaia.” ʼE feala ke faka ʼuhiga “ ʼo te temi muʼa ʼaia.” ʼE ʼi ai te faʼifaʼitaki ia Mateo 2:17: “Pea neʼe hoko ai te meʼa ʼaē neʼe fakahā ʼaki te polofeta ko Selemia.” Ko te faʼahi ʼaia ʼe mole faka ʼuhiga ia ki he ʼu meʼa ʼe fefakahoahoaʼaki kae ʼe ina fakahā te puani e tahi ʼi te temi muʼa, ʼi te temi ʼaia. ʼO toe feiā pe, ko te kupu toté ʼe feala ke fakaʼaogaʼi “ ʼi te temi leva ʼaia.” ʼE maʼu te fakaʼaoga ʼaia ia 1 Kolonito 13:12: “ ʼI te temi ʼaenī ʼe nenefu tatatou sio ʼaki te sioʼata ukamea, kae ʼi te temi leva ʼaia ʼe tā fehagaʼaki. ʼI te temi ʼaenī, ʼe ʼau ʼiloʼi fakakoga pe, kae ʼi te temi leva ʼaia ʼe ʼau ʼiloʼi lelei anai ohage pe ko toku ʼiloʼi lelei.” ʼI henī neʼe fakaʼaogaʼi e Paulo te kupu toté ʼi tona faka ʼuhiga ‘ ʼi he temi ka haʼu.’

ʼE fakamahino mai e te tikisionalio ʼaia, ko te tahi fakaʼaoga ʼo te kupu toté ko te “fakahū he meʼa ka hoko anai.” ʼE lahi te ʼu faʼifaʼitaki ʼaē ʼe foaki mai e te tikisionalio ʼaia mai te ʼu fakamatala e tolu, ʼi te tali ʼa Sesu ki te fehuʼi ʼo ʼuhiga mo te fakaʼiloga ʼo tana ʼi henī.a Ohage la, ʼe tou maʼu te fakaʼaoga ʼo te kupu toté “moʼo fakahū he meʼa ka hoko anai,” ia Mateo 24⁠:​10, 14, 16, 30; Maleko 13⁠:​14, 21; pea mo Luka 21⁠:​20, 27. ʼI tatatou vakaʼi te ʼu vaega ʼaē ʼe tuʼu ʼi muʼa pea mo te ʼu vaega ʼaē ʼe hoa mai, ʼe hā ai pe koʼe ʼe feala ke tou mahino lelei ko he meʼa ʼe hoko ʼi te temi ka haʼu. Pea ko te faʼahi ʼaia ʼe tokoni kia tatou ke tou mahino ki te faka ʼuhiga ʼo te lea faka polofeta ʼa Sesu ʼo ʼuhiga mo te ʼu meʼa ʼaē ka hoko anai ʼi te temi ka haʼu.

Kae, ʼe mole tonu leva ke tou ʼui ko te ʼu kupu fuli ʼo toté ʼi te ʼu fakamatala ʼaia ʼe faka ʼuhiga pe moʼo fakahū he meʼa ka hoko anai. Ohage la, ia Mateo 24:​7, 8, ʼe tou lau ai ko Sesu neʼe ina fakakikite ʼe tuʼu anai he puleʼaga ki he tahi puleʼaga pea ʼe ʼi ai anai mo te ʼu hoge pea mo te ʼu mafuike. ʼE hoko atu ʼi te vaega 9: “Pea ʼe ʼave anai koutou ki te mamahi pea ʼe matehi anai koutou, pea ʼe koutou liliu anai ko he ʼu meʼa ʼe fehiʼaʼinaʼi e te ʼu puleʼaga katoa ʼuhi ko toku huafa.” ʼE tonu koa tatatou mahino ʼaē ko te fakakikite ʼo te ʼu tau, ʼo te ʼu hoge, ʼo te ʼu mafuike ʼe hoko fuli anai, pea lagi fakagata anai, ia muʼa ʼo te kamata ʼo te fakataga?

ʼE mole tonu te manatu ʼaia, pea ko te meʼa ʼaē ʼe tou ʼiloʼi ʼo ʼuhiga mo te meʼa ʼaē neʼe hoko ʼi te ʼuluaki sēkulō ʼe mole fakamoʼoni ki te faʼahi ʼaia. Ko te fakamatala ʼaē ʼe tuʼu ʼi te tohi ʼo Gāue ʼe hā ai, ʼi te ʼosi kamata pe ʼo te fai faka mafola ʼa nātou ʼaē neʼe kau ʼi te kokelekasio faka Kilisitiano foʼou, neʼe nātou tau mo te fakafeagai mālohi. (Gāue 4:​5-​21; 5:​17-​40) ʼE mole feala ke tou ʼui ko te ʼu tau, te ʼu hoge, pea mo te ʼu mafuike fuli ʼaē neʼe palalau kiai ia Sesu neʼe hoko ia muʼa ʼo te ʼuluaki fakataga. Kae, ko te fakataga ʼaia neʼe hoko “ia muʼa” ʼo te ʼu meʼa fuli ʼaia neʼe fakakikite, ʼaē ʼe ʼalutahi mo te manatu ʼa Luka: “Kaʼe ia muʼa ʼo te ʼu meʼa fuli ʼaia, ʼe nātou puke anai koutou pea mo nātou fakatagaʼi anai koutou.” (Luka 21:12) Koia lagi ʼe feala ai ke ʼui ia Mateo 24:9, ko te kupu toté ʼe tau lelei mo te kupu “ ʼi te temi ʼaia.” Lolotoga ʼo te temi ʼo te ʼu tau, te ʼu hoge, pea mo te ʼu mafuike, ʼi te temi ʼaia, ko te ʼu kaugana ʼa Sesu ʼe fakatagaʼi anai nātou.

[Kiʼi nota ʼi te lalo pasina]