Neʼe Nātou Fai Te Finegalo ʼo Sehova
Ko Te Tagata ʼAē ʼe Lahi Tokotahi ʼe Ina Fakahoko Te Gāue Faka Agavaivai
NEʼE ʼiloʼi e Sesu ʼe maʼuhiga te ʼu hola fakamuli ʼaē neʼe nofo ai mo tana ʼu ʼapositolo. ʼE mole kei tuai pea ʼe puke anai ia ia, pea ʼe hoko anai ki tana tui te ʼu ʼahiʼahi neʼe mole heʼeki hoko kia ia. Tahi ʼaē meʼa, neʼe mahino kia Sesu ʼe ina maʼu anai he ʼu fakapale lahi. Mole tuai pea ʼe hiki anai ia ia ki te toʼomataʼu ʼo te ʼAtua pea ʼe foaki anai kia te ia “te Higoa ae e maoluga’pau ʼi te higoa fuape, koteuhi i te Higoa o Sesu ke hu ifo te tuli fuape i Selo, mo te kelekele pea mo te lalo kele.”—Filipe 2:9, 10.
Logope la tana tuʼania ʼo ʼuhiga mo tona mate, pea mo tana holi mālohi ki te fakapale ʼaē neʼe fakapapauʼi age kia ia, kae neʼe mole galo kia Sesu te ʼu meʼa ʼaē neʼe ʼaoga ki tana ʼu ʼapositolo. Ki muli age neʼe tohi fēnei e Soane ʼi tana Evaselio: “Nee ofa ia natou ki te gataʼaga.” (Soane 13:1) Pea ʼi te ʼu hola fakamuli pea mo maʼuhiga ʼaia ʼo tona maʼuli ʼi tona ʼuhiga tagata haohaoa, neʼe akoʼi e Sesu he meʼa maʼuhiga ki tana kau tisipulo.
Te Ako Ki Te Agavaivai
Neʼe nofo te ʼu ʼapositolo mo Sesu ʼi te kogafale fata ʼi Selusalemi ke nātou fai te Pāsikate. ʼI muʼa atu, neʼe logo Sesu ki tanatou kē pe ko ai ia ia ʼaē ʼe lahi tāfito ia nātou. (Mateo 18:1; Maleko 9:33, 34) Neʼe kua palalau Sesu mo nātou ʼo ʼuhiga mo te faʼahi ʼaia pea neʼe ina faigaʼi ke ina fakatonutonuʼi tanatou manatu. (Luka 9:46) Kae ʼi te lakaga ʼaia neʼe fakaʼaogaʼi e Sesu te tahi faʼahiga fakatonutonuʼi. Neʼe fia palalau age kia nātou ʼo ʼuhiga mo te loto agavaivai pea neʼe ina fai age te faʼifaʼitaki ʼi ʼonatou muʼa.
Neʼe tohi e Soane, neʼe “tuuʼake ia [Sesu] mai te taumafa, pea hui e ia tona pulupulu, pea ina too ake he kie o valaʼaki iaʼia. Pea ina liligi te vai ki te pesini, pea nee haga ia o fufulu te u vae o te kau tisipulo pea mo holoholo aki te kie nee ina valai.”—Soane 13:4, 5.
ʼI te Moyen-Orient ʼo te temi ʼāfea, ʼuhi ko te vevela, ʼi te agamāhani neʼe fakaʼaogaʼi e te hahaʼi te ʼu savate kiliʼi pipi ki tanatou haʼele ʼi te ʼu ala efuefu. Ka nātou hū ki he ʼapi, neʼe fakaʼalofa age kia nātou te tagata ʼo te ʼapi pea neʼe ina tuku age te ʼu pesini pea mo te moʼi vai ke nātou fufulu tonatou ʼu vaʼe. ʼI te ʼu ʼapi ʼo te hahaʼi maʼu koloā, neʼe ko te kaugana ʼaē neʼe ina fufulu tonatou ʼu vaʼe.—Kau Fakamāu 19:21; 1 Samuele 25:40-42.
ʼI te kogafale fata ʼaia, neʼe mole ʼi ai he tagata fai fakaafe moʼo tali ʼo nātou. Neʼe mole tuku age kia nātou he ʼu pesini pea neʼe mole ʼi ai he tagata kaugana moʼo fufulu tonatou ʼu vaʼe. Koia neʼe ko he ʼaluʼaga fakaufiufi ki te kau ʼapositolo te kamata fufulu e Sesu tonatou ʼu vaʼe. Ko Ia ʼaē neʼe lahi tāfito ia nātou neʼe ina lolotoga fai te gāue faka agavaivai ʼaia!
ʼUluaki, neʼe mole loto e Petelo ke fufulu e Sesu tona ʼu vaʼe. Kae neʼe ʼui age e Sesu kia ia: “Kapau e mole au fufulu koe, pea e mole ke maù hou tofia mo au.” ʼI te ʼosi fufulu e Sesu te ʼu vaʼe ʼo tana kau tisipulo fuli, neʼe ʼui fēnei e Sesu: “Pe e koutou iloi te mea nee au fai kia koutou? E koutou fakahigoa au ko te faipule mo te Aliki, pea e mooni tautou ui, he ko au ia. Kapau leva nee au fufulu outou vae, e au ko te Aliki mo te faipule, pea e tonu ke koutou fe’fufuluʼaki outou vae; he kuʼau tuku atu kia koutou he faifaitakiʼaga, o hagepe ko taku fai kia koutou, ke koutou fai feia.”—Soane 13:6-15.
Neʼe mole fakatuʼu e Sesu he talatisio ʼo ʼuhiga mo te fufulu ʼo te ʼu vaʼe. Kae neʼe tokoni ai ki tana kau tisipulo ke nātou fetogi tanatou manatu pea ke nātou agavaivai pea mo lotolelei ke nātou fakahoko te ʼu gāue faka agavaivai maʼa tonatou ʼu tēhina. Neʼe mahino te ʼu tisipulo ki te puani ʼaia. Tou vakaʼi te meʼa ʼaē neʼe hoko ki muli age ʼi te temi ʼaē neʼe malaga ai te fakafifihi ʼo ʼuhiga mo te silikosisio. Logope la “te fakaʼalu o mamafa anatou fe’feleuʼaki,” kae neʼe fai fakatokatoka te fono pea ko nātou ʼaē neʼe kau kiai neʼe nātou fefakalogoʼaki ʼi te fakaʼapaʼapa. Tahi ʼaē meʼa, ʼe ʼui ʼe ko te tisipulo ko Sake, ʼaē neʼe mole ko he tahi ʼi te kau ʼapositolo logope la neʼe nātou kau kiai, ʼaē neʼe pelesita ʼi te fono ʼaia. ʼE hā ʼaki mai ko te kau ʼapositolo neʼe kua nātou liliu ʼo agavaivai.—Gāue 15:6-29.
Te Ako Maʼa Tatou
ʼI tana fufulu te ʼu vaʼe ʼo tana kau tisipulo, neʼe tuku mai kia tatou e Sesu he ako mālohi ʼo ʼuhiga mo te agavaivai. ʼE moʼoni, ko te kau Kilisitiano ʼe mole tonu ke nātou manatu ʼe nātou maʼuhiga ʼo maʼua ai ke tauhi age kia nātou te ʼu tēhina mo tuagaʼane, pea ʼe mole tonu ke nātou fia maʼu tuʼulaga pea ke faka maʼuhigaʼi nātou. Kae ʼe tonu ke nātou mulimuli ki te faʼifaʼitaki ʼo Sesu, ʼaē neʼe “mole haele mai ke tauhi kia te ia, kae ke ina tauhi mo foaki tona mauli moʼo totogi aki o te tokolahi.” (Mateo 20:28) Ei, ko te kau tisipulo ʼa Sesu ʼe tonu ke nātou lotolelei ke nātou fai te ʼu gāue faka agavaivai maʼa tonatou ʼu tēhina mo tuagaʼane.
Koia la ʼaē neʼe tohi fēnei ai e Petelo: “Koutou teu te agavaivai koteuhi, e fakafehagai te Atua kia natou fialahi, kae e ina foaki tona kalasia kia natou agavaivai.” (1 Petelo 5:5) Ko te kupu faka Keleka ʼaē ʼe fakaʼaogaʼi ki te kupu “teu” ʼe haʼu mai te tahi kupu ʼe faka ʼuhiga ki te “kie ʼo te tagata kaugana,” ʼaē neʼe valaʼi ai te tahi kie. Neʼe faka ʼuhiga koa e Petelo ki te valaʼi e Sesu tana moʼi kie pea mo tana fufulu te ʼu vaʼe ʼo tana kau ʼapositolo? ʼE mole tou ʼiloʼi papau te faʼahi ʼaia. Kae ʼe feala ke tou ʼui neʼe mole galo kia Petelo te faʼifaʼitaki ʼaia, ʼaē neʼe fai ai e Sesu he gāue faka agavaivai, pea ʼe tonu ke toe feiā mo nātou fuli ʼaē ʼe nātou fia liliu ko he ʼu tisipulo ʼa Kilisito.—Kolose 3:12-14.