Ko Sesu ʼe Ko He Faʼifaʼitakiʼaga ʼo Te Agavaivai
“Kua au tuku atu kia koutou he faifaitakiaga, o tupu ke kotou fai o hage ko taku fai kia koutou.”—SOA. 13:15.
KOTEĀ TAKOTOU TALI?
ʼI muʼa ʼo tana haʼu ki te kele, neʼe fakahā feafeaʼi e te ʼAlo ʼo te ʼAtua tana agavaivai?
ʼI tana maʼuli ʼi te kele, neʼe fakahā feafeaʼi e Sesu tana agavaivai?
Koteā te ʼu fua lelei ʼo te agavaivai ʼa Sesu?
1, 2. ʼI te pō fakaʼosi ʼa Sesu ʼi te kele, koteā ʼaē neʼe ina akoʼi age ki tana kau ʼapositolo?
NEʼE ko te pō fakaʼosi ʼa Sesu ʼi te kele, pea neʼe fakatahi mo tana kau ʼapositolo ʼi he ʼapi ʼi Selusalemi, ʼi te koga fale fata. Lolotoga tanatou kakai, neʼe tuʼu ake Sesu ʼo huʼi ʼona kofu tuʼa, pea ina haʼi te kie holoholo ki tona koga loto pea neʼe ina liligi te vai ki he pesini. Neʼe ina kamata fufulu leva te ʼu vaʼe ʼo tana kau tisipulo pea mo holoholoʼi ʼaki te kie. Hili ʼaia, neʼe ina toe tui ʼona kofu. He koʼē neʼe fai e Sesu te toe gāue mālalo ʼaia?—Soa. 13:3-5.
2 Neʼe fakamahino fēnei e Sesu tona tupuʼaga: “Pe e kotou mahino ki te mea nee au fai kia koutou? . . . Kapau leva nee au fufulu okotou vae, e au ko te Aliki mo te Pule, pea e tonu foki ke kotou fefufuluaki okotou vae; koteuhi kua au tuku atu kia koutou he faifaitakiaga, o tupu ke kotou fai o hage ko taku fai kia koutou.” (Soa. 13:12-15) ʼI te fai e Sesu ia te gāue mālalo ʼaia, ʼe mole toe galoʼi anai e tana kau ʼapositolo te ako ʼaia ʼo uga ai nātou ke natou agavaivai ki muli age.
3. (1) Neʼe feafeaʼi te fakahā tuʼa lua e Sesu te maʼuhiga ʼo te agavaivai? (2) Koteā ʼaē kā tou ako anai ʼi te ʼalatike ʼaenī?
3 ʼI te temi ʼaē neʼe fufulu ai e Sesu te ʼu vae ʼo te kau ʼapositolo, neʼe mole ko he tuʼa tahi ʼaē ʼo tana fakahā kiā nātou te maʼuhiga ʼaē ke natou agavaivai. ʼI muʼa atu, neʼe fefihiʼaki ʼihi ʼapositolo ʼi tanatou fia ʼiloʼi ʼaē pe ko ai neʼe lahi iā nātou. Neʼe toʼo e Sesu te kiʼi toe pea ina ʼui fēnei age kiā nātou: “Ko he tahi pe e ina talitali i toku huafa te kii toe aeni e ina tali ia au totonu; pea ko he tahi pe e ina talitali ia au e ina talitali ia ae nee ina fekaui mai au. Koteuhi ko ae e veliveli ia koutou fuli, ko ia ae e lahi.” (Luka 9:46-48) Ki muli age, ʼi te fai palalau ʼa Sesu mo te kau Faliseo, ʼaē neʼe natou manatu ʼe maʼuhiga age nātou ʼi te hahaʼi, neʼe ina ʼui fēnei: “Ko ae e fiamaoluga e tuku anai ia ki lalo, pea ko ae e fiamalalo e hiki anai ia ki oluga.” (Luka 14:11) ʼE hā lelei mai ai, ʼe loto e Sesu ke agavaivai tana kau tisipulo. ʼE mole ina loto ke natou fiameʼalahi, ke natou manatu ʼe maʼuhiga age nātou ʼi ʼihi, peʼe ke natou fia fakahā ʼi ʼanatou aga ʼe lelei age nātou ʼi ʼihi. ʼE tou ako fakalelei anai ʼi te ʼalatike ʼaenī te faʼifaʼitaki ʼa Sesu ʼo ʼuhiga mo te agavaivai, ke feala hatatou mulimuli kiai. ʼE tou toe vakaʼi anai mo te ʼu fua lelei ʼe maʼu e ia ʼaē ʼe agavaivai pea mo nātou ʼaē ʼe ina fakahā ki ai te aga ʼaia.
“NEʼE MOLE AU MALIU KEHE MAI AI ʼO FAKAFEAGAI”
4. Neʼe fakahā feafeaʼi e Sesu tana agavaivai ʼi muʼa ʼo tana haʼu ki te kele?
4 Neʼe fakahā e te ʼAlo ʼo te ʼAtua tana agavaivai ʼi muʼa ʼo tana haʼu ki te kele. ʼI selō, neʼe fakatahi Sesu mo tana Tamai ʼi he toe temi loaloaga. ʼE fakamatala ʼi te Tohi-Tapu, ʼi te tohi ʼa Esaia, te felōgoi lelei ʼa te ʼAlo pea mo tana Tamai. ʼE tou lau fēnei: “Ko te Tuʼi ʼAliki ko Sehova neʼe ina foaki totonu mai te lea ʼo nātou ʼaē neʼe akoʼi, koteʼuhi ke au poto ʼi te tali ʼaki he palalau ki ʼaē ʼe gaʼegaʼe. ʼE ina fakaʼala ʼi te uhu fuli; ʼe ina fakaʼala toku taliga moʼo fagono kiā nātou ʼaē neʼe akoʼi. Ko te Tuʼi ʼAliki ko Sehova totonu neʼe ina ʼavahi toku taliga, pea ko au neʼe mole au talagataʼa. Neʼe mole au maliu kehe mai ai ʼo fakafeagai.” (Isa. 50:4, 5, MN) Neʼe lotolelei Sesu ke akoʼi ia ia e te ʼAtua moʼoni. Neʼe agavaivai mo fagono lelei ki te ʼu meʼa ʼaē neʼe akoʼi age e Sehova. ʼE mahino ia neʼe toe sio mata Sesu ki te agavaivai ʼa Sehova ʼi tana fakahā tona manavaʼofa ki te hahaʼi agahala.
5. ʼI te temi ʼaē neʼe fihi ai Sesu mo te Tēvolo, neʼe ina fakahā feafeaʼi tana agavaivai mo tana mahino ʼaē ʼe mole pule kiā meʼa fuapē?
5 Neʼe mole agavaivai te kau ʼāselo fuli ohagē ko Sesu. Ko te ʼāselo ʼaē neʼe liliu ko Satana te Tēvolo, neʼe mole loto ia ke akoʼi ia ia e Sehova. Neʼe liliu ʼo fiameʼalahi pea mo kamata manatu neʼe ko ia tokotahi pē ʼaē ʼe maʼuhiga. Neʼe mole ko te agavaivai ʼaia. Koia lā ʼaē neʼe agatuʼu ai kiā Sehova. Kae neʼe mole fēia Sesu. Neʼe ina leleiʼia pē te pule ʼaē neʼe foaki age kiā ia e te ʼAtua ʼi selō. Pea neʼe mole he temi neʼe ina fia fakaʼaoga koviʼi ai tana pule ʼaia. Ohagē lā, ʼe fakamatala ʼi te Tohi-Tapu neʼe ʼi ai te temi neʼe fihi ai Sesu mo te Tēvolo ʼo ʼuhiga mo te sino ʼo Moisese. ʼI te hoko ʼo te meʼa ʼaia, neʼe mole fai e Sesu he meʼa neʼe mole fakagafua age ke ina fai, logolā neʼe ko ia ko te ʼāselo ko Mikaele, ʼaē neʼe ina maʼu te toe pule lahi. Neʼe agavaivai te ʼAlo ʼo te ʼAtua pea neʼe mahino kiā ia ʼe mole pule kiā meʼa fuapē. Neʼe lotolelei ia ke fakatalitali kiā Sehova, te Tuʼi Fakamāu ʼo te ʼatulaulau, moʼo fakatokatoka lelei te faʼahi ʼaia ʼi tona temi totonu.—Lau ia Suta 9.
6. Neʼe fakahā feafeaʼi e Sesu tana agavaivai ʼi tana tali ʼaē ke liliu ko te Mēsia?
6 ʼI tana kei ʼi selō, neʼe kua ʼiloʼi e Sesu te ʼu fakakikite fuli neʼe fai ʼo ʼuhiga mo te ʼu meʼa kā hoko anai kiā te ia, mokā liliu ko te Mēsia. Neʼe kua lagi ina ʼiloʼi ʼe gaohi koviʼi anai ia ia. Logolā te faʼahi ʼaia, kae neʼe tali pē e Sesu ke liliu ko te Mēsia ʼaē neʼe fakapapau, ʼo haʼu ki te kele pea mo mate. Koteā tona tupuʼaga? Neʼe fakamahino e te ʼapositolo ko Paulo neʼe tupu he neʼe agavaivai Sesu. Neʼe tohi e Paulo neʼe mole manatu pē lā Sesu “ke liliu o tatau mo te Atua” logolā neʼe ko he ʼāselo mālohi. Kae “nee ina fakanoai ia ia totonu, o ina too te agaaga o te faifekau, o liliu ia o tatau mo te u tagata.”—Filp. 2:6, 7.
ʼI TANA MAʼULI ʼI TE KELE NEʼE INA “FAKAVAIVAI” IFO IA IA
7, 8. Neʼe fakahā feafeaʼi e Sesu tana agavaivai ʼi tana kei veliveli pea mo lolotoga tana minisitelio?
7 Neʼe tohi fēnei e Paulo ʼo ʼuhiga mo te temi ʼaē neʼe maʼuli ai Sesu ʼi te kele: “Nee ina tali ke mauli i te fakavaivai, pea nee liliu ia o fakalogo o kaku ki te mate, ki te mate foki i te [pou fakamamahi].” (Filp. 2:8) Neʼe fakahā e Sesu tana agavaivai ʼi tana kei veliveli, ʼo ina tuku mai he faʼifaʼitaki ke tou muliʼi. Neʼe fakalogo Sesu ki ʼana mātuʼa, ia Sosefo mo Malia, logolā tonā ʼuhiga agahala. (Luka 2:51) ʼE ko he faʼifaʼitaki lelei ʼaia ki te kau tūpulaga. Kapau ʼe natou fakalogo ki ʼanatou mātuʼa pea ʼe tapuakina anai nātou e te ʼAtua.
8 ʼI tana kua lahi ake, neʼe fakahā tuʼa lahi e Sesu tana agavaivai. Neʼe maʼuhiga age kiā te ia te fai ʼo te finegalo ʼo Sehova. (Soa. 4:34) Lolotoga tana minisitelio, neʼe fakaʼaogaʼi e Sesu Kilisito te huafa ʼo te ʼAtua pea neʼe ina akoʼi ki te hahaʼi te fakatuʼutuʼu ʼa te ʼAtua mo tona ʼuluagaaga. Neʼe mole ʼui pē e Sesu ki te hahaʼi te ʼu meʼa ʼaē ʼe tonu ke natou fai ke fiafia ai te ʼAtua, kae neʼe ina toe fai mo ia te ʼu meʼa ʼaia. Ohagē lā, ʼi te akoʼi e Sesu ki tana kau tisipulo pe feafeaʼi hanatou faikole, neʼe ina fakamuʼamuʼa te faʼahi ʼaenī: “Tamatou Tamai ae e nofo i te atu lagi! Ke tapuha tou huafa.” (Ko mātou ʼaē neʼe matou fetogi tona faʼahiga tohi; Mat. 6:9) Neʼe fakahā ai e Sesu ki ʼana tisipulo neʼe tonu ke maʼuhiga age kiā nātou ia te fakakolōliaʼi ʼo te huafa ʼo Sehova. Pea neʼe toe fai foki e Sesu te faʼahi ʼaia. ʼI tana fakaovi ʼaē ki te mate, neʼe feala ke ina ʼui fēnei kiā Sehova: “Nee au fakailoilo kia natou tou huafa, pea e au toe fakailoilo anai ia kia natou.” (Soa. 17:26) Pea neʼe ʼui tuʼa lahi e Sesu neʼe ina fai ʼana gāue fuli ʼaki pē te tokoni ʼa Sehova.—Soa. 5:19.
9. Koteā ʼaē neʼe fakakikite e Sakalia ʼo ʼuhiga mo te Mēsia? Neʼe fakahoko feafeaʼi e Sesu te lea fakapolofetā ʼaia?
9 Neʼe fakakikite e Sakalia te faʼahi ʼaenī ʼo ʼuhiga mo te Mēsia: “Ke ke nekenekea, taahine o Sione! Ke ke fai ni kalaga fakafiafia, taahine o Selusalemi! Koeni, e hau tou hau kia koe. E faitotonu ia ia mo malo, e agamalu ia ia pea e heka ia ia i he asino, i he asino, te uhi o he asino fafine.” (Sakl. 9:9) Neʼe hoko te faʼahi ʼaia ʼi te temi ʼaē neʼe hū ai Sesu ki Selusalemi ʼi te taʼu 33, ʼi muʼa ʼo te Pāsikate. Tokolahi neʼe natou fola ʼi te ala ʼonatou kofu pea mo ni vaʼa ʼakau. Neʼe fiafia ʼaupitō te hahaʼi ʼi Selusalemi ʼi tana hū ki te kolo. Logo aipē lā tanatou vikiʼi ia Sesu ʼo natou ʼui ko ia tonatou Hau, kae neʼe agavaivai pē Sesu.—Mat. 21:4-11.
10. Koteā ʼaē neʼe fakamoʼoni ai e Sesu ʼaki tana fakalogo ʼo kaku ki tana mate?
10 ʼI tana ʼi te kele, neʼe fakahā e Sesu Kilisito tana agavaivai pea mo tana fakalogo ʼo kaku ki tana mate ʼi he pou fakamamahi. Neʼe ina fakamoʼoni lelei ai ʼe feala ke nofo agatonu te hahaʼi kiā Sehova, māʼia ʼi ni ʼaluʼaga faigataʼa ʼaupitō. Neʼe toe fakahā e Sesu neʼe gutuloi Satana ʼi tana ʼui ʼaē ʼe tauhi pē te hahaʼi kiā Sehova heʼe natou loto ke tapuakina nātou. (Sopo 1:9-11; 2:4) ʼI tana fakalogo kātoa ki tana Tamai, neʼe fakahā ai e Kilisito ʼe lagolago ki te pule faʼitaliha ʼo Sehova pea mo tui ʼe ko te pule pē ʼaia ʼe lelei. ʼE mahino ia neʼe fiafia lahi Sehova ʼi tana sio ki te nofo agatonu ʼo tona ʼAlo agavaivai.—Lau ia Taaga Lea 27:11.
11. ʼAki te sākilifisio ʼa Sesu, koteā ʼaē ʼe feala ke maʼu e nātou ʼaē ʼe natou tui kiā te ia?
11 ʼAki te mate ʼa Sesu ʼi te pou fakamamahi, kua feala ai ke haofaki te hahaʼi mai te agahala mo te mate. (Mat. 20:28) ʼAki tana sākilifisio ʼaia, ʼe feala ai kiā Sehova ke ina fakamolemole ʼatatou agahala, ʼo mulimuli ki ʼana lao faitotonu, pea ʼe foaki ai ki te hahaʼi te fealagia ʼaē ke natou māʼuʼuli ʼo heʼegata. Neʼe tohi fēnei e Paulo: “Aki he gaue e tahi o te faitotonu a he tagata e tahi, Sesu Kilisito, ko te fakamatatonu nee mafola ki te tagata fuli.” (Loma 5:18) ʼAki te mate ʼa Sesu, ʼe feala ai kiā nātou ʼaē neʼe fakanofo ʼaki te laumālie māʼoniʼoni ke natou māʼuʼuli tuputupua ʼi selō, pea ko “ni ihi ovi” peʼe ko te tahi ʼu ovi, ke natou māʼuʼuli ʼo heʼegata ʼi te kele.—Soa. 10:16; Loma 8:16, 17.
NEʼE AGAVAIVAI PEA MO AGALELEI KI TE HAHAʼI
12. Neʼe fakahā feafeaʼi e Sesu tana agavaivai pea mo tana agalelei ki te hahaʼi agahala?
12 Neʼe fakaafe e Sesu ia nātou fuli ʼaē neʼe gaʼegaʼe pea mo lotovaivai ke natou ʼomai kiā te ia. Neʼe ina ʼui fēnei: “Kotou too kia koutou taku amo taki, pea kotou tali aku akonaki, koteuhi e au agamalu mo agavaivai; pea e kotou mau anai te malolo ki okotou laumalie.” (Mat. 11:28, 29) Ko Sesu neʼe agavaivai pea mo agamalū, koia neʼe agalelei ai ki te hahaʼi agahala pea neʼe mole fakapalatahi ia. Neʼe mole ina fakamaʼua ki ʼana tisipulo he ʼu meʼa neʼe mole natou lavaʼi. Neʼe ina vikiʼi nātou pea mo faka lotomālohi nātou. Neʼe mole loto ia ke natou manatu ʼe mole natou faʼa popoto peʼe mole natou tuha mo te falala. Neʼe mole aga fefeka Sesu peʼe ʼita tuʼumaʼu kiā nātou. Kae neʼe ina ʼui fēnei: “E malu taku amo taki, pea e maamaa taku kavega.” Neʼe fia ʼui e Sesu ʼe mole faigataʼa fau ki he tahi hana mulimuli ki te ʼu fakamaʼua ke liliu ko he tisipulo. Kapau ʼe natou ako ʼo ʼuhiga mo ia pea mo mulimuli ki ʼana akonaki, pea ʼe natou maʼu anai he fīmālie. Koʼenā lā te tupuʼaga ʼo te fia fakatahi mo Sesu ʼa te hahaʼi tagata, fafine, tamaliki pea mo mātutuʼa.—Mat. 11:30.
13. Neʼe fakahā feafeaʼi e Sesu tona manavaʼofa ki te hahaʼi ʼaē neʼe maʼuli fakaʼofaʼofa?
13 Neʼe ʼofa Sesu ki te hahaʼi ʼaē neʼe fakaʼofaʼofa ʼi Iselaele, pea neʼe tokoni lahi kiā nātou. ʼI tana ovi ki Seliko, neʼe felāveʼi mo te ʼu tagata kivi e toko lua, ko Paletimeo pea mo tona kaumeʼa. Neʼe nā haga kole kiā Sesu ke tokoni age, kae neʼe pupulaʼi nāua e te hahaʼi ke nā fakalogologo. Neʼe feala noa pē kiā Sesu ke mole ina tokagaʼi te ʼu tagata kivi ʼaia. Kae neʼe ʼofa ia iā nāua, ʼo ina pāui ke nā ʼolo age pea neʼe ina fakamālōlō nāua, ʼo nā toe sisio ai. Neʼe faʼifaʼitakiʼi e Sesu tana Tamai, ia Sehova, ʼo agavaivai pea mo manavaʼofa ki te hahaʼi agahala.—Mat. 20:29-34; Mko. 10:46-52.
“KO AE E FAKAMALALO E HIKI ANAI IA IA KI OLUGA”
14. Koteā te ʼu fua lelei ʼo te agavaivai ʼa Sesu?
14 Neʼe tokolahi ia nātou ʼaē neʼe fiafia pea mo maʼu ni fua lelei mai te fakahā e Sesu te agavaivai. Neʼe fiafia Sehova he neʼe fakalogo tona ʼAlo. Neʼe faka lotofīmālie pea mo faka lotomālohi ki te kau ʼapositolo mo te kau tisipulo te fakahā e Sesu tana agamalū pea mo tana agavaivai kiā nātou. ʼI tana tuku he faʼifaʼitaki lelei kiā nātou, mo akoʼi nātou pea mo vikiʼi nātou, neʼe natou liliu ai ʼo tauhi lelei age ki te ʼAtua. Neʼe toe tokoni Sesu ki te tahi age hahaʼi ʼaki tana akoʼi nātou, mo faka lotomalohiʼi nātou, pea mo foaki te ʼu meʼa ʼaē neʼe ʼaoga kiā nātou. Pea ʼaki te sākilifisio ʼa Sesu, ʼe ko te hahaʼi fuli ʼaē ʼe natou tui kiā te ia ʼaē kā natou maʼu anai ni fua lelei ʼo heʼegata.
15. Neʼe fua lelei feafeaʼi kiā Sesu tana agavaivai?
15 Kae neʼe fua lelei koa kiā Sesu tana agavaivai ʼaia? ʼEī. ʼO feafeaʼi? Neʼe ʼui fēnei e Sesu totonu: “Ko ae e fakamalalo e hiki anai ia ia ki oluga.” (Mat. 23:12) Neʼe fakamahino e Paulo neʼe ko te faʼahi ʼaia neʼe hoko tonu kiā Sesu. Neʼe ina ʼui fēnei: “Nee hiki fakaalialiki ai ia e te Atua, pea nee ina foaki age kia ia te higoa ae e maoluga pau i te higoa fuli pe, koteuhi i te higoa o Sesu ke hu ifo te tuli fuli i te lagi, mo te kele, pea mo te lalo kele, pea ke fakaha e te alelo fuli ko Sesu-Kilisito ko te Aliki, ki te kololia o te Atua te Tamai.” ʼI te agavaivai ʼa Sesu pea mo nofo agatonu ʼi te kele, neʼe “hiki fakaalialiki” e Sehova ʼAtua ia tona ʼAlo, ʼo ina foaki kiā te ia te pule kiā meʼa fuli ʼi te lagi mo te kele.—Filp. 2:9-11.
ʼE LAGOLAGO ANAI SESU “KI TE MOʼONI MO TE AGAVAIVAI”
16. ʼE kei agavaivai pē koa te ʼAlo ʼo te ʼAtua ʼi te temi kā haʼu?
16 ʼE kei agavaivai pē anai te ʼAlo ʼo te ʼAtua ʼi te temi kā haʼu. ʼE fakakikite ʼi te pesalemo te meʼa ʼaē kā fai anai e Sesu ki te ʼu fili ʼo te ʼAtua, ʼi tona ʼuhiga Hau ʼi selō. ʼE ʼui fēnei e te pesalemo ʼaia: “ ʼI tou kolōlia haʼele ki te mālo; ke ke ʼalu, moʼo lagolago ki te moʼoni mo te agavaivai pea mo te faitotonu.” (Pes. 45:4, MN) ʼI Halamaketone, ʼe tau anai Sesu Kilisito moʼo puipui nātou ʼaē ʼe agavaivai, mo faitotonu pea mo ʼoʼofa ki te moʼoni. Pea koteā leva ʼaē kā hoko ʼi te fakaʼosi ʼo Te ʼAfio ʼa Kilisito Iā Taʼu e Afe, hili “tana maumaui te u pule fuli, mo te u lagiaki fuli, pea mo te u malohi fuli”? ʼE kei agavaivai pē koa Kilisito? ʼEī, heʼe ʼui mai ʼi te Tohi-Tapu, ʼe ina liufaki anai te Puleʼaga ki tona ʼAtua pea mo Tamai.—Lau ia 1 Kolinito 15:24-28.
17, 18. (1) He koʼē ʼe maʼuhiga ki te ʼu kaugana ʼa Sehova ke natou agavaivai ohagē ko Sesu? (2) Koteā te ʼu fehuʼi ʼaē kā tou tali anai kiai ʼi te ʼalatike kā hoa mai?
17 ʼE feafeaʼi kiā tātou? ʼE tou faʼifaʼitakiʼi anai koa ia Sesu ʼo tou agavaivai? ʼI Halamaketone ʼe haofaki pē anai e te Hau ko Sesu Kilisito ia nātou ʼaē ʼe agavaivai mo faitotonu. Koia ʼe tonu ke tou agavaivai ke haofaki ai tātou. Pea ohagē ko Sesu, kapau ʼe tou agavaivai, ʼe lahi anai te ʼu lelei kā maʼu e tātou pea mo ʼihi atu.
18 Koteā ʼaē kā tokoni mai ke tou agavaivai ohagē ko Sesu? ʼE feafeaʼi hatatou faiga ke tou agavaivai, tāfito lā ʼi te ʼu ʼaluʼaga faigataʼa? ʼE tou tali anai ki te ʼu fehuʼi ʼaia ʼi te ʼalatike kā hoa mai.
[Paki ʼo te pāsina 15]
Neʼe fua lelei feafeaʼi ki te hahaʼi ia te agavaivai ʼa Sesu?
[Paki ʼo te pāsina 16]
ʼE tonu ke tou faʼifaʼitakiʼi te fakahā e Sesu tona manavaʼofa ki te hahaʼi