Kotou Fakaovi Ki Te ʼAtua
Ko He ʼAtua ʼe Lotolelei Ke Ina Fakamolemole
“KO KOE, Ê Sehova, ʼe ke agalelei pea mo fakamolemole gafua.” (Pesalemo 86:5) ʼAki te ʼu palalau fakalotofīmālie ʼaenī, ʼe fakamoʼoni mai ʼi te Tohi-Tapu ko Sehova ʼAtua ʼe fakamolemole lahi. Ko te meʼa ʼaē neʼe hoko ʼi te maʼuli ʼo te ʼapositolo ko Petelo ʼe hā lelei ai ko Sehova ʼe fakamolemole “lahi.”—Isaia 55:7.
Ko Petelo neʼe ko he kaumeʼa lelei ʼo Sesu. Kae, ʼi te pō fakaʼosi ʼo te maʼuli ʼo Sesu ʼi te kele, neʼe mataku ai ia Petelo ki te tagata pea mo ina fakahoko ai ia te agahala mamafa. ʼI te malaʼe ʼaē neʼe ovi age ki te koga meʼa ʼaē neʼe fakamāuʼi ai ia Sesu, neʼe fakafisi ai ia Petelo ʼi muʼa ʼo te kaugamālie ʼe mole ina ʼiloʼi ia Sesu—ʼo mole tuʼa tahi pē kae neʼe fakafisi tuʼa tolu. ʼI te hili pē ʼo te fakafisi tuʼa tolu ʼa Petelo, “neʼe maliu ia [Sesu] ʼo sioʼi ia Petelo.” (Luka 22:55-61) Kotou fakakaukauʼi age peʼe koteā ʼapē ʼaē neʼe logoʼi e Petelo ʼo ʼuhiga mo te sio age ʼa Sesu kiā te ia? ʼI tana mahino ai ki te kovi ʼo tana agahala, “neʼe tagi mamahi” ia Petelo. (Maleko 14:72) ʼI te fakahemala ʼa te ʼapositolo ʼuhi ko tana fakafisi tuʼa tolu, neʼe lagi feʼekeʼaki pe neʼe kua feala ʼapē ke fakamolemole e te ʼAtua ia te faʼahi ʼaia.
ʼI te hili ʼo tona fakatuʼuake, neʼe fai palalau ia Sesu pea mo Petelo. Koia ʼe mahino papau, neʼe mole kei lotolotolua ai ʼo ʼuhiga mo te kua fakamolemole age ki ai. Neʼe mole palalau kovi ia Sesu, pea neʼe mole ina tauteaʼi. Kae, neʼe ina fehuʼi age kiā Petelo: “ ʼE ke ʼofa koa kiā te au?” Pea tali fēnei age e Petelo: “ ʼEī, ʼAliki, ʼe ke ʼiloʼi pē ʼe au ʼofa kiā te koe.” Pea toe tali age e Sesu: “Fafaga taku ʼu faga ʼakeno.” Pea toe fai age e Sesu ia te fehuʼi ʼaia, pea toe fai age pē e Petelo ia te tali ʼaē neʼe ina fai ʼuluaki, ʼo lagi toe lahi age tana lotomālohi. Neʼe ʼui fēnei e Sesu: “Taki ʼo fafaga taku ʼu kiʼi faga ovi.” ʼI te temi ʼaē ʼe toe fehuʼi tuʼa tolu age ai e Sesu: “ ʼE ke ʼofa koa kiā te au?” ʼI te temi ʼaia, “neʼe lotomamahi ia Petelo” pea mo ina ʼui fēnei: “ ʼAliki, ʼe ke ʼiloʼi ia meʼa fuli, ʼe ke ʼiloʼi ʼe au ʼofa kiā te koe.” Pea tali fēnei age e Sesu: “Fafaga ʼaku ʼu kiʼi ovi.”—Soane 21:15-17.
Koteā te tupuʼaga ʼo te fai e Sesu ia te ʼu fehuʼi kae kua ina ʼiloʼi pē ia te ʼu tali? Ko Sesu ʼe ina ʼiloʼi ia te ʼu meʼa ʼaē ʼi te loto, koia neʼe ina ʼiloʼi neʼe ʼofa ia Petelo kiā te ia. (Maleko 2:8) ʼAki tana fai te ʼu fehuʼi ʼaia, neʼe tuku e Sesu ia te fealagia kiā Petelo ke ina fakamoʼoni tuʼa tolu age ia tona ʼofa. Ko te ʼu palalau ʼa Sesu ʼaki tana tali—“Fafaga taku ʼu faga ʼakeno. . . . Taki ʼo fafaga taku ʼu kiʼi faga ovi. . . . Fafaga ʼaku ʼu kiʼi ovi”—neʼe ko he fakamoʼoni ki te ʼapositolo ʼaē neʼe fakahemala ia te kei falala pē ʼa Sesu ki ai. Moʼo fakamoʼoni ki te ʼu faʼahi ʼaia, neʼe akoʼi e Sesu ia Petelo ke tokoni ʼo tokaga ki te koloa maʼuhiga ʼaupitō—te ʼu tisipulo ʼofaina ʼa Sehova ʼaē ʼe hagē he ʼu kiʼi faga ovi. (Soane 10:14, 15) ʼE mahino ia, neʼe malave kiā Petelo tana ʼiloʼi ʼaē neʼe kei falala mālohi aipē ia Sesu kiā ia!
ʼE mahino mai, neʼe fakamolemole ia Sesu ki tana ʼapositolo ʼaē neʼe fakahemala. Mai tona ʼaluʼaga ʼaē neʼe fakahā lelei e Sesu ia te ʼu kalitātē pea mo te ʼu faʼahiga fai ʼo tana Tamai, ʼe feala ke tou ʼui ai neʼe fakamolemole mo Sehova kiā Petelo. (Soane 5:19) Ko Sehova ʼe loto lelei ke fakamolemole, ko he ʼAtua manavaʼofa ʼe “fakamolemole gafua” ki he tahi ʼe fakahemala ki tana agahala. ʼE mole koa lā ko he manatu fakalotofīmālie?