Kapite ʼUafulu-Ma-Tahi

Te Hoko Faka Kolōlia ʼo Te Fakatuʼutuʼu ʼa Sehova

1, 2. (a) Koteā te fakatuʼutuʼu ʼa Sehova ʼo ʼuhiga mo tana ʼu fakatupu popoto? (b) Ko ai ʼaē ʼe ina faʼufaʼu te famili logo tahi ʼo te kau atolasio ʼa te ʼAtua?

KO TE fakatuʼutuʼu ʼofa ʼa Sehova, te ʼAtua moʼoni pe e tahi, ʼe ko te fakatahiʼi ʼo te ʼu fakatupu popoto fuape ke nātou atolasio kia te ia, pea mo nātou maʼu te ʼāteaina faka kolōlia ʼo tana fānau. Pea ʼe toe holi feiā mo te hahaʼi ʼaē ʼe nātou ʼoʼofa ki te faitotonu.

² Neʼe kamata fakahoko e Sehova te fakatuʼutuʼu taulekaleka ʼaia ʼi te temi ʼaē neʼe ina kamata ai tana fakatupu. Ko tana ʼuluaki fakatupu, neʼe ko tona ʼAlo, ʼaē talu mai tona fakatuʼuake, ʼe ko “te ʼata ʼo te kolōlia [ʼo te ʼAtua], pea mo te fakatātā totonu ʼoʼona.” (Hepeleo 1:​1-3) Ko te ʼAlo ʼaia neʼe ʼulu tokotahi, he neʼe fakatupu ia ia e te ʼAtua totonu. ʼOsi ʼaia, pea neʼe fakaʼaogaʼi ia ia e te ʼAtua moʼo fakatupu te ʼu meʼa fuli ʼaē: ʼuluaki ko te kau ʼaselo ʼi selo, pea fakaʼosi ʼaki te tagata ʼi te kele. (Sopo 38:7; Luka 3:​38) Ko nātou fuli ʼaia neʼe ko te foʼi famili e tahi ʼi te ʼatulaulau. Maʼa nātou fuli ʼaia, neʼe ko Sehova tonatou ʼAtua, te Tuʼi ʼAliki ʼo te ʼAtulaulau, pea mo tonatou Tāmai ʼofaina.

3. (a) Koteā ʼaē neʼe tou maʼu fuli mai tatatou ʼu ʼuluaki mātuʼa? (b) Koteā te fakatuʼutuʼu ʼofa ʼaē neʼe fai e Sehova ki te hōloga ʼo Atama?

³ ʼI te temi ʼaē neʼe fakatūʼa ai tatatou ʼu ʼuluaki mātuʼa ki te mate, ʼuhi ko tanā agahala ʼi tona loto faʼitaliha, neʼe kapu nāua e te ʼAtua mai Eteni pea mo fakafisi kia nāua. Neʼe mole kei nā kau ʼi tona famili ʼo te ʼatulaulau. (Senesi 3:​22-​24; Teutalonome 32:​4, 5) ʼE tou haʼu fuli mai ia nāua, koia ʼaē neʼe tou tutupu ai mo te ʼu holi ki te agahala. Kae neʼe ʼiloʼi e Sehova, ko ʼihi hahaʼi ʼo te hōloga ʼo Atama mo Eva, ʼe nātou loto anai ki te faitotonu. Koia neʼe ina fai he ʼu fakatuʼutuʼu ʼofa, ke feala kia nātou ʼaia ke nātou maʼu “te ʼāteaina faka kolōlia ʼo te fānau ʼo te ʼAtua.”​—Loma 8:​20, 21.

Kua Līʼakina Ia Iselaele

4. Koteā te pilivilesio ʼaē neʼe foaki e Sehova ki te Iselaele ʼāfea?

⁴ Hili kiai teitei taʼu e 2 500 ʼi te ʼosi fakatupu ʼo Atama, neʼe foaki e Sehova te pilivilesio ki ʼihi hahaʼi ke nātou maʼu he ʼu felogoi makehe mo Ia. Neʼe ina fili ia te Iselaele ʼāfea ke nātou liliu ko tana hahaʼi, pea neʼe ina foaki kia nātou tana Lao. (Senesi 12:​1, 2) Koia neʼe ina fakaliliu ai ia nātou ko he puleʼaga, pea mo ina fakaʼaogaʼi nātou ʼo ʼuhiga mo tana fakatuʼutuʼu. (Teutalonome 14:​1, 2; Isaia 43:1) Kae neʼe kei nātou haʼisia ʼi te agahala pea mo te mate, koia ʼaē neʼe mole nātou maʼu ai te ʼāteaina faka kolōlia ʼaē neʼe maʼu e Atama mo Eva ʼi te kamata.

5. Neʼe pulihi feafeaʼi e te kau Iselaele tonatou tuʼulaga makehe ʼaē neʼe nātou maʼu ia muʼa ʼo te ʼAtua?

⁵ Kae neʼe ʼofainaʼi te kau Iselaele e te ʼAtua. Tahi ʼaē meʼa, neʼe ko hanatou maʼua ke nātou fakaʼapaʼapa kia Sehova tanatou Tāmai, pea mo nātou gāue ʼo mulimuli ki tana fakatuʼutuʼu. Neʼe fakahā e Sesu ʼe maʼuhiga ke kita fakahoko te fakamaʼua ʼaia. (Mateo 5:​43-​48) Kae ko te puleʼaga ʼo Iselaele, neʼe mole ina fai te faʼahi ʼaia. Logola neʼe ʼui e te kau Sutea ʼaia ‘ko tanatou Tāmai pe e tahi, ko te ʼAtua,’ kae neʼe tala age e Sesu ko tanatou ʼu gāue pea mo tanatou ʼu manatu, neʼe mole ʼalutahi mo tanatou ʼu palalau ʼaia. (Soane 8:​41, 44, 47) ʼI te taʼu 33 ʼo totatou temi, neʼe fakagata e te ʼAtua ia te Lao, pea neʼe gata ai mo te ʼu felogoi makehe ʼa Iselaele mo ia. Kae ko tona faka ʼuhiga koa neʼe mole kei feala ki he ʼu hahaʼi ke nātou maʼu he ʼu felogoi makehe mo te ʼAtua?

Te Fakatahiʼi ʼo “Te ʼu Meʼa ʼAē ʼi Te Lagi”

6. He koʼe neʼe fai “te takitaki faka puleʼaga” ʼaē neʼe talanoa kiai ia Paulo ia Efeso 1:​9, 10?

⁶ Neʼe fakahā e te ʼapositolo ko Paulo, ko ʼihi hahaʼi ʼe feala anai ke nātou maʼu he ʼu felogoi makehe mo te ʼAtua. Ohage la, ʼo ʼuhiga mo te fakatuʼutuʼu ʼa Sehova ke liliu ia nātou ʼaē ʼe tui ko he ʼu hahaʼi ʼo Tona loto fale, neʼe tohi fēnei e Paulo: “[Ko te ʼAtua] neʼe ina fakahā mai kia tatou te meʼa fakalilo tapu ʼo tona finegalo. ʼE fai te faʼahi ʼaia he neʼe loto e ia totonu, ʼo mulimuli ki tona finegaloʼofa, ki he takitaki faka puleʼaga ʼi te fakaʼosi ʼo te ʼu temi ʼaē kua fakakatofa, ʼaē ko te toe fakatahiʼi ʼo meʼa fuli ia Kilisito, te ʼu meʼa ʼaē ʼi te lagi pea mo te ʼu meʼa ʼaē ʼi te kele.” (Efeso 1:​9, 10) Ko “te takitaki faka puleʼaga” ʼaia ʼe fakatafito kia Sesu Kilisito. ʼAki ia ia, ʼe ʼi ai te ʼu hahaʼi ʼe tali e te ʼAtua. Ko he tokosiʼi ia nātou ʼe nātou ʼamanaki maʼuʼuli ʼi selo, pea ko te tokolahi ʼaupito, ʼe nātou maʼuʼuli anai ʼi te kele.

7. Ko ai “te ʼu meʼa ʼaē ʼi te lagi”?

⁷ ʼUluaki, ʼo kamata mai te Penikosite ʼo te taʼu 33 ʼo totatou temi, neʼe tokaga te ʼAtua ki “te ʼu meʼa ʼaē ʼi te lagi,” ʼaē ko te ʼu hahaʼi ʼaē ka nātou kaugā hau mo Kilisito ʼi te Puleʼaga ʼaē ʼi selo. ʼO fakatafito ki tanatou tui ki te maʼuhiga ʼo te sakilifisio ʼa Sesu, neʼe lau e te ʼAtua ʼe nātou faitotonu. (Loma 5:​1, 2) ʼAki te temi, neʼe ina fakatahiʼi te kau Sutea mo te kau Senitile, pea ko “te ʼu meʼa ʼaē ʼi te lagi” ʼe nātou toko 144 000 anai. (Kalate 3:​26-​29; Apokalipesi 14:1) ʼE kei toe te kiʼi tokosiʼi ʼo nātou ʼi te kele.

Te Fakatahiʼi ʼo “Te ʼu Meʼa ʼAē ʼi Te Kele”

8. Ko ai ʼaē ʼe faka ʼuhiga ki ai “te ʼu meʼa ʼaē ʼi te kele,” pea e feafeaʼi tanatou felogoi ʼaē mo Sehova?

⁸ Ko te takitaki faka puleʼaga ʼaia ʼe ina toe fakatahiʼi foki mo “te ʼu meʼa ʼaē ʼi te kele.” ʼE ko te ʼu lauʼi miliona hahaʼi ʼe lolotoga fakatahiʼi nei pea ʼe nātou ʼamanaki ke nātou maʼuʼuli ʼo heʼegata ʼi te kele. ʼI te logo tahi mo te toe ʼa te kau maʼu tofiʼa ʼo te Puleʼaga, ʼe nātou fakavikiviki ki te huafa ʼo Sehova pea mo nātou faka kolōliaʼi tana tauhi. (Isaia 2:​2, 3; Sofonia 3:9) ʼO toe feiā mo nātou, ʼe nātou fakahigoa ia Sehova ko tanatou “Tāmai,” koteʼuhi ʼe nātou fakamoʼoni ko ia te matapuna ʼo te maʼuli. Pea ʼe ʼofainaʼi nātou e te ʼAtua, ʼo fakatafito ki tanatou tui ki te taʼataʼa ʼaē neʼe liligi e Sesu. (Apokalipesi 7:​9, 14) Kae ʼuhi ko tanatou mole haohaoa, ʼe hoki fakamoʼoni anai ki muli age e te ʼAtua, ko tana fānau.

9. Koteā te fakapapau ʼaē ʼe tuʼu ia Loma 8:​21 ʼo ʼuhiga mo te malamanei?

⁹ Ko nātou ʼaē ʼe nātou ʼamanaki ki te maʼuli ʼi te kele, ʼe nātou fakaʼamu ki te ʼaho ʼaē ka feala ai ki te malamanei ke nātou ‘ ʼāteaina mai te maʼuli popūla ki te maʼuli popo.’ (Loma 8:​21) Ko te faka ʼāteaina ʼaia ʼe kamata anai, mokā fakaʼosi e Kilisito pea mo tana kau ʼaselo te mamahi lahi, ʼaē ka ʼosi ʼaki ia Halamaketone. Pea ʼe fakaʼauha katoa anai te mālama agakovi ʼa Satana, pea mo hoa kiai te ʼu tapuakina ʼo Te ʼAfio ʼa Kilisito ia Taʼu e Afe.​—Apokalipesi 19:​17-​21; 20:6.

10. Koteā te hiva fakavikiviki ʼaē ʼe fai e te ʼu kaugana ʼa Sehova?

¹⁰ ʼI meʼa fakafiafia lahi, te temi ʼaē ka logo tahi ai te ʼu kaugana ʼo Sehova ʼi te kele pea mo tana ʼu kaugana ʼaē ʼi selo, ʼo nātou kalaga fakafiafia fēnei: “ ʼE lahi pea mo fakaofoofo tau ʼu gāue, Sehova ʼAtua, te Māfimāfi. ʼE faitotonu pea mo moʼoni tou ʼu ala, Hau ʼo te heʼegata. Ko ai ʼaē ka mole manavasiʼi moʼoni anai kia te koe, Sehova, pea mo ina faka kolōliaʼi tou huafa, koteʼuhi ko koe tokotahi pe ʼaē ʼe agatonu? Heʼe ʼōmai anai te ʼatu puleʼaga katoa pea ʼe nātou atolasio anai ʼi ʼou muʼa, heʼe kua fakahā tau ʼu lao faitotonu.” (Apokalipesi 15:​3, 4) Ei, ko te ʼu kaugana fuli ʼa Sehova ʼe nātou logo tahi anai moʼo atolasio ki te ʼAtua moʼoni pe e tahi. ʼO feiā mo te kau mate, ʼe fakatuʼuake anai nātou pea mo feala anai ke nātou kau fakatahi ki te hiva fakavikiviki kia Sehova.​—Gaue 24:15.

Ko He ʼĀteaina Taulekaleka

11. Koteā te ʼāteaina taulekaleka ʼaē ka maʼu anai e te hahaʼi ʼaē ka hāo ʼi te mamahi lahi?

¹¹ ʼI te hili ʼo te mamahi lahi, ʼaē ko tona ikuʼaga lahi ko Halamaketone, mokā fakamaʼa anai te kele mai te agakovi, ʼe mole kei nofo anai ia Satana te Tevolo ʼi te tuʼulaga “ ʼatua ʼo te tuʼu ʼo te ʼu faʼahiga meʼa ʼaenī.” Ko te hahaʼi ʼaē ʼe atolasio kia Sehova ʼe mole nātou toe tauʼi anai te ʼu fakahala ʼa Satana. (2 Kolonito 4:4; Apokalipesi 20:​1, 2) ʼE mole toe maʼu anai te lotu hala ʼaē ʼe ina fakafofoga kovi ia Sehova, pea mo ina fakamaveuveu te hahaʼi. Ko te ʼu hahaʼi kaugana ʼa te ʼAtua, ʼe mole nātou toe ʼiloʼi anai te ʼu aga heʼe agatonu, pea mo tonatou fakapōpulaʼi e te ʼu pule fakatagata. ʼI ʼāteaina taulekaleka leva ʼaē ka nātou maʼu!

12. ʼE faka ʼāteaina feafeaʼi anai te hahaʼi fuli mai te agahala pea mo tona ʼu fua kovi?

¹² Ko Sesu “te Akeno ʼo te ʼAtua ʼaē ʼe ina toʼo te agahala ʼo te malamanei,” pea ʼaki tona sakilifisio, ʼe ina molehi anai te ʼu agahala. (Soane 1:​29) Lolotoga te minisitelio ʼa Sesu ʼi te kele, ka ina fakamolemole te ʼu agahala ʼo he tahi, neʼe ina fakamālōlō ia ia ʼaia moʼo fakamoʼoni kua fakamolemole. (Mateo 9:​1-7; 15:​30, 31) ʼO toe feiā pe, ko Sesu Kilisito, ʼi tona tuʼulaga Hau ʼo te Puleʼaga ʼo te ʼAtua ʼaē ʼi selo, ʼe ina fai anai he milakulo moʼo fakamālōlō te kau kivi, te kau tuli, te kau ʼalelo mate, te kau māʼimoa, te hahaʼi ʼaē ʼe mahahaki ʼi te fakakaukau, pea mo te tahi ʼu mahaki. (Apokalipesi 21:​3, 4) Ko te hahaʼi fuli ʼaē ka fakalogo, ʼe mole nātou toe popūla anai ki “te lao ʼo te agahala,” ʼo feala anai ke lelei tanatou ʼu fakakaukau pea mo tanatou ʼu gāue, kia nātou totonu pea mo te ʼAtua. (Loma 7:​21-​23) ʼI te fakaʼosi ʼo Te ʼu Taʼu e Afe, ʼe nātou maʼuli haohaoa anai, ʼo mulimuli ki te ‘paki pea mo te agaaga’ ʼo te ʼAtua moʼoni pe e tahi.​—Senesi 1:​26.

13. ʼI te fakaʼosi anai ʼo te Pule ia Taʼu e Afe, koteā te gāue ʼaē ka fai e Kilisito, pea koteā anai tona fua?

¹³ Ka ʼosi fakaliliu anai e Kilisito ia te malamanei ke maʼuli haohaoa, pea ʼe ina toe liufaki anai ki te Tāmai te pule ʼaē neʼe foaki age moʼo fakahoko tana gāue: “ ʼE ina fakatoʼo anai te puleʼaga ki tona ʼAtua pea mo Tāmai, ʼi tana ʼosi maumauʼi anai te ʼu puleʼaga fuli pea mo te pule fuli pea mo te mālohi fuli. Heʼe tonu ke nofo hau ʼo aʼu ki te temi ʼaē ka tuku ai e te ʼAtua tona ʼu fili fuli ki ʼona lalo vaʼe.” (1 Kolonito 15:​24, 25) ʼI te temi ʼaia, ʼe kua ʼosi hoko katoa anai te fakatuʼutuʼu ʼo te Pule ʼo te Puleʼaga ia Taʼu e Afe; pea ʼe mole toe ʼaoga anai te puleʼaga ʼaia, ʼaē neʼe ina faka felogoi ia Sehova pea mo te malamanei. Pea ʼe fakagata anai mo te tuʼulaga Tagata Faitotogi ʼa Sesu, heʼe kua pulihi katoa anai te agahala pea mo te mate, pea kua toe totogi te malamanei. ʼE fakamahino fēnei e te Tohi-Tapu: “Pea ko te ʼAlo ʼe toe fakalogo anai mo ia kia Ia ʼaē neʼe ina tuku ia meʼa fuli kia te ia, ke feala ki te ʼAtua ke liliu ko meʼa fuli maʼa te hahaʼi fuli.”​—1 Kolonito 15:28.

14. Koteā te ʼahiʼahi ʼaē ka tuku anai e te ʼAtua ke hoko ki te hahaʼi ʼaē kua haohaoa, pea koteā tona tupuʼaga?

¹⁴ Hili te faʼahi ʼaia, ʼe feala anai ki te hahaʼi haohaoa ke nātou fakahā ʼe nātou filifili ke nātou tauhi ʼo heʼegata, ki te ʼAtua moʼoni pe e tahi. Koteʼuhi, ʼi muʼa ʼo tana vavae ia nātou ohage ko hana fānau, ʼe tuku anai e Sehova ia nātou fuli ʼaia ki he ʼahiʼahi fakaʼosi, ʼo ina tuku age mai te vanu, ia Satana pea mo tana kau temonio. ʼE mole hona fua kovi anai ki te hahaʼi ʼaē ʼe nātou ʼoʼofa moʼoni kia Sehova. Kae ko te kau heʼe agatonu fuli ʼaē ka nātou tuku anai ke fakaneke nātou ke nātou talagataʼa kia Sehova, ʼe fakaʼauha anai nātou ʼo talu ai, mo te ʼaselo ʼaē neʼe agatuʼu ʼi te kamata pea mo tana kau temonio.​—Apokalipesi 20:​7-​10.

15. Koteā anai te ʼaluʼaga ʼaē ka toe maʼu e te ʼu fakatupu popoto fuli ʼa Sehova?

¹⁵ Pea ko Sehova ʼe ina vavae pea mo tali anai ohage ko hana fānau, te hahaʼi haohaoa fuli ʼaē neʼe nātou lagolago ki tona pule faʼitaliha lolotoga te ʼahiʼahi fakaʼosi. ʼO kamata mai te temi ʼaia, ko te hahaʼi ʼaia ʼe nātou fakafiafia katoa anai ʼi te ʼāteaina faka kolōlia ʼo te fānau ʼo te ʼAtua, ʼo nātou kau ki te famili ʼo te ʼAtua, ʼaē ʼi te ʼatulaulau. Ko te ʼu fakatupu popoto fuli ʼo selo pea mo te kele, ʼe nātou toe liliu anai ʼo tahi ʼi tanatou atolasio ki te ʼAtua moʼoni pe e tahi. Kua hoko katoa leva te fakatuʼutuʼu ʼa Sehova! ʼE koutou fia kau koa ʼi te famili ʼaia ʼo te ʼatulaulau, ʼaē ʼe fiafia pea mo heʼegata? Kapau koia ʼaia, pea ʼe mātou fakaloto mālohiʼi atu koutou ke koutou fakalogo ki te ʼu palalau ʼa te Tohi-Tapu ʼaē ʼe tuʼu ia 1 Soane 2:​17: “ ʼE lolotoga fakalaka nei te malamanei pea mo tona loto, kae ko ʼaē ʼe ina fai te finegalo ʼo te ʼAtua ʼe nofo ia ʼo talu ai.”

Fakamanatu

• ʼI muʼa ʼo te fakafeagai ʼi Eteni, neʼe feafeaʼi koa te ʼu felogoi ʼa Sehova mo tana kau atolasio fuli?

• Koteā te maʼua ʼaē ʼe tonu ke fai e te ʼu kaugana ʼa te ʼAtua?

• Ko ai ia nātou ʼaē ʼe kei tonu ke nātou liliu ko he ʼu fānau ʼa te ʼAtua, pea koteā tona pikipikiga mo te fakatuʼutuʼu ʼa te ʼAtua ʼo ʼuhiga mo te logo tahi ʼi te tauhi?

[Paki ʼo te pasina 190]

Ko te hahaʼi fakalogo ʼe nātou maʼuʼuli fiafia anai ʼi te palatiso, ʼi te kele katoa