Kua Tuku Keheʼi Ia Nātou Ke Nātou Fakavikiviki Fakafiafia ʼi Te Malamanei Katoa
“Koutou vikiviki kia Sehova! Koutou fai he ʼu fakavikiviki, Ê kau kaugana ʼa Sehova, koutou vikiviki ki te huafa ʼo Sehova.”—Pesalemo 113:1.
1, 2. (a) ʼO mulimuli ki te Pesalemo 113:1-3, ko ai ʼaē ʼe tau mo feʼauga ke tou fakavikiviki fakafiafia ki ai? (b) Koteā te fehuʼi ʼaē ʼe lelei ke tou fai?
KO SEHOVA ʼATUA ʼe ko te Tupuʼaga Lahi ʼo te lagi mo te kele, ko totatou Tui ʼo te ʼAtulaulau ʼo aʼu ki he ʼu temi ʼe mole ʼi ai hona gataʼaga. Ia meʼa fuli, ʼe tau mo feʼauga ke tou fakavikiviki fakafiafia kia te ia. ʼE ko te tupuʼaga la ʼaia ʼo te fakatotonu mai ʼaē kia tatou ia Pesalemo 113:1-3: “Koutou vikiviki kia Sehova! Koutou fai he ʼu fakavikiviki, Ê kau kaugana ʼa Sehova, koutou vikiviki ki te huafa ʼo Sehova. Ke tapuakiʼi te huafa ʼo Sehova ʼi te temi nei pea mo he ʼu temi ʼe mole ʼiloʼi hona gataʼaga! Mai te hopo aga ʼo te laʼā ʼo aʼu ki tona tōʼaga, ko te huafa ʼo Sehova ʼe tonu ke vikivikiʼi.”
2 ʼI totatou ʼuhiga kau Fakamoʼoni ʼa te ʼAtua, ʼe tou fiafia ʼi te fai ʼo te faʼahi ʼaia. ʼE ko he meʼa fakafiafia te kua fakaōvi mai ʼo te temi ʼaē ka fakafonu ai e Sehova ʼAtua te kele ʼaki te hiva fakavikiviki pea mo fakafiafia ʼaia, ʼaē ʼe tou lolotoga hivaʼi ʼi te temi nei! (Pesalemo 22:27) ʼE logoʼi koa tokotou leʼo ʼi te kauhiva lahi ʼaia ʼi te malamanei katoa? Kapau koia ʼaia, pea ʼe mahino ia kua koutou fiafia ʼi takotou kua mavae mai te malamanei ʼaē ʼe mavetevete pea mo heʼe fiafia!
3. (a) Koteā ʼaē ʼe ʼui ai ʼe makehe te hahaʼi ʼa Sehova? (b) E feafeaʼi te tuku keheʼi ʼo tatou?
3 ʼE mahino papau ia ko tatatou fakavikiviki kia Sehova ʼi te logo tahi ʼe ina fakaliliu ai tatou ko he ʼu hahaʼi makehe. ʼE tou felogoi tahi ʼi tatatou ʼu palalau pea mo tatatou faiako, pea ʼe tatau te ʼu meʼa ʼaē ʼe tou fakaʼaogaʼi moʼo tala ʼo ‘te mahu ʼo te finegaloʼofa ʼo Sehova.’ (Pesalemo 145:7) ʼE moʼoni, ʼi totatou ʼuhiga hahaʼi ʼaē kua foaki totatou maʼuli kia Sehova, ʼe tuku keheʼi tatou ki te tauhi ʼo totatou ʼAtua, ko Sehova. Neʼe ʼui age e te ʼAtua ki tana hahaʼi ko Iselaele ʼo te temi muʼa, ʼaē neʼe nātou foaki tonatou maʼuli kia te ia, ke ʼaua naʼa nātou fakatahi mo te ʼu puleʼaga ʼaē ʼi ʼonatou tafa, pea ke ʼaua naʼa nātou tuku ke ʼulihi ia nātou e te ʼu puleʼaga ʼaia. (Ekesote 34:12-16) Neʼe ina foaki ki tana hahaʼi te ʼu lao moʼo tokoni kia nātou ke nātou fai te faʼahi ʼaia. ʼO toe feiā aipe ia ʼaho nei, neʼe foaki mai e Sehova kia tatou tana Folafola Taputapu, te Tohi-Tapu. Ko te ʼu akonaki ʼaē ʼe tou maʼu mai ai ʼe nātou fakahā mai kia tatou peʼe feafeaʼi hatatou fakamamaʼo mai te mālama ʼaenī. (2 Kolonito 6:17; 2 Timoteo 3:16, 17) ʼE mole tuku keheʼi tatou ʼo tou nonofo ʼāteaina ʼi he ʼu monasetelio peʼe ʼi he ʼu fale taupoʼou, ohage ko te kau monike mo te kau taupoʼou ʼo te Papiloni Lahi. ʼO mulimuli ki te faʼifaʼitaki ʼa Sesu Kilisito, ʼe tou fakavikiviki kia Sehova ia muʼa ʼo te hahaʼi.
Tou Faʼifaʼitakiʼi Ia Ia Tāfito ʼAē Neʼe Fakavikiviki Kia Sehova
4. Koteā te faʼifaʼitaki ʼaē neʼe tuku mai e Sesu ʼo ʼuhiga mo te fakavikivikiʼi ʼo Sehova?
4 Neʼe mole he temi neʼe līaki ai e Sesu tana fakatuʼutuʼu ʼaē ko te fakavikivikiʼi ʼo Sehova. Pea ko te faʼahi ʼaia neʼe ina fakakeheʼi ia ia mai te mālama. ʼI te ʼu sinakoka pea mo te fale lotu ʼaē ʼi Selusalemi, neʼe ina fakavikivikiʼi te huafa taputapu ʼo te ʼAtua. ʼI te tumutumu ʼo te moʼuga peʼe ʼi te matatai, ʼi te ʼu faʼahi ʼaē neʼe fakatahitahi ai te hahaʼi, neʼe faka mafola e Sesu te ʼu moʼoni ʼo Sehova ia muʼa ʼo te hahaʼi. Neʼe ina tala fēnei: “Tāmai, ʼe ʼau vikiviki kia te koe ia muʼa ʼo te hahaʼi, ʼAliki ʼo te lagi mo te kele.” (Mateo 11:25) Māʼiape la mo te temi ʼaē neʼe fakamāuʼi ai ia muʼa ʼo Posio Pilato, neʼe tala fēnei e Sesu: “Neʼe ʼau tupu ʼuhi ko te potu ʼaenī, pea neʼe ʼau haʼu ki te malamanei ʼuhi ko te potu ʼaenī: ko te fakamoʼoni ki te moʼoni.” (Soane 18:37) Neʼe ʼiloʼi e Sesu te maʼuhiga ʼo tana gāue. ʼI te potu fuli pe ʼaē neʼe ʼi ai, neʼe foaki e Sesu te ʼu fakamoʼoni ʼo ʼuhiga mo Sehova, pea neʼe ina fakavikiviki kia te ia ia muʼa ʼo te hahaʼi.
5. Ko ai ʼaē ʼe faka ʼuhiga ki ai te vaega ʼaē ia Pesalemo 22:22, pea koteā ʼaē ʼe tonu ke tou fai ʼo ʼuhiga mo te faʼahi ʼaia?
5 Ia Pesalemo 22:22, ʼe tou maʼu ai te fakamatala faka polofeta ʼo ʼuhiga mo ia tāfito ʼaē ʼe ina fakavikivikiʼi ia Sehova. “ ʼE ʼau tala anai tou huafa ki toku ʼu tēhina; ʼi te lotolotoiga ʼo te kokelekasio ʼe ʼau vikiviki anai kia te koe.” Pea ia Hepeleo 2:11, 12, ʼe faka ʼuhiga e te ʼapositolo ko Paulo te ʼu vaega ʼaia ki te ʼAliki ko Sesu, pea mo nātou ʼaē neʼe fakamaʼoniʼoniʼi e Sehova ʼAtua ke nātou kau ki te kolōlia ʼi selo. Ohage ko ia, ʼe mole nātou ufiufi ʼi te vikivikiʼi ʼo te huafa ʼo Sehova ʼi te lotolotoiga ʼo te kokelekasio. ʼE tou maʼu koa te faʼahiga manatu ʼaia ʼi tatatou kau ki tatatou ʼu fono ʼo te kokelekasio? Ko tatatou kau fakafiafia ki te ʼu fono, ʼaki tatatou tokaga lelei pea mo tatatou ʼu tali, ʼe fakavikiviki kia Sehova. Kae ʼe gata pe koa tatatou fakavikiviki fakafiafia ʼi te faʼahi ʼaia?
6. Koteā te fakatotonu ʼaē neʼe fai e Sesu ki tana ʼu tisipulo, pea ʼe faka kolōliaʼi feafeaʼi te ʼAtua e nātou ʼaē ʼe manako ki te mālama gigila?
6 ʼO mulimuli ki te ʼu vaega ʼo Mateo 5:14-16, neʼe toe fakatotonu foki e te ʼAliki ko Sesu ki tana ʼu tisipulo ke nātou fakagigila tanatou mālama, ke feala ai ke vikivikiʼi e te hahaʼi ia Sehova. Neʼe ina ʼui fēnei: “Ko koutou ko te mālama ʼo te malamanei. . . . Ke . . . mū tokotou mālama ia muʼa ʼo te hahaʼi, koteʼuhi ke nātou mamata ki ʼakotou gāue lelei pea nātou faka kolōlia ai ki takotou Tāmai ʼaē ʼe ʼi selo.” Ko nātou ʼaē ʼe nātou manako ki te mālama gigila ʼe nātou faka kolōliaʼi te ʼAtua. ʼE nātou fai koa te faʼahi ʼaia ʼaki pe tanatou ʼu palalau pea mo fai pe te meʼa ʼaē ʼe lelei, te ʼu meʼa ʼaē ʼe tokoni ki te hahaʼi ʼaē ʼe nonofo ʼi te faigataʼaʼia? Kailoa ia, kae ʼe nātou fai te faʼahi ʼaia ʼaki tanatou faka kolōliaʼi ia Sehova ʼi te logo tahi. Ei, ko nātou ʼaē ʼe manako ki te mālama gigila, ʼe nātou foaki ia nātou totonu ki te ʼAtua pea mo nātou liliu ko hana hahaʼi ʼe fakavikiviki fakafiafia kia te ia. Kua koutou fakahoko koa te faʼahi fakafiafia ʼaia?
Te Fiafia ʼAē ʼe Tou Maʼu ʼi Te Fakavikiviki Kia Sehova
7. He koʼe koa ʼe fiafia ia nātou ʼaē ʼe nātou fakavikiviki kia Sehova, pea neʼe koteā te ʼu fiafia ʼaē neʼe nātou maʼu ʼi te Penikosite ʼo te taʼu 33 ʼo totatou temi?
7 He koʼe koa ʼe fiafia ia nātou ʼaē ʼe nātou fakavikiviki kia Sehova? Koteʼuhi ko te fiafia ʼe ko he fua ia ʼo te laumālie maʼoniʼoni ʼa te ʼAtua. Ia Kalate 5:22 ʼe hoa te fiafia ki te ʼofa. Ko te ʼu tisipulo ʼa Sesu ʼi te ʼuluaki sēkulō neʼe nātou fakahā te fua ʼaia ʼo te laumālie ʼo Sehova. Koia, ʼi te ʼaho ʼo te Penikosite ʼo te taʼu 33 ʼo totatou temi, ʼi te temi ʼaē neʼe folahi ai e te ʼAtua tona laumālie ki te toko 120 tisipulo ʼa Sesu, neʼe nātou kamata fakavikiviki fuli kia Sehova ʼi te ʼu lea kehekehe. Ko te kau Sutea fakamalotoloto ʼaē neʼe ʼolo ki Selusalemi, neʼe nātou ʼōmai mai te ʼu puleʼaga kehekehe, pea ‘neʼe nātou punamaʼuli pea mo ōfo ʼi te faʼahi ʼaia.’ Neʼe nātou tala fēnei: “ ʼE tou logo ki tanatou palalau ʼi tatatou ʼu lea ʼo ʼuhiga mo te ʼu meʼa taulekaleka ʼa te ʼAtua”! (Gāue 2:1-11) Neʼe koteā te ʼu fua ʼo te fakavikiviki fakatalakitupua ʼaia kia Sehova ʼi te ʼu lea kehekehe? Ko te toko 3 000 hahaʼi Sutea pea mo poloselite Sutea neʼe nātou tali te logo lelei ʼo te Puleʼaga ʼo ʼuhiga mo te Mesia. Neʼe nātou papitema, mo nātou maʼu te laumālie maʼoniʼoni, pea neʼe nātou holi mālohi ke nātou kau ki te fakavikiviki fakafiafia ʼaē kia Sehova. (Gāue 2:37-42) Neʼe ko he tapuakina moʼoni ia!
8. ʼI te hili ʼo te Penikosite, koteā ʼaē neʼe fai e te kau Kilisitiano moʼo fakatuputupu tanatou fiafia?
8 ʼE toe hoko atu fēnei te fakamatala: “ ʼI te ʼaho fuli pe, neʼe nātou ʼolo tuʼumaʼu ki te fale lotu, ʼaki he lototahi, pea neʼe nātou kakai ʼi tonatou ʼu ʼapi pea mo nātou vaevae tanatou meʼa kai ʼi te fiafia lahi pea mo te fakamalotoloto, ʼo nātou fakavikiviki ki te ʼAtua pea neʼe tali lelei nātou e te hahaʼi fuli. ʼI te temi ʼaia, neʼe hoko atu pe te hilifaki e Sehova kia nātou ʼi te ʼaho fuli te hahaʼi ʼaē kua hāofaki.” (Gāue 2:46, 47) Neʼe nātou fiafia koa ʼuhi pe ko tanatou fakatahitahi pea mo fevaevaeʼaki tanatou meʼa kai? Kailoa ia, kae neʼe nātou fiafia tāfito ʼuhi ko tanatou fakavikiviki kia Sehova ʼAtua ʼi te ʼaho fuli pe. Pea neʼe tuputupu tanatou fiafia ʼi tanatou sio ki te tali ʼa te ʼu lauʼi afe hahaʼi ki tanatou logo ʼo te hāofaki. ʼE toe feiā mo tatou ia ʼaho nei.
ʼE Tou Fakavikiviki Fakafiafia ʼi Te ʼu Fenua Fuli
9. (a) Ko te temi fea ʼaē neʼe kamata foaki ai e te ʼAtua ki te hahaʼi ʼo te ʼu puleʼaga kehekehe te fealagia ʼaē ke nātou fagono ki te logo lelei, pea neʼe ina fakahoko feafeaʼi te faʼahi ʼaia? (b) He koʼe neʼe foaki te laumālie maʼoniʼoni kia Kolonelio pea mo tana ʼu hahaʼi, ka mole heʼeki nātou papitema?
9 Neʼe mole loto e Sehova ke faka tuʼakoi pe ki he fenua e tahi te gāue ʼo tana ʼu kaugana ʼaē ko te fakahā ʼo te mālama. Koia, ʼo kamata mai te taʼu 36 ʼo totatou temi, neʼe ina foaki ki te hahaʼi ʼo te ʼu fenua fuli te fealagia ʼaē ke nātou logo ki tana logo lelei. ʼAki te takitaki ʼa te ʼAtua, neʼe ʼalu ia Petelo ki te ʼapi ʼo te ofisie Senitile ʼi Sesalea. Neʼe ina maʼu ai ia Kolonelio pea mo tona ʼu kaumeʼa lelei pea mo tona famili. ʼI tanatou fakalogo lelei ki te ʼu palalau ʼa Petelo, neʼe nātou tui ai kia Sesu ʼi tonatou ʼu loto. ʼE tou ʼiloʼi feafeaʼi te faʼahi ʼaia? ʼE tou ʼiloʼi koteʼuhi neʼe mafola te laumālie maʼoniʼoni ʼo te ʼAtua ki te ʼu hahaʼi tui Senitile ʼaia. ʼI te agamāhani, neʼe hoki maʼu e he tahi te meʼa ʼofa ʼo te laumālie ʼo te ʼAtua ʼi tana ʼosi papitema, kae ʼi te lakaga ʼaia, neʼe fakahā ai e Sehova tana tali lelei te ʼu hahaʼi ʼaia ʼaē neʼe mole Sutea ʼi muʼa ʼo tonatou papitema. Kapau neʼe mole fai e Sehova te meʼa ʼaia, neʼe mole lagi feala anai ke mahino papau kia Petelo, kua tali e te ʼAtua ʼi te temi ʼaia te kau Senitile, ke nātou kaugana kia te ia pea mo feala ke nātou papitema ʼi te vai.—Gāue 10:34, 35, 47, 48.
10. ʼI te ʼu temi muʼa, neʼe fakakikite feafeaʼi ko te hahaʼi mai te ʼu puleʼaga kehekehe ʼe nātou fakavikiviki anai kia Sehova?
10 Talu mai te ʼu temi muʼa, neʼe kua fakakikite e Sehova ko te hahaʼi mai te ʼu puleʼaga kehekehe ʼe nātou fakavikiviki anai kia te ia. ʼE ʼi ai anai hana hahaʼi fakavikiviki fakafiafia ʼi te ʼu fenua fuli. Moʼo fakamoʼoni ki te faʼahi ʼaia, neʼe talanoa te ʼapositolo ko Paulo ki te lea faka polofeta ʼo te Tauhi ʼĀfea. Neʼe ina ʼui fēnei ki te kokelekasio katoa ʼo te kau Kilisitiano ʼo Loma: “Ke koutou fetaliʼaki, ohage ko te tali ʼo tatou e Kilisito ʼuhi ko te kolōlia ʼo te ʼAtua. Heʼe ʼau tala atu ko Kilisito neʼe liliu moʼoni ko he kaugana ʼo nātou ʼaē kua silikosisio ʼuhi ko te moʼoni ʼa te ʼAtua, ke ina fakamoʼoni ki te ʼu fakapapau ʼaē neʼe fai e te ʼAtua ki tanatou ʼu kui, pea ke feala ki te ʼu puleʼaga ke nātou faka kolōlia ki te ʼAtua ʼuhi ko tona manavaʼofa. Ohage ko tona tohi [ia Pesalemo 18:49]: ‘Koia ʼe ʼau fakamoʼoni fakahāhā anai kia te koe ʼi te ʼu puleʼaga, pea ʼe ʼau fai anai he ʼu hiva ki tou huafa.’ Pea ʼe ina toe ʼui fēnei [ia Teutalonome 32:43]: ‘Koutou fakafiafia ia koutou, ʼu puleʼaga, mo tana hahaʼi.’ Pea ʼe ina toe ʼui fēnei [ia Pesalemo 117:1]: ‘Koutou fakavikiviki kia Sehova, ia koutou fuli, ʼu puleʼaga, pea ke fakavikiviki kia te ia te hahaʼi fuli pe!’ ”—Loma 15:7-11.
11. Neʼe tokoni feafeaʼi te ʼAtua ki te ʼu hahaʼi ʼo te ʼu puleʼaga kehekehe, ke nātou ako tana ʼu moʼoni, pea neʼe koteā tona ʼu fua?
11 ʼE mole feala ke fakavikiviki te hahaʼi ʼi te logo tahi, mo kapau ʼe mole nātou falala kia Sesu Kilisito, ia ia ʼaē neʼe fakanofo e te ʼAtua ke pule ki te hahaʼi ʼo te ʼu puleʼaga fuli. Moʼo tokoni kia nātou ke nātou leleiʼia Tana ʼu moʼoni ʼaē ʼe ina taki ki te maʼuli heʼegata, neʼe fakatuʼutuʼu e te ʼAtua he polokalama ako ʼi te malamanei katoa. ʼE ina takitaki te faʼahi ʼaia ʼaki te kalasi ʼo tana tagata kaugana agatonu. (Mateo 24:45-47) Koteā tona ʼu fua? ʼE ko hahaʼi e toko nima miliona tupu ʼe nātou hivaʼi fakafiafia te ʼu fakavikiviki kia Sehova ia fenua e 230 tupu. Pea ko te ʼu lauʼi miliona hahaʼi ʼe nātou fia kau ki te ʼu fakavikiviki ʼaia. Koutou vakaʼi te kaugamālie ʼo nātou ʼaē neʼe kau ki te ʼAho Fakamanatu ʼo te taʼu 1996: 12 921 933. ʼE ko he meʼa fakafiafia ia!
Neʼe Fakakikite ʼe ʼi Ai Anai Te Toe Hahaʼi Tokolahi ʼe Nātou Fakavikiviki Fakafiafia
12. Koteā te meʼa fakatalakitupua ʼaē neʼe hā ki te ʼapositolo ko Soane, pea neʼe hoko feafeaʼi te meʼa ʼaia?
12 ʼI te meʼa ʼaē neʼe hā ki te ʼapositolo ko Soane, neʼe sio ia ki “te toe hahaʼi tokolahi” mai te ʼu puleʼaga kehekehe. (Fakahā 7:9) Koteā te kupu ʼo te ʼu fakavikiviki tāfito ʼaē ʼe hivaʼi fakatahi e te toe hahaʼi tokolahi ʼaia pea mo te toe ʼo te kau fakanofo ʼa te ʼAtua? ʼE ʼui fēnei mai kia tatou e Soane: “Ko te fakamaʼuli, ʼe tou maʼu mai totatou ʼAtua, ʼaē ʼe ʼafio ʼi te hekaʼaga faka hau, pea mo te Akeno.” (Fakahā 7:10) ʼE lolotoga tala te ʼu fakavikiviki ʼaia ʼaki he lototoʼa ʼi te ʼu potu fuli pe ʼo te malamanei. ʼE tou toʼo te ʼu pālema, ko tona faka ʼuhiga ʼaē, ʼe tou palalau, ʼo tou fetapā ʼi te logo tahi ki te ʼAtua, te Tuʼi ʼo te ʼAtulaulau, pea mo tou fakahā fakafiafia ia muʼa ʼo te lagi mo te kele, “ ʼe tou maʼu” totatou fakamaʼuli mai ia ia pea mo tona ʼAlo, te Akeno, ko Sesu Kilisito. ʼE mahino ia neʼe fiafia ʼaupito te ʼapositolo ko Soane ʼi tana sio ki te meʼa fakatalakitupua ʼaia ʼaē neʼe hā, ʼo ʼuhiga mo te toe hahaʼi tokolahi! Pea ʼe tou fiafia ia ʼaho nei ʼi tatatou sio, pea mo tatatou kau ki te fakahoko moʼoni ʼo te meʼa ʼaia ʼaē neʼe hā kia Soane!
13. Koteā ʼaē ʼe tupu ai te kehekehe ʼa te hahaʼi ʼa Sehova pea mo te malamanei?
13 ʼI totatou ʼuhiga kau kaugana ʼa Sehova, ʼe tou fiafia ʼi te fua ʼo tona huafa. (Isaia 43:10, 12) ʼI totatou ʼuhiga kau Fakamoʼoni ʼa Sehova ʼe mole tou tatau ai mo te mālama ʼaenī. ʼE ko he meʼa fakafiafia te fua ʼo te huafa ʼo te ʼAtua, pea mo tou fakatuʼutuʼu ʼi totatou maʼuli ke tou fai tana gāue fakaʼatua! Ko te fakatuʼutuʼu lahi ʼa Sehova, ʼaē ko te faka tāpuhā ʼo tona huafa taputapu, pea mo te faka lākatonuʼi ʼo tana pule faʼifaʼitaliha ʼi te ʼatulaulau ʼaki te Puleʼaga, ʼe ina foaki mai kia tatou he faka ʼuhiga ʼi totatou ʼu maʼuli. Pea neʼe tokoni mai kia tatou ke tou kau ki tana fakatuʼutuʼu fakaʼatua ʼo ʼuhiga mo tona huafa pea mo tona Puleʼaga. Neʼe ina fai te meʼa ʼaia ia faʼahi e tolu.
Neʼe Ina Tuku Mai Te Moʼoni
14, 15. (a) Koteā te ʼuluaki faʼahi ʼaē ʼe tokoni mai ai te ʼAtua kia tatou, ke tou kau ki tana fakatuʼutuʼu fakaʼatua ʼo ʼuhiga mo tona huafa pea mo tona Puleʼaga? (b) Koteā ʼaē ʼe kehekehe ai te Puleʼaga ʼaē neʼe fakatuʼu ʼi te taʼu 1914 ʼo totatou temi, pea mo te puleʼaga ʼaē neʼe fakaʼauha ʼi te taʼu 607 ʼi muʼa ʼo totatou temi?
14 ʼUluaki, neʼe foaki e Sehova ki tana hahaʼi te moʼoni. Ko te meʼa fakafiafia lahi ʼaē neʼe ina fakahā ʼe ko te kamata pule ʼo tona Puleʼaga ʼi te taʼu 1914. (Fakahā 12:10) ʼE mole tatau te puleʼaga ʼaia ʼaē ʼe ʼi selo pea mo te puleʼaga ʼaē neʼe ʼi Selusalemi, ʼaē neʼe fakanofo hau ai te ʼu hahaʼi ʼo te hōloga ʼo Tavite. Ko te puleʼaga ʼaia neʼe fakaʼauha, pea ʼo kamata mai te taʼu 607 ʼi muʼa ʼo totatou temi, neʼe puleʼi katoa ia Selusalemi e te ʼu puleʼaga faka malamanei ʼo te kau Senitile. Ko te Puleʼaga foʼou ʼaē neʼe fakatuʼu e Sehova ʼi te taʼu 1914 ʼe ko he puleʼaga ia mai lagi ʼe mole fakalogo anai ki he tahi age kae gata pe kia Sehova, pea ʼe mole maumauʼi anai ia. (Taniela 2:44) Pea ʼe toe makehe foki mo ia ʼaē ʼe pule ʼi te puleʼaga ʼaia. ʼO feafeaʼi? ʼE tali fēnei ia Fakahā 11:15: “Pea neʼe hoko ʼi te lagi te ʼu leʼo mālohi, ʼe nātou ʼui fēnei: ‘Ko te puleʼaga ʼo te malamanei kua liliu ia ko te puleʼaga ʼo totatou ʼAliki pea mo tana Kilisito, pea ʼe hau anai ia ʼo heʼegata.’ ”
15 “Ko te puleʼaga ʼo totatou ʼAliki pea mo tana Kilisito” ʼe ina fakahoko tana pule ki te malamanei katoa. Ko te fakatuʼutuʼu foʼou ʼaia ʼo te pule ʼa Sehova, ʼaē ʼe kau kiai tona ʼAlo te Mesia, pea mo tona ʼu tēhina ʼaē e toko 144 000, tokolahi ia nātou kua fakatuʼuake ʼi te temi nei ki te kolōlia ʼi te lagi, pea ʼe mole ko he akonaki feiā pe ʼe lagi fai palalau kiai te hahaʼi ʼaē ʼe ako. Kailoa ia. Ko te Puleʼaga ʼaia ʼe ʼi selo ʼe ko he puleʼaga moʼoni. Pea ʼe tou toe fiafia ʼaupito foki ʼuhi ko te ʼamanaki fakafiafia ʼaē ʼi he maʼuli ʼo heʼegata pea mo haohaoa ʼi te takitaki ʼa te puleʼaga ʼaia. ʼI tatatou maʼu te ʼu moʼoni ʼaia ʼo ʼuhiga mo te Folafola ʼa Sehova, ʼe ina uga tuʼumaʼu ai tatou ke tou palalau fakalelei ʼo ʼuhiga mo te faʼahi ʼaia. (Pesalemo 56:10) ʼE koutou fai tuʼumaʼu koa te faʼahi ʼaia, ʼo koutou tala ki te hahaʼi fuli ko te Puleʼaga Faka Mesianike ʼa te ʼAtua kua pule ʼi te temi nei ʼi te lagi?
ʼE Tokoni Mai Te Laumālie Maʼoniʼoni Pea Mo Te Fale Tautēhina ʼi Te Malamanei Katoa
16, 17. Koteā te lua pea mo te tolu faʼahi ʼaē ʼe tokoni mai ai te ʼAtua kia tatou ke tou kau ki tana fakatuʼutuʼu fakaʼatua?
16 Ko te lua faʼahi ʼaē ʼe tokoni mai ai te ʼAtua ke tou kau ki tana fakatuʼutuʼu fakaʼatua ʼe ko tana foaki mai tona laumālie maʼoniʼoni, ʼaē ʼe ina faka fealagia kia tatou ke tou maʼu tona ʼu fua matalelei ʼi totatou maʼuli, pea mo tou maʼu te ʼofa ʼa te ʼAtua. (Kalate 5:22, 23) Pea tahi ʼaē meʼa, neʼe faitohi fēnei ia Paulo ki te kau Kilisitiano fakanofo: “Neʼe tou maʼu . . . te laumālie ʼaē ʼe haʼu mai te ʼAtua, ke feala hatatou ʼiloʼi te ʼu meʼa ʼaē neʼe lotolelei e te ʼAtua ke ina foaki mai.” (1 Kolonito 2:12) ʼAki tatatou tali te laumālie ʼo Sehova, ko tatou fuli ʼe tou ʼiloʼi pea mo tou mahino ki te ʼu meʼa lelei ʼaē neʼe ina foaki mai kia tatou ʼi te temi nei, ʼaē ko tana ʼu fakapapau, mo tana ʼu lao, mo tana ʼu pelesepeto, pea mo ʼihi ʼatu ʼu meʼa.—Vakaʼi ia Mateo 13:11.
17 Ko te tolu faʼahi ʼaē ʼe tokoni mai ai te ʼAtua kia tatou, ʼe ko totatou fale tautēhina ʼaē ʼe tou maʼu ʼi te malamanei katoa, pea mo te ʼu fakatuʼutuʼu lelei ʼo te kautahi ʼa Sehova ʼo ʼuhiga mo te tauhi. Neʼe talanoa te ʼapositolo ko Petelo ki te faʼahi ʼaia, ʼi tana fakaloto mālohiʼi tatou ke tou “ ʼoʼofa ki te famili katoa ʼo te ʼu tēhina.” (1 Petelo 2:17) Ko totatou famili ʼofa fakatautehina mo faka tautuagaʼane ʼi te malamanei katoa, ʼe tokoni mai kia tatou ke tou tauhi kia Sehova ʼaki he loto fiafia lahi, ohage ko tana fakatotonu mai ia Pesalemo 100:2: “Koutou tauhi kia Sehova ʼaki te loto fiafia. Koutou hū ki ʼona muʼa ʼaki he kalaga fakafiafia.” ʼE toe ʼui fēnei ʼi te vaega 4: “Koutou hū ki ʼona matapā ʼaki he ʼu fakafetaʼi, ki tona ʼu malaʼe ʼaki he ʼu fakavikiviki. Koutou fakavikiviki kia te ia, koutou fakafetaʼi ki tona huafa.” Koia, peʼe tou fai faka mafola ia muʼa ʼo te hahaʼi peʼe tou kau ki tatatou ʼu fono, ʼe feala ke tou fiafia ai. ʼE tou maʼu te tokalelei pea mo te fīmālie ʼi te ʼu malaʼe matalelei ʼo te fale lotu fakalaumālie ʼo Sehova!
Tou Fakavikiviki Fakafiafia Kia Sehova!
18. He koʼe koa ʼe feala ke tou fiafia ʼi te fakavikiviki kia Sehova, logope la te ʼu fakataga pea mo te tahi ʼu fihifihia ʼaē ʼe hoko kia tatou?
18 Tatau aipe pe koteā te ʼu faigataʼaʼia, te ʼu fakataga, pe ko ʼihi ʼatu ʼu fihifihia ʼe lagi hoko kia tatou, ʼe tonu ke tou fiafia ʼi tatatou nonofo ʼi te fale tauhi ʼo Sehova. (Isaia 2:2, 3) Koutou manatuʼi ko te fiafia ʼe ko he kalitate ʼo te loto. Ko totatou ʼu ʼuluaki tēhina mo tuagaʼane Kilisitiano ʼo te temi muʼa, neʼe nātou fakavikiviki fakafiafia kia Sehova, logope la te ʼatu faigataʼaʼia ʼaē neʼe hoko kia nātou, pea mo te maumauʼi ʼo tonatou ʼu koloā. (Hepeleo 10:34) Ia ʼaho nei, ʼe toe feiā pe mo totatou ʼu tēhina mo tuagaʼane ʼi te tui.—Mateo 5:10-12.
19. (a) Koteā te ʼu fakatotonu liuliuga ʼaē ʼe ina uga tatou ke tou fakavikiviki kia Sehova? (b) ʼE fakalogo kiteā totatou maʼuli heʼegata, pea koteā ʼaē ʼe tou fakatotonu ke tou fai?
19 Ko tatou fuli ʼaē ʼe tou tauhi fakafiafia kia Sehova, ʼe tou fakalogo ki te fakatotonu ʼa te Tohi-Tapu ʼaē ke tou fakavikiviki kia te ia. ʼE tuʼa lahi te faka maʼuhigaʼi e te tohi ʼo te Fakahā te fakavikiviki ki te ʼAtua ʼaki te kupuʼi palalau ʼaenī: “Koutou vikiviki kia Sah!” (Fakahā 19:1-6) ʼI te ʼu vaega e ono ʼo te Pesalemo 150, ʼe tuʼa 13 te ʼui mai ʼaē ke tou fakavikiviki kia Sehova. ʼE ko te pāui faka malamanei ʼaia ki te ʼu meʼa fuli ʼaē neʼe fakatupu ke nātou fakatahi ki te hiva fakafiafia ʼo fakavikiviki kia Sehova. ʼE fakalogo totatou maʼuli heʼegata ki tatatou fakatahi ki te kauhiva lahi ʼaia ʼaē ʼe ina ʼui Aleluia! Ei, ko nātou ʼaē ʼe nātou fakavikiviki kia Sehova ʼe ko te hahaʼi pe ʼaia ʼaē ka maʼuʼuli anai ʼo heʼegata. Koia, ʼe tou fakatotonu ai ke tou pipiki lelei ki tana kokelekasio agatonu ʼi te malamanei katoa, ʼi te fakaōvi mai ʼo te fakaʼosi. Pea ʼe feala ai hatatou ʼamanaki ke tou sio ki te fakahoko katoa ʼo te ʼu palalau fakaʼosi ʼaenī ia Pesalemo 150: “Ko te ʼu meʼa fuli ʼaē ʼe mānava—ke nātou vikiviki kia Sah. Koutou vikiviki kia Sah!”
ʼE Koutou Tali Feafeaʼi Anai?
◻ Koteā ʼaē ʼe makehe ai te hahaʼi ʼa Sehova?
◻ He koʼe koa ʼe fiafia ʼaupito te kau kaugana ʼa Sehova?
◻ Koteā ʼaē ʼe tou kehekehe ai mo te malamanei?
◻ Koteā te ʼu faʼahi e tolu ʼaē ʼe tokoni mai ai te ʼAtua kia tatou ke tou kau ki tana fakatuʼutuʼu fakaʼatua?
[Paki ʼo te pasina 17]
ʼI te ʼu potu fuli pe ʼaē neʼe ʼi ai, neʼe fakamoʼoni ia Sesu kia Sehova pea neʼe fakavikiviki kia te ia ia muʼa ʼo te hahaʼi