Ko Te Logo Lelei ʼAia ʼe Tonu Muʼa Ke ʼUluaki Faka Mafola

“ ʼE tonu muʼa ke ʼuluaki faka mafola te logo lelei ʼi te ʼu puleʼaga fuli.”—Maleko 13:10.

1, 2. Koteā te fakaʼiloga makehe ʼa te kau Fakamoʼoni, pea koteā tona tupuʼaga?

HE KOʼE koa ʼe faiga mālohi feiā te kau Fakamoʼoni ʼa Sehova ʼi te fai faka mafola? ʼE mahino papau ia ʼe ʼiloʼi tatou ʼi te malamanei katoa ʼuhi ko tatatou minisitelio ʼaē ʼe fai ki te kaugamālie, peʼe ko tona fai ʼi te ʼu ʼapi, ʼi te ʼu ala, peʼe ko tona fai mokā maʼu he kiʼi faigamālie. ʼI te temi fuli pe ʼaē ʼe feala ai, ʼe tou fakahā ko tatou ko te kau Fakamoʼoni ʼa Sehova pea ʼe tou faiga ke tou fakahā te logo lelei ʼaē ʼe maʼuhiga ʼaupito kia tatou. ʼI tona fakahagatonu, ʼe feala ke tou ʼui ko te minisitelio ʼaia ʼe ko hotatou fakaʼiloga ia!—Kolose 4:6.

² Koutou fakakaukauʼi age muʼa te faʼahi ʼaenī—ʼi te temi pe ʼaē ʼe sio ai te hahaʼi, ʼi tonatou ʼu vāhaʼa fale ki ni ʼu hahaʼi, tagata mo fafine feiā ki te fānau, ʼe teu maʼa pea mo nātou taki ʼanatou ʼu kato, ʼi te agamāhani koteā tanatou ʼuluaki manatu? ʼE nātou ʼui fēnei koa, ‘Ê, koʼeni te kau katolika (pe ko te kau Orthodoxes) ʼe toe liliu mai!’ peʼe nātou ʼui fēnei age la, ‘Koʼeni te kau Pentecôtistes (peʼe ko te kau Baptistes) ʼe toe liliu mai!’ Kailoa. ʼE ʼiloʼi e te hahaʼi ʼe mole maʼu he ʼu famili katoa ʼi te ʼu lotu ʼaia ʼe nātou fai he minisitelio ʼi te ʼu ʼapi. Lagi ʼe ʼi ai he ʼu kūtuga faka lotu ʼe nātou fekauʼi ni ʼu “misionea” ia taʼu e lua ki he ʼu koga meʼa, kae ko ʼanatou hahaʼi fakalogo ʼe mole nātou kau nātou ki he minisitelio feiā. ʼE gata pe ki te kau Fakamoʼoni ʼa Sehova ʼaē kua ʼiloʼi ʼi te malamanei katoa ʼuhi ko tanatou gāue mālohi ʼi te fakahā ʼo tanatou logo ki te tahi age ʼu hahaʼi, ʼi te temi fuli pe ʼaē ʼe feala ai ke nātou fai te faʼahi ʼaia. Pea ʼe toe ʼiloʼi pe foki nātou ʼuhi ko tanatou ʼu nusipepa ʼaē ko Te Tule Leʼo pea mo te Réveillez-vous!—Isaia 43:10-12; Gāue 1:8.

Te Kehekehega ʼAē Mo Te Kau Takitaki Lotu ʼo Te Keletiate

3, 4. E feafeaʼi te tautau talanoa ʼa te ʼu logo ki te kau takitaki lotu ʼo te Keletiate?

³ ʼO ʼuhiga mo ni ʼu kehekehega ʼe ʼiloga lelei ʼaupito, neʼe fakahā tuʼa lahi e te ʼu nusipepa, tokolahi ʼi te kau takitaki lotu ʼo ʼihi fenua ko te ʼu hahaʼi ʼe nātou leleiʼia te ʼu felāveʼi fakasino heʼeʼaoga ʼaē ʼe fai ki te tamaliki, ko te ʼu hahaʼi ʼe aga fakakākā, pea mo heʼe agatonu. ʼE hā lelei mai pe ki te hahaʼi fuli tanatou ʼu gāue fakakakano pea mo tanatou faʼahiga maʼuli ʼaē ʼe koloaʼia ʼaupito. Neʼe fakamatala lelei e te tagata faʼu hiva ʼiloa te meʼa ʼaia, ʼi tana hiva ʼaē ʼe fēnei tona kupu tāfito “Neʼe feala koa ke tau e Sesu he Rolex [ko he ʼuasi aulo ʼe totogi kovi ʼaupito] ʼi hana hā mai ʼi te televisio?” ʼE ina fai te fehuʼi ʼaenī: “Ka na pau la neʼe toe liliu mai ia Sesu, neʼe feala koa ke liliu ko he tagata fai politike? ʼE tuʼu anai koa hona lua nofoʼaga ʼi Palm Springs [ko he kolo koloaʼia ʼo Californie] pea mo ina faigaʼi anai koa ke ina fufū tana ʼu koloā?” ʼI matatonu foki ʼo te ʼu palalau ʼa Sake: “ ʼI te kele neʼe koutou maʼuʼuli ʼi te maʼu koloā pea neʼe koutou kumi te ʼu holi ʼo te sino. Neʼe koutou fakagako tokotou loto ʼi te ʼaho ʼo te fakamate.”—Sake 5:5; Kalate 5:19-21.

⁴ Ko te faifai lelei ʼa te kau takitaki lotu pea mo te hahaʼi ʼaē ʼe fai politike, ʼo kaku ki tanatou kau ki te ʼu lisi ʼaē ʼe vote kiai te hahaʼi ʼe fakahā ʼaki mai e te ʼu faʼahi ʼaia, ko nātou ko te kau sekelipa pea mo te kau Faliseo ʼo totatou temi. ʼO toe feiā aipe, ʼi te ʼu fenua ohage ko Amelika pea mo Kanata, ʼe puli nei te tuʼuga falā ʼa te lotu ki te ʼu tūʼa mamafa ʼuhi ko te ʼu aga fakalialia ʼaē neʼe nātou fai ki te kau tamaliki ʼo toe feiā ki te hahaʼi lalahi.—Mateo 23:1-3.

5. He koʼe neʼe mole fakahā ʼaki mai e te Keletiate ko ia te “tagata kaugana agatonu mo poto”?

⁵ Neʼe feala ke ʼui tonu ai e Sesu ki te kau takitaki lotu ʼo tona temi: “Malaʼia kia koutou, kau sekelipa mo koutou kau Faliseo, kau malualoi! koteʼuhi heʼe koutou hage ko he ʼu falemaka kua pena hina, ʼaia ʼe hage mai ʼe matamatalelei ʼi tuʼa, kaʼe ʼi loto ʼe fonu ko te hui ʼo te hahaʼi mate pea mo te faʼahiga meʼa heʼemaʼa kehekehe. ʼE toe feiā pe foki mo koutou, ʼi tuʼa ʼe koutou mata faitotonu ki te tagata, kaʼe ʼi loto ʼe koutou fonu ʼi te malualoi mo te manuki ki te lao.” Koia la ʼaē, neʼe mole foaki ai e te ʼAtua ki te kau takitaki lotu ʼo te Keletiate te fakatotonu ʼaē ke ina faka mafola te logo lelei ʼo te Puleʼaga, tatau aipe pe ko te kau Katolika, pe ko te kau Polotesita, te kau Orthodoxes, pe ko he faʼahiga kūtuga faka lotu pe. Neʼe nātou fakamoʼoni ai ʼe mole ko nātou te “tagata kaugana agatonu mo poto” ʼaē neʼe fakakikite.—Mateo 23:27, 28; 24:45-47.

He Koʼe Koa ʼe Tonu Ke ʼUluaki Faka Mafola Te Logo Lelei?

6. Koteā te ʼu meʼa ʼaē ʼe ʼamanaki ke hoko?

⁶ ʼI tana fakahā, ʼaki te ʼu palalau fakahagatonu, te fakatotonu ʼa Sesu ke faka mafola te logo lelei ki te ʼu puleʼaga fuli pe, ʼe gata pe kia Maleko ʼe ina fakaʼaogaʼi te kupu “ ʼuluaki.” (Maleko 13:10; koutou fakatatau pea mo Mateo 24:14.) ʼE tou lau fēnei ʼi te fakaliliu ʼa J. B. Phillips: “ ʼI muʼa ʼo te hoko mai ʼo te fakaʼosi, ʼe tonu ke faka mafola te evaselio ki te ʼatu puleʼaga fuli pe.” Ko te fakaʼaogaʼi ʼaē ʼo te kupu ko “ ʼuluaki” ʼe ina fakahā ʼaki mai ʼe ʼi ai te tahi age ʼu meʼa ʼe hoa atu anai ki te gāue faka mafola ʼaē ʼe fai ʼi te malamanei katoa. ʼE kau ki te ʼu meʼa ʼaia te mamahi lahi ʼaē neʼe fakapapau e Sesu pea mo te pule faitotonu ʼa Kilisito ʼi te tuʼu foʼou.—Mateo 24:21-31; Fakahā 16:14-16; 21:1-4.

7. He koʼe koa ʼe loto e te ʼAtua ke ʼuluaki faka mafola muʼa te logo lelei?

⁷ Koia, he koʼe koa ʼe loto e te ʼAtua ke ʼuluaki faka mafola muʼa te logo lelei? Koteʼuhi ko ia, ko te ʼAtua ʼe ʼofa, ʼe faitotonu, ʼe poto pea mo mālohi. ʼAki te lolotoga hoko ʼo te ʼu palalau ʼa Sesu ʼaē neʼe tohi ia Mateo 24:14 pea mo Maleko 13:10, ʼe feala ke tou maʼu he fakaʼiloga makehe ʼo te ʼu kalitate ʼaia ʼa Sehova. Tou vakaʼi fakanounou age muʼa te ʼu kalitate takitahi ʼaia pea mo fakasiosio peʼe koteā tonatou pikipikiga mo te faka mafola ʼaē ʼo te logo lelei.

Ko Te Logo Lelei Pea Mo Te ʼOfa ʼo Sehova

8. ʼE hā feafeaʼi te ʼofa ʼa te ʼAtua ʼi te faka mafola ʼo te logo lelei? (1 Soane 4:7-16)

⁸ ʼE hā feafeaʼi te ʼofa ʼa te ʼAtua ʼi te faka mafola ʼaē ʼo te logo lelei? ʼUluaki, ʼe mole ko he logo ia neʼe fai ki te lanu pe e tahi pe ko he kūtuga pe e tahi. ʼE ko he logo lelei ia neʼe fai ki te “ ʼu puleʼaga fuli.” ʼE ʼofa te ʼAtua ki te famili fakatagata, ʼi te lahi ʼo tona ʼofa, neʼe ina fekauʼi mai tona ʼAlo ʼulu tokotahi ki te kele, ko he sakilifisio faitotogi ki te ʼu agahala ʼo te hahaʼi fuli, kae mole ko he lanu pe e tahi. Neʼe tohi fēnei e te ʼapositolo ko Soane: “Heʼe ko te ʼAtua ʼi tona ʼofa lahi ʼaē ki te malamanei neʼe ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa fakaʼauha, kae ke ina maʼu te maʼuli heʼegata. He neʼe fekauʼi e te ʼAtua tona ʼAlo ki te malamanei, neʼe mole ke ina fakamāuʼi te malamanei, kae ke hāofaki te malamanei mai ia te ia.” (Soane 3:16, 17) ʼE mahino papau ia ko te logo lelei, ʼaē ʼe ko he fakapapau ʼo ʼuhiga mo he mālama foʼou ʼe maʼu ai te tokalelei, te logo tahi, te faitotonu, ʼe ko he fakaʼiloga ia ʼo te ʼofa ʼo te ʼAtua.—2 Petelo 3:13.

Ko Te Logo Lelei Pea Mo Te Mālohi ʼo Sehova

9. He koʼe neʼe mole fakaʼaogaʼi e Sehova te ʼu lotu mālohi ʼo te Keletiate moʼo faka mafola ʼo te logo lelei?

⁹ ʼE hā feafeaʼi te mālohi ʼo Sehova ʼi te faka mafola ʼo te logo lelei? Koutou fakasiosio age muʼa, ko ai ʼaē neʼe ina fili ke ina fakahoko te fakatotonu ʼaia? Neʼe ko te ʼu kautahi faka lotu koa ʼo te Keletiate ʼaē ʼe mālohi ʼaupito ohage la ko te ’Ēkelesia Katolika Loma peʼe ko te lotu faka Polotesita ʼaē kua lahi tona mafola? Kailoa, ʼaki tanatou kau mālohi ʼaē ki te fai politike ʼe mole tāu mo nātou te faʼahi ʼaia. (Soane 15:19; 17:14; Sake 4:4) Neʼe mole ʼofolele ia Sehova ʼi tanatou ʼu koloā peʼe ʼuhi ko tanatou fakatahi mo te kau takitaki ʼaē ʼiloa, ʼo toe feiā aipe ki tanatou ʼu teolosia ʼaē pipiki ki te talatisio. Neʼe mole ʼaoga te mālohi fakatagata moʼo fakahoko ʼo te finegalo ʼo te ʼAtua.—Sakalia 4:6.

10. Ko ai ʼaē neʼe fili e te ʼAtua moʼo fai ʼo te gāue faka mafola?

¹⁰ ʼE hage pe ko te meʼa ʼaē neʼe ʼui e te ʼapositolo ko Paulo ʼi tana tohi ki te kokelekasio ʼo Kolonito: “Heʼe koutou sisio ki tokotou pāui, ʼu tēhina: ʼe mole lahi he kau popoto ʼi te kakano neʼe pāui, peʼe ko he kau mālohi, peʼe ko he ʼu hahaʼi ʼaliki; kae ko te ʼAtua neʼe ina filifili te ʼu meʼa ʼaē ʼe vale ʼo te malamanei moʼo fakaufiufi ki te ʼu tagata popoto; pea ko te ʼAtua neʼe ina filifili te ʼu meʼa ʼaē ʼe vaivai ʼo te malamanei moʼo fakaufiufi ki te ʼu meʼa mālohi; pea ko te ʼAtua neʼe ina filifili te ʼu meʼa fakalialia ʼo te malamanei pea mo te ʼu meʼa ʼaē ʼe vaʼiganoaʼi, te ʼu meʼa ʼaē ʼe mole ʼi ai moʼo faka pulinoa ʼo te ʼu meʼa ʼaē ʼi ai, ke ʼaua naʼa faka kolōliaʼi e he tahi ia ia, ia muʼa ʼo te ʼAtua.”—1 Kolonito 1:26-29.

11. Koteā he ʼu meʼa neʼe hoko ki te kau Fakamoʼoni ʼe nātou fakahā ʼaki mai, ʼe mole honatou ʼu fakatatau?

¹¹ Tokosiʼi ʼi te kau Fakamoʼoni ʼa Sehova ʼe koloaʼia pea ko he tahi age meʼa ʼe mahino papau ia, ʼe mole ʼi ai he tahi ʼe mālohi ʼaupito ʼuhi ko tana fai politike. ʼUhi ko tanatou ʼāteaina ʼaē mai te ʼu meʼa faka politike ʼe mole feala ke nātou uga he faʼahi faka politike. ʼI tona tahi age faʼahi, ʼe tau fai kia nātou te ʼu fakataga ʼe kovi ʼaupito ʼuhi ko te kau takitaki lotu pea mo te kau takitaki politike lolotoga te 20 sēkulō ʼaenī. Kae, logope la te fakafeagai mālohi ʼaē neʼe fai kia nātou e te kau tisipulo ʼo te Nazisme, mo te Fascisme, mo te Kominisi, mo Te tauhi ki te puleʼaga, pea mo te lotu hala, neʼe mole gata te fakapuna’maʼuli ʼi te faka mafola e te kau Fakamoʼoni ʼa Sehova te logo lelei ʼi te ʼatu puleʼaga kae neʼe toe fakapuna’maʼuli foki te fakahahaʼi ʼo nātou.—Isaia 60:22.

12. He koʼe neʼe lava lelei te gāue ʼa te kau Fakamoʼoni?

¹² Ki te manatu ʼa te kau Fakamoʼoni ʼa Sehova, koteā te fakatafitoʼaga ʼo te lava lelei ʼo tanatou gāue? Neʼe fakapapau age e Sesu ki tana kau tisipulo: “ ʼE koutou maʼu anai te mālohi mokā hifo atu anai te laumālie maʼoniʼoni kia koutou pea ʼe koutou liliu anai ko haku kau fakamoʼoni ʼi Selusalemi pea mo te Sutea katoa pea mo Samalia ʼo kaku ki te potu ʼaē ʼe mamaʼo ʼo te kele.” Koia, ʼe koteā anai koa te matapuna ʼo te lava lelei ʼo tanatou gāue? Neʼe ʼui e Sesu “ ʼE koutou maʼu anai te mālohi mokā hifo atu anai te laumālie maʼoniʼoni kia koutou.” ʼO toe feiā aipe ia ʼaho nei, ko te kalavi ʼo te lava lelei ʼo te gāue ʼa te kau Fakamoʼoni ʼa Sehova ʼi tanatou minisitelio faka malamanei, ʼe mole ko te faiva fakatagata kae ko te mālohi ʼa te ʼAtua. ʼE fakahoko e Sehova te polokalama ako ʼaē ʼe lahi tokotahi ʼi te hisitolia, ʼo ina fakaʼaogaʼi te hahaʼi ʼaē ʼe hage mai ʼe vaivavavai.—Gāue 1:8; Isaia 54:13.

Ko Te Logo Lelei Pea Mo Te Poto ʼo Sehova

13. (a) He koʼe ʼe gāue lotolelei te kau Fakamoʼoni kae ʼe mole pe la totogi nātou? (b) Neʼe feafeaʼi te tali ʼa Sehova ki te fasituʼu ʼa Satana?

¹³ Ko te logo lelei ʼe faka mafola e te hahaʼi ʼaki he lotolelei. Neʼe ʼui e Sesu, “Neʼe koutou maʼu noa, koutou foaki noa.” (Mateo 10:8) Koia, ʼe mole ʼi ai he tahi ʼi te kau Fakamoʼoni ʼa Sehova ʼe totogi ʼuhi ko tana kaugana ki te ʼAtua, pea ʼe mole nātou kumi honatou totogi. ʼI tona fakahagatonu, ʼe mole pe la fai he tānaki falā ʼi tanatou ʼu fono. ʼE nātou fiafia, ʼi tanatou kaugana ʼaki tonatou loto katoa, ke nātou foaki ki te ʼAtua he tali kia ia ʼaē ʼe manuki age ki ai, ia Satana te Tevolo. ʼI tona fakahagatonu ko te mālohi fakafeagai fakalaumālie ʼaia ʼa te ʼAtua neʼe ina ʼui ko te hahaʼi ʼe mole nātou kaugana ki te ʼAtua ʼaki he loto katoa. ʼAki tona poto neʼe fai age e Sehova ki te manuki ʼa Satana he tali ʼe molemo feala hona fakafihiʼi—ko te toko miliona kau Kilisitiano Fakamoʼoni agatonu ʼa Sehova ʼe nātou faka mafola te logo lelei ʼo te Puleʼaga ʼi te ʼu ʼapi, ʼi te ʼu ala, peʼe ʼaki te fagonogono faigamālie.—Sopo 1:8-11; 2:3-5; Tāʼaga Lea 27:11.

14. Koteā te “poto ʼaē neʼe fufū” ʼaē neʼe talanoa kiai te ʼapositolo ko Paulo?

¹⁴ ʼAki te faka mafola ʼo te logo lelei ʼo te Puleʼaga ʼe toe hā ʼaki mai ai te tahi age faʼahi ʼo te poto ʼo te ʼAtua, ko te Puleʼaga totonu pe ʼaē neʼe ina fakapapau mai. Neʼe tohi fēnei e te ʼapositolo ko Paulo: “ ʼE tou talanoa tatou ki te poto ʼaē ʼe maʼu ia nātou kua fakapotopoto, ʼe mole ko te poto ia ʼo te ʼu faʼahiga meʼa ʼo te tuʼu ʼaenī, peʼe ko te poto ʼa te kau takitaki ʼo te tuʼu ʼaenī ʼaē ʼe tonu ke fakaʼauha. Kae ʼe tou talanoa tatou ki te poto ʼa te ʼAtua ʼo ʼuhiga mo te misitelio tapu, te poto ʼaē neʼe fufū, ʼaē neʼe teuteuʼi fakatomuʼa e te ʼAtua ʼi muʼa ʼo te ʼu faʼahiga meʼa ʼo te ʼu tuʼu ʼo te ʼu faʼahiga meʼa ki te kolōlia ʼo tatou.” Ko te faka ʼuhiga ʼo te “poto ʼaē neʼe fufū” ko te fakatuʼutuʼu poto ʼaē ʼe fakaʼaogaʼi e te ʼAtua moʼo fakagata te agatuʼu ʼaē neʼe kamata ʼi Eteni. Ko te poto ʼo ʼuhiga mo te misitelio tapu ʼaia neʼe hā ʼaki ia Sesu, te koga tāfito ʼo te logo lelei ʼo te Puleʼaga ʼo te ʼAtua.a—1 Kolonito 2:6, 7; Kolose 1:26-28.

Ko Te Logo Lelei Pea Mo Te Faitotonu ʼa Te ʼAtua

15. E feafeaʼi tatatou ʼiloʼi ko Sehova ʼe ko he ʼAtua ʼo te faitotonu? (Teutalonome 32:4; Pesalemo 33:5)

¹⁵ ʼO ʼuhiga mo te faitotonu ʼa te ʼAtua, ʼe tou fakatokagaʼi tāfito te maʼuhiga ʼo te kupu “ ʼuluaki” ʼaē neʼe fakaʼaogaʼi ʼi te tohi ʼa Maleko 13:10. Ko Sehova ʼe ko te ʼAtua ʼo te faitotonu ʼaē ʼe ʼalutahi pe mo te manavaʼofa. ʼE ina ʼui fēnei ʼaki tana polofeta ko Selemia: “Ko ʼaē ʼe laupisi ke ina laupisi ʼo ʼuhiga mo te meʼa ʼaenī: ke fakasiosio tonu pea mo ʼiloʼi ʼau, ke ʼiloʼi ko ʼau ia Sehova, ia Ia ʼaē ʼe faʼa manavaʼofa, fakamāu pea mo faitotonu ki te kele; koteʼuhi ko te ʼu meʼa ʼaia ʼe ʼau leleiʼia, ko te tala ʼaia ʼa Sehova.”—Selemia 9:24.

16. Koteā he fakatā ʼe feala ke fakaʼaogaʼi moʼo fakahā ʼaki ai ʼe fakamaʼua e te faitotonu ke ʼuluaki fakahā muʼa he fakatokaga?

¹⁶ ʼE hā feafeaʼi te faitotonu ʼa Sehova ʼi te fai faka mafola ʼo te logo lelei? Tou fai he fakatā ki te faʼahi ʼaia, ʼaki he faʼe neʼe ina fai he foʼi kato sokola ʼe hoki kai pe anai mokā ʼolo age te kau fakaafe. Kapau ʼe ina tuku feiā ʼi te laupapa ʼo te fale kuka te foʼi kato ʼo mole ina fakahā age ki te tamaliki te temi ʼaē ʼe tonu ai ke kai te foʼi kato, ʼi te agamāhani koteā ʼaē ʼe fai anai e te tamaliki? Ko tatou fuli neʼe ʼi ai te temi neʼe tou liliki ai! ʼE ʼi ai anai te ʼu kiʼi kauʼi tuhi ʼe nātou fia ʼahiʼahiʼi anai te foʼi kato ʼaia! ʼI te temi nei, mo kapau neʼe hala te faʼe ʼi tana mole tuku age te fakatokaga ʼaē neʼe tāu mo te faʼahi ʼaia, ʼe mole ina maʼu anai he fakatafitoʼaga mālohi moʼo akonakiʼi te kau toe. ʼI te tahi age faʼahi, kapau ʼe ina fakahā age fakalelei kia nātou ko te foʼi kato ʼe tonu ke kai faka anai ʼi te temi ʼaē ʼe hoki ʼolo age ai anai te hahaʼi ʼaē neʼe fakaafe, koia la ʼaē, ʼe mole tonu anai ke nātou gaohi te foʼi kato, ʼe mahino ia neʼe ina fakatokagaʼi fakalelei nātou. Kapau ʼe talagataʼa he tahi, ʼe tāu mo ia ke ina fai he puleʼaki mālohi pea mo faitotonu ki te faʼahi ʼaia.—Tāʼaga Lea 29:15.

17. Neʼe feafeaʼi te haga ʼa Sehova ʼo fakahā tana faitotonu ʼi hona ʼaluʼaga makehe talu mai te taʼu 1919?

¹⁷ Ko Sehova, ʼi tona ʼuhiga faitotonu ʼe mole ina fai anai he fakamāu ki te tuʼu ʼo te ʼu faʼahiga meʼa agakovi ʼaia kae neʼe mole heʼeki ina ʼuluaki foaki te fakatokaga ʼaē ʼe tāu mo te faʼahi ʼaia. Koia, tāfito talu mai te taʼu 1919, ʼi te hili pe ʼaē ʼo te ʼuluaki tau faka malamanei ʼaē neʼe ina fakatupu “te ʼu nunuʼa ʼo te tuʼania,” neʼe fekauʼi e Sehova tana kau Fakamoʼoni ʼi te kele katoa ke nātou ʼolo ʼo faka mafola mālohi te logo lelei ʼo te Puleʼaga. (Mateo 24:7, 8, 14) ʼI tona fakahagatonu, ʼe mole feala ki te ʼu puleʼaga ke nātou ʼui ʼe mole nātou ʼiloʼi te fakatokaga ʼaia ʼaē ʼe mole hona fakatatau.

Neʼe Aʼu Kifea Te Faka Mafola ʼo Te Logo Lelei ʼo Te Puleʼaga ʼi Te Malamanei?

18. (a) Koteā he fakamoʼoni ʼe tou maʼu ʼo ʼuhiga mo te gāue ʼa te kau Fakamoʼoni ʼi te ʼu koga meʼa mamaʼo? (b) Koteā he tahi age ʼu faʼifaʼitaki ʼe koutou ʼiloʼi ʼo ʼuhiga mo te faʼahi ʼaia?

¹⁸ ʼE feala ke tou sio ki he fakamoʼoni ʼo te lava lelei ʼo te polokalama ako faka malamanei ʼaia ʼi te tohi (Last Places—A Journey in the North). ʼE fakamatala e te tagata ʼaē neʼe ina fai te tohi ʼaia ʼi te temi ʼaē neʼe ina vakavakaʼi ai te ʼu mape ʼo ʼuhiga mo te motu tokotahi ʼo Foula, ʼe ko he motu ia ʼe kau ki te ʼu Motu ʼo Shetland ʼi te potu tokelau ʼo te fenua ko Ecosse, neʼe fakahā ʼi te ʼu mape “ ʼi te ʼu tafaʼaki ʼo te motu WKS (ko te ʼu toega vaka neʼe moū), RKS (makaʼia), LDGS (te ʼu mata fenua), and OBS (faigataʼa te fakalaka ʼa te ʼu vaka).” Ko te ʼu fakaʼiloga ʼaia ʼaē neʼe tuʼu ʼi te ʼu mape “neʼe ko he ʼu fakatokaga ia ki ʼaē ʼe feʼaluʼaki vaka ke ʼaua naʼa fakalaka ʼi te ʼu faʼahi ʼaia. ʼE fakamataku te lahi ʼaupito ʼo te ʼu foʼi pulu ʼaē neʼe fufū ʼi te ʼu tai ʼo Foula, ko te tupuʼaga la ʼaia ʼa te mole ʼolo kiai ʼa te hahaʼi ʼaē ʼe ʼi ai tanatou ʼu vaka, te kau tulisi, ʼo māʼiape la mo te hahaʼi ʼaē ʼe nātou fai te ʼu gāue faka puleʼaga ʼa te Fafine ʼAliki ʼo Pilitania, kae ʼe mole fakamataku ia ki te kau Fakamoʼoni ʼa Sehova—Ko he faʼahi neʼe mole heʼeki faʼa fualoa taku mahino kiai.” Neʼe ina toe hoko atu fēnei: “Ohage pe ko tanatou kumi ke nātou fakaliliu te hahaʼi ʼo te ʼu nofoʼaga māsisiva ʼo te ʼu kolo lalahi pea mo nātou ʼo te ʼu Fenua Māsisiva, ʼe toe feiā aipe neʼe nātou fakaliliu te hahaʼi ʼi te ʼu potu mamaʼo ʼo Foula.” Neʼe ina fakamoʼoni neʼe maʼu e te tagata ʼo te koga meʼa ʼaia, ʼe higoa ko Atelea, Te Tule Leʼo ʼi te ʼu māhina kua hili. Pea neʼe ina toe ʼui: “Hili te vāhaʼa e tahi, neʼe ʼau sio ki te [Réveillez-vous! faka Tanemaka] ʼi te ʼu Féroé [ko he ʼu motu ʼo te Tai ʼo te Potu Tokelau] pea hili te māhina e lua, neʼe ʼau sio [ki Te Tule Leʼo faka Tanemaka] ʼi Nuuk, ʼi Groenland.” Ko he fakamoʼoni fakafiafia, ʼo ʼuhiga mo te gāue mālohi ʼa te kau Fakamoʼoni ʼa Sehova ʼi te ʼu koga meʼa ʼaia ʼo te potu tokelau!

Koteā ʼAē ʼe Ina Uga Te Kau Fakamoʼoni ʼa Sehova Ke Nātou Haga Fai Faka Mafola Aipe?

19, 20. (a) Koteā ʼaē ʼe ina uga te kau Fakamoʼoni ʼa Sehova ke nātou haga fai faka mafola aipe? (b) Koteā te ʼu fehuʼi ʼaē ʼe tali anai kiai te alatike ʼaē ka hoa mai?

¹⁹ ʼE mahino papau ia, ko te fai faka mafola ʼi te ʼu ʼapi ki he hahaʼi ʼe mole kita ʼiloʼi, ʼe mole ko he meʼa ia ʼe faigafua, ʼo mole lauʼia pe ko taʼu e fia te kua liliu ʼa he tahi ko he Fakamoʼoni. Koia, koteā ʼaē ʼe ina uga te kau Kilisitiano ʼaia ke nātou haga fai aipe? Ko tonatou ʼuhiga Kilisitiano ʼaē kua foaki kia Sehova pea mo tanatou mahino ki tonatou ʼu maʼua. Neʼe tohi fēnei e Paulo: “Kapau foki, ʼe ʼau tala te logo lelei, ʼe mole ko he tupuʼaga ia ki hoku faka kolōliaʼi ʼo ʼoku, heʼe ko he faʼahi ʼaoga ia neʼe fakatotonu mai. Ei, malaʼia kia te ʼau mo kapau ʼe mole ʼau tala te logo lelei!” ʼE nonofo te kau Kilisitiano moʼoni mo te logo ʼaē ʼe ina foaki te maʼuli, koia, ʼe lava feafeaʼi ke nātou taupau pe maʼa nātou te logo ʼaia? Ko te pelesepeto ʼo ʼuhiga mo te tukugakoviʼi ʼo he tahi neʼe kau ki te liligi toto he neʼe mole tautonu tana fakatokagaʼi te tuʼutāmaki, ʼe ko he tupuʼaga ia ʼe feʼauga moʼo uga te faka mafola ʼo te logo lelei.—1 Kolonito 9:16; Esekiele 3:17-21.

²⁰ Koia, e feafeaʼi te faka mafola ʼo te logo lelei? Koteā te kalavi ʼo te lava lelei ʼo te gāue ʼa te kau Fakamoʼoni ʼa Sehova? Ko te ʼu fakaʼiloga fea ʼo tanatou minisitelio pea mo tanatou kautahi ʼaē ʼe tokoni ki te hā ʼaki mai ai, ko nātou te lotu moʼoni? Koia, ʼe tali anai tatatou alatike ʼaē ka hoa mai ki te ʼu fehuʼi ʼaia.

[Nota ʼi te lalo pasina]

ʼE Kei Koutou Manatuʼi Koa?

◻ Koteā ʼaē ʼe ina fakakeheʼi ai te kau Fakamoʼoni ʼa Sehova mai te kau takitaki lotu?

◻ ʼE hā feafeaʼi te ʼofa, te mālohi, pea mo te poto ʼo te ʼAtua ʼi te gāue faka mafola?

◻ ʼE hā feafeaʼi te faitotonu ʼa te ʼAtua ʼi te faka mafola ʼo te logo lelei?

◻ Koteā ʼaē ʼe ina uga te kau Fakamoʼoni ʼa Sehova ke nātou haga fai aipe tanatou minisitelio?

[Paki ʼo te pasina 15]

Tatau aipe peʼe mamaʼo te nofoʼaga ʼo te hahaʼi, ko te kau Fakamoʼoni ʼa Sehova ʼe nātou fia aʼu aipe kia nātou