Tou Tokoni Ki Te Hahaʼi Ke Nātou Fakaōvi Kia Sehova
“E mole he tahi e haù ki te Tamai, kapau e mole fakalaka ia te au.”—Soane 14:6.
1. Koteā te fakatotonu ʼaē neʼe fai e Sesu ki tana kau tisipulo ʼi tona ʼosi fakatuʼuake, pea koteā ʼaē neʼe hoko ki te kau Fakamoʼoni ʼa Sehova ʼaē neʼe nātou fakalogo kiai?
NEʼE fakatotonu e Sesu Kilisito ki tana ʼu tisipulo ke nātou “fakahoko he u tisipulo ʼi te atu puleaga, papitema natou i te Huafa o te Tamai, mo te Alo, mo te Laumalie-Maonioni.” (Mateo 28:19) ʼI te ʼu taʼu e hogofulu ʼaenī kua hili, neʼe tokoni te kau Fakamoʼoni ʼa Sehova ki te toko tolu miliona hahaʼi tupu, ke nātou fakaōvi ki te ʼAtua, pea ʼaki te temi neʼe nātou papitema moʼo fakahā kua nātou foaki tonatou maʼuli kia te ia moʼo fai tona finegalo. ʼI meʼa fakafiafia leva hatatou tokoni kia nātou ke nātou fakaōvi ki te ʼAtua!—Sakopo 4:8.
2. Logope ʼe tokolahi te hahaʼi foʼou ʼaē ʼe papitemaʼi, kae koteā ʼaē ʼe hoko?
2 Kae ʼi ʼihi fenua ʼaē neʼe tokolahi ai te ʼu tisipulo foʼou ʼaē neʼe papitema, neʼe mole faʼa tuputupu te kaugamālie ʼo te kau fai faka mafola ʼo te Puleʼaga. ʼE mahino ia, ʼe mole tonu ke galo kia tatou ia nātou ʼaē neʼe mamate, heʼe mate te toko tahi ʼi te teau ʼi te taʼu fuli. Kae ʼi te ʼu taʼu ʼaenī kua hili, neʼe hahaʼi pe ia nātou ʼaē neʼe mavae ʼi te moʼoni. Koteā tona tupuʼaga? ʼI te alatike ʼaenī pea mo ia ʼaē ka hoa mai, ʼe fakamahino ai peʼe feafeaʼi te fakaōvi ʼa te hahaʼi kia Sehova, pea mo te ʼu tupuʼaga ʼaē ʼe feala ai ke nātou mavae mai ia te ia.
Te Fakatuʼutuʼu ʼo Tatatou Fai Faka Mafola
3. (a) Koteā ʼaē ʼe tatau ai te gāue ʼa te kau tisipulo ʼa Sesu pea mo te gāue ʼa te ʼaselo ʼaē ʼe fakahā ia Apokalipesi 14:6? (b) Koteā te puleʼaki lelei moʼo uga te hahaʼi ke nātou fia ʼiloʼi te logo ʼo te Puleʼaga, kae koteā te fihifihia ʼaē ʼe hoko?
3 ʼI te “temi fakaʼosi” ʼaenī, ʼe ʼi ai te gāue ʼa te ʼu tisipulo ʼa Sesu, ke nātou faka mafola te “ ʼatamai mālama moʼoni” ʼo ʼuhiga mo te “Logolelei aeni o te Puleaga.” (Taniela 12:4; Mateo 24:14) ʼE ʼalutahi tanatou fekau pea mo te fekau ʼa te ʼaselo ʼaē “nee ina too he Evaselio heegata ke fagonogono kia natou e nofo i te kelekele, ki te u puleaga, mo te u hako, mo te u lea pea mo te hahai fuape.” (Apokalipesi 14:6) ʼI te mālama ʼaenī ʼaē ʼe tokaga tāfito ai te hahaʼi ki te ʼu koloā, ʼi te agamāhani ko te puleʼaki pe e tahi ke tou uga te hahaʼi ke nātou fia ʼiloʼi te Puleʼaga ʼo te ʼAtua pea ke tou tokoni kia nātou ke nātou fakaōvi ki te ʼAtua, ʼe ko tatatou palalau age ki te ʼamanaki ʼo te maʼuli heʼegata ʼi te palatiso fakakelekele. ʼE tonu te faʼahi ʼaia, kae ko nātou ʼaē ʼe nātou fakatahi mo te hahaʼi ʼa te ʼAtua ʼuhi pe heʼe nātou fia hū ki te Palatiso, ʼe mole mālohi anai tonatou tafitoʼaga ke nātou haʼele ʼi te ala ʼaē ʼe ina taki ki te maʼuli.—Mateo 7:13, 14.
4. ʼO mulimuli kia Sesu pea mo te ʼaselo ʼaē ʼe lele ʼi te lotomalie ʼo te lagi, koteā te fakatuʼutuʼu ʼo tatatou gāue fai faka mafola?
4 Neʼe ʼui fēnei e Sesu: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) Ko te ʼaselo ʼaē ʼe lele ʼi te lotomalie ʼo te lagi ʼe ina fakahā he “Evaselio heegata,” pea ʼe ina tala ifo ki te hahaʼi ʼaē ʼe nonofo ʼi te kele: “Koutou tuania te Atua, koutou foaki kia te ia te kololia, koteuhi kua hoko mai te hola o tana fakamau. Koutou atolasio ki te Tupuaga o te lagi, mo te kelekele, mo te tai pea mo te u matapuna vai.” (Apokalipesi 14:7) ʼE mahino mai kia tatou, ʼe tou faka mafola ia te logo lelei moʼo tokoni ki te hahaʼi ke nātou fakaōvi kia Sehova ʼaki ia Kilisito Sesu.
Tatatou Gāue ʼi Te Fakatuʼutuʼu ʼa Sehova
5. Koteā te ʼu palalau ʼaē neʼe fai e Paulo pea mo Sesu, ʼe hā mai ai ko te gāue ʼaē ʼe tou fai ʼe ʼa Sehova kae mole ʼa tatou?
5 ʼI tana faitohi ki te kau Kilisitiano fakanofo, ʼe talanoa te ʼapositolo ko Paulo ki “te gaue o te fakatokatoka” pea ina ʼui, ʼe fakatokatoka e te ʼAtua te hahaʼi mo ia ʼaki te sakilifisio faitotogi ʼa Sesu Kilisito. ʼE ʼui e Paulo, “e poupouki koutou e te Atua aki ia matou. O uhiga mo Kilisito e matou tagi atu: ‘Koutou fakatokatoka mo te Atua.’ ” ʼI meʼa fakaloto māfana leva! Tatau aipe peʼe tou kau ʼi te hahaʼi fakanofo ʼaē ko “te u fakafofoga o Kilisito,” peʼe tou kau ia nātou ʼaē ʼe ʼamanaki maʼuli ʼi te kele, kae ʼe mole tonu ke galo kia tatou, ko te gāue ʼaia ʼe mole ʼa tatou, kae ko te gāue ʼa Sehova. (2 Kolonito 5:18-20) ʼE ko te ʼAtua ʼaē ʼe ina fakaōvi te hahaʼi kia te ia, pea ʼe ina akoʼi ia nātou ʼaē ʼe nātou fakatahi mo Kilisito. Neʼe ʼui fēnei e Sesu: “E mole feala ki he tahi ke haù kia te au, kapau e mole taki mai ia kia te au e te Tamai ae nee ina fekaui mai au, pea e au fakatuuʼake ia i te aho fakamuli. Nee tohi i te kau polofeta, ‘E fakaʼako anai natou fuli e te Atua.’ Ko ae nee fakalogo ki te mea mai te Tamai pea mo ina ako e haù ia kia te au.”—Soane 6:44, 45.
6. ʼE luluʼi feafeaʼi e Sehova te ʼu puleʼaga ia ʼaho nei, pea ko ai ia nātou ʼaē ʼe puipui ʼi tona ‘fale’ lotu?
6 ʼI te ʼu ʼaho fakamuli ʼaenī, e feafeaʼi te fakaōvi e Sehova te hahaʼi kia te ia, pea mo avahi kia nātou te “matapa o te tui”? (Gaue 14:27; 2 Timoteo 3:1) ʼE ina fai tāfito te faʼahi ʼaia ʼi tana fekauʼi tana kau Fakamoʼoni ke nātou kalagaʼi tana logo ʼo te hāofaki pea mo te fakatūʼa ʼo te mālama agakovi ʼaenī. (Isaia 43:12; 61:1, 2) Ko te tala ʼo te logo ʼaia ʼi te malamanei katoa, ʼe ina luluʼi te ʼatu puleʼaga—ʼo ina fakahā kia nātou te kua ōvi mai ʼo tonatou fakamāu. ʼAki te gāue ʼaia, ko te hahaʼi ʼaē ʼe “manakoʼia” kia mata ʼo te ʼAtua, ʼe toʼo ia nātou mai te mālama ʼaenī, pea ʼe nātou maʼu te fīmālie ʼi te “fale” ʼo te tauhi moʼoni. ʼE fakahoko ai e Sehova tana ʼu palalau fakakikite ʼaē neʼe tohi e Asea: “Pea ʼe ʼau luluʼi anai te ʼu puleʼaga fuli, pea ʼe tonu anai ke ʼōmai ia te ʼu meʼa ʼaē ʼe manakoʼia ʼo te puleʼaga fuli; pea ʼe ʼau fakafonu anai te fale ʼaenī ʼaki te kolōlia.”—Asea 2:6, 7, kiʼi nota ʼi te lalo pasina; Apokalipesi 7:9, 15.
7. ʼE avahi feafeaʼi e Sehova te loto ʼo te hahaʼi pea mo fakaōvi ia nātou kia te ia pea mo tona ʼAlo?
7 ʼE avahi e Sehova te loto ʼo te hahaʼi ʼaē ʼe nātou manavasiʼi ki te ʼAtua—“te ʼu meʼa ʼaē ʼe manakoʼia ʼo te puleʼaga fuli”—ke feala hanatou “fakalogo kia mea [ʼe] akonaki ki ai” tana kau Fakamoʼoni. (Asea 2:7, Jewish Publication Society; Gaue 16:14) Ohage ko tona fai ʼi te ʼuluaki sēkulō, ʼi ʼihi temi ʼe fakaʼaogaʼi e Sehova tana kau ʼaselo moʼo takitaki tana kau Fakamoʼoni ki te hahaʼi fakamalotoloto ʼaē neʼe nātou pāui kia te ia ke tokoni age. (Gaue 8:26-31) ʼI te ʼiloʼi ʼa te hahaʼi te ʼu fakatuʼutuʼu fuli ʼaē neʼe fai e te ʼAtua maʼa nātou ʼaki tona ʼAlo ko Sesu Kilisito, ʼe nātou fakaōvi kia Sehova ʼuhi ko tona ʼofa. (1 Soane 4:9, 10) Ei, ʼe fakaōvi e Sehova te hahaʼi kia te ia pea mo tona ʼAlo ʼaki Tana “lotoʼofa,” peʼe ko tona “ ʼofa agatonu.”—Selemia 31:3, kiʼi nota ʼi te lalo pasina.
Ko Ai Te Hahaʼi ʼAē ʼe Fakaōvi e Sehova Kia Te Ia?
8. Ko te faʼahiga hahaʼi feafeaʼi ʼaē ʼe fakaōvi e Sehova kia te ia?
8 Ko Sehova ʼe ina fakaōvi kia te ia pea mo tona ʼAlo ia nātou ʼaē ʼe nātou kumi ia Ia. (Gaue 17:27) ʼE kau kiai te hahaʼi ʼaē “ ʼe nātou toʼetoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko” ʼi te Keletiate, pea ʼi te malamanei katoa. (Esekiele 9:4) ʼE nātou “ ʼiloʼi tonatou masiva fakalaumālie.” (Mateo 5:3, MN) ʼE mahino ia, ko nātou te “kau agavaivai ʼo te kele,” ʼaē ka nātou nonofo anai ʼo talu ai ʼi te palatiso fakakelekele.—Sofonia 2:3.
9. ʼE lava sio feafeaʼi ia Sehova peʼe ‘tali lelei e he tahi te mauli heegata,’ pea ʼe ina fakaōvi feafeaʼi ia nātou ʼaia kia te ia?
9 ʼE feala ke sivi e Sehova te loto ʼo he tahi. Neʼe ʼui fēnei e te hau Ko Tavite ki tana foha ko Salomone: “Ko Sehova ʼe ina sivi te ʼu loto fuli pea ʼe ina ʼiloʼi te ʼu ʼaluʼaga fuli pe ʼo te ʼu fakakaukau. Kapau ʼe ke kumi ia ia, pea ʼe ina tuku anai ke ke maʼu.” (1 Fakamatala 28:9) ʼO mulimuli ki te ʼaluʼaga ʼo te loto ʼa he tahi pea mo tona faʼahiga fakakaukau, pea mo tana faʼahiga manatu, ʼe feala ke vakaʼi e Sehova peʼe tali anai e te tagata peʼe ko te fafine ʼaia te ʼu fakatuʼutuʼu ʼa te ʼAtua ʼo ʼuhiga mo te fakamolemole ʼo te ʼu agahala pea mo te ʼamanaki ki te maʼuli heʼegata ʼi te mālama foʼou ʼa te ʼAtua. (2 Petelo 3:13) ʼAki tana Folafola, ʼaē ʼe faka mafola pea mo akoʼi e tana kau Fakamoʼoni, ʼe fakaōvi e Sehova kia ia pea mo tona ʼAlo ‘ia nātou ʼaē ʼe nātou tali lelei te maʼuli heʼegata,’ pea ʼe nātou “liliu ʼo tui.”—Gaue 13:48, MN.
10. Koteā ʼaē ʼe hā mai ai tatau aipe peʼe fakaōvi e Sehova ʼihi kia te ia, kae ʼe mole faka ʼuhiga leva ʼe kua fakatuʼutuʼu fakatomuʼa tonatou fakatafoki?
10 Kapau ko Sehova ʼe ina fakaōvi ʼihi hahaʼi kia te ia, ko tona faka ʼuhiga koa kua ina ʼosi fakatuʼutuʼu fakatomuʼa te fakatafoki ʼa te hahaʼi ʼaia? Kailoa ia! ʼE fakaōvi e te ʼAtua te hahaʼi kia te ia ʼo mulimuli pe ki te ʼu meʼa ʼaē ʼe nātou loto kiai. ʼE fakaʼapaʼapa ki tonatou loto faʼitaliha. ʼE tuku e Sehova ki te hahaʼi ʼo te kele ia ʼaho nei te fealagia ʼaē neʼe ina tuku ki te kau Iselaelite kua hili kiai taʼu e 3 000 tupu, ʼi te temi ʼaē neʼe ʼui ai e Moisese: “ ʼI te ʼaho ʼaenī, ʼe ʼau tuku atu ʼi ʼokotou muʼa te maʼuli pea mo te meʼa ʼaē ʼe lelei, te mate pea mo te meʼa ʼaē ʼe kovi. . . . Ia ʼaho nei, ʼe ʼau toʼo te lagi pea mo te kele ko he ʼu fakamoʼoni ʼe fakafeagai kia koutou, neʼe ʼau tuku atu ʼi ʼokotou muʼa te maʼuli pea mo te mate, te tapuakina pea mo te malaʼia, pea ʼe tonu ke koutou fili te maʼuli ke feala ai hakotou maʼuli, ia koutou pea mo tokotou hōloga, ʼo koutou ʼofa kia Sehova tokotou ʼAtua, ʼo koutou fakalogo ki tona leʼo pea mo koutou pipiki maʼu kia te ia, he ko ia tokotou maʼuli pea mo te loaloaga ʼo tokotou ʼu ʼaho.”—Teutalonome 30:15-20.
11. Neʼe tonu ke filifili feafeaʼi e te kau Iselaelite ia te maʼuli?
11 Koutou fakatokagaʼi, neʼe tonu ke filifili e te kau Iselaelite te maʼuli ‘ ʼo nātou ʼofa kia Sehova, mo fakalogo ki tona leʼo pea mo pipiki maʼu kia te ia.’ ʼI te temi ʼaē neʼe fai ai te ʼu palalau ʼaia, neʼe mole heʼeki hū te kau Iselaele ki te Kele ʼo te Fakapapau. Neʼe nātou nonofo ʼi te ʼu Mafa ʼo Moape, pea nātou teuteu ke nātou fakalaka ʼi te Vaitafe ʼo Solotane pea mo hū ki Kanaane. Neʼe tonu tanatou ʼamanaki ki te fenua “lelei pea mo lahi” ʼaē “ ʼe tafe ai te huʼa pipi pea mo te meli,” kae ko te fakahoko ʼo te ʼamanaki ʼaia neʼe fakalogo ki tanatou ʼofa kia Sehova, pea mo tanatou fakalogo ki tana ʼu fakatotonu, pea mo tanatou pipiki maʼu kia te ia. (Ekesote 3:8) Neʼe fakahā lelei e Moisese te faʼahi ʼaia, ʼi tana ʼui fēnei: “Kapau ʼe koutou fakalogo ki te ʼu fakatotonu ʼa Sehova tokotou ʼAtua, ʼaē ʼe ʼau fakatotonu atu ʼi te ʼaho nei, ke koutou ʼofa kia Sehova tokotou ʼAtua, mo koutou haʼele ʼi tana ʼu ala pea mo taupau tana ʼu fakatotonu, mo tana ʼu lao pea mo tana ʼu faifakamāu, pea hoki koutou maʼuʼuli anai pea mo liliu ʼo kaugamālie, pea ko Sehova tokotou ʼAtua ʼe ina tapuakinaʼi anai koutou ʼi te fenua ʼaē ka koutou maʼu.”—Teutalonome 30:16.
12. Koteā ʼaē ʼe tou ako mai te faʼifaʼitaki ʼa te kau Iselaelite ʼo ʼuhiga mo tatatou gāue faka mafola pea mo tatatou faiakonaki?
12 Ko te faʼifaʼitaki ʼaia ʼe mole ko he tokoni maʼuhiga koa la ʼo ʼuhiga mo tatatou fai faka mafola pea mo tatatou faiakonaki ʼi te temi fakaʼosi ʼaenī? ʼE tou manatuʼi te Palatiso ʼaē ka hoko mai pea mo tou talanoa kiai ʼi totatou minisitelio. Kae ko tatou pea mo te ʼu tisipulo ʼaē ʼe tou akoʼi, ʼe mole tou sisio anai ki te fakahoko ʼo te fakapapau ʼaia mo kapau ʼe tou tauhi ki te ʼAtua ʼuhi pe ko te ʼu fakapale. Ohage ko te kau Iselaelite, ko tatou pea mo nātou ʼaē ʼe tou akoʼi, ʼe tonu ke tou ‘ ʼofa kia Sehova, mo tou fakalogo ki tona leʼo, pea mo pipiki maʼu kia te ia.’ Kapau ʼe tou manatuʼi te faʼahi ʼaia ʼi totatou minisitelio, pea ʼe tou gāue fakatahi anai mo Sehova moʼo fakaōvi te hahaʼi kia te ia.
ʼE Tou Kaugā Gāue Mo Te ʼAtua
13, 14. (a) ʼO mulimuli kia 1 Kolonito 3:5-9, e feafeaʼi tatatou liliu ʼo kaugā gāue mo te ʼAtua? (b) Ko ai ʼaē ʼe tonu ke vikiʼi ʼo ʼuhiga mo te tuputupu ʼaē ʼe hoko, pea koteā tona tupuʼaga?
13 Neʼe fakatatau e Paulo tatatou gāue fakatahi mo te ʼAtua ki he fai gāueʼaga. Neʼe ina tohi fēnei: “Pe ko ai foki Apolose? Pea ko ai ia Paulo? Ko he u faifekau, ko naua ae nee koutou tui ai, pea e na tahi gaue o fai kia meaofa kua foakiʼage e te Aliki. Ko au, nee au to, nee fakapala e Apolose, kae nee fakatupu e te Atua. Koia, ko te mea noa iaʼia e ina to, pea mo ae e ina fakapala, kae lau tahipe te Atua, iaʼia e ina fakatupu. E tataupe iaʼia e ina to mo ia ae e ina fakapala pea e tahi tali anai tona totogi o fai ki tana gaue. Koteuhi ko maua ko te u kauga gaue a te Atua, ko koutou e ko te gaueʼaga a te Atua, ko te fale o te Atua.”—1 Kolonito 3:5-9.
14 ʼI totatou ʼuhiga kaugā gāue ʼa te ʼAtua, ʼe tonu ke tou kātaki ʼo to “te folafola o te Puleaga” ʼi te loto ʼo te hahaʼi, pea ke tou fakapala te pulapula ʼaia ʼo tou fai he ʼu ʼaʼahi pea mo he ʼu ako Tohi-Tapu neʼe teuteuʼi lelei. Kapau ʼe lelei te kele ʼaē ʼe fakatātā ki tonatou loto, pea ʼe gāue anai Sehova ke tuputupu te pulapula ʼo te moʼoni faka Tohi-Tapu, ke liliu ko he fuʼu ʼakau ʼe fua. (Mateo 13:19, 23) ʼE ina fakaōvi anai te tagata ʼaia kia te ia pea mo tona ʼAlo. ʼI tona fakahagatonu, ko te tuputupu ʼo te kau fai faka mafola ʼo te Puleʼaga ʼe hoko heʼe ko Sehova ʼaē ʼe ina gāueʼi te loto ʼa te hahaʼi, ʼo ina fakatuputupu ai te pulapula ʼo te moʼoni ke nātou fakaōvi kia te ia pea mo tona ʼAlo.
Tou Laga Ke Tologa
15. Koteā te lea fakatātā ʼaē neʼe fai e Paulo moʼo fakahā peʼe feafeaʼi hatatou tokoni ki ʼihi ke tuputupu ia nātou te tui?
15 ʼI tatatou fiafia ki te tuputupu ʼaia ʼa te kau fai faka mafola, ʼe tou fakaʼamu ke haga ʼofa te hahaʼi ʼaia kia Sehova, pea mo nātou fakalogo ki tana ʼu fakatotonu, pea mo nātou pipiki kia te ia. ʼE ko he meʼa fakaʼofaʼofa kia tatou tatatou sio ki te mokosia ʼa ʼihi pea mo tanatou mavae. ʼE feala koa hatatou tāʼofi te faʼahi ʼaia? ʼI tana tahi lea fakatātā, ʼe fakahā mai e Paulo peʼe tou lava tokoni feafeaʼi ki ʼihi ke tuputupu tanatou tui. ʼE ina tohi fēnei: “Pea e mole feala ki he tahi ke ina fai he fakatafito kehe i te fakatafito kua tuʼu: ia Sesu Kilisito. Kae kapau ko he tahipe e ina fakatuu ake i te fakatafito aki te aulo, pe ko te siliva, pe ko te maka mauhiga, pe ko te akau, pe ko te vao moamoa pe ko te kaho, e ha anai te gaue a te tagata takitahi, pea e iloi anai i te Aho o te Fakamau, koteuhi e fakaha ia aki te afi, pea e fakamooni anai e te afi te faahiga gaue a te tagata takitahi.”—1 Kolonito 3:11-13.
16. (a) Koteā te kehekehe ʼo te ʼu lea fakatātā e lua ʼaē neʼe fakaʼaogaʼi e Paulo? (b) Koteā ʼaē ʼe feala ai ke mole faʼa lelei tatatou gāue pea ke mole ina kātakiʼi te ʼu ʼahiʼahi?
16 ʼI te lea fakatātā ʼa Paulo ʼo ʼuhiga mo te gāueʼaga, ko te tuputupu ʼo te pulapula ʼe fakalogo ki tona to fakalelei, mo tona fakapala tuʼumaʼu, pea mo tona tapuakiʼi e te ʼAtua. Ko te tahi lea fakatātā ʼa te ʼapositolo ʼe ina fakahā mai te maʼua ʼa te minisi Kilisitiano ʼo ʼuhiga mo te meʼa ʼaē ʼe ina laga. Neʼe laga koa ki he fakatafito ʼe mālohi mo fakaʼaogaʼi he ʼu meʼa gāue lelei? ʼE fai e Paulo te fakatokaga ʼaenī: “Pea ke tahi vakai, pe feafeai tana fakatuʼu.” (1 Kolonito 3:10) ʼI tatatou ʼosi fakatupu te fia ʼiloʼi ʼa he tahi ʼaki te ʼamanaki ki te maʼuli heʼegata ʼi te Palatiso, ʼe gata pe koa tatatou faiakonaki ki te ʼu meʼa tāfito ʼo te Tohi-Tapu, ʼo tou talanoa tāfito ki te maʼuhiga ʼaē ke faiga ke ina maʼu te maʼuli heʼegata? ʼE gata pe koa tatatou faiakonaki ki te ʼu palalau ʼaenī: ‘Kapau ʼe ke fia maʼuli ʼo heʼegata ʼi te Palatiso, pea ʼe tonu ke ke ako, pea ke ke fono tuʼumaʼu, pea ke ke fai faka mafola’? Kapau koia ia, pea ʼe mole tou fakatuʼu tana tui ki he fakatafito mālohi, pea ʼe mole ina kātakiʼi anai te ʼu ʼahiʼahi ʼo vaivai anai ʼaki te temi. Kapau ʼe tou faiga ke tou fakaōvi te hahaʼi kia Sehova, ʼo tou ʼui age ʼe feala ke nātou maʼuli ʼi te Palatiso mo kapau ʼe nātou tauhi kia te ia lolotoga he ʼu kiʼi taʼu, pea ʼe hage anai ʼe tou laga ʼaki “te akau, pe ko te vao moamoa pe ko te kaho.”
Tou Fakatuputupu Tanatou ʼOfa Ki Te ʼAtua Pea Mo Kilisito
17, 18. (a) Ke tologa te tui ʼa he tahi, koteā ʼaē ʼe maʼuhiga? (b) E feafeaʼi hatatou tokoni ki he tahi ke nofo ia Kilisito ʼi tona loto?
17 Ke tologa takita tui, ʼe tonu ke fakatafito ki takita felogoi lelei mo Sehova ʼAtua ʼaki ia Sesu Kilisito. ʼI totatou ʼuhiga agahala, ʼe hoki feala hatatou maʼu te taʼi felogoi ʼaia ʼaki pe tona ʼAlo. (Loma 5:10) Koutou manatuʼi te meʼa ʼaē neʼe ʼui e Sesu: “E mole he tahi e haù ki te Tamai, kapau e mole fakalaka ia te au.” Moʼo tokoni ki te hahaʼi ke nātou tui, “e mole feala ki he tahi ke ina fai he fakatafito kehe i te fakatafito kua tuʼu: ia Sesu Kilisito.” Koteā tona faka ʼuhiga?—Soane 14:6; 1 Kolonito 3:11.
18 Ko te ʼui ʼaē ke tou fakatuʼu ki te fakatafito ʼaē ko Kilisito, ko tona faka ʼuhiga, ke tou faiakonaki ke tuputupu ia ia ʼaē ʼe ako, te ʼofa ʼaē kia Sesu, he kua mālama lelei ki Tona ʼuhiga Faitotogi, mo Pule ʼo te kokelekasio, mo Pelepitelo Lahi agaʼofa, pea mo Hau fakanofo. (Taniela 7:13, 14; Mateo 20:28; Kolose 1:18-20; Hepeleo 4:14-16) Ko tona faka ʼuhiga, ʼe tonu ke mahino kia nātou ko Sesu ʼe maʼuli moʼoni pea ʼe tonu ke nofo ʼi ʼonatou loto. ʼE tonu ke tou hūfaki nātou ohage ko te hūfaki e Paulo te kau Kilisitiano ʼo Efeso. Neʼe ina tohi fēnei: “[ʼE ʼau] tuutuli ifo ia mua o te Tamai, . . . ke ina tuku atu kia koutou . . . aki te tui ke afio Kilisito i outou loto; ke koutou tauaka mo fakatafito i te ofa.”—Efeso 3:14-17.
19. Koteā ʼaē ʼe tonu ke hoko ki te kau ako ʼo te Tohi-Tapu ʼi tanatou ʼofa kia Kilisito, kae koteā ʼaē ʼe tonu ke tou fakamahino age?
19 Kapau ʼe tou faiga feiā ke tuputupu ʼi tonatou loto te ʼofa kia Kilisito, pea ʼe toe tuputupu anai mo tanatou ʼofa ʼaē kia Sehova ʼAtua. Ko te ʼofa ʼa Sesu, mo te ʼu meʼa ʼaē neʼe ina logoʼi ʼi tona loto, pea mo tona lotoʼofa ʼe hā mai ai te ʼu kalitate ʼo Sehova. (Mateo 11:28-30; Maleko 6:30-34; Soane 15:13, 14; Kolose 1:15; Hepeleo 1:3) Koia ʼi te ʼāsili mālama pea mo ʼofa ʼa te hahaʼi kia Sesu, ʼe nātou ʼāsili mālama anai pea mo ʼofa kia Sehova.a (1 Soane 4:14, 16, 19) ʼE tonu ke tou fakamahino ki te kau ako Tohi-Tapu, ʼe ko Sehova ʼaē neʼe ina takitaki ia meʼa fuli ʼaē neʼe fai e Kilisito maʼa te malamanei, pea ʼe tonu ai ke tou fakafetaʼi kia Ia, pea mo vikiʼi ia Ia, pea mo tauhi ki ai ʼi tona ʼuhiga “ ʼAtua ʼo totatou hāofaki.”—Pesalemo 68:19, 20; Isaia 12:2-5; Soane 3:16; 5:19.
20. (a) E feafeaʼi hatatou tokoni ki te hahaʼi ke nātou fakaōvi ki te ʼAtua pea mo tona ʼAlo? (b) Koteā ʼaē ka tou vakaʼi anai ʼi te alatike ʼaē ka hoa mai?
20 ʼI totatou ʼuhiga kaugā gāue ʼa te ʼAtua, tou tokoni ki te hahaʼi ke nātou fakaōvi kia te ia pea mo tona ʼAlo, ʼo tou tokoni age ke nātou fakatupu ʼi tonatou loto he ʼofa pea mo he tui moʼoni. ʼAki te faʼahi ʼaia, ʼe mahino anai kia nātou ko Sehova ʼe ko he tahi ʼe maʼuli moʼoni. (Soane 7:28) ʼAki ia Kilisito, ʼe feala anai hanatou felogoi lelei mo te ʼAtua, pea ʼe nātou ʼofa pea mo pipiki maʼu anai kia te ia. ʼE mole nātou faka tuʼakoi anai te temi ʼaē ka nātou tauhi ʼofa ai kia te ia, ʼi tanatou tui ʼaē ʼe fakahoko anai e Sehova tana ʼu fakapapau taulekaleka ʼi tona temi totonu. (Tagilāulau 3:24-26; Hepeleo 11:6) Logope ʼe tou tokoni ki ʼihi ke tuputupu tanatou tui, mo tanatou ʼamanaki, pea mo tanatou ʼofa, kae ʼe toe maʼua foki ke tou laga mo tatatou tui ʼa tatou totonu, ke mālohi ohage ko he vaka ʼe lava fakalaka ʼi te ʼu afā mālohi. ʼE tou vakaʼi anai te faʼahi ʼaia ʼi te alatike ʼaē ka hoa mai.
[Nota ʼi te lalo pasina]
a Kapau ʼe tou fia ʼiloʼi lelei ia Sesu pea ʼaki ia ia, tana Tāmai ko Sehova, ʼe lelei ke tou vakaʼi te tohi ʼaenī, Te tagata ʼaē ʼe lahi tokotahi ʼo te ʼu temi fuli, ʼaē neʼe tā e te Watchtower Bible and Tract Society of New York, Inc.
Moʼo Fakamanatu
◻ Koteā ʼaē ʼe tou fai ʼi te agamāhani moʼo uga te hahaʼi ke nātou fia ʼiloʼi te logo ʼo te Puleʼaga, kae koteā te meʼa ʼaē ʼe feala ke hoko?
◻ Koteā te faʼahiga hahaʼi ʼaē ʼe fakaōvi e Sehova kia te ia pea mo tona ʼAlo?
◻ Ko te hū ʼa te hahaʼi Iselaelite ki te Kele ʼo te Fakapapau neʼe fakalogo kiteā, pea koteā ʼaē ʼe tou ako mai ai?
◻ Koteā ʼaē ʼe feala ke tou fai moʼo tokoni ki te hahaʼi ke nātou fakaōvi kia Sehova pea mo tona ʼAlo?
[Paki ʼo te pasina 10]
Logope la ʼe tou fakahā ki te hahaʼi te ʼamanaki ʼo te maʼuli heʼegata ʼi te Palatiso, kae ʼe tou fakatuʼutuʼu tāfito ke tou fakaōvi ia nātou kia Sehova
[Paki ʼo te pasina 13]
ʼE fua lelei anai tatatou ʼu ʼaʼahi mo kapau ʼe tou teuteuʼi fakalelei