Ko Te ʼu Fāmili Kilisitiano ʼe Natou Muliʼi Ia Te Faʼifaʼitaki ʼa Sesu
‘Ko Kilisito neʼe ina tuku atu he faʼifaʼitaki ke kotou mulimuli lelei ki tona ʼu tapugā vaʼe.’—1 PET. 2:21.
1. (a) Neʼe koteā te gāue ʼa te ʼAlo ʼo te ʼAtua ʼi te temi ʼaē neʼe faʼu ai te ʼu meʼa fuli? (b) Neʼe feafeaʼi te loto ʼo Sesu ʼo ʼuhiga mo te mālamanei?
ʼI TE temi ʼaē neʼe faʼu ai e te ʼAtua ia te lagi mo te kele, neʼe gāue mo ia tona ʼAlo ʼulu tokotahi, “ko he tufuga faiva.” Ko te ʼAlo ʼo te ʼAtua neʼe toe lagolago ki tana Tamai, ʼi te temi ʼaē neʼe fai ai e Sehova tana fakatuʼutuʼu pea mo ina fakatupu ia te ʼu faga manu kehekehe pea mo te ʼu vao ʼakau ʼi te kele, pea mo te temi ʼaē neʼe Ina teuteuʼi ai te Palatiso ke liliu ko he nofoʼaga maʼa te tagata. Ko te ʼAlo ʼo te ʼAtua, ʼaē ki muli age neʼe ko Sesu, neʼe ʼofa ʼaupitō ki te mālamanei. “Ko te ʼu meʼa ʼaē neʼe . . . ʼofa kiai neʼe ko te ʼu meʼa ʼaē neʼe nofo mo te ʼu foha ʼo te tagata.”—Taag. 8:27-31; Sen. 1:26, 27.
2. (a) Koteā te tokoni ʼaē neʼe foaki e Sehova maʼa te mālamanei heʼe haohaoa? (b) Ko te faʼahi fea ʼo te maʼuli ʼe ʼaoga kiai te takitaki Fakatohi-tapu?
2 ʼI te kua ʼosi agahala leva ʼa te ʼuluaki taumātuʼa, neʼe liliu ia te fakamolemole ʼo te agahala ʼa te mālamanei ʼe ko he faʼahi maʼuhiga ʼi te fakatuʼutuʼu ʼa Sehova. Neʼe foaki e Sehova ia te sākilifisio faitotogi ʼa Kilisito, ke fakafealagia ai te fakamolemole ʼaia. (Loma 5:8) Tahi ʼaē, neʼe foaki mai e Sehova tana Folafola, te Tohi-Tapu moʼo takitaki te tagata ke fua lelei tona maʼuli logolā tona ʼuhiga heʼe haohaoa. (Pes. 119:105) ʼI tana Folafola, ʼe fakahā ai e Sehova ia te takitaki moʼo tokoni ki tana hahaʼi, ke natou maʼu honatou maʼuli fakafāmili ʼe mālohi pea mo fiafia. ʼO ʼuhiga mo te ʼohoana, ʼe ʼui ʼi te tohi ʼo Senesi, ʼe tonu ki te tagata “ke pipiki ki tona ʼohoana, pea ʼe tonu anai ke nā liliu ko he kakano e tahi.”—Sen. 2:24.
3. (a) Koteā ʼaē neʼe akoʼi e Sesu ʼo ʼuhiga mo te ʼohoana? (b) Koteā ʼaē kā tou vakaʼi anai ʼi te ʼalatike ʼaenī?
3 Lolotoga tana minisitelio ʼi te kele, neʼe fakahā lelei e Sesu, ko te nofo ʼohoana ʼe tonu ke tuʼu ʼo talu ai. Neʼe ina akoʼi ia te ʼu pelesepeto, kapau ʼe maʼuliʼi, pea ko te ʼu fāmili ʼe natou lava tauʼi anai te ʼu agaaga pea mo te ʼu holi ʼaē ʼe fakatupu kovi ki tonatou maʼuli fakataumātuʼa peʼe ki te maʼuli fiafia ʼo tonatou fāmili. (Mat. 5:27-37; 7:12) Ko te ʼalatike ʼaenī ʼe talanoa anai peʼe tokoni feafeaʼi ia te ʼu akonaki ʼa Sesu pea mo tana faʼifaʼitaki lelei ki te ʼu tagata ʼohoana, mo te ʼu fafine ʼohoana, mo te ʼu mātuʼa, pea mo te fānau ke natou maʼu he maʼuli fakafāmili ʼe fiafia pea mo lelei.
ʼE Feafeaʼi Ki He Tagata ʼOhoana Hana Fakamaʼuhigaʼi Tona ʼOhoana?
4. Ko te ʼu faʼahi fea ʼaē ʼe tatau ai te pule ʼa Sesu pea mo ʼaē ʼa te ʼu tagata ʼohoana Kilisitiano?
4 Neʼe hinoʼi e te ʼAtua ia te tagata ʼohoana ko te pule ʼo te fāmili, ohagē pē ko Sesu ʼe ko te Pule ʼo te kōkelekāsio. Neʼe ʼui fēnei e te ʼapositolo ko Paulo: “Ko te tagata ʼe pule ki tona ʼohoana ʼo toe hagē pē ko Kilisito ʼe pule ki te kōkelekāsio, heʼe ko ia te fakamaʼuli ʼo te sino ʼaia. ʼU tagata ʼohoana, ke kotou haga ʼofa ki ʼokotou ʼohoana, ohagē ko te ʼofa ʼa Kilisito ki te kōkelekāsio pea mo ina foaki ia ia totonu maʼa te kōkelekāsio.” (Efe. 5:23, 25) ʼIo, ko te aga ʼaē ʼa Sesu ki tana ʼu tisipulo, ʼe ko he faʼifaʼitaki maʼa te ʼu tagata ʼohoana Kilisitiano ʼo ʼuhiga mo tanatou aga ʼaē ki ʼonatou ʼohoana. Tou vakaʼi age muʼa he ʼu ʼaluʼaga neʼe fakahā ai e Sesu tana pule ʼaē neʼe foaki age e te ʼAtua.
5. Neʼe takitaki feafeaʼi e Sesu ia tana ʼu tisipulo?
5 Ko Sesu neʼe “agamalū pea mo loto agavaivai.” (Mat. 11:29) Kae kā tonu ke fakatonutonuʼi he meʼa pea neʼe fai e Sesu te faʼahi ʼaia. Neʼe maʼuhiga tuʼumaʼu kiā te ia, tana fakahoko ʼaē ʼo tona ʼu maʼua. (Mko. 6:34; Soa. 2:14-17) Neʼe mole fefeka tana ʼu fai tokoni ʼaē ki tana ʼu tisipulo, tatau aipē pe neʼe ʼaoga ke liuliuga tona fai. (Mat. 20:21-28; Mko. 9:33-37; Luka 22:24-27) Koia, neʼe mole ina munaʼi nātou peʼe fakalainoaʼi nātou, neʼe mole loto ke natou manatu ʼe mole ʼofainaʼi nātou peʼe mole natou lavaʼi te ʼu faʼahi ʼaē ʼe ina akoʼi age kiā nātou. Neʼe ina vikiʼi pea mo fakalotomālohiʼi tana ʼu tisipulo ke natou fai ia te meʼa ʼaē ʼe lelei. (Luka 10:17-21) Koia ʼaē neʼe maʼu ai e Sesu ia te fakaʼapaʼapa ʼo tana ʼu tisipulo, ʼuhi ko tana ʼofa pea mo tana aga manavaʼofa ʼaē kiā nātou!
6. (a) Koteā te ako ʼe feala ke maʼu e he tagata ʼohoana mai te aga ʼaē ʼa Sesu ki tana ʼu tisipulo? (b) Koteā te fakalotomālohi ʼe foaki e Petelo ki te ʼu tagata ʼohoana?
6 ʼAki te faʼifaʼitaki ʼa Sesu, ʼe ina akoʼi ki te ʼu tagata ʼohoana ko te pule Fakakilisitiano ʼe mole fai ʼaki he aga ʼe fefeka. Kailoa ia, kae ke fai ʼaki te fakaʼapaʼapa pea mo te ʼofa fakasākilifisio. Neʼe fakalotomālohiʼi e te ʼapositolo ko Petelo ia te ʼu tagata ʼohoana ke natou faʼifaʼitakiʼi te ʼu aga ʼofa ʼa Sesu, ʼo natou “haga nonofo” mo ʼonatou ʼohoana, “o fakamaʼuhigaʼi nātou.” (Lau ia 1 Petelo 3:7.) Kae ʼe feafeaʼi ki he tagata ʼohoana hana fakaʼaogaʼi tana pule ʼaē neʼe foaki age e te ʼAtua pea mo ina fakamaʼuhigaʼi ia tona hoa?
7. ʼE lava fakamaʼuhigaʼi feafeaʼi e te tagata ʼohoana ia tona hoa? Kotou tuku mai he faʼifaʼitaki.
7 Kapau ko te tagata ʼohoana ʼi muʼa ʼo hana fai he ʼu tonu ʼe malave anai ki tona fāmili, ʼe ina tokagaʼi muʼa ia te manatu pea mo te ʼu meʼa ʼaē ʼe loto kiai tona hoa, pea ʼe ina fakamaʼuhigaʼi ia tona ʼohoana. ʼE lagi tonu ke fai he puleʼaki ʼo ʼuhiga mo hanatou hiki ki he tahi fale peʼe ko he fetogi gāue, peʼe ko he ʼu meʼa ʼo ʼuhiga mo tonatou maʼuli ʼi te ʼaho fuli, ohagē lā peʼe kofea ʼaē kā natou ʼolo ʼo mālōlō kiai, peʼe ko te fakaʼaluʼalu ʼo tanatou falā ʼi te ʼu temi ʼaē ʼe natou faigataʼaʼia ai. Mai tona ʼaluʼaga ʼaē, ko te ʼu faʼahi ʼaia ʼe malave anai ki te maʼuli ʼo te fāmili, koia ʼe ʼaoga ai pea mo lelei ai ki te tagata ʼohoana ke ina fakalavelave muʼa ki tona ʼohoana, heʼe ko he faʼahi ʼe tokoni anai ki ai ke ina fai he tonu ʼe fakapotopoto pea mo lelei, pea ʼe faigafua ai anai ki te fafine hana lagolago ki tona ʼohoana. (Taag. 15:22) Ko te ʼu tagata ʼohoana Kilisitiano ʼaē ʼe natou fakamaʼuhigaʼi ʼonatou hoa, ʼe natou maʼu anai ia te ʼofa pea mo te fakaʼapaʼapa ʼo tonatou ʼu hoa, kae ko te faʼahi ʼaē ʼe maʼuhiga age, ko tanatou maʼu ia te ʼofa ʼo Sehova.—Efe. 5:28, 29.
ʼE Feafeaʼi Ki He Fafine ʼOhoana Hana Fakaʼapaʼapa Lahi Ki Tona ʼOhoana?
8. He koʼē ʼe mole tonu ke muliʼi ia te faʼifaʼitaki ʼa Eva?
8 Ko Sesu ʼe ko he faʼifaʼitaki lelei maʼa te ʼu fafine ʼohoana Kilisitiano ʼo ʼuhiga mo te fakalogo ʼaē ki te tuʼulaga pule. ʼE mole tatau te manatu ʼa Sesu ʼo ʼuhiga mo te pule pea mo te aga ʼaē neʼe maʼu e te ʼuluaki fafine! Ko Eva ʼe mole ko he faʼifaʼitaki lelei ke muliʼi e te ʼu fafine ʼohoana. Neʼe ʼi ai tona pule neʼe foaki age e te ʼAtua, ʼaē neʼe fakahā age ki ai e Sehova ia te ʼu fakatotonu. Kae ko Eva neʼe mole fakaʼapaʼapa ki te fakatuʼutuʼu ʼaia. Neʼe mole ina tali te fakatotonu ʼaē neʼe fakahā age e Atama kiā te ia. (Sen. 2:16, 17; 3:3; 1 Ko. 11:3) ʼE moʼoni neʼe kākāʼi ia Eva, kae neʼe tonu ke ina fakalavelave ki tona ʼohoana peʼe tonu ke fakatui ki te leʼo ʼaē neʼe ina ʼui age ko te ‘ ʼAtua ʼe ina ʼiloʼi.’ Kae neʼe ina fia takitaki ia tona ʼohoana.—Sen. 3:5, 6; 1 Tim. 2:14.
9. Koteā te faʼifaʼitaki neʼe tuku mai e Sesu ʼaki tana fakalogo?
9 Kae ko Sesu ia, neʼe ina tuku ia he faʼifaʼitaki lelei ʼo ʼuhiga mo te fakalogo ki tona Pule. ʼI tana aga pea mo tona maʼuli, neʼe ina fakahā tana ‘mole fia faʼao tuʼulaga, ke liliu ʼo tatau mo te ʼAtua.’ Kailoa ia, kae “neʼe ina meʼa noaʼi ia ia totonu, pea mo liliu ai ko he kaugana.” (Filp. 2:5-7) Iā ʼaho nei, ʼi tana kua ʼafio Hau, ʼe mole heʼeki fetogi Sesu. ʼE agavaivai aipē, ʼo fakalogo ki tana Tamai iā meʼa fuli pea mo lagolago ki Tana pule.—Mat. 20:23; Soa. 5:30; 1 Ko. 15:28.
10. ʼE lagolago feafeaʼi anai he fafine ʼohoana ki te takitaki ʼo tona hoa?
10 Ko he fafine ʼohoana Kilisitiano ʼe tonu ke ina faʼifaʼitakiʼi Sesu ʼaki tana lagolago ki te takitaki ʼo tona ʼohoana. (Lau ia 1 Petelo 2:21; 3:1, 2.) Tou vakaʼi ia he ʼaluʼaga ʼe feala ai hana fakahā ia te faʼahi ʼaia. ʼE faiga ia tana tama ke tuku age e tana faʼē he fakagafua ke ʼalu ki he fakafiafia, pea ʼe ʼaoga kiai te fakagafua ʼa tana tamai pea mo tana faʼē. Mai tona ʼaluʼaga ʼaē neʼe mole heʼeki felōgoi te taumātuʼa ki te faʼahi ʼaia, ʼe lagi lelei anai ki te fafine ke ina fehuʼi fēnei age ki tana tama: “Kua ke kole ki tau Tamai?” Kapau ʼe mole heʼeki ina fai, pea ʼe tonu anai ki te fafine ke felōgoi muʼa mo tona ʼohoana ʼi muʼa ʼo hana tuku age he tali. Tahi ʼaē, ʼe lagi lelei anai ki he fafine ʼohoana Kilisitiano ke mole ina fakafihiʼi tona ʼohoana peʼe fakafeagai ki hana tonu ʼi muʼa ʼo tanā fānau. Kapau ʼe mole manatu tahi mo tona ʼohoana, pea ʼe felōgoi anai mo ia kiai mokā ko nāua ʼāteaina pē.—Efe. 6:4.
Te Faʼifaʼitaki ʼa Sesu Ke Muliʼi e Te ʼu Mātuʼa
11. Koteā te faʼifaʼitaki neʼe tuku e Sesu ki te ʼu mātuʼa?
11 Tatau aipē pe neʼe heʼeki ʼohoana Sesu pe neʼe mole hana fānau, kae ʼe ko he faʼifaʼitaki lelei maʼa te ʼu mātuʼa Kilisitiano. ʼO feafeaʼi? Neʼe ina akoʼi tana ʼu tisipulo ʼaki te ʼofa pea mo te faʼa kātaki, ʼi tana ʼu palalau pea ʼi tana aga. Neʼe ina fakahā age kiā nātou te faʼahiga fai ʼo te gāue ʼaē neʼe ina foaki age kiā nātou. (Luka 8:1) Ko te aga ʼa Sesu ki tana ʼu tisipulo, neʼe ko he ako kiā nātou ʼo ʼuhiga mo tanatou faʼahiga aga ʼaē ke natou fefakahāʼaki iā nātou.—Lau ia Soane 13:14-17.
12, 13. Koteā ʼaē ʼe fakamaʼua ki te ʼu mātuʼa mo kapau ʼe tonu ke natou akoʼi tanatou fānau ke natou manavasiʼi ki te ʼAtua?
12 ʼI te agamāhani, ʼe faʼifaʼitakiʼi e te fānau ia tanatou ʼu mātuʼa, peʼe lelei peʼe kovi. Koia, ʼu mātuʼa, kotou fai ia te ʼu fehuʼi ʼaenī kiā koutou totonu pē: ‘Koteā te ako ʼe mā tuku ki tamā fānau ʼo ʼuhiga mo te temi ʼaē ʼe mā fakaʼaogaʼi ki te sioʼi ʼo te televisio pea mo te ʼu fakafiafia, pea mo te temi ki te ako ʼo te Tohi-Tapu pea mo te fai fakamafola? Koteā ʼaē ʼe fakamuʼamuʼa tāfito e tomā fāmili? ʼE mā tuku koa he faʼifaʼitaki lelei ʼaki tamā fakamuʼamuʼa ʼi tomā maʼuli ia te tauhi moʼoni?’ Ko te lao ʼa te ʼAtua ʼe tonu muʼa ke nofo ʼi te loto ʼo te ʼu mātuʼa, mo kapau ʼe nā loto ke manavasiʼi tanā fānau ki te ʼAtua ʼi tanatou lahilahi ake.—Teu. 6:6.
13 Kapau ʼi te ʼaho fuli, ʼe faiga te ʼu mātuʼa ke nā maʼuliʼi te ʼu pelesepeto Fakatohi-tapu, pea ʼe tokagaʼi anai e te fānau. ʼE fua lelei anai te ʼu palalau pea mo te ʼu faiakonaki ʼa te ʼu mātuʼa. Kae kapau ʼe fakatokagaʼi e te fānau, ʼe mole muliʼi e te ʼu mātuʼa ia te ʼu pelesepeto ʼaē e natou fakamaʼua age kiā nātou, pea ʼe lagi natou manatu anai ʼe mole maʼuhiga peʼe mole ʼaoga te ʼu pelesepeto ʼaia kiā nātou. ʼO feala ai ki te fānau ke natou higa gafua ki te ʼu fakahala ʼo te mālamanei.
14, 15. Ko te ʼu koloa fea ʼaē ʼe tonu ki te ʼu mātuʼa ke natou fakatuputupu ʼi te loto ʼo tanatou fānau, pea koteā te puleʼaki ʼe feala ke natou fai ʼo ʼuhiga mo te faʼahi ʼaia?
14 ʼE ʼiloʼi e te ʼu mātuʼa Kilisitiano, ko te taupau ʼo he tamasiʼi, ʼe mole gata pē ʼi te faʼahi fakasino. Koia, ʼe mole fakapotopoto anai ki he ʼu mātuʼa hanatou akoʼi tanatou fānau ke natou fai he ʼu fakatuʼutuʼu ʼe ʼaoga anai pē ki tonatou maʼuli fakasino. (Tnk. 7:12) Neʼe akoʼi e Sesu ki tana ʼu tisipulo, ke nātou kumi muʼa ia te Puleʼaga pea mo tana faitotonu. (Mat. 6:33) Koia ohagē ko Sesu, ʼe faiga anai ia te ʼu mātuʼa Kilisitiano ke natou fakatuputupu ʼi te loto ʼo tanatou fānau, ia te holi ʼaē ke natou haga kumi ia te ʼu koloa fakalaumālie.
15 Pea ki te faʼahi ʼaia, ʼe feala ki te ʼu mātuʼa ke natou fakafealagia ke felōgoi tanatou fānau mo nātou ʼaē ʼe kau ki te selevisi temi kātoa. ʼE ko he fakalotomālohi ʼe feala ke maʼu e te kau tūpulaga ʼi tanatou feʼiloʼiʼaki mo te kau pioniē peʼe ko te tehina taupau pea mo tona ʼohoana. Ko te fakatahitahi mo he ʼu misionea, mo he ʼu Petelite pea mo nātou ʼaē ʼe kau ki te ʼu gāue laga fale fakamālamanei, ʼe feala ke natou fakamatala ia te ʼu fiafia ʼaē ʼe natou maʼu ʼi tanatou tauhi ʼaē kiā Sehova. ʼE mahino ia, ko te fakatahitahi mo te ʼu tehina mo tuagaʼane ʼaia, ʼe natou fakamatala anai ia te ʼu meʼa lelei ʼaē neʼe hoko kiā nātou. ʼAki tanatou faʼifaʼitaki, ʼi tanatou maʼuli fakasākilifisio ʼaē ʼi tanatou selevisi, ʼe feala ai ke tokoni ʼaupitō ki takotou fānau ke natou fai he ʼu tonu fakapotopoto, ke natou fai he ʼu fakatuʼutuʼu ʼe ʼalutahi mo tanatou tauhi ʼaē ki te ʼAtua, pea mo fakafuafua lelei pē tanatou ako ʼaē ʼi te ʼu faleako, ke feala hanatou kau mo nātou ki te selevisi temi kātoa.
ʼU Fānau, Koteā ʼAē Kā Tokoni Atu Ke Kotou Muliʼi Ia Te Faʼifaʼitaki ʼa Sesu?
16. Neʼe fakamaʼuhigaʼi feafeaʼi e Sesu ia tana ʼu mātuʼa fakakelekele pea mo tana Tamai ʼaē ʼe ʼi selō?
16 ʼU fānau, ʼe toe tuku atu kiā koutou e Sesu ia he faʼifaʼitaki lelei. Neʼe foaki age ia Sesu kiā Malia mo Sosefo ke nā taupau, pea neʼe fakalogo ia kiā nāua. (Lau ia Luka 2:51.) Logolā tonā ʼuhiga heʼe haohaoa, kae neʼe ʼiloʼi e Sesu, neʼe tuku age e te ʼAtua kiā nāua te maʼua ʼaē ke nā taupau ia ia. Koia, neʼe tonu ai ke ina fakamaʼuhigaʼi ia Malia mo Sosefo. (Teu. 5:16; Mat. 15:4) ʼI tana kua tagata leva, neʼe fai tuʼumaʼu pē e Sesu ia te meʼa ʼaē leleiʼia e tana Tamai ʼe ʼi selō, ke fakafeagai ki te fakahala. (Mat. 4:1-10) ʼU tūpulaga, ʼe lagi ʼi ʼihi temi ʼe mole kotou fia fakalogo ki takotou ʼu mātuʼa. Koia, koteā ʼaē kā tokoni atu ke kotou muliʼi ia te faʼifaʼitaki ʼa Sesu?
17, 18. (a) Koteā te ʼu fakahala ʼaē ʼe tau mo te kau tūpulaga ʼi te ʼu faleako? (b) Koteā ʼaē ʼe feala ke manatuʼi e te kau tūpulaga ke tokoni ai kiā nātou mokā natou felāveʼi mo he ʼu fakahala?
17 ʼE lagi tokolahi ia nātou ʼaē ʼi te faleako ʼe natou manukinukiʼi te ʼu lēkula ʼo te Tohi-Tapu. ʼE lagi natou faigaʼi ke kotou kau ki he ʼu aga ʼe kovi pea mo natou vāʼi koutou mokā mole kotou muliʼi tanatou ʼu aga. ʼI takotou mole kau mo nātou ki tanatou ʼu aga, ʼe lagi natou foaki atu anai ni ʼu kiʼi higoa moʼo vāʼi ʼo koutou. Kapau ʼe hoko he ʼu meʼa fēia, koteā ʼaē ʼe kotou fai? ʼE kotou ʼiloʼi, kapau ʼe kotou mātataku kiā nātou pea mo muliʼi te kaugamālie, ʼe lotomamahi ai anai takotou ʼu mātuʼa pea mo Sehova. Koteā anai kā hoko mo kapau ʼe kotou muliʼi tokotou ʼu kaugā ako? Kua lagi kotou fai hakotou ʼu fakatuʼutuʼu, ohagē lā ke kotou pioniē peʼe ke kotou faifekau fakaminisitelio, ke kotou ʼolo ki he telituale ʼe ʼaoga tāfito kiai he kau fai fakamafola, peʼe ke kotou Petelite. Ko takotou fakakaugā ʼaē ki tokotou ʼu kaugā ako, ʼe tokoni atu anai koa ke kotou fakahoko takotou ʼu fakatuʼutuʼu ʼaia?
18 ʼU tūpulaga Kilisitiano, kua kotou tō koa ʼi he ʼu ʼaluʼaga ʼe fakatupu tūkia ki takotou tui? ʼE kotou feafeaʼi anai ʼi te ʼu lakaga ʼaia? Kotou manatuʼi ia tokotou faʼifaʼitakiʼaga ko Sesu. Neʼe mole tō ki te fakahala, kae neʼe pipiki maʼu ia ki te meʼa ʼaē neʼe ina ʼiloʼi ʼe faitotonu. Kā kotou manatuʼi te faʼifaʼitaki ʼa Sesu, pea ʼe tokoni atu anai ke kotou maʼu ia te mālohi ʼaē moʼo fakahā fakalelei ki tokotou ʼu kaugā ako, ʼe mole kotou fia fakatahi mo nātou ki te fai ʼo te meʼa ʼaē ʼe kotou ʼiloʼi lelei ʼe kovi. Ohagē ko Sesu, kotou haga tokagaʼi tāfito ia te maʼuli ʼi te selevisi fakafiafia pea mo fakalogo kiā Sehova.—Hep. 12:2.
Te Kalavī ʼAē Ke Maʼu Ai He Maʼuli Fakafāmili Fiafia
19. Ko te faʼahiga maʼuli fea ʼaē ʼe tou maʼu ai te fiafia moʼoni?
19 Ko Sehova ʼAtua pea mo Sesu Kilisito ʼe nā loto ki te meʼa ʼaē ʼe lelei maʼa te mālamanei. Logolā totatou ʼuhiga heʼe haohaoa, kae ʼe tou lava maʼu he maʼuli fiafia. (Isa. 48:17, 18; Mat. 5:3) Neʼe akoʼi e Sesu ki tana ʼu tisipulo ia te ʼu moʼoni fakalotu, ʼaē ko te tafitoʼaga ʼo te maʼuli fiafia ʼo te mālamanei, ʼo mole gata aipē. Neʼe toe akoʼi e Sesu ia te faʼahiga maʼuli ʼaē ʼe lelei tokotahi age. ʼO mole gata pē ʼi tana ʼu palalau, kae neʼe ina fakahā ʼi tona maʼuli fakapotopoto pea mo tana aga ia he faʼifaʼitaki lelei. Ko tātou fuli ʼi te fāmili, ʼe feala ke tou maʼu te ʼu fua lelei ʼi tatatou muliʼi ia tana faʼifaʼitaki. Koia, ʼu tagata ʼohoana, ʼu fafine ʼohoana, ʼu mātuʼa, pea mo fānau, kotou muliʼi te faʼifaʼitaki ʼa Sesu! Kā tou maʼuliʼi te ʼu akonaki ʼa Sesu pea mo muliʼi tana faʼifaʼitaki, pea ʼe ko te kalavī moʼoni ʼaia, ke tou maʼu ai he maʼuli fakafāmili ʼe lelei pea mo fiafia.
ʼE Kotou Tali Feafeaʼi Anai?
• ʼE tonu ke fakahoko feafeaʼi e te ʼu tagata ʼohoana tonatou tuʼulaga pule ʼaē neʼe foaki age e te ʼAtua?
• ʼE feafeaʼi ki he fafine hana muliʼi ia te faʼifaʼitaki ʼa Sesu?
• Koteā ʼaē ʼe lava ako e te ʼu mātuʼa mai te aga ʼaē neʼe fai e Sesu ki tana ʼu tisipulo?
• Koteā te ako ʼe lava maʼu e te kau tūpulaga mai te faʼifaʼitaki ʼa Sesu?
[Paki ʼo te pasina 14]
ʼI muʼa ʼo he fai ni ʼu tonu ʼe malave ki te fāmili, koteā ʼaē kā fai anai e te tagata ʼohoana ʼofa?
[Paki ʼo te pasina 15]
Ko te ʼaluʼaga fea ʼaē ʼe maʼu ai e he fafine ʼohoana ia te faigamālie ʼaē ke lagolago ki te takitaki ʼo tona ʼohoana?
[Paki ʼo te pasina 16]
ʼE faʼifaʼitakiʼi e te fānau ia te ʼu agamāhani ʼaē ʼe lelei ʼo tanatou ʼu mātuʼa