‘Ko He ʼu Tagata Neʼe Foaki’ Moʼo Tauhi Te ʼu Ōvi ʼa Sehova

“I tana hake ki te maoluga, nee ina fakapopula he kau popula; nee [“ina foaki he ʼu tagata,” MN] ki te hahai.”​—Efeso 4:8.

1. Koteā te ʼu palalau ʼaē neʼe fai e te tuagaʼane ʼo ʼuhiga mo te kau tagata ʼāfea ʼo tana kokelekasio?

“MĀLO takotou tokaga fakalelei kia mātou. ʼI takotou malimali fakamalotoloto, mo takotou ʼu palalau fakaloto māfana, pea mo takotou tokaga kia mātou. ʼE koutou maʼu tuʼumaʼu hokotou temi ke koutou fakalogo kia mātou pea mo tuku mai he ʼu palalau fakaloto mālohi ʼaki te Tohi-Tapu. ʼOfa pe ke ʼau fakafetaʼi tuʼumaʼu ki te gāue ʼaē ʼe koutou fai.” Ko te ʼu palalau ʼaia neʼe fai e te tuagaʼane ki te kau tagata ʼāfea ʼo tana kokelekasio. ʼE hā lelei mai, neʼe malave ʼaupito kia ia te ʼofa ʼaē neʼe fakahā age e te ʼu tagata ʼāfea ʼo tana kokelekasio.​—1 Petelo 5:​2, 3.

2, 3. (a) ʼO mulimuli kia Isaia 32:​1, 2, ʼe tokaga feafeaʼi te ʼu tagata ʼāfea ki te ʼu ōvi ʼa Sehova? (b) Koteā te gāue ʼaē ʼe tonu ke fai e he tagata ʼāfea ke fakahigoa ia ia ko he meʼa ʼofa?

² Ko te ʼu tagata ʼāfea ʼe ko he fakatuʼutuʼu neʼe fai e Sehova moʼo taupau tana ʼu ōvi. (Luka 12:32; Soane 10:16) ʼE ʼofa mamahi Sehova ki tana ʼu ōvi​—pea ʼi te lahi ʼo tana ʼofa ʼaia, neʼe ina totogi nātou ʼaki te taʼataʼa maʼuhiga ʼo Sesu. ʼE mole tou punamaʼuli ai ʼi te fiafia ʼa Sehova mokā gaohi fakaleleiʼi tana ʼu ōvi e te ʼu tagata ʼāfea. (Gaue 20:28, 29) Koutou fakatokagaʼi te ʼu palalau fakakikite ʼaē neʼe fai ʼo ʼuhiga mo te ʼu tagata ʼāfea peʼe ko te ʼu “pilinise” ʼaia: “ ʼE tonu anai ke nātou tahi liliu ko he nonoʼaga mokā matagi pea ko he holaʼaga mokā afā, ohage ko he ʼu kiʼi vaitafe ʼi he potu moamoa, ohage ko te malumalu ʼo he maka lahi ʼi he kele kakā.” (Isaia 32:​1, 2) Ei, ʼe tonu ke nātou puipui, mo fakaloto mālohi, pea mo fakafimālieʼi tana ʼu ōvi. Koia, ko te ʼu tagata ʼāfea ʼaē ʼe nātou tauhi te ʼu ōvi ʼaki te lotoʼofa, ʼe nātou faiga ke nātou fakahoko te maʼua ʼaē neʼe tuku age e te ʼAtua.

³ ʼE ʼui e te Tohi-Tapu ʼo ʼuhiga mo te ʼu tagata ʼāfea ʼaia, ʼe ko ‘he ʼu tagata neʼe foaki mai.’ (Efeso 4:⁠8) Ka koutou fia fai he meʼa ʼofa ki he tahi, ʼe koutou manatu ki he meʼa ʼe ʼaoga anai kia ia pea ʼe fakatupu fiafia anai ki ai. ʼE feala ke fakahigoaʼi he tagata ʼāfea ʼe ko he meʼa ʼofa, mo kapau ʼe ina fakaʼaogaʼi tana poto moʼo tokoni ki te ʼu ōvi ke nātou fiafia. E feafeaʼi tana fai ia te faʼahi ʼaia? ʼE tou maʼu tona tali ʼi te ʼu palalau ʼaē neʼe fai e Paulo ia Efeso 4:​7-16, pea ʼe fakahā ai te ʼofa ʼa Sehova ki tana ʼu ōvi.

‘Ko He ʼu Tagata Neʼe Foaki Mai’—Ko He ʼu Tagata Maifea?

4. ʼI te fakahoko ʼo te koga tohi ʼo Pesalemo 68:​18, neʼe feafeaʼi te ‘hake ʼa Sehova ki ʼoluga,’ pea neʼe ko ai ‘te ʼu tagata ʼaē neʼe foaki mai’?

⁴ ʼI te talanoa ʼa Paulo ʼo ʼuhiga mo te ʼu ‘tagata ʼaē neʼe foaki mai,’ neʼe ina fakaʼaogaʼi te ʼu palalau ʼa Tavite, ʼaē neʼe ina ʼui fēnei ʼo ʼuhiga mo Sehova: “Neʼe ke hake ki ʼoluga; neʼe ke ʼave he kau pilisoni; neʼe ke toʼo he ʼu meʼa ʼofa fakatagata.” (Pesalemo 68:18) ʼI te ʼosi nofo ʼa te kau Iselaelite ʼi te Kele ʼo te Fakapapau lolotoga ni ʼu taʼu, neʼe “hake” Sehova ʼi hona ʼaluʼaga fakatā ki te Moʼuga ʼo Sione, pea ina hinoʼi ia Selusalemi ʼe ko te kolo muʼa ʼo te puleʼaga ʼo Iselaele, pea neʼe fakanofo hau ai ia Tavite. Kae neʼe ko ai koa te “ ʼu meʼa ʼofa fakatagata”? Neʼe ko te ʼu tagata ʼaē neʼe pilisoniʼi ʼi te ʼosi ʼohofiʼi ʼo te fenua. Ko ʼihi ʼi te kau pilisoni ʼaia neʼe foaki ki muli age ki te kau Levite, ke nātou tokoni ki te gāue ʼaē neʼe fai ʼi te tapenakulo.​—Esitalasi 8:​20.

5. (a) ʼE fakahā feafeaʼi e Paulo, ʼe ʼi ai te tahi fakahoko ʼo Pesalemo 68:​18 ʼi te kokelekasio faka Kilisitiano? (b) Neʼe ‘hake feafeaʼi ia Sesu ki ʼoluga’?

⁵ ʼE fakahā e Paulo ʼi tana tohi ki te kau Efeso, ko te ʼu palalau ʼa te tagata fai pesalemo ʼe ʼi ai tona tahi fakahoko lahi ʼi te kokelekasio faka Kilisitiano. ʼI tana fakanounou te koga tohi ʼo Pesalemo 68:18, ʼe tohi fēnei e Paulo: “Pea nee foaki mai kia tatou taki tokotahi te kalasia o fai ki te fakafuafua o te meaofa o Kilisito. E ko te tupuaga aia o tana folafola: ‘I tana hake ki te maoluga, nee ina fakapopula he kau popula; nee [“ina foaki he ʼu tagata,” MN] ki te hahai.’ ” (Efeso 4:​7, 8) ʼI henī, ʼe fakaʼaogaʼi e Paulo te pesalemo moʼo faka ʼuhiga kia Sesu ʼi tona ʼuhiga tagata fakafofoga ʼa te ʼAtua. Ko Sesu neʼe “malo i te malama-nei” he neʼe nofo agatonu. (Soane 16:33) Neʼe toe mālo foki ʼi te mate pea mo Satana, he neʼe fakatuʼuake ia ia e te ʼAtua mai te mate. (Gaue 2:​24; Hepeleo 2:​14) ʼI te taʼu 33 ʼo totatou temi, ko Sesu ʼaē neʼe kua fakatuʼuake neʼe hake “o maoluga ake i te u lagi fuape”​—ko tona faka ʼuhiga, ʼo māʼoluga ake ʼi te tahi ʼu ʼaselo. (Efeso 4:​9, 10; Filipe 2:​9-11) Mai tona ʼuhiga ʼaē neʼe mālo Sesu ʼi te temi ʼaia, koia neʼe ina toʼo “he kau popula” ʼi tona ʼu fili. ʼO feafeaʼi?

6. ʼI te Penikosite ʼo te taʼu 33 ʼo totatou temi, neʼe kamata kaihaʼa feafeaʼi e Sesu te ʼapi ʼa Satana, pea koteā ʼaē neʼe ina fai ʼaki te “kau popula”?

⁶ ʼI tana kei nofo ʼi te kele, neʼe fakahā e Sesu tona mālohi kia Satana ʼo ina fakamālōlō te hahaʼi ʼaē neʼe ulusino ai te ʼu temonio. Neʼe feala pe ke ʼui, neʼe ʼohofiʼi e Sesu te ʼapi ʼa Satana, ʼo ina haʼi ia ia, pea mo kaihaʼa tana ʼu koloā. (Mateo 12:22-​29) Koutou fakakaukauʼi age muʼa te lahi ʼo te ʼu meʼa ʼaē neʼe feala ke toʼo e Sesu maʼa ia, koteʼuhi ʼi tona kua fakatuʼuake, neʼe ‘foaki kia ia te pule katoa i Selo mo te kelekele’! (Mateo 28:18) ʼI te Penikosite ʼo te taʼu 33 ʼo totatou temi, ko Sesu ʼi tana hake ki selo ʼi tona ʼuhiga tagata fakafofoga ʼa te ʼAtua, neʼe ina kamata toʼo te ʼu meʼa ʼo te ʼapi ʼa Satana ʼo ina ‘fakapopula he kau popula’​—ko he ʼu tagata neʼe kua fualoa tonatou nofo popūla ʼi te agahala pea mo te mate, pea mo te pule ʼa Satana. Ko te kau “popula” ʼaia, neʼe nātou tali ke nātou liliu ko “he u kaugana a Kilisito e natou fai te finegalo o te Atua mo onatou loto katoa.” (Efeso 6:6) ʼI tona fakahagatonu, neʼe faka ʼāteaina nātou e Sesu mai te pule ʼa Satana, pea ʼi te huafa ʼo Sehova, neʼe ina foaki ia nātou ki te kokelekasio ‘ko he ʼu tagata neʼe foaki.’ Koutou fakakaukauʼi age muʼa te toe ʼita lahi ʼa Satana ʼi tana sio ki te ʼu tagata ʼaia neʼe faʼao mai ia te ia!

7. (a) Koteā te ʼu gāue ʼa ‘te ʼu tagata ʼaē neʼe foaki’ ki te kokelekasio? (b) Koteā te faigamālie ʼaē neʼe foaki e Sehova ki te ʼu tagata ʼāfea fuli?

⁷ ʼE ʼi ai koa ‘he ʼu tagata neʼe foaki’ ʼi te kokelekasio ia ʼaho nei? ʼE mahino ia! ʼE nātou tagata ʼāfea, peʼe nātou gāue ko he kau fagonogono ‘ ʼo te evaselio, peʼe nātou tauhi ōvi, peʼe nātou faiako’ ʼi te ʼu kokelekasio e 87 000 ʼa te hahaʼi ʼa te ʼAtua ʼi te kele katoa. (Efeso 4:​11) ʼE fakaʼamu e Satana ke nātou gaohi koviʼi te faga ōvi. Kae ʼe mole ko te fakatuʼutuʼu ʼaia ʼaē neʼe fai e te ʼAtua ʼaki ia Kilisito ʼi tana foaki te ʼu tagata ʼaia ki te kokelekasio. Neʼe foaki e Sehova te ʼu tagata ʼaia ke feala ki te kokelekasio ke maʼuli lelei, pea ʼe kole maʼua anai kia nātou ʼo ʼuhiga mo tanatou tauhi te ʼu ōvi ʼaē neʼe tuku age kia nātou ke nātou taupau. (Hepeleo 13:17) Kapau ko koe ko te tagata ʼāfea, pea neʼe foaki atu e Sehova te faigamālie ʼaē ke ke fakahā ko koe ko te meʼa ʼofa, peʼe ko he tapuakina ki tou ʼu tēhina mo tuagaʼane. ʼE ke fai anai te faʼahi ʼaia mo kapau ʼe ke fakahoko tou ʼu maʼua maʼuhiga e fā.

Ka ʼAoga Ke Fai He “Fakatonutonuʼi”

8. Koteā te ʼu faʼahiga ʼaluʼaga ʼaē ʼe tonu ai ke fakatonutonuʼi tatou ʼi ʼihi temi?

⁸ ʼUluaki puani, ʼe ʼui e Paulo ko te ʼu ‘tagata ʼaē neʼe foaki,’ neʼe foaki “moʼo fakatonutonuʼi te kau maʼoniʼoni.” (Efeso 4:​12, MN) Ko te kupu Keleka ʼaē ʼe fakaliliu ʼaki te kupu “fakatonutonuʼi,” ʼe faka ʼuhiga ki te fakatonutonuʼi ʼo he meʼa ke “ ʼalutahi fakalelei” mo te tahi meʼa. ʼI totatou ʼuhiga agahala, ʼe ʼaoga kia tatou fuli ke fakatonutonuʼi tatou ʼi ʼihi temi​—ke “ ʼalutahi” tatatou fakakaukau mo tatatou aga, pea mo te manatu ʼa te ʼAtua mo tona finegalo. ʼI tona ʼofa, neʼe ‘foaki mai e Sehova he ʼu tagata’ moʼo tokoni kia tatou ke tou fakatotonu tatatou ʼu aga mokā ʼe ʼaoga. E feafeaʼi tanatou fai te faʼahi ʼaia?

9. ʼE lava tokoniʼi feafeaʼi e he tagata ʼāfea, he tahi neʼe lākahala?

⁹ ʼI ʼihi temi, ʼe lagi pāui anai he tagata ʼāfea ke tokoni ki he ōvi neʼe agahala, pe neʼe lagi ‘lākahala ʼi muʼa ʼo hana ʼiloʼi.’ ʼE lava tokoni feafeaʼi te tagata ʼāfea ki te taʼi ʼaluʼaga ʼaia? ʼE ʼui mai ia Kalate 6⁠:​1, “Koutou fakatafoki mai iaʼia, o fai aki mo te agavaivai.” Koia, ka fai tokoni te tagata ʼāfea, ʼe mole ina valokiʼi anai te aga ʼo ia ʼaē neʼe lākahala, peʼe ina fai age he ʼu palalau fefeka. Ko te tokoni ʼe tonu ke fakaloto mālohi, ka mole tonu ke ina “fakamatakutaku” ia ia ʼaē ʼe tokoniʼi. (2 Kolonito 10:9; vakaʼi mo Sopo 33:7.) Kua lagi ufiufi ia ia ʼaē neʼe lākahala, koia ʼe faiga anai te kau tagata ʼāfea ke ʼaua naʼa nātou fakaloto vaivai ia ia. Ka fai he tokoni ʼaki te ʼofa, tatau aipe pe ko he tokoni mālohi, kae ʼe ina fakatonutonuʼi anai te manatu ʼo ia ʼaē neʼe lākahala, pea ʼe toe lelei ai anai.​—2 Timoteo 4:2.

10. Koteā te faka ʼuhiga ʼo te fakatonutonuʼi ʼo ʼihi?

¹⁰ ʼI tana ‘foaki mai he ʼu tagata’ moʼo fakatonutonuʼi ʼo tatou, neʼe loto e Sehova ke fakafimālieʼi tatou e te ʼu tagata ʼāfea ʼaia pea ke tou fia faʼifaʼitaki kia nātou. (1 Kolonito 16:17, 18; Filipe 3:​17) Ko te fakatonutonuʼi ʼo ʼihi, ʼe mole gata ʼaki pe te tokoniʼi ʼo nātou ʼaē neʼe lākahala, kae ʼe toe tonu foki ke tokoni ki te kau faitotonu ke nātou haga pipiki tuʼumaʼu ki te ʼu aga ʼaē ʼe lelei.a Ia ʼaho nei, ʼi te lahi ʼo te ʼu fihifihia ʼaē ʼe fakaloto vaivai, ʼe ʼaoga ke fakaloto mālohiʼi te tokolahi ʼo te kau Kilisitiano. ʼE lagi ʼaoga ki ʼihi ke tokoniʼi nātou ʼaki he agaʼofa ke ʼalutahi tanatou ʼu manatu pea mo te ʼu manatu ʼa te ʼAtua. Ohage la, ʼe manatu e ʼihi Kilisitiano, ʼe mole nātou faiva pea ʼe mole honatou ʼaoga. ʼE lagi manatu e “natou [ʼaia] kua lotovaivai,” ʼe mole ʼofa anai Sehova kia nātou, pea ʼe mole feʼauga anai ki te ʼAtua tanatou ʼu faiga ʼaē ke nātou tauhi kia te ia. (1 Tesalonika 5:​14) Kae ko te faʼahiga manatu ʼaia ʼe mole ʼalutahi pea mo te manatu ʼa Sehova ʼo ʼuhiga mo tana ʼu kaugana.

11. Koteā ʼaē ʼe feala ke fai e te kau tagata ʼāfea moʼo tokoni kia nātou ʼaē ʼe nātou manatu, ʼe mole honatou ʼaoga?

¹¹ ʼU tagata ʼāfea, koteā ʼaē ʼe feala ke koutou fai moʼo tokoni kia nātou ʼaia kua vaivai? ʼAki he lotoʼofa, koutou fakahā age kia nātou ʼaki te Tohi-Tapu, ʼe tokaga Sehova ki tana ʼu kaugana fuli, pea koutou fakamoʼoni age ʼe feala hanatou fakaʼaogaʼi te ʼu vaega ʼaia kia nātou takitokotahi. (Luka 12:​6, 7, 24) Koutou tokoni age kia nātou ke nātou mahino, neʼe ‘taki mai’ nātou e Sehova ke nātou tauhi kia te ia, ko he fakamoʼoni ʼaia ʼo tana faka maʼuhigaʼi ia nātou. (Soane 6:​44) Koutou fakamanatuʼi age kia nātou, ʼe mole nātou tauʼi ʼāteaina pe te fihifihia ʼaia​—ʼe tokolahi te ʼu kaugana ʼa Sehova ʼe nātou tau mo te ʼu fihifihia ʼaia. ʼI te tahi lakaga, neʼe lotomamahi ʼaupito te polofeta ko Eliseo, pea neʼe fia mate ai. (1 Hau 19:​1-4) Ko ʼihi Kilisitiano fakanofo ʼo te ʼuluaki sēkulō, neʼe ‘tauteaʼi’ nātou e tonatou loto. (1 Soane 3:​20) ʼE tou loto fīmālie ʼi tatatou ʼiloʼi ʼaē, ko ʼihi kau faitotonu ʼi te ʼu temi ʼāfea ‘neʼe tatau tonatou natula mo tatou.’ (Sakopo 5:​17) Tahi ʼaē meʼa, ʼe feala ke koutou vakaʼi mo ia ʼaē kua lotovaivai, he ʼu alatike fakaloto mālohi ʼo Te Tule Leʼo pea mo te Réveillez-vous! Ko takotou ʼu faiga moʼo tokoni kia nātou ke nātou toe falala kia Sehova, ʼe tokagaʼi anai e te ʼAtua ʼaē neʼe ina fakatuʼutuʼu koutou “ko he ʼu tagata neʼe foaki.”​—Hepeleo 6:​10.

“Te Laga” ʼo Te Faga Ōvi

12. Koteā ʼaē ʼe hā mai ʼaki te kupuʼi palalau “te laga o te sino o Kilisito,” pea koteā te puleʼaki ki te lagaʼi ʼo te faga ōvi?

¹² Lua puani, “neʼe foaki he ʼu tagata,” ki “te laga o te sino o Kilisito.” (Efeso 4:​12) ʼI te vaega ʼaia, ʼe fai e Paulo he ʼu palalau fakatā. Ko “te laga” ʼe ina fakamanatuʼi mai he laga fale, pea ko “te sino o Kilisito” ʼe faka ʼuhiga ki he ʼu hahaʼi​—ko te kau Kilisitiano fakanofo ʼo te kokelekasio. (1 Kolonito 12:27; Efeso 5:​23, 29, 30) ʼE tonu ke tokoni te kau tagata ʼāfea ki tonatou ʼu tēhina ke nātou tuputupu ʼi te faʼahi fakalaumālie. ʼE nātou fakaʼaogaʼi tonatou pilivilesio ʼaia ‘o uhiga mo te lagiaki, kae mole o uhiga mo te maumauʼi’ ʼo te faga ōvi. (2 Kolonito 10:⁠8) Ko te puleʼaki ki te lagaʼi ʼo te faga ōvi ʼe ko te ʼofa, heʼe “lagai e te ofa.”​—1 Kolonito 8:1.

13. Koteā te faka ʼuhiga ʼo te lotomahino, pea he koʼe ʼe maʼuhiga ke lotomahino te kau tagata ʼāfea?

¹³ Ko te agaaga ʼo te ʼofa ʼaē ʼe ʼaoga moʼo lagaʼi te faga ōvi, ʼe ko te lotomahino. Ko te lotomahino ko tona faka ʼuhiga ke kita logoʼi te meʼa ʼaē ʼe logoʼi e ʼihi ʼi tonatou loto​—ke kita mahino ki tanatou ʼu manatu pea mo tanatou ʼu tuʼakoi. (1 Petelo 3:8) He koʼe koa ʼe ʼaoga ke lotomahino te kau tagata ʼāfea? ʼUhi tāfito heʼe ko Sehova​—ia ia ʼaē ʼe ina ‘foaki mai he ʼu tagata’​—ʼe ko he ʼAtua ʼe lotomahino. Ka lotomamahi tana ʼu kaugana, pea ʼe toe lotomamahi mo ia. (Ekesote 3:7; Isaia 63:9) ʼE ina ʼiloʼi tonatou ʼu tuʼakoi. (Pesalemo 103:14) Koia, ʼe lava feafeaʼi ki te kau tagata ʼāfea ke nātou lotomahino?

14. Koteā te ʼu ʼaluʼaga ʼaē ʼe feala ai ke lotomahino te kau tagata ʼāfea?

¹⁴ Ka ʼalu he tahi ʼe lotovaivai kia nātou, pea ʼe nātou fakalogo kia ia, pea mo nātou mahino ki te ʼu meʼa ʼaē ʼe ina logoʼi ʼi tona loto. ʼE nātou faiga ke nātou mahino ki te ʼaluʼaga, mo te ʼulugaaga ʼo tonatou ʼu tēhina. Koia, ka nātou fai anai he ʼu tokoni faka Tohi-Tapu moʼo lagaʼi ʼo nātou, ʼe tali leleiʼi anai e te ʼu ōvi, heʼe fai te ʼu tokoni ʼaia e he ʼu tagata tauhi ōvi ʼe lotomahino pea mo nātou tokaga moʼoni kia nātou. (Tāʼaga Lea 16:23) Ko te lotomahino ʼe ina uga te kau tagata ʼāfea ke nātou tokagaʼi te ʼu tuʼakoi ʼa te ʼu tēhina mo tuagaʼane pea mo te lagi ʼu fihifihia ʼaē ʼe tupu mai ai. Ohage la, ʼe lotohoha ʼihi Kilisitiano koteʼuhi ʼe mole feala ke lahi tanatou gāue ki te ʼAtua, lagi ʼuhi ko tanatou kua matutuʼa peʼe ko tanatou mahamahaki. ʼI te tahi faʼahi, ʼe lagi ʼaoga anai ke fakaloto mālohiʼi ʼihi ke nātou fakalahi tanatou kau ki te minisitelio. (Hepeleo 5:​12; 6:1) Ko te lotomahino ʼe tokoni anai ki te kau tagata ʼāfea ke nātou maʼu he ʼu “palalau matamatalelei” moʼo fakaloto mālohiʼi ʼo ʼihi. (Tagata Tānaki 12:10) Ka lagaʼi te tui ʼa te ʼu ōvi ʼa Sehova pea mo fakaloto mālohiʼi, pea ʼe uga anai nātou e tanatou ʼofa ki te ʼAtua ke nātou fai ia meʼa fuli moʼo tauhi kia te ia!

Ko He ʼu Tagata ʼe Nātou Fakatuputupu Te Logo Tahi

15. Koteā te faka ʼuhiga ʼo te ʼui ʼaē ke tou “faifaitahi i te tui”?

¹⁵ Tolu puani, neʼe ‘foaki mai he ʼu tagata’ ke tou “tau fuli ai ki te faifaitahi o te tui pea mo te iloi katoa o te Alo o te Atua.” (Efeso 4:​13) Ko te ʼui ʼaē ke tou “faifaitahi [i] te tui” ʼe faka ʼuhiga ki te logo tahi ʼi te tui, kae ʼe tou faka ʼuhiga foki ki te logo tahi ʼo te hahaʼi tui. Ko te tahi tupuʼaga la ʼaia ʼo te ‘foaki mai e te ʼAtua he ʼu tagata’​—ke nātou taupau te logo tahi ʼo tana hahaʼi. E feafeaʼi tanatou fai ia te faʼahi ʼaia?

16. He koʼe ʼe maʼuhiga ke logo tahi te kau tagata ʼāfea?

¹⁶ ʼUluaki, ʼe tonu ke nātou taupau te logo tahi ia nātou. Kapau ʼe mole logo tahi te ʼu tagata tauhi ōvi, pea ʼe mole taupau fakalelei anai te ʼu ōvi. Ko te temi maʼuhiga ʼaē ʼe feala ke fakaʼaogaʼi moʼo taupau te ʼu ōvi, ʼe maumau anai ʼi he ʼu fai palalau loaloaga ʼo ʼuhiga mo he ʼu kiʼi fihifihia noa pe. (1 Timoteo 2:8) ʼE mole lototahi tuʼumaʼu anai te kau tagata ʼāfea ki te ʼu faʼahi fuli ʼaē ʼe nātou vakaʼi, heʼe kehekehe tonatou ʼulugaaga. Ko te logo tahi ʼe mole ko tona faka ʼuhiga, ʼe mole feala ke kehekehe tanatou ʼu manatu, peʼe nātou fakahā fakapotopoto te ʼu manatu ʼaia lolotoga tanatou ʼu fai palalau. ʼE taupau e te ʼu tagata ʼāfea te logo tahi mo kapau ʼe nātou fefakalogoʼaki ʼaki he fakaʼapaʼapa ʼo mole nātou fai fakatomuʼa hanatou tonu ki he faʼahi ka mole heʼeki nātou vakaʼi fakatahi. Kapau ʼe mole fakafeagai ki te ʼu pelesepeto ʼa te Tohi-Tapu, pea ʼe nātou fakalogo fuli anai ki te tonu ʼaē ʼe fai e te kolesi ʼa te kau tagata ʼāfea. Kapau ʼe nātou fakalogo ki te faʼahi ʼaia, pea ʼe nātou fakahā anai ʼe takitaki nātou e te “poto mai oluga,” ʼaē ʼe “tokalelei, [mo] agamalu.”​—Sakopo 3:​17, 18.

17. ʼE lava taupau feafeaʼi e te ʼu tagata ʼāfea te logo tahi ʼo te kokelekasio?

¹⁷ ʼE toe faiga foki te kau tagata ʼāfea ke nātou taupau te logo tahi ʼo te kokelekasio. Ka tuʼutāmakiʼia te tokalelei​—ʼuhi ko te muhumuhu, pe ko te loto mahalohalo, pe ko te laga kē ʼa ʼihi​—pea ʼe nātou foimo fai he ʼu tokoni ʼo ʼuhiga mo te ʼu faʼahi ʼaia. (Filipe 2:​2, 3) Ohage la, ʼe nofo tokaga anai te kau tagata ʼāfea kia nātou ʼaē ʼe nātou fatufatuʼi tuʼumaʼu ʼihi pea mo nātou fia ʼiloʼi te ʼu meʼa ʼa ʼihi. (1 Timoteo 5:​13; 1 Petelo 4:​15) ʼE tokoniʼi anai nātou e te kau tagata ʼāfea ke nātou mahino, ko te aga ʼaia ʼe fakafeagai ki te meʼa ʼaē ʼe akoʼi mai e te ʼAtua, ʼaē ke “tahi fua’pe . . . e te tagata tana kavega totonu.” (Kalate 6:​5, 7; 1 Tesalonika 4:​9-​12) ʼAki te Tohi-Tapu, ʼe nātou fakamahino anai, ʼe lahi te ʼu faʼahi ʼaē ʼe tuku mai e Sehova ke tou faʼitaliha kiai, pea ʼe mole he tahi ia tatou ʼe tonu ke ina valokiʼi te aga ʼa ʼihi ʼo ʼuhiga mo te ʼu faʼahi ʼaia. (Mateo 7:​1, 2; Sakopo 4:​10-12) Ke feala hatatou gāue fakatahi ʼi te logo tahi, ʼe maʼua ke tou fefalalaʼaki pea mo fefakaʼapaʼapaʼaki ʼi te kokelekasio. Kapau ko ‘te ʼu tagata ʼaē neʼe foaki mai,’ ʼe nātou fai he ʼu tokoni faka Tohi-Tapu mokā ʼe ʼaoga, pea ʼe nātou taupau anai te tokalelei pea mo te logo tahi.​—Loma 14:19.

ʼE Nātou Puipui Te Faga Ōvi

18, 19. (a) Ko te ʼu ‘tagata ʼaē neʼe foaki’ ʼe nātou puipui tatou mai ia ai? (b) Koteā te tahi tuʼutāmaki ʼaē ʼe tonu ke puipui mai ai te faga ōvi, pea koteā te meʼa ʼaē ʼe fai e te kau tagata ʼāfea moʼo puipui nātou?

¹⁸ Fā puani, neʼe ‘foaki mai e Sehova he ʼu tagata’ moʼo puipui tatou mai “te matagi fuape o te u akonaki i te faiva a te tagata, aki anatou kaka e natou fakahehe ki te hala.” (Efeso 4:​14) Ko te kupu faka Keleka ʼaē ʼe fakaliliu ʼaki te kupu “kaka,” ʼe faka ʼuhiga ki te “gaoʼi pepa.” ʼE mole feiā koa la te faʼahiga fai ʼa te kau ʼaposita popoto? ʼAki he ʼu fakamahino fakapotopoto, ʼe nātou pikohi te faka ʼuhiga ʼo te ʼu vaega faka Tohi-Tapu moʼo fakahēʼi te kau Kilisitiano moʼoni mai tanatou tui. ʼE tonu ke nofo tokaga te kau tagata ʼāfea ki te ʼu “lupo kaikai” ʼaia!​—Gaue 20:​29, 30.

¹⁹ ʼE tonu ke puipui te ʼu ōvi ʼa Sehova mai te tahi ʼu faʼahiga tuʼutāmaki. Ko te tagata tauhi ōvi ko Tavite ʼo te temi ʼāfea, neʼe ina puipui tuʼumaʼu te ʼu faga ōvi ʼa tana tāmai mai te ʼu manu fekai. (1 Samuele 17:​34-36) ʼO toe feiā pe ia ʼaho nei, ʼe ʼi ai te ʼu lakaga ʼe tonu ai ke lototoʼa te kau tagata ʼāfea moʼo puipui te faga ōvi mai ia nātou ʼaē ʼe nātou gaohi koviʼi peʼe fakamamahiʼi te ʼu ōvi ʼa Sehova, pea tāfito ia nātou ʼaē kua vaivai. ʼE foimo fakamavae anai e te kau tagata ʼāfea ia nātou ʼaē ʼe aga fakakākā ʼi te kokelekasio, pea mo fai he ʼu fakatuʼutuʼu ki te meʼa ʼaē ʼe kovi.b​—1 Kolonito 5:​9-13; vakaʼi mo Pesalemo 101:7.

20. He koʼe ʼe tou fīmālie mokā tokaga kia tatou ‘te ʼu tagata ʼaē neʼe foaki mai’?

²⁰ ʼE tou loto fakafetaʼi ki te ʼu ‘tagata ʼaia ʼaē neʼe foaki’ mai! ʼI tanatou tokakaga kia tatou ʼaki te ʼofa, ʼe tou fīmālie ai, heʼe nātou fakatonutonuʼi tatou ʼaki he agalelei, mo lagaʼi tatou ʼi te ʼofa, mo taupau tatatou logo tahi, pea mo nātou puipui tatou ʼaki he lototoʼa. Kae ʼe tonu ke faka ʼuhiga feafeaʼi e ‘te ʼu tagata ʼaē neʼe foaki’ tanatou gāue ʼi te kokelekasio? ʼE tou lava fakahā feafeaʼi tatatou loto fakafetaʼi kia nātou? ʼE tou tali anai kiai ʼi te alatike ʼaē ka hoa mai.

[Nota ʼi te lalo pasina]

ʼE Kei Koutou Manatuʼi Koa?

◻ Ko ai koa te ʼu ‘tagata ʼaē neʼe foaki,’ pea he koʼe neʼe foaki nātou e Sehova ki te kokelekasio ʼaki ia Kilisito?

◻ ʼE fakahoko feafeaʼi e te kau tagata ʼāfea tonatou maʼua ʼaē ke nātou fakatonutonuʼi te faga ōvi?

◻ Koteā ʼaē ʼe feala ke fai e te kau tagata ʼāfea moʼo lagaʼi tonatou ʼu tēhina mo tuagaʼane?

◻ ʼE lava taupau feafeaʼi e te kau tagata ʼāfea te logo tahi ʼo te kokelekasio?

[Paki ʼo te pasina 10]

Ko te lotomahino ʼe ʼaoga ki te ʼu tagata ʼāfea moʼo fakaloto mālohiʼi ia nātou ʼaē kua lotovaivai

[Paki ʼo te pasina 10]

Kapau ʼe logo tahi te ʼu tagata ʼāfea, pea ʼe toe logo tahi anai mo te kokelekasio