“Ko Te ʼAtua ʼe ʼOfa”

“Ko ʼaē ʼe mole ʼofa neʼe mole ina ako te ʼiloʼi ʼo te ʼAtua, koteʼuhi ko te ʼAtua ʼe ʼofa.”​—1 Soane 4:8, MN.

1-3. (a) Koteā ʼaē ʼe ʼui e te Tohi-Tapu ʼo ʼuhiga mo te kalitate ʼo Sehova ʼaē ko te ʼofa, pea he koʼe ʼe fakaʼaogaʼi pe te ʼu palalau ʼaia ki te kalitate ʼaia? (b) He koʼe ʼe ʼui e te Tohi-Tapu “Ko te ʼAtua ʼe ʼofa”?

KO TE ʼu kalitate fuli ʼo Sehova ʼe mole honatou fakatatau, ʼe nātou haohaoa pea mo leleiʼia ʼaupito. Kae ko te kalitate ʼaē ʼe leleiʼia tāfito ʼi tona ʼu kalitate fuli ʼaia, ʼe ko te ʼofa. ʼE mole he tahi age meʼa ʼe ina fakaōvi tatou kia Sehova ohage ko tona ʼofa. ʼE ko he meʼa fakafiafia, heʼe ko te kalitate tāfito ʼaē ʼe ina maʼu ʼe ko te ʼofa. ʼE tou ʼiloʼi feafeaʼi te faʼahi ʼaia?

² ʼE ʼi ai te faʼahi ʼe talanoa kiai te Tohi-Tapu ʼo ʼuhiga mo te ʼofa, kae ʼe mole ina ʼui te faʼahi ʼaia ʼo ʼuhiga mo te tahi ʼu kalitate maʼuhiga ʼo Sehova. ʼE mole ʼui e te Tohi-Tapu ko te ʼAtua ʼe mālohi peʼe ko te ʼAtua ʼe faitotonu peʼe ko te ʼAtua ʼe poto. ʼE ina maʼu te ʼu kalitate ʼaia pea ʼe ko ia te matapuna tāfito ʼo te ʼu kalitate fuli ʼaia e tolu. Kae ʼo ʼuhiga mo te ʼofa, ʼe ʼi ai te faʼahi ʼe loloto age ʼe ʼui mai ia 1 Soane 4:8: “Ko te ʼAtua ʼe ʼofa.” Ei ko te ʼofa ʼe ko te ʼulugaaga tāfito ʼaia ʼo Sehova. ʼE feala ke tou fakakaukau fēnei: ʼaki tona mālohi ʼe feala kia Sehova ke ina fai he ʼu gāue. Ko tana faitotonu pea mo tona poto ʼe nā takitaki ia ia ʼi tana ʼu gāue. Kae ko te ʼofa ʼo Sehova ʼe ina uga ia ia ke gāue. Pea ʼe hā tuʼumaʼu tona ʼofa mokā ina fakahā tona tahi ʼu kalitate.

³ ʼE tau ʼui ko Sehova totonu ia te ʼofa. Koia, kapau ʼe tou fia ʼiloʼi ʼo ʼuhiga mo te ʼofa, pea ʼe tonu ke tou ako ke tou ʼiloʼi ia Sehova. Koia tou vakavakaʼi ʼihi faʼahi ʼo te ʼofa lahi ʼo Sehova.

Ko Te ʼAluʼaga Lahi ʼAē Neʼe Fakahā Ai Te ʼOfa

4, 5. (a) Koteā te ʼaluʼaga lahi tokotahi ʼi te hisitolia neʼe fakahā ai te ʼofa? (b) He koʼe ʼe feala ke tou ʼui ko Sehova pea mo tona ʼAlo ʼe nā logo tahi ʼuhi ko te noʼo mālohi ʼaē ko te ʼofa?

⁴ Neʼe lahi te ʼu ʼaluʼaga neʼe fakahā ai e Sehova tona ʼofa, kae ʼe ʼi ai te ʼaluʼaga ʼe lahi ʼaupito age. Koteā te ʼaluʼaga ʼaia? Neʼe ko tana fekauʼi ifo tona ʼAlo ke haʼu ʼo mamahi pea mo mate maʼa tatou. ʼE feala ke tou ʼui fakalelei ʼe ko te ʼaluʼaga ʼaia ʼe lahi tokotahi ʼo te fakahā ʼo te ʼofa ʼi te hisitolia katoa. He koʼe ʼe feala ke tou palalau feiā?

⁵ ʼE fakahigoa e te Tohi-Tapu ia Sesu ko “te ʼuluaki-tupu ʼo te ʼu meʼa fuli ʼaē neʼe fakatupu.” (Kolose 1:​15, MN ) Koutou fakakaukauʼi age muʼa, neʼe maʼuli te ʼAlo ʼo Sehova ʼi muʼa ʼo te fakatupu ʼo te ʼatulaulau. Neʼe ko temi koa e fia ʼaē neʼe fakatahi ai te Tāmai pea mo te ʼAlo? Ko ʼihi tagata poto ʼe nātou fakafuafua kua taʼu 13 miliale te fakatuʼu ʼo te ʼatulaulau. Kae tatau aipe peʼe totonu te fakafuafua ʼaia, ʼe mole feʼauga tona loaloaga ke tou ʼiloʼi ai te temi maʼuli ʼo te ʼAlo ʼuluaki tupu ʼo Sehova! Koteā ʼaē neʼe ina fai lolotoga te ʼu taʼu ʼaia? Neʼe gāue fakafiafia te ʼAlo ohage ko he “tufuga gāue” ʼo tana Tāmai. (Tāʼaga Lea 8:​30; Soane 1:3) Ko Sehova pea mo tona ʼAlo neʼe nā gāue toko lua moʼo fakatupu ia meʼa fuli pe. ʼE mahino ia neʼe ko he ʼu temi fakafiafia! Ko ai ia tatou ʼe ina lava mahino moʼoni ki te mālohi ʼo te ʼu felogoi ʼaia lolotoga te toe temi loaloaga ʼaia? ʼE mahino ia, ko Sehova ʼAtua pea mo tona ʼAlo ʼe nā logo tahi ʼuhi ko te noʼo mālohi ʼaē ko te ʼofa.

6. ʼI te temi ʼaē neʼe papitema ai ia Sesu, neʼe fakahā feafeaʼi e Sehova tana manatu ʼo ʼuhiga mo Tona ʼAlo?

⁶ Kae neʼe fekauʼi ifo e Sehova tona ʼAlo ki te kele ke tupu ohage ko he kiʼi toe. Koia lolotoga ni ʼu taʼu neʼe mole fakatahi ai Sehova mo tona ʼAlo ʼofaina ʼi selo. Neʼe tokaga fakalelei ia Sehova kia Sesu, ʼo ina vakavakaʼi mai te lagi tana tuputupu ʼo liliu ko he tagata haohaoa. ʼI tona taʼu 30, neʼe papitema ia Sesu. ʼI te lakaga ʼaia neʼe palalau te Tāmai totonu mai selo, ʼo ina ʼui fēnei: “Ko ia nei ko toku ʼAlo, ia te ʼofaina, ʼaenī kua ʼau fiafia ʼaupito ia te ia.” (Mateo 3:​17, MN ) Neʼe fiafia ʼaupito tana Tāmai, ʼi tana sio ki te agatonu ʼa Sesu ʼo fakahoko ia meʼa fuli ʼaē neʼe fakakikite, pea mo meʼa fuli ʼaē neʼe ina kole age kia te ia!​—Soane 5:​36; 17:4.

7, 8. (a) Koteā ʼaē neʼe kātakiʼi e Sesu ʼi te ʼaho 14 ʼo Nisani ʼo te taʼu 33 ʼo totatou temi, pea neʼe malave feafeaʼi ki tana Tāmai? (b) He koʼe neʼe tuku e Sehova ke mamahi tona ʼAlo pea mo mate?

⁷ Kae neʼe feafeaʼi te loto ʼo Sehova ʼi te ʼaho 14 ʼo Nisani ʼo te taʼu 33 ʼo totatou temi, ʼi te temi ʼaē neʼe lavakiʼi ai Sesu pea mo puke e te toe hahaʼi ʼitaʼita? ʼI te temi ʼaē neʼe manukiʼi ai, mo ʼanuhi pea mo hokaʼi? ʼI te temi ʼaē neʼe huipiʼi, mo lavelavea ai tona tuʼa? ʼI te temi ʼaē neʼe tutuki ai tona ʼu nima pea mo tona ʼu vaʼe ki te pou ʼakau pea mo fakatautau ai kae laukoviʼi ia ia e te hahaʼi? Neʼe feafeaʼi te loto ʼo te Tāmai ʼi te kalaga ake ʼo tona ʼAlo ʼofaina kia te ia ʼi tona mamahi he neʼe tau tūgaki? Neʼe feafeaʼi te loto ʼo Sehova ʼi te temi ʼaē neʼe mate ai Sesu, he neʼe ko te hoki hoko ʼo he meʼa feiā ki Tona ʼAlo ʼofaina talu mai te kamataʼaga ʼo te fakatupu ʼo meʼa fuli?​—Mateo 26:14-​16, 46, 47, 56, 59, 67; 27:26, 38-​44, 46; Soane 19:1.

⁸ ʼE logoʼi e Sehova te ʼu meʼa ʼi tona loto, kae ʼe faigataʼa hatatou fakamatala katoa tona lotomamahi ʼaupito ʼi te mate ʼo tona ʼAlo. Ko te faʼahi ʼaē ʼe feala ke tou fakamatala, ʼe ko te loto ʼo Sehova ke hoko ia te faʼahi ʼaia. He koʼe neʼe tali e te Tāmai ke hoko te toe mamahi ʼaia kia te ia? ʼE fakahā mai kia tatou e Sehova te meʼa fakaofoofo ia Soane 3:16​—ʼuhi ko te maʼuhiga ʼaupito ʼo te vaega faka Tohi-Tapu ʼaia, koia neʼe fakahigoaʼi ko te kiʼi Evaselio veliveli. ʼE ʼui fēnei ai: “He nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” Koia ko te meʼa tāfito ʼaē neʼe ina uga ai te ʼAtua ke ina fai te faʼahi ʼaia ʼe ko te ʼofa. Neʼe mole heʼeki fakahā he toe ʼofa lahi feiā.

ʼE Fakahā Mai e Sehova Tona ʼOfa Kia Tatou

9. Koteā te manatu ʼaē ʼe loto e Satana ke tou maʼu ʼo ʼuhiga mo Sehova, kae koteā ʼaē ʼe ʼui papau mai e Sehova kia tatou?

⁹ Kae ʼe ʼi ai te fehuʼi maʼuhiga ʼe feala ke tou lagaʼi: ʼE ʼofa koa te ʼAtua kia tatou takitokotahi? ʼE feala ke lototahi ʼihi ki te ʼui ʼaē ʼe ʼofa te ʼAtua ki te hahaʼi fuli pe, ohage ko tona ʼui ia Soane 3:​16. Kae ʼe lagi nātou manatu ‘ ʼe mole feala ki te ʼAtua ke ʼofa kia ʼau totonu.’ ʼE faiga e Satana ke tou tui ko Sehova ʼe mole ʼofa kia tatou pea ʼe mole tou maʼuhiga. ʼI te tahi age faʼahi: tatau aipe peʼe tou manatu ʼe mole ʼofainaʼi tatou peʼe mole tou maʼuhiga, kae ʼe ʼui papau mai e Sehova ʼe maʼuhiga kia te ia tana ʼu kaugana agatonu takitokotahi.

10, 11. ʼE fakahā feafeaʼi e te lea fakatātā ʼa Sesu ʼo ʼuhiga mo te ʼu pasele ʼe tou maʼuhiga kia mata ʼo Sehova?

¹⁰ Ohage la, tou vakaʼi te ʼu palalau ʼa Sesu ʼaē ʼe tuʼu ia Mateo 10:29-​31. Moʼo fakatātā ia te maʼuhiga ʼo tana ʼu tisipulo, neʼe ʼui fēnei e Sesu: “ ʼE mole koa la fakatau he ʼu pasele e lua ki he foʼi piesi paʼaga e tahi ʼe mole faʼa maʼuhiga? Kaʼe mole he tahi ia nātou ʼe tō ki te kele ka mole ʼiloʼi e takotou Tāmai. Kaʼe māʼia mo te ʼu fuluʼi ʼulu fuli ʼo tokotou ʼulu kua ʼosi katoa ʼi te lau. Koia, ʼaua naʼa koutou manavasiʼi: ʼE koutou maʼuhiga lahi ake koutou ʼi he tuʼuga pasele.” Tou vakaʼi te faka ʼuhiga ʼo te ʼu palalau ʼaia ki te hahaʼi ʼaē neʼe fagono kia Sesu ʼi te ʼuluaki sēkulō.

¹¹ ʼI te temi ʼo Sesu ko te ʼu pasele ʼaia neʼe totogi lelei age ʼi te ʼu misi ʼaē neʼe fakatau moʼo kai. Neʼe feala ke totogi ia pasele e lua ʼaki pe he foʼi piesi paʼaga e tahi ʼe mole maʼuhiga. Kae neʼe ʼui e Sesu ki muli age, ohage ko tona tuʼu ia Luka 12:​6, 7, kapau ʼe foaki e he tahi he ʼu foʼi piesi paʼaga e lua, pea ʼe mole ʼavage pasele e fā, kae ko pasele e nima. Neʼe hilifaki age te tahi misi ohage pe neʼe mole hona maʼuhiga. Lagi neʼe mole maʼuhiga ki te hahaʼi te ʼu kiʼi misi ʼaia, kae ʼe nātou feafeaʼi kia mata ʼo te Tupuʼaga? Neʼe ʼui fēnei e Sesu: “ ʼE mole he tahi ia nātou ʼaia [māʼia mo te pasele ʼaē neʼe hilifaki age] ʼe galoʼi ia muʼa ʼo te ʼAtua.” ʼI te temi nei ʼe lagi tou kamata mahino ki te manatu ʼa Sesu. Kapau ʼe maʼuhiga kia Sehova he kiʼi pasele e tahi, pea e feafeaʼi age la te maʼuhiga ʼo te tagata kia te ia! Ohage ko tona ʼui e Sesu, ʼe ʼiloʼi e Sehova ia meʼa fuli pe ʼo ʼuhiga mo tatou. Ei, ʼe ina ʼiloʼi peʼe ko totatou ʼu fuluʼi ʼulu e fia.

12. He koʼe ʼe feala ke tou tui papau neʼe moʼoni ia Sesu ʼi tana talanoa ʼo ʼuhiga mo te lau ʼo te ʼu fuluʼi ʼulu ʼo totatou ʼulu?

¹² ʼE lagi faigataʼa anai maʼa ʼihi tanatou tui ki te ʼu palalau ʼa Sesu. Kae koutou fakakaukauʼi age muʼa te fakatuʼuake. ʼE tonu ke ʼiloʼi lelei tatou e Sehova ke feala ai hana toe fakatupu tatou! ʼE tou maʼuhiga ʼaupito kia te ia, ʼo feala ai hana manatuʼi te ʼu faʼahi fuli ʼo ʼuhiga mo tatou, ohage ko te ʼu meʼa ʼaē ʼe nātou faʼufaʼu totatou sino pea mo tatatou ʼu suvenia pea mo te ʼu meʼa neʼe hoko kia tatou. Ko tana lau totatou ʼu fuluʼi ʼulu​—ʼaē ʼe fakafuafua ko fuluʼi ʼulu e 100 000 ʼi totatou ʼulu—ʼe ko he meʼa noa ia mokā fakatatau ki te fakatuʼuake. Ko te ʼu palalau matalelei ʼaia ʼa Sesu ʼe ko he fakamoʼoni ʼaia, ko Sehova ʼe tokaga kia tatou takitokotahi!

13. ʼO ʼuhiga mo Sosafate, ʼe fakahā feafeaʼi ai ko Sehova ʼe ina kumi te meʼa ʼaē ʼe lelei ia tatou logola totatou ʼuhiga agahala?

¹³ ʼE fakahā mai e te Tohi-Tapu te tahi meʼa ʼe tou ʼiloʼi papau ai ʼe ʼofa Sehova kia tatou: ʼE ina kumi pea mo ina faka maʼuhigaʼi te meʼa ʼaē ʼe lelei ʼi totatou loto. Ohage la ko te Hau ko Sosafate. ʼI te temi ʼaē neʼe fai ai e te hau he aga heʼe fakapotopoto, neʼe ʼui fēnei kia ia e te polofeta ʼa Sehova: “ ʼUhi ko te faʼahi ʼaia, koʼeni kua ʼita ia Sehova kia te koe.” ʼE mole fakafiafia te ʼu palalau ʼaia! Kae neʼe mole gata ai te logo mai ia Sehova. ʼE toe hoko atu fēnei: “Kae ʼe ʼi ai te ʼu meʼa lelei ia te koe.” (2 Fakamatala 19:​1-3) Koia ko te ʼita tonu ʼaia ʼa Sehova neʼe mole ina tāʼofi ia ia ke ina tokagaʼi “te ʼu meʼa lelei” ʼo Sosafate. ʼE mole fakaloto fīmālie koa la te ʼiloʼi ʼaē ko totatou ʼAtua ʼe ina kumi te meʼa ʼaē ʼe lelei ia tatou, logola totatou ʼuhiga agahala?

Ko He ʼAtua ʼe “Fakamolemole Gafua”

14. Ka tou agahala, koteā te ʼu meʼa ʼaē ʼe tou logoʼi, kae ʼe lava feafeaʼi ke fakamolemole mai ia Sehova?

¹⁴ Ka tou agahala, ko te lotomamahi, te ufiufi pea mo te tukugakoviʼi ʼo kita ʼaē ʼe lagi tou logoʼi, ʼe feala ke tou manatu ai ʼe mole tau mo tatou ke tou tauhi kia Sehova. Kae koutou manatuʼi ko Sehova ʼe “fakamolemole gafua.” (Pesalemo 86:5) Ei, kapau ʼe tou fakahemala mai tatatou ʼu agahala pea mo tou faiga fakamalotoloto ke mole tou toe fai, pea ʼe feala ke fakamolemole mai ia Sehova. Tou vakaʼi peʼe fakamatala feafeaʼi e te Tohi-Tapu te ʼaluʼaga fakatalakitupua ʼaia ʼo te ʼofa ʼo Sehova.

15. ʼE mamaʼo feafeaʼi te līaki ʼa Sehova tatatou ʼu agahala?

¹⁵ Neʼe ʼui fēnei e te tagata fai pesalemo ko Tavite ʼo ʼuhiga mo te fakamolemole ʼa Sehova: “Ohage pe ko te mamaʼo ʼo te potu esite mai te potu uesite, neʼe Ina līaki mamaʼo feiā tatatou ʼu agahala mai ia tatou.” (Ko mātou ʼaē neʼe mātou fakaʼiloga kehe; Pesalemo 103:12, The Amplified Bible) E feafeaʼi te vaha mamaʼo ʼo te potu esite pea mo te potu uesite? ʼE mamaʼo tuʼumaʼu pe te potu esite mai te potu uesite, ʼe mole feala ke felāveʼi te ʼu potu ʼaia e lua. ʼE ʼui e te tagata sivi Tohi-Tapu ko te kupuʼi palalau ʼaia ko tona faka ʼuhiga “ ʼe mamaʼo ʼaupito, ʼi hona ʼaluʼaga ʼe mole feala ke tou mahino kiai.” Ko te ʼu palalau ʼaē neʼe fai e Tavite ʼaki te takitaki ʼa te laumālie, ʼe ina fakahā mai ko Sehova, mokā ina fakamolemole mai kia tatou, ʼe ina līaki mamaʼo tatatou ʼu agahala.

16. Ka fakamolemole e Sehova tatatou ʼu agahala, he koʼe ʼe tonu ki muli age ke tou manatu ʼe tou maʼa ʼi ʼona mata?

¹⁶ Neʼe kua koutou ʼahiʼahiʼi koa la ke koutou fakatō he pulepule ʼi he kofu hina? Lagi neʼe koutou faiga ke koutou fakamaʼa lelei, kae neʼe mole tō te pulepule. Koutou fakatokagaʼi te fakamatala ʼa Sehova ʼo tana fealagia ʼaē ke fakamolemole: “Ka liliu anai ʼakotou agahala ʼo kula ʼahoʼaho, ʼe nātou liliu anai ʼo hihina ohage ko te nive, kapau ʼe nātou kula ohage ko te kie ʼaē ʼe kula fakapōʼuli, pea ʼe nātou liliu anai ohage ko he fuluʼi akeno.” (Isaia 1:​18) Ko te kupu “kula ʼahoʼaho” ʼe faka ʼuhiga ki he lanu kula ʼe mālama.a Ko te “kula fakapōʼuli” ʼe ko he lanu neʼe fakapōʼuli age ʼi te ʼu lanu kehekehe. ʼE mole feala ke tou toʼo te agahala ʼaki pe totatou mālohi ʼo tatou. Kae ko Sehova ʼe feala ke ina toʼo te ʼu agahala ʼaē ʼe hage ʼe kula ʼahoʼaho pea mo kula fakapōʼuli, ʼo ina fakaliliu ke nātou hihina ohage ko te nive peʼe ko he fuluʼi akeno neʼe mole pena. Koia ka fakamolemole e Sehova tatatou ʼu agahala, pea ʼe mole tonu ke tou manatu ʼe ina taupau tatatou ʼu agahala ʼi totatou maʼuli katoa.

17. Koteā tona faka ʼuhiga ʼo te ʼui ʼaē ko Sehova ʼe ina līaki ki muli tatatou ʼu agahala?

¹⁷ ʼI te hiva fakafetaʼi ʼa Esekiasi ʼe faka malave loto, neʼe ina tohi fēnei ʼo ʼuhiga mo Sehova ʼi tona ʼosi hāofaki mai tona mahaki kovi: “Koteʼuhi neʼe ke līaki ki ʼou tuʼa taku ʼu agahala fuli.” (Isaia 38:17) ʼE ʼui ʼo ʼuhiga mo Sehova ʼe ina toʼo te ʼu agahala ʼa te tagata agahala ʼaē ʼe fakahemala, ʼo ina lī ki muli ke mole toe sio kiai peʼe mole ina toe tokagaʼi. Ohage ko tona ʼui e te tohi, ʼe hage ʼe ʼui fēnei: “Kua hage kia koe neʼe mole ʼau fai [haku ʼu agahala].” ʼE mole ko he manatu fakaloto fīmālie koa la ʼaia?

18. ʼE fakahā feafeaʼi e te polofeta ko Mikea ka fakamolemole ia Sehova, pea ʼe ina pulihi tatatou ʼu agahala ʼo talu ai?

¹⁸ ʼI te fakapapau ʼo ʼuhiga mo te toe liliu ʼa te kau Iselaele, neʼe fakahā e Mikea tana tui papau ʼaē neʼe fakamolemole e Sehova ki tana hahaʼi fakahemala: “Ko ai te ʼAtua ʼe hage ko koe . . . [ʼe] mole ke tokagaʼi te talagataʼa ʼo te toe ʼo tana tofiʼa? . . . Pea ʼe ke lī anai tanatou ʼu agahala fuli ki te loloto ʼo te tai.” (Mikea 7:​18, 19) Koutou fakakaukauʼi age muʼa te faka ʼuhiga ʼo te ʼu palalau ʼaia ki te hahaʼi ʼaē neʼe maʼuʼuli ʼi te temi ʼo te Tohi-Tapu! Neʼe feala koa ke toe maʼu he meʼa neʼe lī “ki te loloto ʼo te tai”? Koia ʼe fakahā e te ʼu palalau ʼa Mikea ka fakamolemole ia Sehova, pea ʼe ina pulihi tatatou ʼu agahala ʼo talu ai.

“Te Manavaʼofa ʼo Totatou ʼAtua”

19, 20. (a) Koteā te faka ʼuhiga ʼo te kupu faka Hepeleo ʼaē neʼe fakaliliu ʼaki te kupu “fakahā he manavaʼofa” peʼe “ke fakaʼofaʼofa”? (b) Moʼo akoʼi mai te manavaʼofa ʼo Sehova, ʼe fakaʼaogaʼi feafeaʼi e te Tohi-Tapu te ʼu meʼa ʼaē ʼe logoʼi e he faʼe ʼo ʼuhiga mo hana tamasiʼi?

¹⁹ Ko te manavaʼofa ʼe ko te tahi ʼaia faʼahi ʼo te ʼofa ʼo Sehova. Koteā te manavaʼofa? ʼI te Tohi-Tapu ʼe pipiki tahi te manavaʼofa pea mo te lotoʼofa. ʼE lahi te ʼu kupu faka Hepeleo pea mo faka Keleka ʼe nātou faka ʼuhiga ki te manavaʼofa. Ohage la ko te kupu faka Hepeleo raham ʼe tau fakaliliu ʼaki te kupu “fakahā he manavaʼofa” peʼe “ke fakaʼofaʼofa.” Ko te kupu faka Hepeleo ʼaia, ʼaē ʼe faka ʼuhiga e Sehova kia ia totonu, ʼe ʼi ai tona pikipikiga mo te kupu “falega fānau” pea ʼe feala ke ʼui ʼe ko “te manavaʼofa ʼa he faʼe.”

²⁰ Moʼo akoʼi ʼo tatou ʼo ʼuhiga mo te manavaʼofa ʼo Sehova, ʼe fakaʼaogaʼi e te Tohi-Tapu te ʼu meʼa ʼaē ʼe logoʼi e he faʼe ʼo ʼuhiga mo tana kiʼi tamasiʼi. ʼE ʼui fēnei ia Isaia 49:15: “ ʼE feala koa ki he fafine ke ina galoʼi tana tamasiʼi ʼaē ʼe ina fafaga, pea ke mole manavaʼofa [raham] ki te tama ʼaē ʼe ina fuafatuʼi? ʼE moʼoni, ʼe feala ke nātou galoʼi, kae ko ʼau ʼe mole ʼau galoʼi anai koutou.” (The Amplified Bible) ʼE faigataʼa ki he faʼe ke ina galoʼi te fafaga ʼo tana kiʼi tamasiʼi pea mo tana tokaga ki ai. ʼE mole he tahi moʼo puipui te kiʼi tamasiʼi, pea ʼi te ʼaho mo te po ʼe tonu ke tokaga te faʼe ki te kiʼi toe meamea ʼaia. Kae ʼe ko he meʼa fakaʼofaʼofa heʼe kua taʼu hoko tāfito ʼi te ʼu “temi maʼuhiga ʼaupito” ʼaenī, ke līaki e te faʼe tana kiʼi tamasiʼi. (2 Timoteo 3:​1, 3, MN ) “Kae ko ʼau ʼe mole ʼau galoʼi anai koutou,” ko te ʼui ʼaia ʼa Sehova. Ko te manavaʼofa ʼo Sehova ki tana ʼu kaugana ʼe mālohi ʼaupito age ia ʼi te ʼofa ʼaē ʼe maʼu e he faʼe ki tana kiʼi tamasiʼi ʼaē kei meamea.

21, 22. Neʼe feafeaʼi te maʼuli ʼo te kau Iselaele ʼi Esipito, pea neʼe tali feafeaʼi e Sehova tanatou ʼu tagi?

²¹ ʼE fakahā feafeaʼi e Sehova te manavaʼofa, ohage ko he tāmai peʼe ko he faʼe ʼe ʼofa? ʼE tou tokagaʼi te kalitate ʼaia ʼi te ʼu meʼa ʼaē neʼe ina fai ki te puleʼaga ʼo Iselaele. ʼI te fakaʼosi ʼo te 16 sēkulō ʼi muʼa ʼo totatou temi, neʼe maʼuli popūla te ʼu lauʼi miliona kau Iselaele ʼi Esipito, pea neʼe gaohi koviʼi ai nātou. (Ekesote 1:​11, 14) ʼI tanatou lotomamahi, neʼe nātou tagi kia Sehova. Neʼe tali feafeaʼi e te ʼAtua manavaʼofa?

²² Neʼe malave ki te loto ʼo Sehova. Neʼe ina ʼui fēnei: “Neʼe ʼau sio ki te mamahi ʼo taku hahaʼi ʼi Esipito, pea neʼe ʼau logo ki tanatou tagi . . . heʼe ʼau ʼiloʼi lelei te ʼu mamahi ʼaē ʼe hoko kia nātou.” (Ekesote 3:7) Neʼe mole feala kia Sehova ke sio ki te ʼu mamahi ʼo tana hahaʼi peʼe logo ki tanatou ʼu kalaga kae mole fakaʼofaʼofa kia nātou. Ko Sehova ʼe ko te ʼAtua ʼe lotomahino. Pea ko te lotomahino​—te fealagia ʼaē ke kita logoʼi ia kita te mamahi ʼo he tahi​—ʼe pipiki ki te manavaʼofa. Kae neʼe mole logoʼi pe e Sehova te ʼofa ki tana hahaʼi, kae neʼe uga ia ia ke ina fai he meʼa moʼo hāofaki ia nātou. ʼE ʼui fēnei ia Isaia 63:9: “ ʼI tona ʼofa pea mo tona manavaʼofa, neʼe ina toe totogi nātou.” ʼAki “he nima mālohi,” neʼe ina hāofaki te kau Iselaele mai Esipito. (Teutalonome 4:​34) Ki muli age, neʼe ina foaki faka milakulo age kia nātou he meʼa kai, pea mo ina taki nātou ki te fenua ʼe fua lelei ke liliu ko tonatou fenua.

23. (a) ʼAki te ʼu palalau ʼa te tagata fai pesalemo, ʼe tou ʼiloʼi papau feafeaʼi ko Sehova ʼe tokaga moʼoni kia tatou takitokotahi? (b) ʼE tokoni feafeaʼi mai ia Sehova kia tatou?

²³ ʼE mole fakahā pe e Sehova tona manavaʼofa ki tana hahaʼi ʼi tonatou ʼuhiga kūtuga. Ko totatou ʼAtua ʼofa ʼe tokaga kia tatou takitokotahi. ʼE ina ʼiloʼi lelei te ʼu mamahi fuli pe ʼaē ʼe feala ke hoko kia tatou. Neʼe ʼui fēnei e te tagata fai pesalemo: “ ʼE sio te ʼu mata ʼo Sehova ki te kau agatonu. Pea ko ʼona taliga ʼe logo ki tanatou pāui ke ina hāofaki ia nātou. Ko Sehova ʼe ōvi kia nātou ʼaē ʼe loto lavea; pea ʼe ina hāofaki ia nātou ʼaē ʼe taʼomia tonatou laumālie.” (Pesalemo 34:15, 18) ʼE tokoni feafeaʼi ia Sehova kia tatou takitokotahi? ʼE mole ina pulihi anai te tupuʼaga ʼo totatou ʼu mamahi. Kae ʼe lahi te ʼu meʼa ʼe ina foaki kia nātou ʼaē ʼe kole tokoni kia te ia. ʼE foaki e tana Folafola he ʼu tokoni ʼe ʼaoga moʼoni. ʼI te kokelekasio, neʼe ina fakatuʼutuʼu he ʼu tagata taupau kua popoto ʼi te faʼahi fakalaumālie, ʼaē ʼe nātou faiga ke nātou fakahā tona manavaʼofa ʼo nātou tokoni ki te hahaʼi. (Sakopo 5:​14, 15) ʼUhi ko Sehova “ ʼe fakalogo ki te faikole,” koia ʼe ina foaki ai “te laumālie maʼoniʼoni kia nātou ʼaē ʼe nātou kole age kia te ia.” (Pesalemo 65:2; Luka 11:13, MN ) Ko te ʼu fakatuʼutuʼu fuli ʼaia ʼe ko te fakahā ʼaia ʼo “te manavaʼofa ʼo totatou ʼAtua.”​—Luka 1:​78, MN.

24. ʼE koutou tali feafeaʼi anai ki te ʼofa ʼo Sehova?

²⁴ ʼE mole tou fiafia lahi koa la ʼi tatatou vakaʼi te ʼofa ʼo tatatou Tāmai ʼaē ʼe ʼi selo? ʼI te ʼuluaki alatike neʼe fakamanatuʼi mai kia tatou ko Sehova ʼe ina fakahā tona mālohi, mo tana faitotonu pea mo tona poto ʼaki te ʼofa ke fua lelei kia tatou. Pea ʼi te alatike ʼaenī, neʼe tou sio ko Sehova, ʼi hona ʼu ʼaluʼaga fakaofoofo, neʼe ina fakahā fakalelei tona ʼofa ki te malamanei​—pea mo tatou takitokotahi. ʼI te temi nei, ʼe tonu ke tou tahi fai te fehuʼi ʼaenī: ‘ ʼE ʼau tali feafeaʼi anai ki te ʼofa ʼo Sehova?’ ʼOfa pe ke koutou ʼoʼofa kia te ia ʼaki tokotou loto katoa, mo tokotou ʼatamai, mo tokotou nefesi, pea mo tokotou mālohi katoa. (Maleko 12:29, 30) ʼOfa pe ke koutou fakahā ʼi tokotou maʼuli takotou fia fakaōvi lelei kia Sehova. Pea ʼofa pe ke fakaōvi atu ia Sehova, te ʼAtua ʼaē ʼe ʼofa, ʼo aʼu ki he ʼu temi ʼe heʼegata!​—Sakopo 4:8.

[Kiʼi nota]

ʼE Kei Koutou Manatuʼi Koa?

• ʼE tou ʼiloʼi feafeaʼi ko te ʼofa ʼe ko te kalitate maʼuhiga ʼaia ʼo Sehova?

• He koʼe ʼe feala ke tou ʼui ko te fekauʼi ifo e Sehova tona ʼAlo ke haʼu ʼo mamahi pea mo mate maʼa tatou ʼe ko te ʼofa lahi tokotahi ʼaia?

• ʼE fakahā feafeaʼi mai e Sehova ʼe ʼofa kia tatou takitokotahi?

• ʼE fakamatala feafeaʼi e te Tohi-Tapu te loto fakamolemole ʼo Sehova?

[Paki ʼo te pasina 15]

“Ko te ʼAtua . . . neʼe ina foaki tona ʼAlo ʼulu tokotahi”

[Paki ʼo te pasina 16, 17]

“ ʼE koutou maʼuhiga lahi ake koutou ʼi he tuʼuga pasele”

[Haʼuʼaga ʼo te paki]

© J. Heidecker/VIREO

[Paki ʼo te pasina 18]

Ko te ʼu meʼa ʼaē ʼe logoʼi e he faʼe maʼa tana kiʼi tamasiʼi kei meamea, ʼe ina akoʼi mai kia tatou te manavaʼofa ʼo Sehova