‘ ʼE Ke ʼIloʼi Talu Mai Tau Kei Veliveli’
ʼO MULIMULI ki te ʼu kumi ʼaē neʼe fai e te kau popoto, ʼe maʼuhiga ke tou palalau ki te ʼu kiʼi toe liliki ke tuputupu tonatou ʼuto, heʼe tupu ai tonatou ʼu fealagia fakakaukau, pea mo te fealagia ʼaē ke nātou fakatokatoka he ʼu fihifihia. ʼE moʼoni tāfito te faʼahi ʼaia ʼi te ʼuluaki taʼu ʼo he kiʼi tamasiʼi. ʼE fakahā mai e te nusipepa International Herald Tribune ko ʼihi tōketā ʼe nātou faka tui ʼi te temi nei, “ ʼe maʼuhiga ʼaupito te ʼatu ʼu kupu ʼaē ʼe logo kiai he kiʼi tamasiʼi ʼi te ʼaho fuli, heʼe tokoni anai te faʼahi ʼaia kia ia ke liliu ʼo poto ki muli age, pea ke faiva ʼi te faleako pea ʼi te maʼu ʼo he gāue.”
Kae ko te ʼu palalau ʼaia, ʼe tonu ke fai e he tahi. Ko te televisio pea mo te lātio, ʼe mole feala ke nā fetogi he tahi.
Ko te fafine ʼe ina sivi te faʼufaʼu ʼo te ʼuto ʼi te Univelesitē ʼo Washington ʼi Seattle ʼi Amelika, neʼe ina ʼui fēnei: “ ʼI te temi nei kua mātou ʼiloʼi, ko te tuputupu ʼo te ʼuto ʼe hoko ʼi te kamataʼaga ʼo te maʼuli, pea ko te ʼuto ʼo he kiʼi tamasiʼi ʼe tonu ke fakagāueʼi ke feala hona tuputupu. Neʼe mole heʼeki faʼa fualoa tamatou ʼiloʼi ʼaē, ʼe kamata te tuputupu ʼaia ʼi te hoki tupu ʼo te tamasiʼi. Ohage la, ko ʼihi tamaliki ʼaē ʼe māhina ono pe, kua nātou māmāhani ʼi te logo ki te lea ʼo tanatou ʼu mātuʼa.”
Ko te ʼu kumi ʼaē neʼe fai ʼi te ʼu taʼu ʼaenī kua hili, ʼe fakafeagai ki te ʼui ʼaē ʼe feʼauga pe ke kita ʼofa ki he tamasiʼi ke feala ai ke tuputupu tona ʼatamai. ʼE toe hā ʼi te ʼu kumi ʼaia, te maʼuhiga ʼaē ke gāue te ʼu mātuʼa ki te tuputupu ʼo tanā tamasiʼi.
ʼE tou manatuʼi ai te ʼu palalau ʼaē neʼe fai e te ʼapositolo ko Paulo ʼi tana tohi kia Timoteo: “Talu mai tau kei veliveli ʼe ke ʼiloʼi te ʼu tohi taputapu, ʼaē ʼe feala ke nātou fakaliliu koe ke ke poto ki te fakamaʼuli.” ʼE hā mai ʼaki te faʼahi ʼaia, ko te ʼu tohi taputapu ʼaē neʼe fakahā kia Timoteo e tana faʼe pea mo tana kui fafine ʼaē neʼe nā Kilisitiano, neʼe ko he faʼahi maʼuhiga ʼaia kia Timoteo ke tuputupu ʼo liliu ko he kaugana faiva ʼa te ʼAtua.—2 Timoteo 1:5; 3:15.