Ko He Tokoni Lelei Ki Te ʼAve Fakahagatonu ʼo Te Folafola ʼo Te Moʼoni

ʼI TE tahi ʼaho, ko te tagata sivi teate ʼe gāue maʼa te sulunale neʼe ʼalu ʼo sioʼi te teate. Neʼe mole ina faʼa leleiʼia pea neʼe ina tohi fēnei ki muli age: “Kapau ʼe koutou fia sio ki he meʼa ʼe mole koutou leleiʼia, koutou ʼolo ʼo mamata ki te gaoʼi ʼaia.” Ki muli age, ko te hahaʼi ʼaē neʼe nātou totogi te gaoʼi ʼaia, neʼe nātou tā te laupisi ʼo te gaoʼi ʼaia, ʼo nātou fakaʼaogaʼi pe te koga ʼo te ʼu palalau ʼa te tagata sivi teate. Koʼeni te ʼu palalau ʼaē neʼe nātou tāʼofi: “Koutou ʼolo ʼo mamata ki te gaoʼi ʼaia”! Neʼe fai moʼoni te ʼu palalau ʼaia e te tagata sivi teate, kae neʼe toʼo faka koga pe ia, pea ʼe mole tatau leva tatatou mahino kiai.

ʼE fakahā e te faʼifaʼitaki ʼaia ia te maʼuhiga ʼo te ʼiloʼi ʼo te haʼuʼaga ʼo he faʼahiga palalau. Ko te toʼo ʼo he ʼu kupuʼi palalau kae mole ʼalutahi mo tona haʼuʼaga ʼe feala ke ina fulihi tona faka ʼuhiga, ohage ko te fulihi hala e Satana ia te faka ʼuhiga ʼo te Tohi-Tapu, ʼaē neʼe ina fakaʼaogaʼi moʼo fakahalaʼi ʼaki ia Sesu. (Mateo 4:1-11) ʼI te tahi faʼahi, ko te sioʼi ʼo te haʼuʼaga ʼo he palalau ʼe tokoni mai kia tatou ke tou mahino lelei ai ki tona faka ʼuhiga. ʼUhi ko te faʼahi ʼaia, mokā tou ako he vaega faka Tohi-Tapu, ʼe lelei hatatou sioʼi tuʼumaʼu te vaega ʼi tona haʼuʼaga katoa, pea mo sioʼi te tuʼuʼaga ʼo te vaega ʼaia ke tou mahino lelei ai ki te meʼa ʼaē neʼe fia ʼui mai e te tagata faitohi.

ʼAveʼave Fakalelei

Koʼeni te faka ʼuhiga ʼo te sinoʼi tohi, ko te ʼu koga ʼo he ʼu palalau neʼe tohi peʼe tala gutu, pea ʼe tuʼu ʼi muʼa peʼe hoa mai ki te kupuʼi palalau peʼe ko he vaega, ʼe ina tautau fetogi te faka ʼuhiga ʼo te palalau ʼaia. ʼE feala pe ke faka ʼuhiga te sinoʼi tohi ki te ʼu meʼa ʼe fakapipiki ki he meʼa neʼe hoko, peʼe ko he ʼaluʼaga makehe. ʼE feala ke toe faka ʼuhiga ki te fakatafito. ʼE ʼiloga te maʼuhiga ʼo te vakaʼi ʼo te haʼuʼaga ʼo he vaega, tāfito la mokā tou tokagaʼi te meʼa ʼaē neʼe tohi e te ʼapositolo ko Paulo kia Timoteo: “Faigai ia koe, o hage ko he tagata kua tuha ke ke tuu ia mua o te Atua, ko he tagata gaue e mole ufiufi, e ina ave fakahagatonu te folafola o te mooni.” (2 Timoteo 2:15) Ke tou ʼave fakahagatonu ia te Folafola ʼa te ʼAtua, ʼe tonu ke tou mahino lelei kiai, pea hoki tou fakamahino lelei ai leva pea mo fai he fakamahino ʼe totonu. Ko tatatou fakaʼapaʼapa kia Sehova, ia te Haʼuʼaga ʼo te Tohi-Tapu, ʼe ina uga anai ia tatou ke tou faigaʼi ʼo fai ia te koga ʼaia, pea mo tou faka ʼuhiga ia te haʼuʼaga ʼo he vaega ʼe ʼaoga lahi anai ki te mahino kiai.

Te Haʼuʼaga ʼo Te Lua Tohi ʼa Timoteo

Tou vakaʼi age muʼa ia te tohi faka Tohi-Tapu ʼo Lua Timoteo.a Moʼo kamata tatatou vakaʼi ia te tohi, tou fai muʼa te ʼu fehuʼi ʼo ʼuhiga mo te haʼuʼaga ʼo te tohi ʼaia. Ko ai ʼaē neʼe ina tohi ia Lua Timoteo? ʼI te temi fea? ʼI te ʼu ʼaluʼaga fea? Pea tou fai leva te ʼu fehuʼi ʼaenī: Neʼe feafeaʼi te maʼuli ʼo “Timoteo” ʼaē ʼe tuʼu ʼi te kupu tāfito ʼo te tohi? He koʼe neʼe ʼaoga kia ia ia te logo ʼaē ʼe tuʼu ʼi te tohi? Ko te ʼu tali ki te ʼu fehuʼi ʼaia ʼe ina fakatuputupu anai hatatou fia mahino lahi ki te ʼuhiga ʼo te tohi, pea mo tokoni mai kia tatou ke tou sio ki tona ʼaoga kia tatou ʼi te temi nei.

ʼE fakahā e te ʼu ʼuluaki vaega ʼo Lua Timoteo, ʼe ko he tohi neʼe fai e te ʼapositolo ko Paulo kia Timoteo. ʼE fakahā e te tahi ʼu vaega ko te temi ʼaē neʼe faitohi ai ia Paulo, neʼe pilisoni ai ia ia ʼuhi ko te logo lelei. Neʼe līʼakina ia ia e te tokolahi, pea kua logoʼi e Paulo ka ʼamanaki mate ia ia. (2 Timoteo 1:15, 16; 2:8-10; 4:6-8) Koia, neʼe lagi ina fai te tohi lolotoga tona pilisoniʼi tuʼa lua ʼi Loma, ʼi te lagi taʼu 65 ʼo totatou temi. Lagi hili ʼaia, pea neʼe fakatūʼa mate ia ia e Néron.

Ko te ʼu faʼahi ʼaia ʼaē neʼe fai ai te Lua tohi ʼo Timoteo. Kae ʼe tou lava tokagaʼi neʼe mole faitohi ia Paulo kia Timoteo ʼo meomeo ʼo ʼuhiga mo tona ʼu fihifihia. Kae neʼe ina fakatokaga kia Timoteo ʼo ʼuhiga mo te ʼu temi faigataʼa ka hoko, pea mo ina fakaloto mālohiʼi tona kaumeʼa ke fakamamaʼo mai te ʼu fakafiafia, kae ke ina haga “fakamalohiʼi” ia ia pea ke ina fakahoko te ʼu fakatotonu ʼa Paulo ki ʼihi ake. ʼAki te ʼu meʼa ʼaia, ʼe teuteu lelei anai moʼo tokoni ki niʼihi. (2 Timoteo 2:1-7) ʼE ko he faʼifaʼitaki maʼuhiga ia ʼo ʼuhiga mo te tokaga ʼaē ki ʼihi logola he ʼu temi faigataʼa! Pea ʼe ko he tokoni lelei ia kia tatou ʼi te temi nei!

Neʼe fakahigoaʼi e Paulo ia Timoteo ko he “fanau ofaina.” (2 Timoteo 1:2) ʼE tau palalau te Tauhi Foʼou ki te tūpulaga ʼaia ʼo ina ʼui neʼe ko he kaugā fagona ʼo Paulo. (Gaue 16:1-5; Loma 16:21; 1 Kolonito 4:17) ʼI te temi ʼaē neʼe faitohi age ai ia Paulo, neʼe ko te lagi taʼu 30 tupu ʼaia ʼa Timoteo—kae neʼe lau ia ʼe kei tūpulaga pe ia. (1 Timoteo 4:12) Kae neʼe kua ʼi ai te ʼu fakamatala lelei ʼo ʼuhiga mo tana agatonu, ʼo lagi ‘kaugana kia Paulo’ lolotoga taʼu e 14. (Filipe 2:19-22) Logope te muli ʼa Timoteo, kae neʼe fekauʼi e Paulo ia ia ke ina tokoniʼi ʼihi tagata ʼāfea, “ke aua te fihi i te u kupu” kae ke nātou tokakaga ki te ʼu meʼa maʼuhiga, ohage ko te tui mo te faʼa kātaki. (2 Timoteo 2:14) Neʼe fakagafua age pe foki kia Timoteo ke ina fakaʼaluʼalu ia te fakanofo ʼo te ʼu tagata taupau pea mo te ʼu tagata faifekau faka minisitelio ʼo te ʼu kokelekasio. (1 Timoteo 5:22) Kae neʼe lagi kei fakalākilua tana fakahoko ʼo tona tuʼulaga pule.—2 Timoteo 1:6, 7.

Neʼe ʼi ai te ʼu fihifihia lahi neʼe tau mo te tūpulaga ʼaia ʼaē neʼe tagata ʼāfea. ʼI te ʼu fihifihia ʼaē neʼe tau mo ia, ko te ʼu tagata e toko lua, ko Imeneo mo Fileto, neʼe “na fakahiga ai te tui a ihi,” ʼo nā akoʼi ‘kua ʼosi hoko te fakatuʼuake.’ (2 Timoteo 2:17, 18) Pea ʼe ʼiloga ia neʼe nā tui ko te fakatuʼuake pe e tahi, ʼe ko te fakatuʼuake fakalaumālie, pea ʼe kua ʼosi hoko ia ki te kau Kilisitiano. Lagi neʼe nā toʼo kehe te ʼu palalau ʼa Paulo mai te sinoʼi tohi, ʼo nā fakamatala kua mamate te kau Kilisitiano ʼi tanatou ʼu agahala, kae kua toe fakamaʼuli ake ia nātou ʼaki te laumālie ʼo te ʼAtua. (Efeso 2:1-6) Neʼe kua fakatokaga e Paulo te tuputupu ʼa te gāue ʼa te kau ʼaposita. Neʼe ina tohi fēnei: “E hoko mai anai he temi, e mole kei lavaʼi e te hahai te akonaki mooni, . . . pea e fakamamao anai onatou taliga mai te mooni, e natou fakahaga anai ki te u fagana.” (2 Timoteo 4:3, 4) Neʼe fakahā e te fakatokaga fakatomuʼa ʼa Paulo ia te maʼuhiga ʼaē kia Timoteo ke ina muliʼi te tokoni ʼa te ʼapositolo.

Te ʼAoga ʼo Te Tohi ʼo Lua Timoteo ʼi Te Temi Nei

Talu mai te kamataʼaga, neʼe tou sio neʼe tohi e Paulo ia te Lua tohi kia Timoteo ʼuhi ko te ʼu faʼahi ʼaenī ʼe hoa mai kiai: (1) Neʼe ina ʼiloʼi kua ōvi mai tona mate, pea neʼe ina faigaʼi ke ina teuteuʼi ia Timoteo ki te temi ʼaē ʼe mole ka puli anai pea mole feala ke lagolago ki ai. (2) Neʼe ina fia teuteuʼi ia Timoteo ke ina puipui te ʼu kokelekasio mai te kau ʼaposita, pea mo te ʼu fakanekeneke fakatupu tuʼutāmaki. (3) Neʼe ina fia fakaloto mālohiʼi ia Timoteo ke lahi tana gāue kia Sehova pea ke pipiki mālohi ki te ʼatamai mālama totonu ʼo te Tohi-Tapu moʼo fakafeagai ki te ʼu akonaki hala.

Kua lahi leva te ʼuhiga ʼo te Lua tohi ʼo Timoteo kia tatou, ʼo ʼuhiga mo tatatou mahino ki tona haʼuʼaga. ʼO toe feiā foki mo te temi nei, ʼe ʼi ai te kau ʼaposita ʼe nātou hage ko Imeneo mo Fileto, ʼe nātou faka maʼuhigaʼi tanatou ʼu manatu totonu pea ʼe nātou fia holoʼi tatatou tui. Pea tahi ʼaē meʼa, ʼe tou lolotoga nei ʼi “te ʼu temi maʼuhiga ʼaupito mo faigataʼa” ʼaē neʼe fakakikite e Paulo. Tokolahi kua nātou ʼiloʼi te moʼoni ʼo te fakatokaga ʼaenī ʼa Paulo: “Ko nātou fuli ʼaē ʼe fia pipiki ki te ʼAtua ʼi te lototahi mo Kilisito Sesu, ʼe toe fakatagaʼi anai mo nātou.” (2 Timoteo 3:1, 12, MN ) E feafeaʼi hatatou lava tutuʼu maʼu? Ohage ko Timoteo, ʼe tonu ke tou fakalogo ki te tokoni ʼa nātou ʼaē kua fualoa tanatou tauhi kia Sehova. Pea ʼaki te ako takitokotahi, mo te faikole, pea mo te ʼu fono faka Kilisitiano, ʼe feala hatatou “haga fakamalohiʼi” ia tatou ʼaki te ʼofa makehe ʼa Sehova. Pea tahi ʼaē meʼa, ʼaki te mālohi ʼo te ʼatamai mālama moʼoni, ʼe tou lava muliʼi te fakaloto mālohi ʼaenī ʼa Paulo: “Haga taupau maʼu te faʼifaʼitaki ʼo te ʼu folafola ʼo te maʼuli.”—2 Timoteo 1:13, MN.

“Te Faʼifaʼitaki ʼo Te ʼu Folafola ʼo Te Maʼuli”

Koteā “te ʼu folafola ʼo te maʼuli” ʼaē neʼe palalau kiai ia Paulo? ʼE ina fakaʼaogaʼi te kupuʼi palalau ʼaē ʼe faka ʼuhiga ki te akonaki faka Kilisitiano moʼoni. ʼI tana ʼuluaki tohi kia Timoteo, neʼe fakamahino e Paulo ko “te ʼu folafola ʼo te maʼuli” ʼe ko “te u folafola totonu o totatou Aliki ko Sesu Kilisito.” (1 Timoteo 6:3) Ko he tahi ʼe ina muliʼi te faʼifaʼitaki ʼo te ʼu folafola ʼo te maʼuli, ʼe ina fakaliliu ia ia ko he tahi ʼe ʼofa pea mo ina faka maʼuhigaʼi te hahaʼi. Mai te ʼaluʼaga ʼaē ko te minisitelio ʼo Sesu pea mo tana ʼu akonaki ʼe ʼalutahi mo te ʼu akonaki fuli ʼaē ʼe maʼu ʼi te Tohi-Tapu katoa, ko te kupuʼi palalau “te ʼu folafola ʼo te maʼuli,” ʼe feala ke toe fakahoko atu tona faka ʼuhiga ki te ʼu akonaki fuli ʼa te Tohi-Tapu.

Kia Timoteo, ʼo feiā mo te kau tagata ʼāfea fuli, ko te faʼifaʼitaki ʼo te ʼu folafola ʼo te maʼuli neʼe ko he “koloa taulekaleka” neʼe tonu ke nātou taupau. (2 Timoteo 1:13, 14) Neʼe tonu kia Timoteo ke ina ‘faka mafola ia te Folafola, ke ina tāʼofi ʼi te faigamālie ʼo te temi, mo te temi ʼaē ʼe mole faigamālie, ke ina valokiʼi, ke ina fakatonutonuʼi, ke ina tokoniʼi ʼi te faʼafai katoa pea ʼaki he fakapotopoto ʼi te faiakonaki.’ (2 Timoteo 4:2) ʼI tatatou mālama ki te mafola ʼo te ʼu akonaki faka ʼaposita ʼi te temi ʼo Timoteo, ʼe tou mahino ai pe koʼe neʼe faka maʼuhigaʼi e Paulo te ʼaoga ʼaupito ke akoʼi te ʼu folafola ʼo te maʼuli. ʼE tou toe mahino ai foki ki te maʼua ʼaē kia Timoteo ke ina puipui te faga ōvi ʼo ‘valokiʼi, mo fakatonutonuʼi, mo tokoniʼi ʼi te faʼafai katoa’ ʼaki te faʼa kātaki, pea mo fakahoko ʼaki he poto lelei ʼi te faiako.

Ko ai ʼaē neʼe tonu ke faka mafola ki ai ia Timoteo ʼo ʼuhiga mo te folafola? ʼE fakahā e te sinoʼi tohi ʼaē neʼe toʼo mai ai te palalau ko Timoteo, ʼi tona ʼuhiga tagata ʼāfea, neʼe ina faka mafola te folafola ʼi te loto kokelekasio faka Kilisitiano. ʼAki te ʼu fakanekeneke kovi ʼo te hahaʼi fakafeagai, neʼe tonu ke taupau e Timoteo ia tona fakafuafua lelei ʼi te faʼahi fakalaumālie pea ke ina tala ʼaki he lototoʼa ia te Folafola ʼa te ʼAtua, kae neʼe mole tonu ke ina tala he ʼu filosofia fakatagata, peʼe ko hana ʼu manatu, peʼe ko he ʼu palalau loi ʼe mole ʼi ai hona ʼaoga. ʼE mahino ia neʼe lagi hoko ai he fakafeagai mālohi mai ia nātou ʼaē neʼe nonofo mo hanatou ʼu fakatuʼutuʼu kovi. (2 Timoteo 1:6-8; 2:1-3, 23-26; 3:14, 15) Kae ʼi tana muliʼi ia te tokoni ʼa Paulo, neʼe lagi fakafeagai mālohi ia Timoteo ki te ʼapositasia, ohage ko tona fai e Paulo.—Gaue 20:25-32.

ʼE faka ʼuhiga koa te ʼu palalau ʼa Paulo ʼo ʼuhiga mo te faka mafola ʼo te folafola ki te gāue fai faka mafola ʼi tuʼa atu ʼo te kokelekasio? Ei, pea ʼe fakahā te faʼahi ʼaia e te sinoʼi tohi. ʼE toe ʼui fēnei e Paulo: “Kae ko koe, taupau tau poto ia meʼa fuli, kātaki ʼi te mamahi, fai te gāue ʼa te tagata faka mafola evaselio, ke katoa tou minisitelio.” (2 Timoteo 4:5, MN ) Ko te faka mafola evaselio—ʼaē ko te faka mafola ʼo te logo lelei moʼo hāofaki ʼo te hahaʼi ʼaē ʼe mole tui—ʼe ko te tāfito ʼaia ʼo te minisitelio faka Kilisitiano. (Mateo 24:14; 28:19, 20) Pea ohage pe ko te faka mafola ʼo te Folafola ʼa te ʼAtua ʼi te kokelekasio, māʼiape la mo “te ʼu temi faigataʼa,” ʼe tonu ke tou haga faka mafola ia te folafola ʼi tuʼa atu ʼo te kokelekasio, tatau aipe peʼe tou tau mo he ʼu ʼaluʼaga faigataʼa.—1 Tesalonika 1:6.

Ko te fakatafito ʼo tatatou fai faka mafola pea mo tatatou faiako, ʼe ko te Folafola ʼa te ʼAtua. ʼE tou falala katoa ki te Tohi-Tapu. Neʼe ʼui fēnei e Paulo kia Timoteo: “Ko te Tohi-Tapu katoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu.” (2 Timoteo 3:16, MN ) ʼE tautau fakaʼaogaʼi lelei te ʼu palalau ʼaia moʼo fakahā ko te Tohi-Tapu ʼe ko te Folafola ʼe haʼu mai te ʼAtua. Kae neʼe koteā te tupuʼaga ʼo te tohi e Paulo ia te ʼu palalau ʼaia?

Neʼe palalau ia Paulo ki te tagata ʼāfea, ko he tahi ʼe ʼi ai tona maʼua ʼi te kokelekasio, ko te ‘fakatonutonuʼi, mo fakatokatoka ʼo te ʼu meʼa, pea mo akonakiʼi ʼi te faitotonu.’ Koia neʼe ina fakamanatuʼi age kia Timoteo ke falala ki te poto ʼo te Folafola ʼo te ʼAtua, ʼaē neʼe akoʼi age kia Timoteo talu mai tana kei veliveli. ʼI ʼihi temi ʼe tonu ki te kau tagata ʼāfea, ohage ko Timoteo, ke nātou fakatonutonuʼi te kau agahala. Ka nātou fai te faʼahi ʼaia, ʼe tonu ke nātou falala tuʼumaʼu ki te Tohi-Tapu. Pea tahi ʼaē meʼa, kapau ko te Tohi-Tapu ʼe haʼu mai te ʼAtua, ko te ʼu fakatonutonuʼi fuli ʼaē ʼe fakatafito kiai ʼe ko te ʼu fakatonutonuʼi mai te ʼAtua. Ko he tahi ʼe lītuʼa ki te fakatonutonu ʼaē ʼe fakatafito ki te Tohi-Tapu, ʼe mole lītuʼa ia ki he ʼu manatu fakatagata, kae ʼe lītuʼa ia ki te tokoni ʼaē ʼe haʼu tonu mai ia Sehova.

ʼE lahi ʼaupito ʼi te tohi ʼo Lua Timoteo te poto fakaʼatua! Pea ʼe toe maʼuhiga age ia mokā tou tokagaʼi te tokoni ʼi tona sinoʼi tohi! ʼI te alatike ʼaenī, neʼe tou fakasiosio fakanounou ia te logo maʼuhiga ʼaē ʼe tuʼu ʼi te tohi ʼaia, kae ʼe feʼauga ia moʼo fakahā ʼe ʼaoga ke tou tokagaʼi te sinoʼi tohi mokā tou lau te Tohi-Tapu. ʼE tokoni mai anai ke tou ʼiloʼi papau peʼe tou “ave fakahagatonu te folafola o te mooni.”

[Kiʼi nota]

[Paki ʼo te pasina 27]

Neʼe fia teuteuʼi e Paulo ia Timoteo ke ina puipui te ʼu kokelekasio

[Paki ʼo te pasina 30]

Neʼe fakamanatuʼi age e Paulo kia Timoteo ke falala ki te poto ʼo te Folafola ʼaē ʼe haʼu mai te ʼAtua