Ko Te Kau Faka Mafola ʼo Te Puleʼaga ʼe Nātou Fakamatala

“Fai Te Gāue ʼa He Tagata Fai Faka Mafola Evaselio”

KOTEĀ koa te faka ʼuhiga ʼo he tagata fai faka mafola evaselio? Ko te kupu ʼaia ʼe haʼu mai te kupu faka Keleka eu·ag·ge·li·stesʹ, ʼaē ʼe teitei tatau mo te kupu eu·ag·geʹli·on, ko tona faka ʼuhiga ko te “logo lelei.” Koia, ko he tagata ʼe fai faka mafola evaselio ʼe ko he tagata fai faka mafola, peʼe ko he tagata ʼave folafola ʼo te logo lelei.

Ko te kau Kilisitiano moʼoni fuli ʼe ko he ʼu hahaʼi fai faka mafola evaselio, koteʼuhi ʼe nātou faka mafola te logo lelei ʼo ʼuhiga mo te Puleʼaga ʼo te ʼAtua. Koia ʼaē, neʼe tonu ai te fakatotonu ʼaē neʼe fai e te ʼapositolo ko Paulo kia Timoteo, ke ina “fai te gāue ʼa he tagata fai faka mafola evaselio.” Neʼe fai fakalelei e Timoteo te gāue ʼaia. Neʼe uga ia ia e Paulo ke ina ‘taupau lelei tona ʼatamai mai te ʼu meʼa fuli’ pea ke ina ‘fakahoko katoa tona minisitelio.’—2 Timoteo 4:5.

ʼI totatou ʼuhiga kau fai faka mafola evaselio, ʼe tou fai fakalelei totatou minisitelio pea mo tou ‘taupau lelei totatou ʼatamai,’ pea mo tou nonofo tokaga ʼo fakahā te logo lelei ʼi te temi fuli pe. ʼE lahi te hahaʼi neʼe nātou ʼiloʼi ia Sehova pea mo tana ʼu fakapapau ʼi tanatou palalau mo te kau Fakamoʼoni ʼa Sehova ʼi te fagonogono faigamālie. Ko te meʼa ʼaia neʼe hoko kia Seymore, ko te tagata ʼe nofo ʼi Barbade.

Ko Seymore neʼe ko te tagata faiako. Ko Charles, neʼe ko te tagata faiako vaeluaʼi temi neʼe nā gāue tahi ʼi te faleako pea ʼe ko ia ko te Fakamoʼoni ʼa Sehova, neʼe ina tokagaʼi te ʼu faigamālie fuli moʼo fai faka mafola evaselio. Neʼe ko he minisi ʼe fai faka mafola katoa, peʼe ko he pionie, pea neʼe ina fakaʼaogaʼi te temi faigamālie fuli moʼo fakahā ʼo te logo lelei ki niʼihi. Neʼe ʼuluaki logo ia Seymore ki te logo ʼo te Puleʼaga, ʼuhi ko te fagonogono faigamālie.

Neʼe mole tuai pea neʼe fakatuʼutuʼu e Seymore ke ina fakahā te ʼu moʼoni ʼo te Tohi-Tapu ki te tokolahi. Koia neʼe kamata tana fagonogono faigamālie ki tona ʼu kaugā gāue, kae tāfito ki tana kau ako. Logope la ʼi ʼihi fenua neʼe mole tonu ke akoʼi te lotu ʼi te ʼu faleako faka puleʼaga, kae neʼe hinoʼi ia Seymore ke ina ako te lotu pea mo te ʼu aga ʼaē ʼe tonu ke fai. Kae ʼaki te ʼatamai mālama foʼou ʼaē neʼe ina maʼu ʼi te Tohi-Tapu, kua fetogi te ʼu manatu ʼāfea ʼaē neʼe maʼu e Seymore. Koia ʼi te ʼu kiʼi temi mālōlō ʼo te ako, neʼe palalau ia ki tana kau ako, ʼo ʼuhiga mo te fakapapau ʼa te ʼAtua ki te mālama foʼou pea mo te ʼamanaki ki te maʼuli heʼegata.

Koteā te manatu ʼa te tamaliki ako ʼo ʼuhiga mo te ʼu meʼa ʼaia? Tokolahi neʼe nātou fakahā tanatou fia logo fakamalotoloto ki te logo lelei ʼo te Puleʼaga ʼo Sehova. ʼAki te temi, neʼe kamata e Seymore te ʼu ako Tohi-Tapu mo te toko hogofulu-ma-tolu ʼo tana kau ako. Neʼe lahi ʼaupito te ʼu meʼa neʼe nātou fia ʼiloʼi, koia neʼe fakatuʼutuʼu ai ke nātou ako te Tohi-Tapu ʼo fai tuʼa lua ʼi te vāhaʼa. Ki muli age, ko te tokolahi ia nātou neʼe nātou kamata kau ki te ʼu fono faka Kilisitiano ʼi te Fale ʼo te Puleʼaga ʼa te kau Fakamoʼoni ʼa Sehova. ʼO aʼu mai ki te temi ʼaenī, ko te toko hiva ia nātou ʼaia kua foaki tonatou maʼuli kia Sehova, pea kua nātou papitema ʼo nātou liliu ko he kau Fakamoʼoni ʼa Sehova. Pea ko Seymore, ʼi te temi nei kua pionie katoa pea ʼe ko he tagata ʼāfea ʼi te kokelekasio ʼa te kau Fakamoʼoni ʼa Sehova ʼi Barbade.

Ko te hisitolia ʼaenī, ʼe ko he faʼifaʼitaki ʼe ina fakahā mai peʼe feafeaʼi te ‘fai ʼo te gāue fai faka mafola evaselio,’ ʼa te kau Fakamoʼoni ʼa Sehova ʼi te malamanei katoa, ʼaki te fagonogono faigamālie. ʼE nātou mulimuli ki te tokoni ʼa te Tohi-Tapu ia Kolose 4:5, 6, ʼaē ʼe ʼui fēnei: “Koutou haga haʼele ʼi te fakapotopoto ʼo ʼuhiga mo nātou ʼaē ʼo tuʼa, ʼo koutou totogi maʼa koutou te temi faigamālie. Ke mālie tuʼumaʼu ʼakotou ʼu palalau pea ke fakamagoni ʼaki te māsima, ke koutou ʼiloʼi ai peʼe feafeaʼi hakotou tali ki te hahaʼi fuli.”