Tou Fakatahi Tuʼumaʼu Mo Natou ʼAe ʼe ʼOfa Kia Sehova

He koʼe ʼe tonu ke tou fakatahi tuʼumaʼu mo natou ʼae ʼe ʼofa kia Sehova? Koteʼuhi ko te ʼu hahaʼi ʼae ʼe tou fakatahi mo ia ʼe natou ʼekenaki tatou ke tou fai te ʼu meʼa ʼae ʼe lelei peʼe ko te ʼu meʼa ʼae ʼe kovi. (Taa 13:20) Ohage la, neʼe fai e te Hau ko Seoasi “te mea ae e lelei kia mata o [“Sehova,” MN]” ʼi tana fakatahi tuʼumaʼu mo te Pelepitelo Lahi ko Seosata. (2 Kk 24:2) Hili te mate ʼa Seosata, neʼe liʼaki e Seoasi ia Sehova ʼuhi ko ʼana fakakaugā kovi.—2Kk 24:17-19.

ʼI te ʼuluaki sekulo, neʼe fakatatau e te apositolo ko Paulo ia te kokelekasio Fakakilisitiano ki “he fale lahi,” pea mo te hahaʼi ʼo te kokelekasio ki he ʼu “ipu.” Kapau ʼe tou tekeʼi te ʼu fakatahi mo he tahi ʼe ina fai he ʼu meʼa ʼe mole leleiʼia e Sehova, tatau aipe pe ko he tahi ʼo totatou famili peʼe ʼi te kokelekasio, ʼe tou liliu anai ko “he ipu ʼe fakaʼaogaʼi ki te ʼu meʼa maʼuhiga.” (2Ti 2:20, 21) Koia, tou haga fakakaumeʼa mo he ʼu hahaʼi ʼe ʼofa ia Sehova mo natou fakalotomalohiʼi tatou ke tou tauhi kia te ia.

VAKAʼI TE ʼATA VITEO TOU AKO TE TEKEʼI ʼO TE ʼU FAKAKAUGĀ KOVI, PEA MO TALI KI TE ʼU FEHUʼI ʼAENI:

• Kapau ʼe mole tou nonofo tokaga, ʼe feafeaʼi anai hatatou fakakaumeʼa mo he ʼu hahaʼi ʼe mole lelei?

• Kotea ʼae neʼe tokoni ki te ʼu Fakamoʼoni ʼe toko tolu ke natou fakamamaʼo mai te ʼu fakakaugā kovi?

• Kotea te ʼu pelesepeto Fakatohi-tapu ʼe feala ke tokoni atu ke kotou filifili fakalelei he ʼu kaumeʼa?