ʼE Fua Lelei Feafeaʼi Kia Koe Te ʼu Fono?

Neʼe kua ke kau koa ki he fono ʼa te kau Fakamoʼoni ʼa Sehova? Kapau heʼeki ke alu, ʼe lagi ke tuʼania ʼi tau iloʼi ʼae ko tau hoki kau ʼaia ki ai. ʼE lagi ke feuiʼaki fenei: ‘Kotea ʼae ʼe fai ʼi te ʼu fono? He koʼe ʼe maʼuhiga? He koʼe ʼe tonu ke au kau ki ai?’ Ka ke fakatahi mo ʼihi ʼe malohi anai ʼau felogoi mo te ʼAtua pea ʼe toe tokoni atu ki tou maʼuli. Pea ko te aluʼaga ka tou vakaʼi ʼi te kapite ʼaeni.

1. He koʼe ʼe fakatahitahi te kau Fakamoʼoni ʼa Sehova?

Neʼe fakaha e he tagata faitohi-tapu tona tupuʼaga tafito, ʼo ina ui fenei: “ʼI te fakatahi lahi, ʼe au fakavikiviki anai kia Sehova.” (Pesalemo 26:12) ʼO toe feia pe ia ʼaho nei, ʼe ko te agamahani ʼa te kau Fakamoʼoni ʼa Sehova ia te fakatahitahi pea ʼe natou fiafia. ʼI te malamanei katoa, ʼe natou fakatahitahi ʼi te vahaʼa fuli ʼo tauhi ki te ʼAtua, mo hiva fakavikiviki kia te ia pea mo faikole. Pea tuʼa lua peʼe tuʼa tolu ʼi te taʼu, ʼe natou fai ni fakatahi lalahi moʼo fakavikiviki kia Sehova.

2. Kotea ka ke ako ʼi te ʼu fono ʼaia?

ʼI te ʼu fono ʼa te kau Fakamoʼoni ʼa Sehova, ʼe natou akoʼi ai te Tohi-Tapu. ‘ʼE natou fakamahino lelei pea mo fakaha tona fakaʼuhiga.’ (Lau ia Neemia 8:8.) Kapau ʼe ke kau ki ai, ʼe lahi age anai te ʼu faʼahi ʼe ke ako ʼo ʼuhiga mo Sehova ʼo feia mo ʼona kalitate. Ka ke logo ki te palalau tuʼumaʼu ki tona ʼofa, pea ʼe toe lahi age anai tau fia fakaovi kia te ia. ʼE ke toe tokagaʼi ai tana fia tokoni atu ke ʼi ai he ʼuhiga ʼo tou maʼuli.—Esaia 48:17, 18.

3. ʼE fua lelei feafeaʼi kia koe tau fakatahi mo ʼihi?

ʼE kole mai e Sehova ke “tou fetokagaʼaki ke tou feugaʼaki ki te ʼofa pea mo te ʼu gaue lelei, ʼo mole tou liakī tatatou fakatahi.” (Hepeleo 10:24, 25) ʼI te ʼu fono, ʼe ke felaveʼi ai mo ni hahaʼi ʼe natou tokagaʼi moʼoni niʼihi pea ʼe natou fia iloʼi he tahi ʼu manatu ʼo ʼuhiga mo te ʼAtua, ohage pe ko koe. ʼE ke logo anai ki hanatou fakamatala ni aluʼaga neʼe natou maʼu ai ni fakalotomalohi ʼi te Tohi-Tapu. (Lau ia Loma 1:11, 12.) ʼE ke feiloʼiʼaki ai anai mo he kau selipatea peʼe ko ni taumatuʼa ʼe fiafia logo la ʼe natou tau mo ni fihifihia. Koia ʼae ʼe loto ai e Sehova ke tou fakatahi tuʼumaʼu.

TA FAKALOLOTO

4. Te ʼu fono ʼa te kau Fakamoʼoni ʼa Sehova

ʼI te ʼuluaki sekulo, neʼe fakatahitahi tuʼumaʼu te kau Kilisitiano ke natou atolasio kia Sehova. (Loma 16:3-5) Lau ia Kolose 3:16, pea fai te fehuʼi ʼaeni:

• Neʼe atolasio feafeaʼi te kau ʼuluaki Kilisitiano kia Sehova?

ʼATA VITEO: Kotea ʼAe ʼe Fai ʼi Te Fale Fono? (2:12)

• Kotea la he ʼu aluʼaga neʼe ke tokagaʼi ʼi tau sioʼi te foʼi ʼata mo tau lau te vaega ʼo Kolose 3:16 ʼe nā tatau ai?

• ʼI te ʼata viteo peʼe ʼi te pāki, ʼe ʼi ai la he faʼahi tafito neʼe malave kia koe?

Lau ia 2 Kolonito 9:7, pea fai te fehuʼi ʼaeni:

• He koʼe ʼe mole totogi te ʼu fono ʼa te kau Fakamoʼoni ʼa Sehova?

Ta vakaʼi fakatahi te aluʼaga ka vakaʼi ʼi te fono ʼo te vahaʼa ka haʼu.

• Kotea la he koga ʼo te fono ʼe ke leleiʼia peʼe ʼaoga kia koe?

Kua ke iloʼi koa?

ʼI te jw.org, ʼe ke maʼu ai te ʼu koga meʼa mo te ʼu hola ʼo te ʼu fono, ʼi te malamanei katoa.

1. ʼI ʼamatou fono, ʼe ʼi ai te ʼu akonaki, te ʼu faʼifaʼitaki mo te ʼu ʼata viteo. Pea ʼe kamata mo fakaʼosi te ʼu fono ʼaki he hiva mo te faikole

2. ʼE ʼi ai ʼihi koga ʼo te fono, ʼe feala ai ke faitali te nofoʼaki

3. ʼE fakatalitali te hahaʼi fuli: te ʼu famili, te kau selipatea, te kau matuʼa pea mo te kau tupulaga

4. ʼE mole totogi e te kau Fakamoʼoni ʼa Sehova te hu ki ʼanatou fale fono. Pea ʼe mole fai he tae falā

5. ʼE ʼaoga ni faiga malohi ki te kau ki te ʼu fono

Ta vakaʼi te faʼifaʼitaki ʼo te famili ʼo Sesu. ʼI te taʼu fuli, neʼe tonu ke natou haʼele ia kilometa ʼe 100 ʼi he koga meʼa moʼugaʼia ke natou kaku ki te Fale Lotu, ʼi Selusalemi. Lau ia Luka 2:39-42, pea fai te ʼu fehuʼi ʼaeni:

• ʼI tau manatu la, neʼe faigafua koa te faifagona ʼaia ki Selusalemi?

• Kia koe la kotea te ʼu faiga ʼe tonu ke ke fai ke ke kau ki te ʼu fono?

• Kia koe ʼe ʼi ai koa hona ʼaoga? Kotea tona tupuʼaga?

• He koʼe ʼe tonu ke tou kau tuʼumaʼu ki te ʼu fono?

MANATU TAFITO

Ka ke kau ki te ʼu fono, ʼe lahi te ʼu faʼahi ka ke ako ʼo ʼuhiga mo Sehova, ʼe ke fakamalohiʼi ai ʼau felogoi mo ia pea ʼe ke atolasio ai kia te ia ʼo fakatahi mo ʼihi.

Fehuʼi Fakamanatu

• He koʼe ʼe fakalotomalohiʼi tatou e Sehova ke tou fakatahitahi?

• Kotea ka ke ako ʼi te ʼu fono ʼa te kau Fakamoʼoni ʼa Sehova?

• Kotea te tahi ʼu fua lelei ʼe ke maʼu moka ke kau ki te ʼu fono?

TE TAHI ʼU MANATU

ʼE ke tuʼania koa ki tau kau ki he fono? Ko te aluʼaga ʼaia neʼe logoʼi e he tagata pea faifai pe ʼaia ʼo ina leleiʼia te ʼu fono.

Neʼe Natou Fakatalitali Lelei Maua (4:16)

Neʼe leleiʼia e he tagata te ʼu fono pea neʼe faiga malohi ke kau tuʼumaʼu ki ai.

Neʼe Au Leleiʼia ʼOsi Te ʼu Fono (4:33)

Te ʼu talamanatu ʼa ʼihi ʼo ʼuhiga mo te ʼu fono.

“He Koʼe ʼe Tonu Ke Au Ki Te ʼu Fono?” (Alatike ʼi te jw.org)

Neʼe fetogi te maʼuli ʼo he tahi neʼe kau ki he kutuga agakovi hili tana kau ki he fono ʼa te kau Fakamoʼoni ʼa Sehova.

“Je ne sortais jamais sans mon arme” (Ko Te Tule Leʼo (Fakafalani) ʼaho 1 ʼo Sulio 2014)

5. Neʼe fetogi te malamanei talu mai te 1914

Vakaʼi te ʼATA VITEO.

ʼATA VITEO: Neʼe Fetogi Te Malamanei Talu Mai Te 1914 (1:10)

Neʼe fakakikite e Sesu pe ʼe feafeaʼi anai te malamanei moka Hau. Lau ia Luka 21:9-11 pea fai te fehuʼi ʼaeni:

• Kotea la te ʼu aluʼaga ʼe ke sio ʼe hoko ia ʼaho nei?

Neʼe fakaha e te apositolo ko Paulo pe feafeaʼi anai te hahaʼi ʼi te ʼu ʼaho fakamuli. Lau ia 2 Timoteo 3:1-5, pea fai te fehuʼi ʼaeni:

• Kotea la kua ke tokagaʼi ia ʼaho nei ʼo ʼuhiga mo te hahaʼi?

6. Kotea ʼe tonu ke tou fai?

Lau ia Mateo 24:3, 14, pea fai te ʼu fehuʼi ʼaeni:

• Kotea te gaue maʼuhiga ʼe ha ai ʼe pule nei te Puleʼaga ʼo te Atua?

• ʼE feafeaʼi hau lagolago ki te gaue ʼaia?

Kua pule te Puleʼaga ʼo te ʼAtua pea kua ina vave puleʼi pe te kele katoa. Lau ia Hepeleo 10:24, 25 pea fai te fehuʼi ʼaeni:

• ʼE tou iloʼi kua ‘ovi mai te ʼaho ʼo Sehova,’ koia kotea ʼe tonu ke tou fai?