He Koʼe ʼe Mole Tali e Te ʼAtua Ia Te ʼu Faikole Fuli?
ʼE fagono tatatou Tamai ʼae ʼe ʼi selo, ko Sehova ki ʼatatou faikole fakamalotoloto pea ʼe fiafia ai. Kae ʼe ʼi ai ʼihi aluʼaga, ʼe mole ina tali ai ʼatatou faikole. Kotea te ʼu aluʼaga ʼaia? Pea kotea ʼae ʼe tonu ke tou manatuʼi moka tou faikole? Koʼeni he ʼu tokoni ʼe tuku mai ʼi te Tohi-Tapu.
“Ka kotou faikole, ʼaua naʼa kotou lau liuliuga ʼakotou palalau.”—Mateo 6:7.
ʼE mole loto e Sehova ke tou lau liuliuga ni faikole neʼe tou ako fakaʼatamai peʼe tou fakaʼaogaʼi he tohi faikole. Kae ʼe ina loto ko he ʼu palalau ʼe haʼu mai ʼotatou loto. Fakakaukauʼi age muʼa, ʼe palalau tuʼumaʼu atu hou kaumeʼa ki he meʼa pe ʼe tahi. ʼE mole ke piko anai ʼi tona fakalogo? Kapau ko hokita kaumeʼa, ʼe tonu ke tou palalau fakahagatonu mo fakamalotoloto ki ai. Koia, ka tou fakaʼaogaʼi ʼatatou palalau mahani moka tou faikole ki tatatou Tamai ʼae ʼe ʼi selo, ʼe ha ai ʼe hage pe kia tatou ko hotatou kaumeʼa.
“Ka kotou kole, ʼe mole kotou maʼu koteʼuhi ʼe kotou kole ʼaki he fakatuʼutuʼu kovi.”—Sakopo 4:3.
ʼE tou iloʼi, ʼe mole loto e te ʼAtua ke tou fai peʼe maʼu ʼihi meʼa. Koia ʼe mahino ia, kapau ʼe tou kole age te ʼu meʼa ʼaia, ʼe mole ina tali anai. Ohage la, kapau ʼe gaoʼi he tahi mo faikole ki te ʼAtua ke tokoni age ke maʼu hona kiʼi lasio mo hana falā, ʼe tali anai koa e Sehova ia te taʼi faikole ʼaia? Neʼe kua ina fakaha lelei mai, ke ʼaua naʼa tou manumanū mo tui ki ni meʼa ʼe mole moʼoni ohage ko te lasio. (Esaia 65:11; Luka 12:15) Koia, ʼe mole tou ʼamanaki anai ʼe tali e Sehova ia te taʼi ʼu faikole ʼaia. Kapau ʼe tou loto ke tali e te ʼAtua ʼatatou faikole, ʼe tonu ia ke alu tahi mo te meʼa ʼae ʼe ui mai ʼi te Tohi-Tapu.
“Ko ia ae e ina fulihi tona taliga ke aua naa logo ki te lao, e liliu tana faikole ko he mea fakalialia.”—Taaga Lea 28:9.
ʼI te temi muʼa, neʼe mole tali e te ʼAtua te ʼu faikole ʼa natou ʼae neʼe mole fakalogo ki ʼana lao. (Esaia 1:15, 16) Pea ko te faʼahiga sio ʼa te ʼAtua heʼeki fetogi ia. (Malakia 3:6) ʼE tonu ke tou fakalogo lelei ki ʼana lao ke feala hana tali ʼatatou faikole. Kae kapau neʼe tou fai ni meʼa ʼe kovi ʼi te temi muʼa, ʼe tonu koa ke tou manatu ʼe mole fagono mai anai ʼi he temi? Kailoa ia. ʼE tonu ke tou fakahemala ki ʼatatou aga ʼae neʼe tou fai ki muʼa atu mo faiga malohi ke tou fakafiafiaʼi ia tona loto. Kapau ʼe tou fai feia, ʼe lotofakamolemole mai anai kia tatou ʼaki he agalelei.—Gaue 3:19.