ʼE Fia ʼIloʼi e Te Kau Lautohi . . .

ʼE ʼi Ai Koa He Fakaʼosiʼaga ʼo Te Kele?

▪ Ko ʼihi neʼe natou manatu ko te fakaʼosiʼaga ʼo te kele ʼe hoko ʼi te ʼaho 21 ʼo ʼOketopeli 2011. Kae neʼe mole hoko. Koia, neʼe mole hoko moʼoni ia te lea fakakikite ʼa te tagata fai talalogo ko Harold Camping ʼi Amelika. Neʼe ina fakakikite ʼe hoko anai ia te ʼAho ʼo te Fakamāu ʼi te ʼaho 21 ʼo Maio 2011, ʼe ʼi ai anai ia he mafuike fakamataku kā hoko ki te kele kātoa, pea hili anai kiai ia māhina e nima, ʼi te ʼaho 21 ʼo ʼOketopeli, ʼe pulihi anai ia te kele.

Kae, ʼe mole feala anai ke ʼi ai he fakaʼosiʼaga ʼo te kele. Heʼe mole fakafealagia anai e te Tupuʼaga ʼo te kele ke hoko ia te faʼahi ʼaia. ʼE ʼui fēnei ʼi tana Folafola: “Nee ke fakatafito te kele, pea e tuu malohi ia.”—Pesalemo 119:90.

Ko ʼihi kau lautohi ʼo te Tohi-Tapu ʼe natou fakamoʼoni ia te ʼui ʼaē ʼe fakaʼauha anai ia te kele ʼaki ia te afi. ʼE natou fakaʼaogaʼi ia te koga tohi ʼo 2 Petelo 3:7, 10 moʼo lagolago ki te manatu ʼaia: “E taofi e te folafola aena te atu lagi mo te malamanei o te temi nei ke maumaui e te afi, i te aho o te fakamaau mo te maumaui o te kau agakovi. . . . E hau anai te aho o te toe liliu mai a te Aliki o hage ko he tagata kaihaa; i te aho aia, e puli anai te atu lagi i he gugulu lahi, pea e vela anai te u mea fuli i te lagi o osiosi, pea e toe vela anai o osiosi te kele mo te u gaueaga i ai.” ʼE ko he ʼu palalau moʼoni koa ʼaē neʼe fai e te ʼapositolo ko Petelo?

Kailoa ia. Koteā tona tupuʼaga? Koteʼuhi neʼe fakaʼaogaʼi ia te ʼu vaega moʼo fakaʼalutahi ia te ʼu meʼa ki muʼa atu ʼo te tohi ʼa Petelo pea mo te toega ʼo te Tohi-Tapu. Kanapaulā neʼe moʼoni ia te ʼu palalau ʼo te ʼu vaega ʼaia ʼe feala ai ke ʼui ʼe tutu anai ia te lagi peʼe ko te ʼatulaulau, pea mo te ʼu fetuʼu ʼe lauʼi miliale pea mo miliale pea mo ʼihi atu koga e te afi ʼuhi ʼi he kiʼi koga meʼa veliveli ʼo te kele ʼe maʼu ai ia te hahaʼi agakovi. ʼE kotou maumauʼi anai koa ia he ʼu kilometa ʼo he mataʼone ʼuhi heʼe mole kotou leleiʼia ia he fisiʼi ʼone e tahi? Kailoa, ʼe mole ko he manatu fakapotopoto! Koia ʼe mole feala anai kiā Sehova ke ina fakaʼauha kātoa ia te ʼu meʼa fuli ʼaē neʼe ina fakatupu ʼuhi ko te hā ʼo he talagataʼa ʼa he tahi ki tana ʼu gāue ʼo ʼuhiga mo tana fakatupu.

Pea tahi, ko te taʼi manatu ʼaia ʼe fakafeagai fakahagatonu ki te ʼu palalau ʼa Sesu Kilisito, ʼaē ʼe ina ʼui fēnei ai: “Manuia natou ae e agamalu, koteuhi e natou mau anai te kele!” (Mateo 5:5; Pesalemo 37:29) ʼE feala koa ki he tamai ʼofa ke ina laga ia he fale matalelei maʼa tona fāmili pea ina tutu? (Pesalemo 115:16) ʼE mole ko he manatu fakapotopoto. Ko Sehova ʼe mole ko he Tupuʼaga pē kae ʼe ko he Tamai ʼofa.—Pesalemo 103:13; 1 Soane 4:8.

Neʼe fakaʼaogaʼi e Petelo ia te kupu “kele” ʼi hona ʼaluʼaga fakatā, ʼo fakaʼuhiga ki te sōsiete fakatagata, ʼaē ko te hahaʼi agakovi. Kotou fakatokagaʼi neʼe fakatatau e Petelo ia te faʼahi ʼaia ki te Tulivio ʼo te temi ʼo Noe. (2 Petelo 3:5, 6) ʼI te ʼaluʼaga ʼaia, neʼe fakaʼauha pē ia te hahaʼi agakovi, gata pē ki te kele pea mo te tagata agatonu ko Noe pea mo tona fāmili neʼe haofaki. ʼO toe fēia aipē, neʼe toe fakaʼaogaʼi e Petelo ia te kupu “te atu lagi” ʼi hona ʼaluʼaga fakatā. Ko tona fakaʼuhiga ko “te atu lagi” ʼe ko te kau pule fakatagata. Koia, ʼe fakaʼauha anai ia te tagata agakovi ʼaē ʼe mole fia fakalogo mo te ʼu puleʼaga agakovi fuli pea fetogi ʼaki te takitaki ʼa te ʼAtua mai te lagi, peʼe e te Puleʼaga.—Taniela 2:44.

ʼE ʼi ai koa he fakaʼosiʼaga ʼo te kele? Kailoa. ʼE fakaʼuhiga ia ki te pulihi ʼo te kele fakatā, ia te hahaʼi agakovi. Kae ko te kele ʼe tuʼu anai ʼo heʼegata pea mo te hahaʼi ʼaē ʼe tui ki te ʼAtua.—Taaga Lea 2:21, 22.